Luti Tongana Zo so Alingbi Kue, na Hingango Ye Biani na Bê

Akota Bungbi: Afä so Ayeda na Ngia na Songo ti E ti Aita

NA NGOI so lo yeke na ngu bale oku, atä so lo de ti wara nzoni seni kue pepe na peko ti kanga ti ndulu na ngu oko so lo sala teti mbeni fango ngbanga ti wataka, Joseph F. Rutherford asala kusala na ngia tongana mbeni wakua ti hôtel so kusala ti lo ayeke ti yö akungba ti a-client ti gue na ni na kubu ti ala. Lo yö na ngangu ti lo kue a-valise, na lo mu maboko na afon lo Chrétien ti gue ti wara kubu ti ala na yâ hôtel ni. Use na popo ti angbele fon lo ti kanga, afon lo Wamandango Bible, ayeke kangbi ambeti so afa ndo ti akubu ti ala na azo mingi mingi so ayeke ku ti wara ando ti lango. Akusala ni atambela juska bebi ahon. Mbeni bibe ti nzerengo tele so apusu ambeni zo ti sala tongaso nga asi na ala kue. Ye so asi na ngoi wa?

A yeke ngu 1919, na aWamandango Bible (so laso a hinga ala tongana aTémoin ti Jéhovah) akiri na kusala na peko ti mbeni ngoi ti sioni salango ngangu. Ti kiri ti mu ngangu na songo ti ala ti aita, ala sala mbeni kota bungbi na Cédar Point, Ohio, na États-Unis, ti londo na lango oko ti si na lango miombe ti nze ti septembre ngu 1919. Na ndangba lango ti kota bungbi ni, mbeni bungbi ti azo mingi so asi na ngia na so wungo ti ala ayeke 7 000 adengi mê ngangu tongana Ita Rutherford ayeke wa zo oko oko so aga na kota bungbi so na atene so: “I yeke alembe ti Gbia ti agbia na Seigneur ti aseigneur, na fango na azo tene ti . . . royaume ti gloire ti Seigneur ti e.”

Na popo ti azo ti Jéhovah, akota bungbi aba gigi ngbele ye na ngoi ti Israël ti giriri. (Exode 23:14-17; Luc 2:41-43) Amara ti bungbi tongaso ayeke la ni angoi ti kota ngia, a mu maboko na azo kue so aga ti zia bê ti ala biani na ndo Tene ti Nzapa. Legeoko nga, akota bungbi ti aTémoin ti Jéhovah ti ngoi ti laso aluti mbilimbili na ndo ti aye ti yingo. Ti ala so ayeke bi bê na ndo ni na tâ bê kue, mara ti abungbi ti kota ngia tongaso afa na kite pepe so aTémoin abungbi oko na lege ti akamba ti songo ti Chrétien so akpengba.

Angangu so Ambeni Zo Asala ti Ga na Akota Bungbi

A-Chrétien ti ngoi ti laso aba so akota bungbi ti ala ayeke angoi ti dengo bê na lege ti yingo nga na wango-tene na yâ Tene ti Nzapa. Ala ba akota bungbi so tongana mbeni kpengba lege so amu maboko na ala ti ‘luti tongana azo so alingbi kue, na hingango na bê ti ala biani ye kue so Nzapa aye.’ (aColossien 4:12) Ni la, aTémoin ayeke mu mbage ti ala na bê kue na akota bungbi so, na salango akota ngangu ti duti dä na ngoi ni.

Ti ambeni zo, gi gango ti ala na mara ti akota bungbi tongaso ahunda ti fa mabe na gigi na ti hon ndo ti ambeni ye ti kangango lege so ayeke tongana ahoto. Na tapande, bi bê na mbeni Témoin mbakoro ti Autriche. Atä so lo yeke na kobela ti diabète na lo yeke na bezoin ti tene a kpo lo lâ na lâ na yorö ti insuline, lo sala kue ti ga na alango ti kota bungbi ti district ni kue so atambela na kodoro ti lo. Na Inde, mbeni kota sewa ti aTémoin so ayeke na yâ ti kota nzinga aba so a yeke duti ngangu mingi ti gue na mbeni kota bungbi. Mbeni oko ti sewa ni amu maboko na ala. Lo tene: “Teti mbi ye pepe ti manke bungbi ni, mbi kä aye ti mê ti mbi ti lor ti futa nginza ti lege ni. A lingbi na sadaka so mbi sala, teti bungbingo na aita nga na aye so asi na e akpengba mabe ti e.”

