Lege so Mo Lingbi ti Mu Anzoni Desizion

NGANGU ti soro ye so bê ti zo mveni aye ayeke mbeni matabisi so alondo na Nzapa. Tongana a yeke dä pepe, e yeke duti tongana amasini so ayeke na ngangu pepe na ndo aye so e sala. Ye oko, tongana a yeke dä, e yeke luti na gbele akpale. Na dutingo na ngangu ti soro ye so bê ti zo mveni aye, a yeke ngbanga ti e ti mu adesizion tongana angu ti fini ti e ayeke hon.

Biani, adesizion mingi ayeke gi asenge ye. Ambeni tongana kusala wa ti soro wala ti sala mariage wala pepe, alingbi ti sala ye na ndo kekereke ti e kue. Me ambeni asala ye na ndo ti ambeni zo. Ambeni desizion so ababâ na mama amu asala ye mingi na ndo ti amolenge ti ala. Nga, e yeke na tene ti kiri na Nzapa teti adesizion mingi so e mu.​—aRomain 14:12.

A Lingbi A Wara Mungo Maboko

Tongana a ndu tene ti mungo desizion, mingi ni azo asala ye nzoni pepe. Mbeni oko ti akozo desizion so azo amu so a sû na mbeti aga na ye ti sioni mingi. Ève amu desizion ti te lê ti keke so Nzapa agbanzi polele. Ye so lo soro, so aluti na ndo ti bibe ti kion, asala si koli ti lo abungbi na lo ti ke yanga ti Nzapa, na ye ti pekoni ayeke pasi mingi teti azo kue. Na yâ atapande mingi, azo angbâ ti mu adesizion ti ala ndali ti anzala ti kion ahon ti akpengba-ndia so ayeke mbilimbili. (Genèse 3:6-19; Jérémie 17:9) Na tongana e yeke na gbele akpengba desizion, mingi ni e hinga akatikati ti e.

Tongaso, a yeke pepe ye ti dongo bê so tongana azo aye ti mu akota desizion, mingi ti ala ayeke gi mungo maboko na lege ti aye so ahon ngangu ti azo. Bible afa peko ti mbeni ye so asi tongana Neboukadnetsar, na ngoi ti guengo na bira, ayeke la ni na mbeni desizion ti mu. Atä so lo yeke la ni gbia, lo ba so lo yeke na bezoin ti “gi bendo,” ti hunda ye na ayingo sioni. Tongaso, tondo ni atene: “Lo yengi kondoro, lo hunda ye na ayanda ti da, lo ba na yâ bê.” (Ezéchiel 21:26 [21:21, NW]) Legeoko nga laso, azo mingi ahunda ye na azo so afa nda ti yanga ti atoro, na awagingo nda ti atongoro nga na ambeni lege nde nde ala gi mungo maboko ti ayingo. Ye oko aye so ayeke handa zo.​—Lévitique 19:31.

Mbeni Zo ayeke dä so a lingbi ti zia bê kue na lo na so na yâ mbaï kue amu maboko na azo ti mu adesizion so ayeke na lege ti ndara. Zo so ayeke gi Jéhovah Nzapa. Na tapande, giriri, Nzapa amu na mara ti lo, Israël, Ourim na Thoummim, peut-être aye ti nzoni-kue so ala bi tongana mara ni ayeke na gbele kota desizion ti mu. Na lege ti Ourim na Thoummim, Jéhovah akiri tene polele na ahundango tene ti ala na lo mu maboko na a-ancien ti Israël ti bata si adesizion ti ala ague oko na ye so bê ti lo aye.​—Exode 28:30; Lévitique 8:8; Nombre 27:21.

