Na Lege Wa Jésus Asö Azo?

“Jésus asö Azo!” “Jésus ayeke Sauveur ti e!” Na yâ ti akodoro mingi na ndo sese kue, a zia atene tongaso na ndo ti a-mur ti ada nga na ambeni ndo nde so azo mingi ague dä. Azo kutu mingi amä na bê biani so Jésus ayeke Sauveur ti ala. Tongana mo hunda na ala, “Na lege wa Jésus asö e?” ala yeke kiri peut-être tene, “Jésus akui teti e” wala, “Jésus akui teti asiokpari ti e.” Tâ tene, kui ti Jésus amu lege na e ti wara salut. Me tongana nyen kuâ ti zo oko alingbi ti lungula asiokpari ti azo mingi mingi? Tongana a hunda na mo, “Tongana nyen kuâ ti Jésus asö e?” mo yeke tene nyen?

KIRINGO TENE so Bible amu na ndo tene so akpengba oko pepe me a yeke polele nga a yeke na nda ni. Ye oko, ti gbu nda ti nene ni, a lingbi e ba kozoni kue fini na kui ti Jésus tongana lege ti leke na mbeni tâ kota kpale. Gi na pekoni si e lingbi biani ti gbu nda ti kota ti ngele ti kui ti Jésus.

Na salango si Jésus amu fini ti lo, Nzapa ayeke leke mbeni tene so aba gigi na ngoi so Adam asala siokpari. Biani siokpari so aga na kota kpale! Kozo koli na wali ti lo, Ève, ayeke la ni mbilimbili-kue. Pendere yaka ti Éden ayeke la ni ndo ti duti ti ala. Nzapa amu na ala pendere kusala ti bata yaka so ayeke ndo ti duti ti ala. A mu na ala kungba ti bata na ndoye tanga ti acréature kue so ayeke na fini na ndo sese. Na tongana azo adü na asi singo na ndo sese, a lingbi ala kono yâ ti paradis ni juska a si na nda ti sese kue. (Genèse 1:28) So tâ pendere kua so amu ngia na bê si ala wara! Nga, ala yeke na pendere songo ti ndoye na popo ti ala. (Genèse 2:18) Ye oko atia ala pepe. Fini ti lakue lakue na yâ kota ngia ayeke na gbele ala.

A yeke ngangu ti bi bê so Adam na Ève alingbi ti sala siokpari. Me kozo koli na kozo wali ake yanga ti tâ zo so aleke ala: Jéhovah Nzapa. Na salango kusala na mbeni ngbo, Satan Zabolo, so ayeke mbeni yingo, ahanda Ève ti londo ti ke Jéhovah, na Adam amu peko ti lo.​—Genèse 3:1-6.

Kite ayeke la ni pepe na ndo ye so Wasalango ye ayeke sala na Adam nga na Ève. Lo fa polele kozoni awe ye so ayeke ga na lege ti kengo yanga, lo tene: “Mo lingbi te le-keke kue ti yaka tongana bê ti mo aye; me lê ti keke ti hinga nzoni na ti hinga sioni, mo te pepe; teti na lâ ni so mo te lê ni so, fade mo kui biani.” (Genèse 2:16, 17) Me a hunda fadeso ti kiri tene na mbeni hundango tene so ayeke kota mingi ahon.

Azo Ayeke na Gbele Kota Kpale

Kozo siokpari aga na tâ kota kpale na azo. Adam ato nda ti duti na fini tongana mbeni zo so ayeke mbilimbili-kue. Tongaso, amolenge ti lo alingbi la ni ti wara fini ti lakue lakue so ayeke mbilimbili-kue. Ye oko, Adam asala siokpari kozoni si lo dü amolenge. Mara ti azo kue ade asigigi pepe na yâ lo tongana lo wara dengo ngbanga so: “Fade mo te kobe na lege ti sô ti lê ti mo juska mo kiri na sese, teti A kamata mo na sese; na fade mo kiri na pupu-sese, teti mo yeke pupu-sese.” (Genèse 3:19) Tongaso, tongana Adam asala siokpari na lo to nda ti kui tongana ti so Nzapa atene giriri, a dë ngbanga ti kuâ na li ti azo kue legeoko na lo.

