Tondo so alondo na awafango tënë ti Royaume

A mû palata na mbeni Da ti Royaume

NDOKUA ti gbenyon gbia so abâ tënë ti pupu, ngu, na ambeni ye tongaso na kodoro ti Finlande afa ngu 2000 tongana “Ngu ti Lekengo ando pendere.” Mbeni oko ti azo so amû li ni dä atene so “nda ni so a mû lekengo ando pendere tongana kota li ti tënë ti ngu ni ayeke ti dabe e kue na ngangu so akeke na akongö, so ako pendere, ayeke sala na ndo gigi ti e ti lâ oko oko nga na ndo nzoni duti ti e.”

Na 12 janvier 2001, filiale ti aTémoin ti Jéhovah ti Finlande awara mbeni mbeti so alondo na Bungbi ti andokua so abâ tënë ti lekengo ando pendere na sese ti Finlande. Mbeti ni atene so a mû mbeni oko ti apalata ti lekengo ndo pendere ti ngu ni na Da ti Royaume ti aTémoin ti Jéhovah ti Tikkurila, ngbanga ti so a leke yâ ti gbagba ni pendere mingi na akongö. Mbeti ni akiri atene so “mingi ni, atâa a yeke na ngoi ti ngu wala ti ndowa, ando so angoro tele ti Da ti bungbi ni ayeke gi lakue pendere, na a leke ni nzoni mingi.”

A mû palata ni na aTémoin ti Jéhovah na Hôtel Rosendahl na Tampere, Finlande. Na ngoi ni so, akota zo nga na awadengo buze 400 aga dä. Bungbi ti andokua so abâ tënë ti lekengo ando pendere na sese ti Finlande atokua nga mbeni mbeti na awagosinga, a tene: “Na ambage nde nde ti kodoro ni, a lingbi ti tene so a leke yâ ti gbagba ti aDa ti Royaume ti aTémoin ti Jéhovah kue pendere mingi. Kode so a leke na ando ni ayeke sala ka si tongana azo ahon na tele ni, pendere ti gbagba ni ayeke gboto lê ti ala. Da ti Royaume ti Tikkurila ayeke mbeni tapande ti pendere ndo so a leke ni nzoni mingi na akeke nga na akongö. Da ti bungbi ni nga na akusala kue so a sala na akeke nga na akongö asala si ndo ni ayeke kpô nga pendere mingi.”

A yeke wara na Finlande aDa ti Royaume 233, na mingi ti ala, a leke ndo so angoro ni pendere na akongö. Me ye so asala si ando so ayeke biani pendere mingi ayeke so ala yeke ando ti tâ vorongo na ti fango ye ti Bible. Na lê ti aTémoin ti Jéhovah so wungo ti ala ahon kutu omene na ndo sese mobimba, Da ti Royaume, atâa a hunda nginza mingi wala pëpe, ayeke mbeni ndo so ala ye tënë ni mingi. A yeke ndali ni si ala ye ti bata ni nzoni. Azo kue alingbi ti gue na Da ti Royaume so ayeke na yâ vaka ti ala!