Ba mbeni tapande nde. Tongana a hiri Guidéôn ti duti na li ni ti aturugu ti Israël ti tiri bira na Madiân, a lingbi lo mu desizion wala ti yeda wala pepe na mara ti kota matabisi so. Teti so lo ye ti hinga nzoni so Jéhovah ayeke mu maboko na lo, Guidéôn ahunda ti ba mbeni fä ti kpene. Lo sambela ti tene mamio aduti gi na ndo ti kuä ti tele ti ngasangbaga so lo zia na gigi na bï ni kue me sese kue so angoro ni angbâ na hulengo ni. Na bï ti pekoni, lo hunda ti tene kuä ti tele ti ngasangbaga ni angbâ kuru ni na ngoi so mamio ni aga mingi na ndo sese so angoro ni. Na nzobe Jéhovah asala afä so Guidéôn ahunda. Tongana ye ti pekoni, Guidéôn amu nzoni desizion, nga na mungo maboko ti Nzapa, lo hon awato ti Israël na ngangu kue.​—aJuge 6:33-40; 7:21, 22.

Ti Laso A Yeke Tongana Nyen?

Laso, Jéhovah angbâ lakue ti duti ndulu ti mu maboko na awakua ti lo tongana ala yeke na gbele akota desizion. Tongana nyen? Tongana Guidéôn, a lingbi e hunda afä na Jéhovah na lege ti ‘kuä ti tele ti ngasangbaga,’ ti fa na e nzoni desizion ti mu ni? Mbeni koli na wali ti lo ahunda tele ti ala wala a lingbi ala gue na mbeni ndo so a hunda ti wara awafango tene ti Royaume dä mingi. Ti mu maboko na ala ti mu desizion, ala leke mbeni tara. Ala zia da ti ala na kango ni na mbeni ngele. Tongana, na yâ ti mbeni lango so ala diko, ala kä da ni na ngele so ala zia wala so ahon ni, ala yeke mu ni tongana mbeni fä so Nzapa aye ti tene ala gue. Me tongana a vo da ni pepe, ala yeke ba so Nzapa aye pepe ti tene ala gue.

A vo da ni pepe. A yeke mbeni fä so Jéhovah aye la ni pepe ti tene koli na wali so asala kua na ndo so a hunda ti wara awafango tene dä mingi? Tâ tene, a yeke pikango kate ti tara ti fa biani ye so Jéhovah asala wala ye so lo sala pepe teti awakua ti lo. E lingbi ti tene pepe so laso Jéhovah ayeke sala ye oko pepe ti fa ye so lo ye ti sala teti e. (Esaïe 59:1) Ye oko, e yeke na droit pepe ti ku mara ti fä tongaso na yâ akota desizion ti e, biani ti zia si Nzapa amu desizion na place ti e. Ni la, même a lingbi Guidéôn fani mingi na yâ fini ti lo amu adesizion san ti tene Jéhovah asala aye ti kpene!

Ye oko, Bible atene so a lingbi ti wara fango lege ti Nzapa. Na ndo ngoi ti e, lo tene giriri: “Tongana i gue na koti, wala na gati, fade mê ti i amä yanga na peko ti i, so atene, So ayeke lege ni, i tambela dä.” (Esaïe 30:21) Tongana e yeke na gbele akota ye ti soro, a yeke mbilimbili na lege ni ti gi ti hinga nzoni so adesizion ti e ague oko na ye so bê ti Nzapa aye na afa na gigi kota ndara ti lo. Tongana nyen? Na gingo nda ti Tene ti lo nga na ziango lege na ni ti ga ‘lampe teti gere ti e, na lumière teti lege ti e.’ (Psaume 119:105, NW; aProverbe 2:1-6) Ti sala ni, a lingbi e lë kode ti wara lakue tâ hingango ye ti Bible. (aColossien 1:9, 10) Na tongana e yeke na gbele mbeni desizion, a lingbi e gi nzoni akpengba-ndia kue ti Bible so andu tene ni. Mara ti gingo ye tongaso ayeke mu ande lege na e ti “hinga nzoni aye so ayeke kota ahon.”​—aPhilippien 1:9, 10, NW.

A lingbi e sala nga tene na Jéhovah na yâ sambela, na hingango na bê kue so lo yeke mä ande e. Ba tongana nyen a yeke ye ti dengo bê ti fa na Nzapa ti e ti ndoye desizion so a lingbi e mu na aye so e gi ti soro na popo ni! Na pekoni, na bê kue e lingbi ti hunda ti tene lo fa lege na e na yâ mungo nzoni desizion. Fani mingi, yingo ti nzoni-kue ayeke dabe e ande na akpengba-ndia ti Bible so ague oko na ni, wala a lingbi ti mu maboko na e ti gbu nzoni mingi ahon nda ti mbeni versê so asala tene na ndo ye so asi na e.​—Jacques 1:5, 6.

