Nzoni Fango Lege: E Lingbi Wara Ni na Ndo Wa?

BIBLE atene: “A yeke mbeni zo si aleke da oko oko kue, me zo so aleke ye kue ayeke Nzapa.” (aHébreu 3:4, NW; Apocalypse 4:11) Teti so tâ Nzapa, Jéhovah, ayeke Wasalango e, “lo mveni ahinga mbilimbili tongana nyen a leke e.” (Psaume 103:14, NW) Lo hinga ye kue na ndo wokongo ti e nga na aye so atia e. Nga, teti so lo yeke mbeni Nzapa ti nzobe, lo ye ti mû na e aye so e yeke na bezoin ni. (Psaume 145:16; 1 Jean 4:8) Bezoin ti e ti wara nzoni fango lege ayeke nga na popo ti aye so.

Na lege ti prophète Isaïe, Jéhovah atene: “Bâ, Mbi mû Lo ti ga témoin ti azo, Zo ti fa lege, na Zo ti komande azo.” (Esaïe 55:4) Yorö teti kpale ti fango lege ti ngoi ti laso andu nga gingo ti hinga Wafango Lege so Lo Ti Ngangu Ahon Kue mveni ahiri na kusala, na yengo dä na fango lege ti lo. Tongaso, zo wa ayeke Wafango Lege so na Zo ti Komande so asala tënë ti lo kozoni? Aye wa afa lo tongana mbeni wafango lege? Fade lo yeke gue na e na ndo wa? Ye nyen a lingbi e sala ti wara ye ti nzoni na lege ti fango lege ti lo?

Wafango Lege ti Zendo Ni Asi

A sala fadeso angu 2 500 awe, ange Gabriel aga na prophète Daniel, na lo tene na lo: “A lingbi mo hinga ye, na mo hinga nda ti ye ni, a to nda ni na lâ ni so a to tënë ti kiri ti leke na ti sala Jérusalem juska Messie Wafango Lege ni aga, fade a yeke yenga mbasambala, nga na yenga bale omene na ndo ni use. Fade a kiri a sala lo mbeni, na kota place nga na kota dû so ngu so alï ayeke na yâ ni, me na yâ ngoi ti ye ti vundu.”​—Daniel 9:25, NW.

A yeke polele so ange ni ayeke fa na Daniel tâ ngoi ti gango ti Wafango Lege so Jéhovah asoro lo. “Messie Wafango Lege ni” ayeke si ande na nda ti ayenga 69, wala angu 483, so a diko ni a londo na ngu 455 K.N.E., tongana a to tënë ti kiri ti leke Jérusalem.a (Néhémie 2:1-8) Ye nyen asi na nda ti ngoi ni so? Wasungo Évangile Luc atene: “Na yâ ngu bale oko na ndo ni oku ni so Tibère César akomande, tongana Ponce Pilate ayeke gouverneur ti sese ti Judée, na Hérode ayeke gouverneur ti sese ti Galilée [ngu 29 N.E.], . . . tënë ti Nzapa asi na Jean molenge ti Zacharie na yando. Lo tambela na sese kue na tele ti Ngu ti Jourdain, lo fa tënë ti batême ti gbiango bê, si azo alingbi wara pardon ti siokpari ti ala.” Na ngoi ni so, “azo ayeke ku” Messie Wafango Lege ni. (Luc 3:1-3, 15) Atâa so azo mingi aga na mbage ti Jean, lo yeke lani Wafango Lege ni pëpe.

Na pekoni, ndulu na nze ti octobre, ngu 29 N.E., Jésus ti Nazareth aga na mbage ti Jean ti wara batême. Na Jean asala tënë ti témoin, lo tene: “Mbi bâ Yingo ti Nzapa asigigi na yayu, Lo zu tongana bungu, na Lo duti na ndo Lo. Na mbi de mbi hinga Lo pëpe; me Lo so ato mbi ti batize na ngu, Lo tene na mbi, Zo so fade mo bâ Yingo ni azu na aduti na ndo Lo, Lo yeke Zo so abatize na Yingo Vulu. Na mbi bâ, na mbi sala tënë ti témoin, Lo so ayeke Molenge Ti Nzapa.” (Jean 1:32-34) Na ngoi ti batême ti lo, Jésus aga Wafango Lege ni so a sa yingo na ndo ti Lo, lo so ayeke Messie wala Christ.

Biani, “Zo ti fa lege, na Zo ti komande azo” so ayeke Jésus Christ. Nga tongana e yeke bi bê na asalango ye ti lo tongana wafango lege, e yeke ndulu ti bâ so fango lege ti lo ahon mingi aye kue so, na ngoi ti laso, a yeke ku na mbage ti mbeni tâ wafango lege so alingbi biani.

