Jéhovah Ayeke Ndo ti Bata Tele ti E

“Teti Mo, O L’Eternel [“Jéhovah,” NW], Mo yeke Ndo Ti Bata Tele ti mbi. . . . Fade sioye oko aga na ndo mo pepe.”​—PSAUME 91:9, 10.

1. Ngbanga ti nyen e lingbi ti tene so Jéhovah ayeke ndo ti bata tele ti e?

JÉHOVAH ayeke tâ ndo ti bata tele teti azo ti lo. Tongana e mu tele ti e kue na lo, atä ‘ye alingbi gi e na mbage kue, me a lingbi ti gbanzi lege ti e pepe; bê ti e alingbi ti gi e, me bê ti e alingbi ti nze pepe; a lingbi ti sala ngangu na e, me Nzapa alingbi zia e pepe; a lingbi pika e, a lingbi ti kinda e, me e lingbi kui pepe.’ Ngbanga ti nyen? Ngbanga ti so Jéhovah amu na e “ngangu so ahon ti senge ni.” (2 aCorinthien 4:7-9, NW) Biani, Babâ ti e ti yayu ayeke mu maboko na e ti tomba peko ti mbeni dutingo na fini so agi ti nzere na Nzapa, na e lingbi ti mu na bê atene so ti wasungo psaume: “Teti Mo tene, O L’Eternel, Mo yeke Ndo Ti Bata Tele ti mbi. Mo sala si Lo Ti Nduzu Ahon Kue aga ndo ti duti ti mo; fade sioye oko aga na ndo mo pepe.”​—Psaume 91:9, 10.

2. Tene ti nyen a lingbi ti tene na ndo Psaume 91, na zendo wa lo mu?

² Peut-être a yeke la ni Moïse si asû atene so ti Psaume 91. Mbeni kete tene so aga na li ni afa lo tongana wasungo Psaume 90, na Psaume 91 aga tâ gi na pekoni, na a fa pepe iri ti mbeni zo nde tongana wasungo ni. Peut-être a kangbi hengo ambage ti Psaume 91 so na popo ti abungbi ti azo nde nde; so ti tene peut-être mbeni zo oko ato nda ti he bia kozo (91:1, 2), na mbeni bungbi ti awahengo bia ni akiri tene (91:3-8). Peut-être na pekoni, a yeke mä go ti mbeni wahengo bia ni oko (91:9a), na mbeni bungbi ti awahengo mozoko akiri tene (91:9b-13). Na nda ni, peut-être mbeni wahengo bia ni oko ahe andangba tene ni (91:14-16). Atä ye ni ayeke la ni tongana nyen, Psaume 91 amu zendo ti nzoni dutingo na lege ti yingo teti bungbi ti aChrétien so a sa yingo na ndo ti ala, na a mu mara ti dengo bê tongaso nga teti bungbi ti afon ala so amu tele ti ala na Nzapa.a Zia e bi bê na atene ti yâ ti psaume so na bango ndo ti awakua ti Jéhovah so kue.

A Wara Nzoni Dutingo na yâ ‘Ndo ti Lingo ti Nzapa’

3. (a) “Ndo ti lingo ti Lo Ti Nduzu Ahon Kue” ayeke nyen? (b)  Ye nyen e yeke ba tongana ‘e duti na gbede ti Lo Ti Ngangu Ahon Kue’?

³ Wasungo psaume ahe na bia: “Lo so aduti na ndo ti lingo ti Lo Ti Nduzu Ahon Kue, fade lo duti na gbede ti Lo Ti Ngangu Ahon Kue. Fade mbi tene na Jéhovah: ‘Mo yeke ndo ti bata tele ti mbi nga na gbagba ti bira ti mbi, Nzapa ti mbi, so fade mbi zia bê ti mbi na lo.’ ” (Psaume 91:1, 2, NW) “Ndo ti lingo ti Lo Ti Nduzu Ahon Kue” ayeke mbeni ndo ti bata tele na lege ti fä teti e, na mbilimbili teti aChrétien so a sa yingo na ndo ti ala na so aga mbeni mbilimbili ye so Diable agi ti sala ngangu na ndo ni. (Apocalypse 12:15-17) Lo yeke futi fade e kue tongana Nzapa ayeke bata pepe ala so aduti na ndo ti lo tongana agene na lege ti yingo. Na ‘dutingo na gbede ti Lo Ti Ngangu Ahon Kue,’ e yeke ba tongana nyen Nzapa ayeke mu gbede ti lo ti bata e. (Psaume 15:1, 2; 121:5) Mbeni ndo ti bata tele ti nzoni ahon wala mbeni gbagba ti bira so akpengba mingi ahon Gbia Seigneur ti e Jéhovah ayeke dä pepe.​—aProverbe 18:10.

