Atënë so azo ahunda

Ti vo mbeni da na tïtî mbeni bungbi ti vorongo, na ti sala ni si a ga Da ti Royaume ayeke mbeni lege ti salango beoko na alege ti vorongo nde?

Mingi ni, aTémoin ti Jéhovah ayeke kpe ti ga ndulu tongaso na ambeni lege ti vorongo nde. Me même tongana ala vo mbeni da tongaso, a lingbi lakue pëpe ti duti mbeni lege ti salango beoko na alege ti vorongo nde. A lingbi ti bâ ni gi tongana mbeni kusala ti dengo buze so sala ni gi fani oko. Kongregation ti aTémoin ti Jéhovah ti ndo ni ayeke gi ti sala kusala pëpe maboko na maboko na mbeni lege ti vorongo nde, ti leke mbeni da ti vorongo so ala use kue ayeke sala kusala na ni.

Na bango ndo ti Jéhovah, ye wa ayeke salango beoko na mbeni lege ti vorongo nde? Bâ wango so bazengele Paul amû: “I bungbi tele ti i pëpe na azo so amä na bê pëpe. Mbilimbili asala beoko na siokpari? Lumière asala beoko na bingo? Christ asala beoko na Bélial? Wamabe na zo so amä na bê pëpe, ala lingbi sala beoko? Temple ti Nzapa asala beoko na ayanda? . . . Teti tënë so, I sigigi na popo ti ala, i duti nde, Seigneur atene; i ndu ye ti sioni oko pëpe, na fade Mbi kamata i”. (2 aCorinthien 6:14-17). Tongana Paul asala tënë ge ti ‘salango beoko’, lo ye ti tene nyen?

Tënë ti salango beoko so Paul afa ni andu mbilimbili bungbingo oko na yâ vorongo nga na akusala ti yingo na awavorongo yanda nga na ala so amä na bê pëpe. Lo tene na aChrétien ti Corinthe ti sala hange na ‘tengo kobe . . . na table ti ayingo sioni’. (1 aCorinthien 10:20, 21; Exode 20:5; 23:13; 34:12). Tongana a vo mbeni da so mbeni bungbi ti vorongo asala na kusala kozo, a yeke gi ti wara da ni ti sala na mbeni Da ti Royaume. Kozoni si a sala na kusala tongana mbeni Da ti Royaume, a yeke lungula aye kue so na yâ ni andu vorongo ti wataka. Tongana a leke ni tongaso awe, a yeke mû da ni na Jéhovah ti sala kusala na ni gi teti vorongo ti lo oko. Ge so, mbeni salango beoko na popo ti tâ vorongo na vorongo ti wataka ayeke dä oko pëpe.

Tongana ala yeke gi ti bâ anzene nzene tënë so andu vongo da ni, a lingbi ala sala kue ti tingbi tele mingi mingi pëpe na azo ti vorongo nde so, na a lingbi ala ngbâ gi na ndo tënë ti dengo buze ni. Aita ti kongregation ayeke sala nzoni ti bata na li gbotongo mê ti Paul ti ‘bungbi tele ti ala pëpe na azo so amä na bê pëpe.’ Atâa so e bâ tele ti e pëpe kota ahon ala so ayeke ti ambeni lege ti vorongo nde, e yeke kpe ti ga ndulu mingi ahon na ala wala ti yôro tele ti e na yâ vorongo ti ala.a

Me a yeke duti ande tongana nyen teti mbeni kongregation so aye ti loué mbeni da so ayeke ti mbeni bungbi ti vorongo Nzapa nde? Tongana a ye ti loué mbeni da, fani mingi a hunda ti tingbi tele lakue lakue na azo ti lege ti vorongo ni so ayeke awa ti da ni, na a yeke ye so si e gi ti kpe ni. Même tongana a yeke ti loué mara ti da tongaso gi teti mbeni ye oko, a lingbi a-ancien ti kongregation ni agi ti gbu li na ndo ahundango tënë so: Fade mbeni yanda na mbeni ye ti vorongo ayeke duti ande dä na yâ da ni wala na gigi ni? Bibe wa azo ti ndo ni ayeke wara ande tongana ala bâ e na salango kusala na da ni? Tongana e sala kusala na da so, fade a yeke duti mbeni ye ti pika gere dä teti mbeni zo na yâ kongregation? (Matthieu 18:6; 1 aCorinthien 8:7-13). A-ancien ayeke gi ande ti bâ atënë so, na ti mû desizion na pekoni alingbi na ni. Biani, a lingbi ala gi ti bâ nga yingo-ti-hinga ti ala mveni nga na ti kongregation, ti hinga wala a yeke vo ande mara ti da tongaso ti sala ni na mbeni Da ti Royaume.

[Kete Tene na Gbe Ni]

[Foto na lembeti 27]

Da so ayeke giriri mbeni synagogue, me a vo ni na a leke ni si a ga mbeni Da ti Royaume