Mo Lingbi ti Hon Dutingo Gi Mo Oko na Ngangu

ZO WA si alingbi ti tene so lo wara lâ oko pëpe songo ti dutingo gi lo oko? Aye mingi alingbi ti sala si e bâ so e yeke gi e oko. Ye oko, mingi ni awali so amû koli lâ oko pëpe, so aga awomua wala so akangbi na akoli ti ala alingbi ti bâ so ala yeke gi ala oko.

Na tapande, mbeni maseka-wali Chrétien so iri ti lo ayeke Frances atene: “Na ngoi so mbi wara ngu 23, a lingbi ti tene so akamarade ti mbi kue amû koli awe, na mbi ngbâ gi mbi oko.”a Bibe ti dutingo gi zo oko alingbi ti kono tongana angu ayeke hon na abeku ti salango mariage ayeke kiri na peko. Sandra, so fadeso ayeke na yâ ti angu 40, atene: “Mbi ye lâ oko pëpe ti ngbâ kumbamba, na mbi yeke lakue na nzala ti sala mariage tongana lege azi na mbi.” Angela, so ayeke na yâ ti angu 50, afa: “Mbi leke na bê ti mbi pëpe ti ngbâ kumbamba, me a yeke dutingo so mbi yeke na yâ ni la. Aita-koli kumbamba ayeke lani mingi pëpe na ndo so a to mbi dä tongana pionnier spécial.”

Ye ti sepela ayeke so awali Chrétien mingi asoro ti sala mariage pëpe ngbanga ti so ala bata na be-biani wango ti Jéhovah so ahunda ti sala mariage “gi na yâ Seigneur.” (1 aCorinthien 7:39) Ambeni amanda ti duti nzoni na yâ kumbamba ti ala, me ambeni abâ so nzala ti sala mariage na ti wara amolenge ayeke kono mingi ahon tongana angu ayeke hon. Sandra atene: “Bezoin ti wara ndoye, so aga teti so mbi yeke na koli pëpe, ayeke lakue na mbi.”

Ambeni ye nde, tongana ti bâ lege ti ababâ na mama so aga mbakoro awe, alingbi ti kono yâ ti bibe ti dutingo gi zo oko. Sandra atene: “Teti so mbi mû koli pëpe, sewa ni aku ti tene mbi si mbi bâ lege ti babâ na mama ti e so aga mbakoro awe. Teti angu 20, mbi yô kota mbage ti kungba ni, atâa so mbi yeke oko ti amolenge omene. Fini alingbi ti duti ngangu mingi pëpe tongana mbeni koli so alingbi ti mû maboko na mbi ayeke dä.”

Frances afa mbeni ye nde so akiri akono yâ ti dutingo gi lo oko. Lo tene: “Na ambeni ngoi azo ahunda mbi polele, ‘Ngbanga ti nyen mo mû koli pëpe?’ Mara ti hundango tënë tongaso asala si mbi bâ so a yeke faute ti mbi si mbi yeke kumbamba. Na yâ pumba ti amariage mingi so mbi gue dä, mbeni zo ahunda lakue na mbi tënë so mbi ye ni lâ oko pëpe, ‘Tongaso lawa si mo yeke sala mariage?’ Na mbi to nda ti tene na bê ti mbi, ‘Tongana aita-koli so akpengba na lege ti yingo asala nzala ti mbi pëpe, peut-être mbi yeke pëpe na alengo ti Chrétien so alingbi wala peut-être mbi yeke pendere pëpe.’ ”

Tongana nyen a lingbi ti hon ndo ti bibe ti dutingo gi zo oko? Ye nyen, peut-être, ambeni zo alingbi ti sala ti mû maboko?

Zia Bê Kue na Jéhovah

Wasungo psaume ahe bia: “Mo zia kungba ti mo na ndo L’Eternel [“Jéhovah,” NW], na fade Lo bata mo. Fade Lo zia ye ayengi azo ti mbilimbili lâ oko pëpe.” (Psaume 55:23 [55:22, NW]) Tënë “kungba” na yanga ti Hébreu aye biani ti tene “mbage,” na a ndu atënë ti bê nga na agingo bê so e lingbi ti duti na ni ndali ti ye so asi na yâ fini ti e. Ahon azo kue, Jéhovah abi bê na ndo akungba so mingi na lo lingbi ti mû na e ngangu ti luti na gbele ni. Ziango bê kue na Jéhovah Nzapa ayeke ye so amû maboko na Angela ti hon ndo ti bibe ti dutingo gi lo oko. Na bingo bê na kusala ti lo ti ngoi kue, lo tene: “Tongana mbi to nda ti sala kusala ti pionnier, mbi na fon mbi na yâ kusala e lango ayo na kongregation so ayeke ndulu na e. E manda ti zia bê kue na Jéhovah, na ye so amû maboko na mbi na yâ fini ti mbi kue. Tongana asioni bibe aga na mbi, mbi sala tënë na Jéhovah na lo mû maboko na mbi. Psaume 23 adë lakue bê ti mbi, na mbi yeke diko ni mingi.”