4. Aye wa ‘zo ti gbungo ndeke,’ Satan, ayeke sala na kusala, na tongana nyen e yeke kpe na yâ ni?

⁴ Wasungo psaume akiri atene: “Fade lo [ Jéhovah a] zi mo na son so zo ti gbungo andeke aleke, nga na yâ kobela so afuti kodoro so ayeke ga na aye ti ngangu.” (Psaume 91:3, NW) Na ngoi ti Israël ti giriri, fani mingi, mbeni zo ti gbungo ndeke ayeke gbu ala na salango kusala na ason wala agbanda. Na popo ti ason ti Satan, ‘zo ti gbungo ndeke,’ a yeke wara bungbi ti lo ti sioni, nga na “aye ti handa” ti lo. (aEphésien 6:11) Na ndo ti lege ti e, a zia ason so a honde ni ti tene a gboto e na yâ ye ti sioni na a sala si e wara futingo na lege ti yingo. (Psaume 142:3) Ye oko, ngbanga ti so e ke ti sala ye ti kirikiri, “âme ti e akpe legeoko tongana ndeke so asigigi na yâ son ti zo so agi lo.” (Psaume 124:7, 8) So tâ bê ti kiri singila si e yeke na ni teti so Jéhovah azi e na maboko ti sioni ‘zo ti gbungo andeke’!​—Matthieu 6:13.

5, 6. “Kobela ti futi kodoro” wa aga na “aye ti ngangu,” me ngbanga ti nyen azo ti Jéhovah atï na gbe ni pepe?

⁵ Wasungo psaume asala tene ti “kobela ti futi kodoro so aga na aye ti ngangu.” Legeoko tongana mbeni kobela so ayeke mu zo na ndo kue, mbeni ye ayeke dä so aga na “aye ti ngangu” teti sewa ti azo nga teti ala so amu mbage ti kota yanga-ti-komande ti Jéhovah. Na ndo tene so, wasungo mbaï Arnold Toynbee asû na mbeti: “Ngbele ye ti londo na hunzingo ti Use Bira so Amu Sese Kue, tene ti vorongo kodoro asala si wungo ti akodoro so ayeke na lipanda ague na li ni mingi . . . Bango ndo ti azo laso ayeke ti kangbi tele lakue mingi ahon.”

⁶ Na yâ ti asiècle so ahon, ambeni mokonzi akiri atingo wâ na gbe ti tiri teti kangbingo popo ti amara. Ala hunda nga ti tene a mu kota kpengo mbito na ala, wala na ayanda wala ambeni fä nde nde. Me Jéhovah azia lege lâ oko pepe na abe-ta-zo ti lo ti tï na gbe ti mara ti “kobela ti futi kodoro” tongaso. (Daniel 3:1, 2, 20-27; 6:7-10, 16-22) Tongana mbeni sewa ti aita ti amara nde nde so ayeke na ndoye, e yeke voro gi Jéhovah oko, e yeke bata dutingo ti e nde so aluti na ndo Mbeti ti Nzapa, na e hinga na yekiango zo teti lê ti lo pepe so “na yâ mara oko oko kue, lo [Nzapa a] yeda na zo so akpe mbito ti lo na asala ye alingbi na mbilimbili.” (Kusala 10:34, 35, NW; Exode 20:4-6; Jean 13:34, 35; 17:16; 1 Pierre 5:8, 9) Atä so pono ti “aye ti ngangu” ayeke si na e na lege ti salango ngangu na aChrétien, e yeke na ngia nga e yeke na yâ ti nzoni dutingo na lege ti yingo na yâ “ndo ti lingo ti Lo Ti Nduzu Ahon Kue.”

