“I ga na mbi, . . . na fade mbi mû na i lege ti hu tele”

“I bata kundu ti Nzapa”

“I yeke lakue dä ti mä e na ti fa na e ambeni tënë na yâ Bible so akpengba e.”​—Pamela.

“Singila mingi teti ye kue so i sala teti e kue. A mû maboko na e biani.”​—Robert.

PAMELA na Robert asû lani atënë ti kiringo singila so na a-ancien ti akongregation so ala ayeke dä. Ambeni na popo ti awakua ti Nzapa na ndo sese mobimba ayeke kiri nga singila teti maboko na batango ndo so ala ngbâ ti wara na mbage ti ala so ‘ayeke bata kundu ti Nzapa’. (1 Pierre 5:2). Biani, azo ti Jéhovah akiri singila teti gbâ ti aye so a-ancien asala teti ala nga lege so ala sala na ni.

‘Ala wu na kusala ti Seigneur’

A-ancien ayeke na akusala mingi ti sala (Luc 12:48). Ala yeke leke adiskur ti mû na abungbi, na ala yeke mû mbage ti ala ti fa na azo nzo tënë ti Royaume ti Nzapa. Akusala ti ala andu nga salango vizite na afon ala na yâ vorongo ti kpengba ala na lege ti Tënë ti Nzapa. A-ancien ayeke mû ngoi ti sala na ala so a hunda ti bâ ndo na ndo ala: ambakoro nga na ambeni ita so ayeke na yâ kpale. Ala yeke sala aye so kue me ala girisa nga pëpe ti bata asewa ti ala mveni na lege ti yingo nga na ti mitele (Job 29:12-15; 1 Timothée 3:4, 5; 5:8). Ambeni ancien ayeke mû maboko na yâ lekengo afini Da ti Royaume. Ambeni nde ayeke sala kusala na yâ aKomite so abâ lege ti songo na ada-nganga wala so ayeke na popo ti aBungbi ti aita so ayeke gue na yâ ada-nganga ti bâ aita so ayeke na kobela. Nga, mingi na popo ti ala ayeke sala akusala na bê kue na ngoi ti akota bungbi. Tâ tënë biani, a-ancien ‘awu na kusala ti Seigneur’. (1 aCorinthien 15:58). Ni la, bê ti e adö pëpe ti bâ so mara ti a-ancien tongaso, so ayeke sala kusala ngangu, ayeke wara gonda mingi na mbage ti azo so ala yeke na kungba ti bata ala.​—1 aThessalonicien 5:12, 13.

A-ancien so lakue ayeke sala vizite na aita ti ala Chrétien na yanga-da ti ala wala na mbeni ndo nde ti kpengba ala na lege ti yingo ayeke tâ lingu ti mungo wâ na zo. Thomas so akono na yâ mbeni sewa so babâ ni ayeke dä pëpe atene: “Tongana fade a yeke teti mungo maboko ti ndoye nga na wango ti a-ancien pëpe, mbi pensé pëpe so mbi yeke sala fade kusala na Jéhovah tongana wakua ti ngoi kue laso.” Mingi ti apendere so akono na yâ asewa so gi babâ wala mama ni si abata ala ayeda so bingo bê so a-ancien afa na mbage ti ala amû maboko na ala ti lë kpengba songo na Nzapa.

Avizite so a-ancien ayeke sala ti kpengba angasangbaga ayeke nga aye so ambakoro abâ na ngele ngangu na yâ kongregation. Na pekoni so ala wara vizite ti a-ancien use, ambeni ita koli na wali so ayeke amissionnaire na so ngu ti ala ahon 80, asû mbeti so na a-ancien ni: “E ye ti fa bê ti kiri singila ti e teti nzoni vizite so ala sala na e. Na pekoni so ala zia e ti hon, e kiri e diko aversê so ala bâ ni na e. E yeke girisa ande lâ oko pëpe atënë so ala mû ti kpengba na e.” Mbeni ita womua ti ngu 70 asû mbeti so na a-ancien: “Mbi yeke sambela fade Jéhovah ti wara mungo maboko, na lo tokua ala use na mbi. Vizite so ala sala na mbi ayeke mbeni deba nzoni so alondo na Jéhovah!” Mo wara nzoni awe na lege ti mbeni vizite ti a-ancien ti kongregation ti mo? Biani, e kue e yekia angangu so a-ancien ni ayeke sala ti bata kundu so ayeke na gbe ti ala!

Aberger so amû tapande ti Nzapa na ti Christ

Jéhovah ayeke mbeni Berger ti ndoye (Psaume 23:1-4; Jérémie 31:10; 1 Pierre 2:25). Jésus Christ ayeke nga mbeni kpengba Berger na lege ti yingo. Biani, a hiri lo “Nzo Berger”, “Kota Berger”, na “Mokonzi Ti aBerger”. (Jean 10:11; aHébreu 13:20; 1 Pierre 5:4). Salango ye ti Jésus ayeke tongana nyen na mbage ti ala so aye lani ti ga adisciple ti lo? Lo mû tisango ndo so na wâ na ala: “I ga na Mbi, i kue so i sala kusala na i yeke na kungba so ane, na fade Mbi mû na i lege ti hu tele.”​—Matthieu 11:28.