Messie: Tâ Wafango Lege So Alingbi Biani

Mbeni wafango lege so alingbi ayeke mû fango lege so ayeke polele, na lo yeke mû maboko na azo so ayeke na gbe ti lo ti leke na bê nga ti wara ngangu so alingbi na ni ti hon ndo ti akpale nzoni. Mbeni buku (21st Century Leadership: Dialogues With 100 Top Leaders) atene so ‘ye so ayeke mbeni ye so a hunda na mbage ti wafango lege ti siècle 21 so asala kusala ti lo nzoni.’ Lani Jésus aleke mbilimbili ala so amä tënë ti lo ti hon ndo ti akpale ti lâ oko oko! Tara gi ti bâ diskur ti lo ti kota ahon so lo mû, so azo ahinga ni mingi: Fango ye na ndo Hoto. Atënë so a sû ni na Matthieu chapitre 5 ti si na 7 asisingo na awango so alingbi.

Na tapande, bâ wango so Jésus amû na ndo lege ti leke akpale na popo ti mba. Lo tene: “Tongaso, tongana mo yeke mû matabisi ti mo na gbele balaga, na mo dabe mo kâ na ita ti mo so ayeke na tënë na li ti mo, mo zia matabisi ti mo na tele ti balaga ni, mo gue mo leke songo na ita ti mo kozoni si, na nda ni, mo ga mo mû matabisi ti mo.” (Matthieu 5:23, 24) Mungo li ni ti sala siriri na ambeni zo aga na kozo ndo, même kozo na salango kungba ti lege ti vorongo so a hunda, tongana mungo matabisi na balaga ti temple na Jérusalem tongana ti so Ndia ti Moïse ahunda ni giriri. Tongana a sala tongaso pëpe, Nzapa ayeke yeda pëpe na akusala ti vorongo lo. Wango ti Jésus alingbi na ngoi ti laso legeoko tongana ti so a lingbi na ngoi ni kâ, a sala fadeso asiècle mingi awe.

Jésus amû nga maboko na awamango lo ti kpe son ti ye ti pitan. Lo mû wango so na ala: “I mä a tene giriri, ‘A lingbi mo sala lango sioni pëpe.’ Me mbi tene na i so zo kue so angbâ ti bâ mbeni wali si nzala ti wali ni asala lo, lo sala lango sioni awe na lo na yâ bê ti lo.” (Matthieu 5:27, 28, NW) So tâ gbotongo mê so alingbi biani! Ngbanga ti nyen e ye ti to nda ti leke lege so ayeke gue na e na lango sioni na batango na li abibe na ndo aye ti pitan? Jésus atene so salango pitan na lango sioni alondo na bê ti zo. (Matthieu 15:18, 19) E yeke sala ye na ndara tongana e bata bê ti e nzoni.​—aProverbe 4:23.

A yeke wara nga na yâ Fango ye na ndo Hoto apendere wango na ndo dutingo na ndoye teti awato ti mo, fango na gigi bê ti mû ye, dutingo na nzoni bango ndo na mbage ti aye ti mitele na ti yingo, na ambeni ye nde tongaso. (Matthieu 5:43-47; 6:1-4, 19-21, 24-34) Jésus afa même na azo so ayeke mä lo tongana nyen ti gi mungo maboko ti Nzapa na fango na ala lege ti sambela. (Matthieu 6:9-13) Messie so ayeke Wafango Lege ayeke kpengba na ayeke leke adisciple ti lo ti hon ndo ti akpale so azo kue ayeke wara na yâ fini.

Fani omene na yâ Fango ye ti lo na ndo Hoto, Jésus ato nda ti tënë ti lo tongaso: “I mä a tene giriri” wala “A tene nga giriri;” me na pekoni lo fa mbeni tënë nde, lo tene: “Me Mbi tene na i.” (Matthieu 5:21, 22, 27, 28, 31-34, 38, 39, 43, 44, NW) Ye so afa so a yeke lani na yâ ti salango ye ti ala so ayeke mä lo, ti sala ye na mbeni lege so ague oko na angobo ti salango ye so aFarizien afa lani gi na yanga. Me Jésus ayeke fa na ala fadeso mbeni lege nde so afa na gigi tâ bibe ti Ndia ti Moïse. Na lege so, Jésus ayeke fa mbeni gbiango ye, na lo sala ni na mbeni lege so asala si a yeke ngangu pëpe na adisciple ti lo ti yeda na ni. Biani, Jésus apusu ala ti sala akota gbiango ye na yâ fini ti ala na lege ti yingo nga na ti mitele. Ye so ayeke tâ fä ti hinga na mbeni tâ Wafango Lege.

Mbeni buku na ndo fango lege na andokua afa tongana nyen a lingbi ti duti ngangu ti sala mara ti gbiango ye tongaso. Buku ni afa so a lingbi zo so ayeke na lingu ti gbiango ye ni [wafango lege ni] aduti na bingo bê ti wakua so kusala ti lo ayeke ti mû maboko na azo so awara kpale, na gbungo nda ti ye ti mbeni wasenda-bibe, gbungo ngangu ti mbeni wanguru ti kpengo loro, lengo ti ngbâ lakue ti sala ye tongana mbo na ndo ti bio, na be-nze-pepe ti mbeni zo so amû tele ti lo kue na vorongo ti lo. Nga, atâa lo yeke na alengo so oko oko kue, a yeke pëpe fä so biani lo yeke sala ande si ye kue aga nzoni.