7. Tongana nyen Jéhovah ayeke bata e “na lege ti ali ti kpangbi ti lo”?

⁷ Teti so e yeke na Jéhovah tongana ndo ti bata tele ti e, e wara dengo bê na yâ atene so: “Na lege ti ali ti kpangbi ti lo fade lo kanga lege kue ti si na mo, nga na gbe ti akpangbi ti lo fade mo honde tele dä. Fade dutingo be-ta-zo ti lo ayeke mbeni kota vala nga na mbeni kpengba ye ti bata tele.” (Psaume 91:4, NW) Nzapa ayeke bata e, legeoko tongana mbeni babâ wala mama ti ndeke so ayeke hulu na ndo amolenge ti lo ti bata ala. (Esaïe 31:5) ‘Na lege ti ali ti kpangbi ti lo, lo kanga lege kue ti si na e.’ Mingi ni, “ali ti kpangbi” ti mbeni ndeke ayeke gi akpangbi ti lo. Na lege ti akpangbi ti lo, mbeni ndeke ayeke honde amolenge ti lo, ti bata ala na gbele awato. Tongana asenge molenge ti ndeke, e yeke na nzoni dutingo na gbe ti akpangbi ti Jéhovah na lege ti fä ngbanga ti so e wara ndo ti bata tele na yâ tâ bungbi ti lo ti aChrétien.​—Ruth 2:12; Psaume 5:2, 12 (5:1, 11, NW).

8. Na lege wa “dutingo be-ta-zo” ti Jéhovah ayeke mbeni kota vala na kpengba ye ti bata tele?

⁸ E zia bê na “dutingo be-ta-zo,” wala dutingo be-biani. A yeke tongana mbeni kota vala ti ngoi ti giriri, so fani mingi tele ni ayeke tongana mbeni yanga-da, na so akono alingbi na ni ti kanga tele ti mbeni zo kue. (Psaume 5:13 [5:12, NW]) Ziango bê na yâ mara ti batango ndo tongaso ayeke zi e na gbe ti mbito. (Genèse 15:1; Psaume 84:12 [84:11, NW]) Legeoko na mabe ti e, dutingo be-ta-zo ti Nzapa ayeke tongana mbeni kota vala ti batango zo, na a yeke mingo akondoro ti wâ ti Satan, na a yeke kanga lege na salango ngangu ti wato. (aEphésien 6:16) A yeke nga mbeni kpengba ye ti bata tele, mbeni gbagba ti batango zo so e luti ngangu na pekoni.

‘Fade Mbito Asala E Pepe’

9. Ngbanga ti nyen bï alingbi ti duti mbeni ngoi so amu mbito na zo, me ngbanga ti nyen e yeke na mbito pepe?

⁹ Na bingo bê na ndo batango ndo ti Nzapa, wasungo psaume atene: “Fade mbito asala mo pepe teti ye so amu mbito na bï, wala teti kondoro so ala pika na lâ, wala teti kobela ti futi kodoro so atambela na yâ bingo, wala teti ye ti futi so afuti ye na kota lâ.” (Psaume 91:5, 6) Teti a yeke sala mingi ti akusala ti sioni na gbe-mingo, bï alingbi ti duti mbeni ngoi so a mu mbito na zo. Na popo ti bingo ti yingo so ayeke kanga laso lê ti sese kue, fani mingi awato ti e ayeke sala kusala ti mayele ti wara lege ti futi yekiango ndo ti e teti aye ti yingo nga ti mingo biaku kusala ti e ti fango tene. Me ‘mbito asala e pepe teti ye so amu mbito na bï’ ngbanga ti so Jéhovah ayeke bata e.​—Psaume 64:2, 3 (64:1, 2, NW); 121:4; Esaïe 60:2.

10. (a) “Kondoro so ala pika na lâ” andu peut-être nyen, na tongana nyen e yeke sala ye na mbage ni? (b) “Kobela ti futi kodoro so atambela na yâ bingo” ayeke tongana nyen, na ngbanga ti nyen e sala mbito ni pepe?

