Atene so Azo Ahunda

“Hungo tele” so a sala tene ni na aHébreu 4:9-11 ayeke nyen? Na tongana nyen mbeni zo ayeke “lï na yâ hungo tele so”?

Bazengele Paul asû mbeti so na aChrétien Hébreu ti kozo siècle: “Mbeni hungo tele ti sabbat angbâ teti azo ti Nzapa. Teti zo so alï na yâ hungo tele ti Nzapa, ahu tele nga teti akusala ti lo, tongana so Nzapa ahu tele teti akusala ti lo mveni. Tongaso, zia e sala ngangu kue ti lï na yâ hungo tele so.”​—aHébreu 4:9-11, NW.

Tongana Paul asala tene ti hungo tele ti Nzapa teti akusala ti Lo, a lingbi ti ba so lo sala tene ti Genèse 2:2 (NW); na ndo so e diko: “Teti lâ mbasambala ni Nzapa ahunzi kusala ti lo so lo sala awe, na lo to nda ti hu tele na lâ mbasambala ni teti akusala kue so lo sala awe.” Ngbanga ti nyen Jéhovah ato nda “ti hu tele na lâ mbasambala ni”? Biani, a yeke pepe ngbanga ti so lo ye ti kiri ti wara ngangu mbeni na peko ti “akusala kue so lo sala awe.” Versê so aga na pekoni amu maboko ti gbu nda ni: “Nzapa ato nda ti hiri deba nzoni na ndo lâ mbasambala ni na lo sala si a ga nzoni-kue, teti na lâ ni so lo hu tele teti akusala ti lo kue so Nzapa acréé na bibe ti sala ye.”​—Genèse 2:3, NW; Esaïe 40:26, 28.

“Lâ mbasambala” ni ayeke nde mingi na tanga ti alango omene so ahon kozoni awe, na lege so a yeke mbeni lâ so Nzapa ahiri deba nzoni na ndo ni, na asala si a ga nzoni-kue, so ti tene, a yeke mbeni lâ so lo zia nde, wala lo leke ni, teti mbeni kusala so ayeke nde. Kusala ni ayeke nyen? Kozoni na ye so, Nzapa afa kusala so lo leke ti sala na mbage ti azo na sese. Nzapa atene na kozo koli nga na kozo wali: “I dü amolenge mingi, i wu, i si singo na sese, i sala si ye kue aga na gbe gere ti i; i komande asusu ti kota ngu ti ingo, andeke ti nduzu, na ye ti fini kue so atambela na ndo sese.” (Genèse 1:28) Atä so Nzapa amu na azo nga na sese mbeni tongo nda ni so ayeke mbilimbili-kue, a yeke hunda ngoi ande ti tene azo azia sese na gbe ti komandema ti ala na ti sala si a ga mbeni paradis so asi singo na mbeni sewa ti azo so ayeke mbilimbili-kue, tongana ti so Nzapa aleke na bê ti lo ti sala. Tongaso, na “lâ mbasambala” ni, Nzapa ahu tele ti lo, wala lo zia lege ti sala kusala ti lekengo aye na sese ti tene ye so lo leke awe amaï alingbi na ye so bê ti lo aye. Na nda ti “lâ” ni so, ye kue so Nzapa aleke na bê ti lo ayeke ga ande tâ tene. Fade hungo tele so ayeke ninga teti angoi oke?

Tongana e kiri e ba tene ti Paul na aHébreu, e ba so lo tene “mbeni hungo tele ti sabbat angbâ teti azo ti Nzapa,” na lo wa afon lo Chrétien ti sala ngangu kue “ti lï na yâ hungo tele so.” Tene ni afa so na ngoi so Paul asû atene so, “lâ mbasambala” ti hungo tele ti Nzapa, so ato nda ni angu ndulu na 4 000 kozoni, angbâ lakue ti gue. A yeke hunzi ande pepe juska na ngoi so ye so Nzapa aleke ti sala na mbage ti azo nga na mbage ti sese aga tâ tene kue na nda ti Komandema ti Ngu Saki Oko ti Jésus Christ, so ayeke “Seigneur ti lâ ti Sabbat.”​—Matthieu 12:8; Apocalypse 20:1-6; 21:1-4.

