Tondo so Alondo na Awafango Tene ti Royaume

Nzapa Ambô Ngule ti Lo

AZO so agbian fini ti ala ti lingbi na andia nga na akpengba-ndia ti Jéhovah awara akota deba nzoni. Atä so lekengo ambeni ye so a lingbi a gbian ayeke lakue kete ye pepe, a lingbi ti wara hio mungo maboko nga na tene ti kpengba zo. (Psaume 84:12 [84:11, NW]) Tapande so ge, so alondo na Mbongo-to ti Asie, afa ye so.

Na ngoi so lo yeke na vacances, mbeni ita-wali ti kodoro ti France asala lisoro na mveni ti ndo ti kango ye so iri ti lo ayeke Kima na ndo ye so Jéhovah aleke ti sala teti sese. Lo zia nga na Kim buku Mo lingbi ti douti la koue la koue na paradis na ndo sesse. Na bango yâ ti buku ni, Kim aba bungbi ti atene, “fade lo mbô ngule kue na lê ti ala.” (Apocalypse 21:4, NW) Kim adabe lo: “Biani versê so andu bê ti mbi. Na bango mbi na ngia na yanga nga na salango tene na azo na yâ lango ni kue na ndo ti kango ye, zo wa alingbi ti hinga so gi na ngoi so mbi kiri na kodoro na lakui, mbi toto juska mbi lango?” Na fango ye so amu vundu na lo, lo tene: “Mbi duti la ni na mbeni koli teti angu 18 na mbi yeke la ni na ngia oko pepe teti so lo ke ti sala mariage na mbi. Mbi ye la ni ti hunzi mara ti dutingo na fini tongaso, me teti so mbi duti na lo teti angu mingi, mbi wara ngangu pepe ti sala ni.”

Ngoi kete na pekoni, Kim ayeda ti manda Bible na mbeni Témoin ti Jéhovah so iri ti lo ayeke Linh. Kim atene: “Mbi yeke la ni na kota nzala ti sala ye alingbi na fango ye ti Bible. Na tapande, mbi zia ti voro akotara ti mbi, atä so a sala la ni si sewa ti mbi akanga lege na mbi. Na ndo ni, mbi tara ti sala si dutingo ti e alingbi na ndia, me ndeko ti mbi ake ti sala ni. Na ngoi ti ngangu so, ita-wali so ayeke na France angbâ lakue ti tokua na mbi ambeti so aluti na ndo ti Bible, na Linh amu ngangu na mbi mingi. Be-nze-pepe nga mungo maboko na lege ti ndoye ti aita-wali so amu maboko na mbi ti gbu ngangu juska mbi lingbi ba tâ salango ye ti koli ti mbi. Mbi ga ti hinga so lo yeke la ni awe na ‘awali’ 5 nga na amolenge 25! Ye so amu ngangu na mbi ti zia lo.

“Ti zia mbeni kota pendere da na ti lango na yâ mbeni kete da ayeke kete ye pepe. Nga, ngbele koli ti mbi asala ngangu na mbi ti tene mbi kiri mbi duti na lo, lo tene même so lo yeke buba lê ti mbi na acide tongana mbi ke. Na ngangu ti Jéhovah, mbi wara lege ti sala ye so ayeke mbilimbili.” Kim angbâ ti gue na li ni nga na nda ni lo wara batême na avril ngu 1998. Na ndo ni, ambeni ita ti lo ti wali use nga na kete molenge ti lo ti koli ato nda ti manda Bible na aTémoin ti Jéhovah.

Kim atene: “Mbi bi bê ti mbi ka la ni so fini ti mbi ayeke na beku oko pepe. Ye oko, laso mbi yeke na ngia, na mbi toto mbeni pepe na bï. Jéhovah ambô awe ngule na lê ti mbi.”

[Kete Tene na Gbe Ni]