¹⁰ “Kondoro so ala pika na lâ” andu peut-être asioni tene ti yanga. (Psaume 64:4-6 [64:3-5, NW]; 94:20) Tongana e ngbâ lakue ti fa atene so ayeke tâ tene, mara ti kangango lege polele tongaso na kusala ti e ti nzoni-kue ayeke duti gi ye senge. Na ndo ni, e sala mbito pepe ti “kobela ti futi kodoro so atambela na yâ bingo.” Ye so ayeke mbeni kobela ti futi kodoro na lege ti fä so aba gigi na yâ bingo ti sese so ayeke na gbe ti ngangu ti Satan, na so tambela ti azo ni na lege ti vorongo ti ala ayeke na kobela. (1 Jean 5:19) A yeke lë mbeni dutingo ti bibe na ti bê so ague na kuâ, na salango si azo ayeke na yâ bingo teti ala hinga ye oko pepe na ndo ti Jéhovah, ti aye so Lo leke ti sala, nga na ti aye so lo mu na ndoye. (1 Timothée 6:4) Na popo ti bingo so, e yeke na mbito pepe, teti so e yeke na gbâ ti lumière na lege ti yingo.​—Psaume 43:3.

11. Ye nyen ayeke si na ala so ayeke wara “ye ti futi so afuti ye na kota lâ”?

¹¹ Na mbage nga, “ye ti futi so afuti ye na kota lâ” amu mbito na e pepe. Peut-être “kota lâ” so a sala tene ni ge andu ye so a ba tongana lumière ti sese so. Ala so atï na gbe ti bango ndo ti lo ti tombango peko ti amosoro ayeke wara futingo na lege ti yingo. (1 Timothée 6:20, 21) Tongana e fa tokua ti Royaume na mbito oko pepe, e yeke sala mbito ti awato ti e oko pepe, teti Jéhovah ayeke Lo so abata e.​—Psaume 64:2 (64:1, NW); aProverbe 3:25, 26.

12. Azo saki mingi ayeke ‘tï’ na tele ti azo wa, nga na lege wa si ala yeke tï?

¹² Wasungo psaume angbâ ti sala tene: “Fade azo saki oko atï na tele ti mo, na azo saki bale oko atï na koti ti mo; me fade a ga ndulu na mo pepe. Fade mo ba futa ti awasiokpari, fade mo ba gi na lê ti mo.” (Psaume 91:7, 8) Ngbanga ti so ala ke ti ba na Jéhovah ndo ti bata tele ti ala, azo mingi “atï” na yâ kui na lege ti yingo ‘na tele ti e.’ Biani, “azo saki bale oko atï na koti” ti azo ti Israël ti yingo ti ngoi ti laso. (aGalate 6:16) Me tongana e yeke na popo ti aChrétien so a sa yingo na ndo ti ala wala ti afon ala so amu tele ti ala na Nzapa, e yeke na nzoni dutingo na yâ ti “ndo ti lingo” ti Nzapa. E yeke ‘ba gi na lê ti e futa ti awasiokpari’ so ayeke ko lengo ti kpale na lege ti dengo buze, ti lege ti vorongo, nga na ti ambeni lege nde.​—aGalate 6:7.

‘Fade Sioye Oko Aga na Ndo E Pepe’

13. Asioye wa ayeke ga na ndo e pepe, na ngbanga ti nyen?

¹³ Atä so nzoni dutingo ti sese so ayeke buba bubango, e zia Nzapa na kozo ndo, na e wara ngangu na yâ atene ti wasungo psaume so: “Teti Mo [tene], O L’Eternel, Mo yeke Ndo Ti Bata Tele ti mbi. Mo sala si Lo Ti Nduzu Ahon Kue aga ndo ti duti ti mo; fade sioye oko aga na ndo mo pepe, wala kobela oko ti futi kodoro aga ndulu na tente ti mo pepe.” (Psaume 91:9, 10) Biani, Jéhovah ayeke ndo ti bata tele ti e. Ye oko, e nga kue e sala si Lo Ti Nduzu Ahon Kue aga ‘ndo ti duti ti e,’ ndo so e wara nzoni duti dä. E sepela Jéhovah tongana Gbia ti Ndagigi Kue, e wara “ndo ti duti” na yâ lo tongana Lingu ti nzoni dutingo ti e, na e yeke fa nzo tene ti Royaume ti Lo. (Matthieu 24:14) Ni la, ‘fade sioye oko aga na ndo e pepe,’ so ti tene fade mbeni oko ti asioye so a fa ni kozoni na yâ psaume so ayeke ga pepe na ndo e. Atä asioye tongana ayengingo ti sese, akota pupu ti futi ye, angu so asuku mingi, akota nzala ti kobe, na akota kpale ti peko ti bira asi na e legeoko na ambeni zo nde, a yeke futi pepe mabe ti e wala nzoni dutingo ti e na lege ti yingo.