Na bingo bê na ndo pendere beku so ayeke ga ande, Paul afa tongana nyen mbeni zo alingbi ti lï na yâ hungo tele ti Nzapa. Lo sû na mbeti: “Zo so alï na yâ hungo tele ti Nzapa, ahu tele nga teti akusala ti lo.” So afa na e so atä tongo nda ni ti mbilimbili-kue so ala wara, azo tongana mbeni bungbi, alï pepe na yâ hungo tele ti Nzapa. A yeke ndali ti so Adam na Ève angbâ lakue pepe ti sala ye alingbi na hungo tele ti Nzapa na ndo “lâ mbasambala” ni, na yengo dä na ye so Lo leke teti ala. Nde na so, ala ke yanga ti lo na ala ye ti duti nde na Nzapa ti sala ye ti bê ti ala. Ti ba biani, ala yeda na ye so Satan aleke na mayele ahon ti yeda na fango lege so Nzapa amu na ndoye. (Genèse 2:15-17) Ye ti pekoni ayeke so ala glisa beku ti dutingo na fini teti lakue lakue na ndo mbeni paradis na sese. Ti londo na ngoi ni so, azo kue aga ngba ti siokpari na ti kui.​—aRomain 5:12, 14.

Kengo yanga ti azo akanga lege pepe na ye so Nzapa aleke ti sala. Lâ ti hungo tele ti lo angbâ lakue ti gue. Ye oko, Jéhovah aleke mbeni ye na ndoye, so ayeke sadaka ti kota ngele, na lege ti Molenge ti lo, Jésus Christ, si zo kue so ayeda na ni na mabe alingbi ti ku si a zi lo na lo hu tele na gbele nengo ti siokpari na ti kui. (aRomain 6:23) Nda ni la si Paul awa afon lo Chrétien ti ‘hu tele teti akusala ti ala.’ A lingbi ala yeda na aye so Nzapa aleke teti salut, na ti tara pepe ti leke kekereke ti ala na lege ti ngangu ti ala mveni, tongana ti so Adam na Ève asala giriri. A lingbi nga ala zia ti tomba peko ti akusala ti ala mveni na gingo ti fa so ye so ala sala ayeke na lege ni.

A yeke ye ti dengo bê na ti hungo tele teti mbeni zo ti ke tombango peko ti aye ti kion wala aye ti sese so ti tene lo sala ye so bê ti Nzapa aye. Jésus amu tisango ndo so: “I ga na mbi, i kue so i sala kusala na vundu na i yeke na kungba so ane, na fade mbi mu na i lege ti hu tele. I kamata joug ti mbi na ndo ti i na i manda tene ti mbi, teti mbi yeke sala ye na ngangu pepe na mbi yeke na bê ti molenge, na fade i wara lege ti hu âme ti i. Teti joug ti mbi ayeke ngangu pepe na kungba ti mbi ane pepe.”​—Matthieu 11:28-30, NW.

Lisoro ti Paul na ndo tene ti hungo tele ti Nzapa nga na ndo lege so mbeni zo alingbi ti lï na yâ ni ayeke biani mbeni lingu ti kpengbango zo giriri teti aChrétien Hébreu na Jérusalem, so ahu pono na gbe ti asalango ngangu mingi nga na hengo ndo teti mabe ti ala. (Kusala 8:1; 12:1-5) Legeoko nga, atene ti Paul alingbi ti duti lingu ti kpengbango zo teti aChrétien laso. Na hingango so zendo ti Nzapa ti ga na mbeni paradis na ndo sese na gbe ti Royaume ti mbilimbili ti lo ayeke ndulu ti ga tâ tene, e nga kue a lingbi e hu tele ti e teti akusala ti e mveni na e sala ngangu kue ti lï na yâ hungo tele so.​—Matthieu 6:10, 33; 2 Pierre 3:13.

[Foto na lembeti 31]

Zendo ti Nzapa ti mbeni paradis na ndo sese ayeke ga ande tâ tene na hunzingo ti lâ ti hungo tele ti lo