Mbeni article so li ti tënë ni ayeke “Fango Lege: Alengo ti Zo Ni Ayeke Kota Ye” atene: “A lingbi awafango lege asala ye alingbi na lege so ala ye adisciple ti ala asala na ye.” Biani, mbeni nzoni wafango lege ayeke sala ye alingbi na ye so lo yeke fa. A yeke ye so a bâ mbilimbili lani na ndo Jésus Christ! Biani, lo fa na ala so ayeke na tele ti lo ti duti na tâ be-ti-molenge, me lo mû nga na ala mbeni tapande ti lingbi na ni na sukulango gere ti ala. (Jean 13:5-15) Lo tokua gi pëpe adisciple ti lo ti fa nzo tënë ti Royaume ti Nzapa, me nga lo bi tele ti lo mveni na ngangu kue na yâ kusala so. (Matthieu 4:18-25; Luc 8:1-3; 9:1-6; 10:1-24; Jean 10:40-42) Nga, na ndo salango ye na mbage ti azo so afa lege, Jésus azia tapande. Lo tene na ndo lo mveni: “Molenge ni alingbi sala ye oko na bê ti Lo pëpe, gi ye so Lo bâ Babâ ayeke sala; teti ye kue so Lo sala, Molenge asala ye so tongaso nga.”​—Jean 5:19.

Bingo bê na ndo aye so Jésus atene na asala, so afa na nduzu ge, afa polele so lo yeke tâ Wafango lege so alingbi biani. Biani, lo hon ye kue so azo ahunda teti nzoni wafango lege. Jésus ayeke mbilimbili-kue. Teti so lo wara fini so alingbi futi ni pëpe na peko ti kuâ na londongo ti lo na popo ti awakinda, lo ngbâ na fini teti lakue lakue. (1 Pierre 3:18; Apocalypse 1:13-18) Mbeni zo wa so ayeke wafango lege alingbi na aye so kue a fa ge?

Ye Nyen A Lingbi E Sala?

Teti so lo komande awe tongana Gbia ti Royaume ti Nzapa, “Messie Wafango Lege ni” ayeke tuku ande adeba nzoni na ndo azo so amä yanga. Na ndo tënë so, Mbeti ti Nzapa amû zendo so: “Fade sese asi singo biani na hingango ye ti Jéhovah tongana ti so ngu ahon ndo ti ngu-ingo kue.” (Isaïe 11:9, NW) “Fade azo ti tâ be-ti-molenge awara sese, na biani fade ala wara kota ngia na yâ siriri so asi singo.” (Psaume 37:11, NW) “Fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe.” (Michée 4:4) “Fade Nzapa mveni ayeke na ala. Nga fade lo mbô ngule kue na lê ti ala, na fade kui ayeke mbeni pëpe, fade mua wala wuluwulu wala pasi ayeke mbeni pëpe. Angbele ye ahon awe.”​—Apocalypse 21:3, 4, NW.

Laso, sese ayeke hon na yâ ti mbeni kpale ti awafango lege. Ye oko, Jésus Christ ayeke gue na azo ti be-ti-molenge na mbeni fini sese ti siriri, so na yâ ni fade a yeke ga na azo so amä yanga ti sala beoko na yâ tâ vorongo ti Jéhovah Nzapa, na fade ala yeke gue na li ni ti ga mbilimbili-kue. So tâ kota ye mingi si a yeke ti mû ngoi ti wara hingango ye ti tâ Nzapa na ti Wafango Lege so lo hiri na kusala, nga ti sala ye alingbi na hingango ye so!​— Jean 17:3.

Mbeni oko ti atënë ti yekiango ndo ti kota ahon so e lingbi ti fa na mbage ti mbeni zo ayeke ti mû tapande ti lo. Tongaso, a lingbi e mû pëpe tapande ti Wafango Lege ti kota ahon kue ti mbaï ti azo, Jésus Christ? Tongana nyen e lingbi ti sala tongaso? Yengo dä na fango lege ti lo ayeke sala ngangu wa na ndo fini ti e? Fade a yeke bâ atënë so nga na ambeni nde na yâ ti a-article use so ayeke ga na peko.

[Kete Tene na Gbe Ni]

[Foto na lembeti 4]

Daniel afa kozoni gango ti Wafango Lege ni so Nzapa asoro

[Afoto na lembeti 7]

Afango ye ti Jésus aleke lani azo ti hon ndo ti akpale ti fini

[Foto na lembeti 7]

Fade Jésus ayeke gue na azo ti mango yanga na yâ mbeni fini sese ti siriri