Tondo so alondo na awafango tënë ti Royaume

Lo wara tâ tënë na ndo so lo ku ni pëpe

NZAPA aye si “azo kue awara salut, na ahinga tene-biani mbilimbili.” (1 Timothée 2:3, 4). Ndali ni, aTémoin ti Jéhovah apete na akangbi aBible nga na ambeti ti manda na Bible kutu mingi. Ngoi na ngoi, ambeti so amû maboko na azo ti nzoni bê ti manda tâ tënë na alege so a ku ni oko pëpe. Na ndo tënë so, awafango tënë ti Royaume na Freetown, Sierra Leone, afa tondo so ge.

Na yâ sewa ti lo a dü amolenge gumbaya na Osman ayeke use ni. Lo kono na yâ mbeni sewa so amû peko ti mbeni lege ti vorongo, na tongaso lakue lo na babâ ti lo ayeke gue na da ti nzapa. Me ye so lege ti vorongo ti lo afa na ndo ti enfer azia vundu na bê ti lo mingi. Lo gi li ti lo gbä na tënë so mbeni Nzapa ti nzobe ayeke sala pasi na azo ti sioni na lê ti wâ. Atënë kue so a fa ti mû maboko na Osman ti hinga nda ti tënë ti enfer ti wâ nzoni adë bê ti lo pëpe.

Mbeni lâ, tongana Osman ayeke na ngu 20, lo bâ na yâ mbeni ndo ti bingo saleté mbeni mbeti ti bleu so mbage ni agbi. Teti so lo ye dikongo mbeti mingi, lo mû ni, lo hulu ndo ni, na lo bâ li ti tënë ni so ayeke, Ta Tene so aga na Zo Fini ti La Koue La Koue.a

Osman ahunda tele ti lo: ‘Tâ tënë ni so ayeke nyen?’ Nzala ti hinga ye so ayeke na yâ ni apusu lo ti gue na mbeti ni na da na ti diko ni kue na ngoi oko. Bâ tâ nzerengo tele ti lo oko ti hinga so Nzapa ayeke na tâ iri mveni, Jéhovah! (Psaume 83:19). Osman amanda nga so kota lengo ti Nzapa ayeke ndoye na so même pensé ti sala pasi na azo na lê ti wâ ayeke sioni na lê ti Lo (Jérémie 32:35; 1 Jean 4:8). Na nda ni, lo diko so Jéhovah aga ndulu ti ga na paradis na ndo sese, na fade azo alingbi duti dä lakue lakue (Psaume 37:29; Apocalypse 21:3, 4). So pendere tâ tënë pëpe si alondo na Nzapa ti ndoye na ti nzobe! Na bê kue, Osman amû merci na Jéhovah ti zia lege na lo ti wara tâ tënë na ndo so lo ku ni oko pëpe.

Alango kete na pekoni, ambeni kamarade ti Osman amû maboko na lo ti wara Da ti Royaume ti aTémoin ti Jéhovah na lo gue lo sala kozo bungbi ti lo. Na ngoi so lo yeke kâ, lo hunda na mbeni Témoin ti manda Bible na lo. Atâa so sewa ti lo akanga lege na lo ngangu, Osman ague na li ni na lege ti yingo na lo wara batême (Matthieu 10:36). Laso, lo yeke mbeni ancien na yâ ti kongregation. A yeke ye ti dongo bê mingi ti bâ aye kue so aga na peko ti warango mbeni mbeti na ndo Bible na yâ ndo ti bingo saleté!

[Kete Tene na Gbe Ni]