14. Teti e yeke awakua ti Jéhovah, ngbanga ti nyen akobela ti futi kodoro agbu e pepe?

¹⁴ A-Chrétien so a sa yingo na ndo ti ala ayeke tongana awande so alango na yâ ti atente nde na bungbi ti aye ti sese so. (1 Pierre 2:11) ‘Même kobela ti futi kodoro oko aga ndulu na tente ti ala pepe.’ Atä beku ti e ayeke ti wara fini na yayu wala na sese, e yeke pepe ti sese so, na e wara pepe akobela ti lo ti yingo so afâ zo tongana pitan, tombango peko ti mosoro, lege ti vorongo ti wataka, na vorongo ‘nyama so asigigi na kota ngu ti ingo’ nga na “image” ti lo, Bendo ti Gigi.​—Apocalypse 9:20, 21; 13:1-18; Jean 17:16.

15. Na lege wa e yeke na mungo maboko ti a-ange?

¹⁵ Na ndo tene ti batango ndo so a mu na e, wasungo psaume atene na ndo ni: “Teti fade Lo [Jéhovah a] wa a-ange ti Lo ti bata mo na lege ti mo kue. Fade ala yö mo na maboko ti ala, si mo pika gere ti mo na tênë pepe.” (Psaume 91:11, 12) A mu na a-ange ngangu ti bata e. (2 aGbia 6:17; Psaume 34:8-10 [34:7-9, NW]; 104:4; Matthieu 26:53; Luc 1:19) Ala yeke bata e ‘na yâ alege ti e kue.’ (Matthieu 18:10) Teti e yeke awafango tene ti Royaume, e yeke wara ye ti nzoni na lege ti fango lege na batango ndo so aga na lege ti a-ange, na e yeke pika gere ti e pepe na lege ti yingo. (Apocalypse 14:6, 7) Même ‘atênë’ tongana kangango lege na kusala ti e ayeke sala pepe si e pika gere ti e, na e glisa yengo dä ti Nzapa.

16. Na lege wa akode ti salango sioni na zo ti mbeni “bamara so ade molenge” na ti mbeni “konga” ayeke nde nde, na tongana nyen e yeke sala ye na gbele ni?

¹⁶ Wasungo psaume angbâ lakue ti sala tene: “Fade mo tambela na ndo bamara so ade pendere nga na konga; fade mo dö na gere bamara so ade pendere so ayeke na kuä ti go nga na kota ngbo.” (Psaume 91:13, NW) Legeoko tongana ti so mbeni bamara so ade pendere ayeke ga ti sala sioni na zo polele na lê ti lo, ambeni zo na popo ti awato ti e ayeke fa kengo ndo ti ala na mbage ti e polele na sigingo na andia so nda ni ayeke ti kanga lege na kusala ti e ti fango tene. Ye oko, a yeke gi nga ti sala sioni na e na mbeni lege so e ku ni pepe, na so akpa akode ti salango sioni na zo ti mbeni konga so, na mbeni ndo so a honde, alondo ti dë zo. Ngoi na ngoi, na gbe-mingo, bungbi ti amokonzi ti lege ti vorongo ayeke ga ti sala sioni na e na lege ti azo ti ndia, awafango ngbanga, nga na ambeni zo nde. Me na lege ti mungo maboko ti Jéhovah, e yeke gi na siriri ti leke tene nzoni na gbele ada-ngbanga, na tongaso ‘ti bata nzo tene na ti zia gere ni na lege ti ndia.’​—aPhilippien 1:7, NW; Psaume 94:14, 20-22.