Jéhovah amu nga abiazo na yâ kongregation so e lingbi ti sala lisoro na ala na ndo ti adesizion ti e. (aEphésien 4:11, 12) Ye oko, na bango ambeni zo, a lingbi e sala ye pepe legeoko tongana ala so aba ambeni zo na peko ti tele juska na nda ni ala wara mbeni oko so atene ye so ala ye ti mä. Na pekoni ala sala ye alingbi na wango ti lo. A lingbi e dabe e nga na tapande ti gbotongo mê ti Rehabam. Tongana lo luti na gbele mbeni kpengba desizion, ambakoro koli so asala kua legeoko na babâ ti lo amu na lo pendere wango. Ye oko, ahon ti sala ye alingbi na wango ti ala, lo ba apendere so akono legeoko na lo. Na mungo peko ti wango ti ala, lo mu mbeni desizion ti sioni mingi, na a sala si lo glisa mbeni kota mbage ti royaume ti lo.​—1 aGbia 12:1-17.

Tongana mo yeke gi wango, gi ni na mbage ti ala so ahinga ye na yâ fini na so ayeke na nzoni hingango ye ti Mbeti ti Nzapa nga so ayekia mingi akpengba-ndia so ayeke mbilimbili. (aProverbe 1:5; 11:14; 13:20) Tongana lege ayeke dä, mu ngoi ti gbu li na ndo ti akpengba-ndia so andu desizion ni nga na ndo sango kue so mo wara. Na ngoi so mo ga ti ba aye na lege ti Tene ti Jéhovah, nzoni desizion ni ayeke ga polele na lê ti mo.​—aPhilippien 4:6, 7.

Adesizion so E Mu

Ambeni desizion ayeke ngangu pepe ti mu ni. Tongana a hunda na ala ti zia ti fa tene, abazengele ahinga la ni so a lingbi ala ngbâ ti fa tene na ndo Jésus, tongaso fade fade ala fa na Sanhédrin desizion ti ala ti mä yanga ti Nzapa ahon ti zo. (Kusala 5:28, 29) Ambeni desizion alingbi ti hunda gbungo li mingi teti so Bible afa tene polele na ndo ni pepe. Ye oko, mingi ni akpengba-ndia ti Bible ayeke za lumière na ndo nzoni desizion ti mu. Na tapande, atä so ambage mingi ti salango ngia ti laso ayeke la ni pepe na ngoi ti Jésus, atene ti Bible ayeke dä so ayeke polele na ndo ye so anzere na Jéhovah na ye so anzere na lo pepe. Tongaso, Chrétien kue so abi tele ti lo na yâ mbeni ngia so amaï salango ngangu, ye ti pitan, wala kengo yanga amu mbeni sioni desizion.​—Psaume 97:10; Jean 3:19-21; aGalate 5:19-23; aEphésien 5:3-5.

Ngoi na ngoi, adesizion use kue alingbi ti duti na lege ni. Ti sala kusala na ndo so a hunda ti wara awafango tene dä mingi ayeke mbeni pendere matabisi na alingbi ti ga na akota deba nzoni. Me tongana mbeni zo ndali ti mbeni nda ti tene amu desizion ti sala ni pepe, lo lingbi ti ngbâ ti sala nzo kusala na yâ kongregation so lo yeke dä. Ngoi na ngoi, e lingbi ti luti na gbele mbeni desizion so ayeke mu lege na e ti fa na gigi kota ti mungo tele ti e na Jéhovah wala ye so e ba na nene ni mingi na yâ fini ti e. Tongaso, Jéhovah amu lege na e ti sala kusala na ngangu ti e ti soro ye so bê ti e mveni aye ti fa tâ ye so ayeke na yâ bê ti e.