A yeke tâ na lege ni si bazengele Paul atene na pekoni: “Na lege ti koli oko [Adam] siokpari aga na sese na kui aga na lege ti siokpari, na tongaso kui asi na azo kue teti ala kue asala siokpari.” (aRomain 5:12, NW) Biani, ndali ti kozo siokpari, amolenge so a ku ti tene a dü ala mbilimbili-kue na fini ti lakue lakue na gbele ala aba gigi na kobela, gango mbakoro, na kui tongana ye so aku ala.

Mbeni zo alingbi ti tene: “A yeke na lege ni pepe. E soro pepe ti ke yanga ti Nzapa tongana ti so Adam asala giriri. Ngbanga ti nyen a lingbi e glisa beku ti e ti duti na fini ti lakue lakue nga na ngia?” E hinga so tongana mbeni da-ngbanga aye ti bi na da ti kanga mbeni molenge teti so babâ ti lo anzi mbeni kutukutu, molenge ni alingbi biani ti dema tele ti lo: “A yeke na lege ni pepe! Mbi sala ye ti sioni oko pepe.”​—Deutéronome 24:16.

Na pusungo kozo koli na kozo wali ti sala siokpari, peut-être Satan atene na bê ti lo so lo yeke zia Nzapa na yâ mbeni kota kpale so a yeke duti ande ngangu ti leke ni. Zabolo aga na bira tâ na tongo nda ti mbaï ti azo, kozoni si a dü mbeni molenge. Na ngoi so Adam asala siokpari, mbeni kota hundango tene aba gigi: Ye nyen Jéhovah ayeke sala teti amolenge so Adam na Ève ayeke wara ande?

Jéhovah Nzapa asala ye so ayeke nzoni nga na lege ni. Élihu, zo ti mbilimbili atene: “Nzapa alingbi sala sioye kete pepe, Lo Ti Ngangu Ahon Kue alingbi sala sioni oko pepe.” (Job 34:10) Nga na ndo Jéhovah, prophète Moïse asû na mbeti: “Tênë ni, kusala ti lo alingbi kue, teti alege ti lo kue ayeke mbilimbili. Lo yeke Nzapa ti be-biani, lo yeke na sioni oko pepe; lo yeke mbilimbili na lo sala ye mbilimbili.” (Deutéronome 32:4, NW) Ye so tâ Nzapa amu ti leke na kpale so siokpari ti Adam aga na ni akanga pepe lege so azi na e ti duti na fini ti lakue lakue na ndo sese so ayeke ga paradis.

Nzapa Amu Mbeni Ye so Ayeke Mbilimbili-kue ti Leke na Kpale Ni

Ba ye so Nzapa afa na yâ ngbanga so lo dë na ndo Satan Zabolo ti leke na kpale ni. Jéhovah atene na Satan: “Fade Mbi zia tene ti ke na popo ti mo na wali so [bungbi ti Nzapa so ayeke na yayu], na popo ti hale ti mo [sese so ayeke na gbe ti ngangu ti Satan] na hale ti lo [Jésus Christ]; fade lo mboko li ti mo [Satan], na fade mo mboko ndagere ti lo [kui ti Jésus].” (Genèse 3:15) Na yâ kozo prophétie ti Bible so, tene ti Jéhovah andu ye so lo leke na bê ti lo ti tene Molenge ti lo ti yingo so ayeke na yayu aga na ndo sese tongana zo so ayeke mbilimbili-kue, Jésus, na pekoni lo kui, a mboko ndagere ti lo, na yâ siokpari oko pepe.