A-ancien nga laso ayeke sala ngangu ti kpengba na ti bata lakue kundu ni. Mara ti akoli tongaso “[a]yeke tongana ndo ti honde tele ngbanga ti kota pupu, ala yeke ndo ti bata tele ngbanga ti pupu ti ngangu. Ala yeke tongana angu so asua na ndo kuru sese, ala yeke tongana gbede ti kota tênë na yâ sese so zo anze dä.” (Esaïe 32:2). Azo ti batango amba ti ala tongaso ayeke mû hungo tele na zo, ala mû lege na kundu ni ti yekia ala, na ala sala si Nzapa ayeda na ala.​—aPhilippien 2:29; 1 Timothée 5:17.

Awali ti ala amû maboko ngangu na ala

Bungbi ti Nzapa ayeke na ngia teti a-ancien nga teti mungo maboko ti ndoye so ala yeke wara na mbage ti awali ti ala. Fani mingi, maboko so mara ti awali tongaso ayeke mû ahunda na mbage ti ala ti gbanzi ambeni ye na tele ti ala. Ngoi na ngoi, ala yeke na kodoro na ngoi so akoli ti ala ayeke sala ambeni kusala ti kongregation wala ala yeke sala avizite ti kpengba angasangbaga. Na ambeni ngoi, a hunda na ala ti gbian ambeni ye so ala leke fade ni nzoni aninga awe, ngbanga ti so ambeni kpale abâ gigi na yâ kongregation na so a hunda ti leke ni hio. ‘Atâa so kue’, Michelle atene so ‘tongana ni yeke bâ koli ti ni na lekengo abungbi wala na salango avizite ti kpengba aita, ni yeke tene na yâ li ti ni so lo yeke sala kusala ti Jéhovah, na ni yeke tara ti mû maboko na lo alingbi na so ni lingbi ti sala.’

Cheryl, so ayeke nga wali ti mbeni ancien, atene: “Mbi hinga so aita ti koli na ti wali na yâ kongregation ayeke na bezoin ti a-ancien ti sala tënë na ala, na mbi ye si ala bâ so ala lingbi ti ga ti bâ koli ti mbi na ngoi kue so ala yeke na bezoin ti lo.” Awali so amû maboko na akoli ti ala, na tapande ti Michelle na Cheryl, ayeda na bê kue ti gbanzi ambeni ye na tele ti ala mveni si akoli ti ala awara lege ti bata kundu ti Nzapa nzoni. A gonda awali ti a-ancien mingi teti bibe ti ala ti duti ndulu ti mû maboko na akoli ti ala.

Ye oko, a lingbi mbeni ancien so ayeke na kua mingi agirisa pëpe aye so atia wali ti lo nga na amolenge ti lo na lege ti yingo. A lingbi mbeni ancien so a sala mariage awe aduti “zo so tënë ayeke na li ti lo pëpe, koli ti wali oko, amolenge ti lo amä na bê, na a klame ala teti sioni wala kengo tënë pëpe.” (Tite 1:6). A lingbi lo bata azo ti da ti lo na lege so Mbeti ti Nzapa ahunda na asurveillant ti sala.​—1 Timothée 3:1-7.

Ti mbeni ancien so ayeke na kua mingi ti sala, wali ti lo so aduti ndulu ti mû maboko na lo ayeke mbeni wali so a lingbi pëpe ti haka ngele ti lo! A yeke bibe so a-ancien so ayeke na awali na so abi bê na ndo ala ayeke na ni. A yeke tongana ti so Bible atene: “Zo so awara wali [“nzoni wali”, NW], lo wara ye ti nzoni, na lo wara nzobe na tïtî L’Eternel.” (aProverbe 18:22). Na lege ti atënë nga na asalango ye ti ala, a-ancien tongaso ayeke fa na awali ti ala so ala yekia ala biani. A-ancien so ayeke na awali ayeke sambela legeoko na ala, na ayeke manda ye na ngia legeoko na ala; me na ndo ni nga, ala yeke zia mbeni ngoi nde ti tene, na tapande, ala gue na tambela na ayanga ti ngu, ala fono na popo ti akeke ti gbako, wala ala gue ti gboto gere na yâ mbeni pendere ndo. Biani, a-ancien ayeke na ngia ti bata awali ti ala na lege ti ndoye.​—1 Pierre 3:7.

A-ancien so na bê ti ala kue ayeke bata kundu ti Nzapa ayeke mû biani hungo tele na lege ti yingo na azo ti Jéhovah. Ala yeke biani ‘amatabisi’, mbeni deba nzoni teti kongregation!​—aEphésien 4:8, 11-13.