Mingi ni, adesizion ti e asala ye na ndo ti ambeni zo. Na tapande, aChrétien ti kozo siècle ayeke la ni na ngia ti duti mbeni pepe na gbe ti aye mingi so Ndia agbanzi. Ye so aye ti tene, na tapande, so ala lingbi ti yeda wala ti ke kobe so ayeke la ni sioni na gbe ti Ndia. Ye oko, a wa ala ti ba yingo-ti-hinga ti azo tongana ala mu desizion ti sala ye alingbi wala pepe na ngangu so ti soro ye so bê ti zo mveni aye. Atene ti Paul na ndo tene so alingbi ti ndu adesizion mingi so e mu: ‘I sala ye oko pepe so asala si azo atï.’ (1 aCorinthien 10:32) Nzala ti tene ambeni zo atï pepe alingbi ti mu maboko na e ti ba yâ ti adesizion mingi so e yeke mu. Na peko ti ye kue, ndoye ti azo so ayeke ndulu na e ayeke use komandema ti kota ahon.​—Matthieu 22:36, 39.

Ye so Aga na Peko ti Adesizion ti E

Adesizion so a mu, so a ba tene ni mbilimbili kozoni na so aluti na ndo ti akpengba-ndia ti Bible, ayeke ga lakue na anzoni ye na nda ni. Biani, na yâ kozo ngoi, ala lingbi ti hunda ti tene zo agbanzi ye na tele ti lo. Tongana abazengele atene na Sanhédrin desizion ti ala ti ngbâ ti fa tene na ndo Jésus, azo ti Sanhédrin apika ala na zaza kozoni si a zi ala. (Kusala 5:40) Tongana aHébreu ota, Shadrak, Méshak, na Abed-Négo, amu desizion so ala yeke kuku pepe na gbele yanda so Neboukadnetsar asala na lor, ala zia fini ti ala ne lê ti kuâ. Ala leke la ni tele ti ala ti luti na gbele kuâ so desizion ti ala alingbi ti ga na ni na ala. Me ala hinga so Nzapa ayeke yeda na ayeke hiri deba nzoni na ndo ala.​—Daniel 3:16-19.

Tongana e wara akpale na pekoni so e mu mbeni desizion na lege ti hingango nda ti ye nzoni, ye so aye ti tene pepe so desizion ni ayeke la ni na lege ni pepe. “Ngoi na ye so zo aku pepe” alingbi ti sala sioni même na peko ti adesizion so a mu na bê kue. (Zo-ti-fa-tene 9:11, NW) Nga, ngoi na ngoi Jéhovah amu lege na ye ti ngangu ti tara ndo so mungo yanga ti e asi dä. A lingbi Jacob atiri la ni ngangu na bï kue na mbeni ange kozoni ti wara deba nzoni. (Genèse 32:24-26) E nga e lingbi ti tiri ngangu na ye ti ngangu, même tongana e yeke sala ye so ayeke mbilimbili. Ye oko, tongana adesizion ti e ague oko na ye so bê ti Nzapa aye, e lingbi ti hinga na bê ti e biani so lo yeke mu ande maboko na e ti gbu ngangu, na so na nda ni lo yeke hiri deba nzoni na ndo ti e.​—2 aCorinthien 4:7.

Tongaso, tongana mo ye ti mu mbeni kota desizion, zia bê ti mo gi na ndo ti ndara ti mo mveni pepe. Gi akpengba-ndia ti Bible so andu tene ni. Sala tene na Jéhovah na ndo ni. Na ndo so lege ayeke dä, ba afon mo Chrétien biazo. Na pekoni duti na kpengba-be. Sala ye na ngangu so Nzapa amu ti soro ye so bê ti mo mveni aye na lege ni. Mu nzoni desizion na fa na gigi na Jéhovah so bê ti mo ayeke mbilimbili na gbele lo.

[Foto na lembeti 28]

Gi nda ti Tene ti Nzapa kozoni ti mu akota desizion

[Afoto na lembeti 28, 29]

Sala tene na Jéhovah na ndo adesizion so a lingbi mo mu

[Foto na lembeti 30]

Mo lingbi ti sala lisoro na ndo ti akota desizion ti mo na aChrétien biazo