Na Papouasie-Nouvelle-Guinée, mbeni bungbi ti azo so asala nzala ti tene ni, na so ade ti wara batême pepe, aleke na bê ti ala ti gue na mbeni kota bungbi ti district na li-kodoro ni. Ala ga ndulu na mbeni koli so alango na kete kodoro ti ala ni, na so ayeke na mbeni kota kutukutu ti yongo azo; ala hunda na lo nginza oke lo yeke hunda ti gue na ala na kota bungbi ni. Teti nginza so lo hunda ahon mingi nginza so ala yeke na ni, ala leke ti sala kusala na da ti koli ni, na lekengo ndo ti tongo kobe ti lo si a ga nzoni. Tongaso, ala wara lege ti gue na kota bungbi ti district so, na ti wara ye ti nzoni na dutingo dä na ngoi ti programme ni kue.

Yongo ti lege ni ayeke pepe mbeni kota kpale teti aTémoin ti Jéhovah so aleke na bê awe ti gue na akota bungbi. Na ngu 1978, ti gue na mbeni kota bungbi na Lille, na France, mbeni pendere so alondo na Pologne atambela akilomètre 1 200 na vélo teti alango omene. Na ngoi ti été ti ngu 1997, aTémoin use ti Mongolie atambela akilomètre 1 200 ti ga na mbeni bungbi ti aChrétien na Irkutsk, na Russie.

Tâ Songo ti Aita Ayeke Sala Kusala

Salango beoko na songo ti aita so aTémoin ayeke fa na gigi na ngoi ti akota bungbi ti ala asigigi polele na lê ti ala so agi pepe ti ba ye na sioni bê. Bê ti azo mingi adö ti ba so a yeke sala nzoni na azo kue so aga na kota bungbi so, na tâ songo ti wâ ayeke même na popo ti ala so ayeke peut-être ti fani kozo ti ala ti tene ala tingbi tele.

Na ngoi ti mbeni assemblée internationale so atambela na Australie ade ti ninga pepe, mbeni guide so ayeke tambela teti yenga oko na tele ti azo so alondo na kodoro-wande ti ga na kota bungbi ni aye ti ngbâ ti duti na ala kete teti a nzere na lo mingi. Ndoye na salango beoko ti ala apika bê ti lo, na lo lingbi pepe ti mä na bê so ala yeke mä tele nzoni tongaso, teti mingi ti ala ayeke awande. Tongana ngoi asi teti lo ti zia ala ti gue, lo sala tene na kota go ti gboto lê ti ala. Na salango tene na ala tongana “aita ti koli na ti wali,” lo to nda ti kiri singila na ala, me lo lingbi pepe ti hunzi tene ti lo, teti so mawa asala lo na ngu ti lê ti lo asigigi.

Na ngu 1997, Sri Lanka asala kozo kota bungbi ti lo ti district na ayanga ti kodoro ota na yâ mbeni kota lando. Programme ni kue atambela gi legeoko na Anglais, na Cinghalais nga na Tamoul. Na yâ ti mbeni sese so kpale ti ngonzo angbâ ti gue na li ni na popo ti azo ti kete mara, mara ti bungbingo tongaso ti azo ti ayanga ota ahon senge pepe na lê ti azo. Mbeni zo ti polisi ahunda na mbeni ita-koli: “Azo wa la si ayeke mu li ni na kota bungbi so: ala so atene Cinghalais, so atene Tamoul wala so atene Anglais?” Ita ni akiri tene: “Mbeni oko pepe ti abungbi so ayeke mu li ni. E yeke sala ye so kue legeoko.” Koli ti polisi ni adë kite. Tongana abungbi ti azo ti ayanga ota so abungbi oko teti sambela ti nda ni, na si tenengo legeoko “Amen” atoto ngangu na yâ lando ni, azo ti kota bungbi ni kue asungba na pikango maboko so alondo na bê. A yeke lâ ni ngangu ti wara mbeni zo so ngu ti lê aga pepe na lê ti lo. Biani, akota bungbi ayeke afä so ayeda na ngia na songo ti e ti aita.​—Psaume 133:1.a

[Kete Tene na Gbe Ni]