17. Tongana nyen e yeke dö na gere “bamara so ade pendere na so ayeke na kuä ti go”?

¹⁷ Wasungo psaume asala tene ti dongo na gere “bamara so ade pendere so ayeke na kuä ti go nga na kota ngbo.” Mbeni bamara so ade pendere na so ayeke na kuä ti go alingbi ti duti sioni mingi, na mbeni kota ngbo alingbi ti duti mbeni nyama so tele ti lo akono mingi. (Esaïe 31:4) Ye oko, atä lege so mbeni bamara so ade pendere na so ayeke na kuä ti go ayeke ga na ngangu tongana lo ye ti sala sioni na zo polele, e yeke dö lo na gere na lege ti fä na mango yanga ti Nzapa ahon ti mä yanga ti azo wala ti abungbi so ayeke sala ye tongana abamara. (Kusala 5:29) Tongaso, “bamara” so azia mbito na bê ayeke sala sioni na e pepe na lege ti yingo.

18. “Kota ngbo” adabe e peut-être na zo wa, na ye nyen a lingbi e sala tongana a ye ti sala sioni na e?

¹⁸ Septante asala kusala na mbeni tene so aye ti tene “kota ngbo.” Ye so alingbi biani ti dabe e na “kota ngbo . . . , ngbo ti giriri, lo so a di iri ti lo Diable na Satan.” (Apocalypse 12:7-9; Genèse 3:15) Lo yeke tongana mbeni sioni kota ngbo so ayeke na ngangu ti te yâ ti nyama so lo gbu, na ti mene lo. (Jérémie 51:34) Tongana Satan aye ti tara ti ngoro damba ti lo na tele ti e, ti pete e na akpale ti sese so, na ti mene e, zia e zi tele ti e na yâ ni na e dö “kota ngbo” so na gere ti e. (1 Pierre 5:8) A lingbi tanga ti ala so a sa yingo na ndo ti ala asala tongaso tongana ala ye ti mu mbage ti ala na gango tâ tene ti aRomain 16:20.

Jéhovah: Lingu ti Salut ti E

19. Ngbanga ti nyen e gi ndo ti bata tele na mbage ti Jéhovah?

¹⁹ Na ndo tene ti tâ wavorongo, wasungo psaume asala tene na place ti Nzapa tongana lo tene: “Fade Mbi sö lo teti lo ndoye Mbi; fade Mbi yä lo na nduzu teti lo hinga iri ti Mbi.” (Psaume 91:14) Tene “fade Mbi yä lo na nduzu” aye ti tene so zo oko pepe alingbi ti si juska na lo. Tongana e gi ndo ti bata tele na mbage ti Jéhovah tongana awavorongo lo, a yeke mbilimbili ngbanga ti so ‘e ndoye lo.’ (Marc 12:29, 30; 1 Jean 4:19) Na mbage, Nzapa ‘asö e’ na tïtî awato ti e. Fade a yeke lungula e lâ oko pepe na ndo sese. Nde na so, fade a yeke sö e ngbanga ti so e hinga iri ti Nzapa na e di ni na mabe. (aRomain 10:11-13) Nga, e leke na bê ti e ti ‘tambela na iri ti Jéhovah teti lakue lakue.’​—Michée 4:5; Esaïe 43:10-12.

20. Tongana Psaume 91 ayeke gue ti hunzi, ye nyen Jéhovah amu zendo ni na wakua be-ta-zo ti lo?

²⁰ Tongana Psaume 91 ayeke gue ti hunzi, Jéhovah atene na awakua be-ta-zo ti lo: “Fade lo di iri ti Mbi, na fade Mbi kiri tene na lo; fade Mbi yeke na lo na yâ ye ti vundu; fade Mbi sö lo, na Mbi yä iri ti lo. Fade Mbi sala si fini ti lo awu mingi, alingbi na bê ti lo, na Mbi fa na lo salut ti Mbi.” (Psaume 91:15, 16) Tongana e yeke di iri ti Nzapa na yâ sambela legeoko na ye so bê ti lo aye, lo yeke kiri tene na e. (1 Jean 5:13-15) E hon awe na yâ aye ti vundu mingi ngbanga ti akengo tele so Satan amaï ni. Me atene “fade Mbi yeke na lo na yâ ye ti vundu” ayeke leke e teti aye ti ngangu so ayeke si ande, na a yeke dë bê ti e so Nzapa ayeke mu ande maboko na e tongana ayeke futi bungbi ti aye ti sese so.