Bazengele Paul ayeke lani na mbeni kota kungba ti yô. Fani ota, lo ‘hunda Seigneur ti lungula kî so ayeke na yâ mitele ti lo.’ A mû maboko na Paul na lege ti mbeni ye ti kpene pëpe, me a mû zendo na lo so nzobe ti Nzapa so zo alingbi na ni pëpe ayeke mû ngangu na lo. (2 aCorinthien 12:7-9, NW) Paul aga ti hinga nga ngia ti duti gi na ye so lo yeke na ni. Lo sû mbeti na pekoni: “Mbi hinga lege ti duti na nzinga, na mbi hinga lege ti duti na yâ ye mingi nga. Na yâ ye kue, mbi hinga lege ti duti na nzala na ti duti na kobe, ti duti na nzinga na ti wara ye. Mbi wara ngangu teti aye kue na lege ti lo so amû na mbi ngangu.”​—aPhilippien 4:12, 13, NW.

Tongana nyen mbeni zo alingbi ti wara ngangu ti Nzapa tongana bê ti lo anze wala lo bâ so lo yeke gi lo oko? Paul asû na mbeti: “I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti singila. Na fade siriri ti Nzapa so ahon bibe kue abata bê ti i na abata bibe ti i na yâ Christ Jésus.” (aPhilippien 4:6, 7) Sandra asala ye alingbi na wango so. Lo tene: “Teti so mbi yeke kumbamba, mingi ni mbi yeke gi mbi oko. Ye so amû lege na mbi mingi ti sambela Jéhovah. Mbi bâ so mbi yeke ndulu mingi na lo na mbi lingbi ti sala tënë na lo tongana ti so bê ti mbi aye na ndo akpale nga na angia ti mbi.” Frances atene nga: “Tiringo na asioni bibe gi mbi oko ayeke mbeni kota bira lakue. Me fango polele atënë ti bê ti mbi na Jéhovah amû maboko na mbi mingi. Mbi hinga biani so Jéhovah abi bê na ye kue so alingbi ti ndu nzoni duti ti mbi na lege ti yingo nga na lege ti bibe.”​—1 Timothée 5:5.

“I Yô Kungba ti Ambeni Zo na Popo ti I”

Na yâ songo ti aita Chrétien, a lingbi zo ayô akungba ti lo gi lo oko pëpe. Bazengele Paul amû wango so: “I yô kungba ti ambeni zo na popo ti i, tongaso fade i bata ndia ti Christ kue.” (aGalate 6:2) Na lege ti songo ti e na afon e Chrétien, e lingbi ti wara “nzo tënë” ti kpengba na zo, so alingbi ti sala si kungba ti dutingo gi zo oko ane tongana ti kozoni pëpe.​—aProverbe 12:25.

Bâ nga ye so Mbeti ti Nzapa atene na ndo molenge-wali ti Yiphtah, Wafango ngbanga ti Israël. Kozoni si lo hon na ngangu aturugu ti Ammon so ayeke awato ti lo, Yiphtah adeba yanga ti lo ti mû na Jéhovah kozo zo ti da ti lo so ayeke sigigi ti yamba lo. Zo ni so aduti molenge ti lo ti wali. (aJuge 11:30, 31, 34-36) Atâa so a ye ti tene so lo yeke ngbâ kumbamba na lo yeke zia nzala ti lo so ayeke na lege ni ti wara mbeni sewa, molenge-wali ti Yiphtah ayeda na bê ti lo kue ti sala ye alingbi na bä so, na lo sala kusala na yâ temple na Shilo teti tanga ti fini ti lo kue. Gbanzingo ye na tele ti lo ahon gi senge tongaso na lê ti azo? Pëpe, nde na so: “Ye so aga tongana ndia na popo ti azo ti Israël; amolenge-wali ti Israël ague lâ osio na yâ ngu oko, ngu na ngu, ti dabe ala na molenge ti Jephté ti wali, zo ti Galaad.” (aJuge 11:40) Biani, tënë ti gonda alingbi ti mû ngangu na ala so awara ni. Tongaso, e zia lâ oko pëpe ti gonda azo so alingbi na ni.