Ngbanga ti nyen Nzapa ahunda kuâ ti mbeni zo so ayeke mbilimbili-kue? Biani, ngbanga so Jéhovah Nzapa adë na li ti Adam ayeke duti so wa tongana lo sala siokpari? A yeke kui pepe? (Genèse 2:16, 17) Bazengele Paul asû na mbeti: “Futa ti siokpari ayeke kui.” (aRomain 6:23) Adam afuta siokpari ti lo na lege ti kuâ ti lo mveni. A mu na lo fini, me lo soro ti sala siokpari, na lo kui na nda ni, ye so ayeke futa teti siokpari ti lo. (Genèse 3:19) Ka ti fango ngbanga so a lingbi mara ti azo kue aduti na gbe ni ayeke tongana nyen? A lingbi mbeni zo akui ti kanga ndo ti siokpari ti ala. Me kuâ ti zo wa si alingbi biani ti kanga ndo ti asiokpari ti azo kue?

Na mara ti Israël ti giriri Ndia ti Nzapa ahunda “fini teti fini [wala, âme teti âme].” (Exode 21:23) Na lege ti kpengba tene so ayeke na yâ ndia so, a lingbi ngele ti kui so ayeke kanga ndo ti siokpari ti azo aduti oko na ti ye so Adam aglisa. Gi kui ti mbeni zo ti mbilimbili-kue si alingbi ti futa siokpari. Jésus ayeke biani zo so alingbi. Tâ tene, Jésus ayeke “kota ngele so alingbi na ni” ti sö ahale kue ti Adam so a lingbi ti ton ala.​—1 Timothée 2:6, NW; aRomain 5:16, 17.

Kui ti Jésus Ayeke na Ngele Ngangu

Kui ti Adam ayeke na ngele oko pepe; lo lingbi biani na kui teti siokpari ti lo. Ye oko, kui ti Jésus ayeke na ngele ngangu teti so lo kui na yâ siokpari pepe. Jéhovah Nzapa alingbi ti yeda na ngele ti fini ti Jésus so ayeke mbilimbili-kue tongana kota ngele teti ahale kue ti wasiokpari Adam so amä yanga. Na ngele ti sadaka ti Jésus aluti pepe gi na ndo futango ye teti asiokpari so e sala giriri. Tongana a yeke tongaso, ka e yeke wara beku oko pepe teti mbeni kekereke. Teti so a më ngo ti e na yâ siokpari, e yeke kiri lakue ti glisa lege. (Psaume 51:7 [51:5, NW]) Ba tongana nyen e lingbi ti kiri singila so kui ti Jésus azi lege na e ti wara dutingo so ayeke mbilimbili-kue so Jéhovah aleke ando teti ahale ti Adam na Ève!

A lingbi ti haka Adam na mbeni babâ so akui na azia e na yâ kota kuda ti nginza (siokpari) so lege ayeke dä oko pepe na e ti futa ni kue. Nde na so, Jésus ayeke tongana mbeni nzoni babâ so akui na azia na e mbeni ye ti héritier ti mosoro so azi e pepe gi na gbe ti kota kuda so Adam azia na ndogo ti e me lo mu nga aye so alingbi na ni ti tene e duti na fini teti lakue lakue. Kui ti Jésus alungula gi pepe asiokpari so e sala giriri; me a leke nga mbeni pendere ye teti kekereke ti e.

Jésus asö azo ngbanga ti so lo kui teti e. Na biani ye so a leke na lege ti kui ti lo ayeke na ngele mingi! Tongana e ba ni tongana mbeni mbage ti ye so Nzapa amu ti leke na kota kpale ti siokpari ti Adam, mabe ti e na yâ Jéhovah nga na yâ alege ti salango ye ti lo akpengba. Biani, kui ti Jésus aye ti tene zingo na gbe ti siokpari, kobela, gango mbakoro, na kuâ mveni “azo kue so afa na gigi mabe na lo.” (Jean 3:16, NW) Mo kiri singila na Nzapa teti ye so lo leke na ndoye ti sö e?

[Foto na lembeti 5]

Adam aga na siokpari na kui na ndo azo

[Foto na lembeti 6]

Jéhovah amu mbeni ye so ayeke mbilimbili-kue ti leke na kpale ni