21. Na lege wa ala so a sa yingo na ndo ti ala ayeke wara futa ti ala ti gloire?

²¹ Atä kangango lege ti wâ ti Satan, na ngoi so Jéhovah adiko, na peko ti mbeni “fini so awu mingi” so ala sala na sese, fade ala so a sa yingo na ndo ti ala na so ayeke na popo ti e ayeke wara futa na yayu ti sala si wungo ti ala kâ alingbi kue. Ye oko, aye ti kpene so Nzapa asala ti sö zo aga awe na gloire na lege ti yingo na ala so a sa yingo ti Nzapa na ndo ti ala. Nga, so tâ yekiango ndo si ala wara teti so ala mu li ni tongana aTémoin ti Jéhovah na ndo sese na lâ ti nda ni so! (Esaïe 43:10-12) Fade kusala ti kota ahon kue ti Jéhovah ti sö azo ti lo ayeke si na ngoi ti kota bira ti lo ti Har–Maguédôn, tongana lo yeke fa na gigi mbilimbili ti kota yanga-ti-komande ti lo, na lo yeke sala si iri ti lo aga nzoni kue.​—Psaume 83:19 (83:18, NW); Ezéchiel 38:23; Apocalypse 16:14, 16.

22. Zo wa ayeke ‘ba ande salut ti Jéhovah’?

²² Atä e yeke ti aChrétien so a sa yingo na ndo ti ala, wala ti afon ala so amu tele ti ala na Nzapa, e yeke ba ndo na mbage ti Jéhovah ti wara salut. Na ngoi ti “kota lâ ti Jéhovah so amu mbito,” fade a yeke sö ala so asala na Nzapa na be-biani. (Joël 2:30-32, NW) Ala so na popo ti e ayeke duti ande na popo ti “azo mingi so asi singo,” so ayeke sö kuâ ti lï na yâ fini sese ti Nzapa, na so ayeke ngbâ be-ta-zo na ngoi ti tara ti nda ni, ayeke wara ande ‘fini so awu mingi, alingbi na bê ti ala,’ mbeni fini so ayeke hunzi lâ oko pepe. Nga, fade lo yeke zingo azo mingi mingi na popo ti awakinda. (Apocalypse 7:9; 20:7-15) Biani, Jéhovah ayeke wara ande kota ngia ti ‘fa na e salut’ na lege ti Jésus Christ. (Psaume 3:8) Teti e yeke na apendere beku so na gbele e, zia e ngbâ lakue ti ba ndo na mbage ti Nzapa ti mu maboko na e na ndo lege ti diko alâ ti e teti gloire ti lo. Na lege ti atene na asalango ye ti e, zia e ngbâ lakue ti fa so Jéhovah ayeke ndo ti bata tele ti e.

[Kete Tene na Gbe Ni]

Fade Mo Kiri Tene Tongana Nyen?

• “Ndo ti lingo ti Lo Ti Nduzu Ahon Kue” ayeke nyen?

• Ngbanga ti nyen e yeke na mbito pepe?

• Na lege wa ‘sioye oko ayeke

ga na ndo e pepe’?

• Ngbanga ti nyen e lingbi ti tene so Jéhovah ayeke lingu ti salut ti e?

[Foto na lembeti 17]

Mo hinga na lege wa dutingo be-ta-zo ti Jéhovah ayeke kota vala teti e?

[Afoto na lembeti 18]

Jéhovah amu maboko na awakua ti lo ti sala kusala ti fango tene atä aye ti ngangu so ala ku ni pepe nga na kangango lege polele

[Lingu ti foto na lembeti 18]

Cobra: A. N. Jagannatha Rao, Trustee, Madras Snake Park Trust