E sala nga nzoni ti bâ tapande ti Jésus. Atâa so a yeke pëpe na yâ ngobo ti salango ye ti aJuif ti tene akoli asala lisoro na awali, Jésus amû ngoi ti lo ti duti na Marie nga na Marthe. Peut-être, ala yeke awomua wala awali so ade amû koli pëpe. Jésus aye lani si ala use kue awara aye ti nzoni so songo ti lo ti kamarade aga na ni na lege ti yingo. (Luc 10:38-42) E lingbi ti manda tapande ti Jésus na ziango aita-wali so ayeke akumbamba na yâ asalango ngia ti e nga na mango tele na ala ti sigigi na fango tënë. (aRomain 12:13) Ala kiri singila na mara ti bingo bê tongaso? Mbeni ita-wali atene: “Mbi hinga so aita andoye na ayekia mbi, me mbi kiri singila tongana ala bi bê mingi ahon na mbi.”

Sandra afa nda ni: “Teti so e yeke na mbeni sewa pëpe, e yeke na kota bezoin ti tene a ndoye e, ti bâ so e yeke mbage ti sewa ti aita-koli na aita-wali ti yingo.” A yeke polele so Jéhovah abi bê na mara ti azo tongaso, na e sala kusala maboko na maboko na lo ti sala si ala bâ so e yeke na bezoin ti ala na e ndoye ala. (1 Pierre 5:6, 7) Mara ti bingo bê so ayeke hon senge tongaso pëpe, teti so “zo so asala be-nzoni na awanzinga, lo mû ye na L’Eternel ti perde, na fade L’Eternel [“Jéhovah Nzapa,” NW] afuta lo teti nzo kusala ti lo.”​—aProverbe 19:17.

“Fade Zo Oko Oko Ayô Kungba ti Lo Mveni”

Atâa so ambeni zo alingbi ti mû maboko, na ye so ala sala alingbi ti kpengba zo mingi, “fade azo oko oko kue ayô kungba ti ala mveni.” (aGalate 6:5) Ye oko, na yongo kungba ti dutingo gi zo oko, a lingbi e sala hange na ambeni ye ti sioni. Na tapande, dutingo gi e oko alingbi ti hon e na ngangu tongana e ke ti fa tënë ti bê ti e na ambeni zo. Na mbeni mbage nde, e lingbi ti hon dutingo gi e oko na ngangu na lege ti ndoye. (1 aCorinthien 13:7, 8) Ti mû ye na ti kangbi ye ayeke lege ti nzoni ahon ti wara tâ ngia, atâa dutingo ti e ayeke so wa. (Kusala 20:35) Mbeni ita-wali pionnier so asala kusala ngangu atene: “Mbi yeke na ngoi mingi pëpe ti bi bê na ndo dutingo gi mbi oko. Tongana mbi bâ so mbi mû maboko na zo na mbi yeke na aye mingi ti sala, mbi bâ pëpe so mbi yeke gi mbi oko.”

A lingbi e sala nga hange si dutingo gi e oko apusu e pëpe ti lë songo ti ndoye so ayeke na lege ni pëpe na mbeni zo. Na tapande, so ye ti vundu si ayeke duti ande ti zia si nzala ti sala mariage akanga lege na e ti bâ gbâ ti akpale so salango mariage na mbeni zo so ayeke wamabe pëpe aga na ni na mbilimbili ti bâ pëpe ndara ti wango so Mbeti ti Nzapa amû ti kpe mara ti joug wala bungbingo tele tongaso! (2 aCorinthien 6:14) Mbeni wali Chrétien so akangbi na koli ti lo atene: “Mbeni ye oko ti sioni mingi ahon dutingo kumbamba ayeke dä. A yeke ti sala mariage na zo so alingbi na mo pëpe.”

Peut-être teti mbeni ngoi a hunda mo ti gbu ngangu na gbele mbeni kpale so mo lingbi ti leke ni pëpe. Na ngangu ti Nzapa, mo lingbi ti hon ndo ti bibe ti dutingo gi mo oko. Na ngoi so e ngbâ lakue ti sala na Jéhovah, zia e duti na beku so mbeni lâ a yeke kaï anzala ti e kue na lege kue so ayeke nzoni ahon.​—Psaume 145:16.

[Kete Tene na Gbe Ni]

[Afoto na lembeti 28]

A lingbi ti hon dutingo gi zo oko na ngangu na mungo ye nga na kangbingo ye