Sala si maboko ti mo awara ngangu

NA YÂ Bible, a sala tënë ti maboko lege mingi. Na alege nde nde mingi, a sala kusala na maboko na lege ti fä. Na tapande, mbeni maboko so ayeke na sioni pëpe aye ti sala tënë ti mbeni zo so tënë ayeke na li ti lo pëpe (2 Samuel 22:21; Psaume 24:3, 4). Ti lungula yâ ti maboko ti mo aye ti tene ti mû ye na ambeni zo (Deutéronome 15:11; Psaume 145:16). Tongana mbeni zo abâ fini ti lo tongana ye senge, a yeke tene so lo zia âme ti lo na yâ maboko ti lo (1 Samuel 19:5). Tongana mbeni zo anze na kusala, a tene so lo zi maboko ti lo (2 Chronique 15:7). Nga, ti sala si maboko ti mbeni zo awara ngangu, a ye ti tene ti kpengba lo na ti mû wâ na lo teti mbeni kusala.​—1 Samuel 23:16.

Laso, e yeke tâ na yâ ngangu bezoin ti tene a kpengba e, wala a sala si maboko ti e awara ngangu tongana ti so a tene ni na yâ mbeti ni na yanga ti Hébreu. E yeke na yâ mbeni ngoi ti “ye ti ngangu”. (2 Timothée 3:1). Tongana bê ti e anze, bibe ti e ayeke ti zia ye kue, ti zi maboko ti e. Fani mingi, a yeke bâ amaseka so adö ekole azia, akoli so adö sewa ti ala azia, nga amama so adö amolenge ti ala azia. Teti so e yeke aChrétien, a lingbi e kpengba maboko ti e ti tene e gbu ngangu na gbele atara so e yeke wara na yâ kusala ti e teti Nzapa (Matthieu 24:13). Tongana e sala tongaso, e yeke zia ngia na bê ti Jéhovah.​—aProverbe 27:11.

Lege ti sala si maboko awara ngangu

A-Juif ti ngoi ti Esdras ayeke lani na bezoin ti sala si maboko ti ala awara ngangu, tongana ti so a tene na yâ mbeti ni na yanga ti Hébreu, si ala lingbi ti hunzi lekengo temple ti Jéhovah na Jérusalem. A sala lani tongana nyen si maboko ti ala awara ngangu? Tondo ni atene: “Ala bata fête ti mapa so a sala na mama ni pëpe, ala bata fête ni na tâ ngia teti lâ mbasambala; teti L’Eternel asala si ala yeke na tâ ngia, na Lo gbian bê ti gbia ti Assyrie si lo sala na ala na yâ kusala ti da ti Nzapa, Nzapa ti Israël.” (Esdras 6:22). A yeke polele so a yeke biani na lege ti ngangu ti lo so lo sala na kusala si Jéhovah azingo yingo ti “gbia ti Assyrie” ti zi lege na azo ti Lo ti kiri na ndo ti ala, na Lo mû wâ na bê ti azo ni, si ala hunzi kusala so ala to nda ni.

Na pekoni, tongana a hunda ti leke ambeni mbage ti gbagba ti Jérusalem so abuba, Néhémie asala si maboko ti aita ti lo Juif awara ngangu ti sala kusala ni. E diko: “Mbi fa na ala tënë ti tïtî Nzapa ti mbi so ayeke nzoni na ndo mbi, na tënë so gbia atene na mbi nga. Na ala tene, Zia e londo, e sala kusala so. Tongaso ala kpengba ti sala nzo kusala so.” Teti so maboko ti ala awara ngangu awe, Néhémie na afon lo Juif awara lege ti leke agbagba ti Jérusalem gi na yâ ti alango 52!​—Néhémie 2:18; 6:9, 15.

Legeoko nga, Jéhovah akpengba maboko ti e ti fa nzo tënë ti Royaume (Matthieu 24:14). Lo yeke sala ni na ‘salango si e ga azo so alingbi kue na lege ti nzoye kue si e lingbi sala ye so Lo ye’. (aHébreu 13:21). Lo zia na yâ maboko ti e agbakuru ti nzoni ahon atanga ni kue. E yeke na Bible na e yeke nga na abuku, apériodique, abrochure, atract, akasete ti mango ni nga na akasete vidéo, so kue aluti na ndo Bible, na so e yeke sala na kusala ti ndu bê ti azo na ndo sese kue. Biani, a lingbi ti wara ambeti ti e na ayanga ti kodoro ahon 380 tongaso. Na ndo ni, na lege ti abungbi ti kongregation nga na akota bungbi, Jéhovah ayeke fa na e tongana nyen ti sala kusala na anzoni gbakuru so na yâ kusala ti e ti fango tënë nzoni.

Atâa so Jéhovah ayeke sala si maboko ti e awara ngangu na yâ ti alege mingi, lo yeke ku nga na mbage ti e ti sala ngangu e mveni. Dabe mo na ye so prophète Élisée atene na gbia Joas so aga na mbage ti lo ti wara mungo maboko ti tiri na aturugu ti Syrie so aye ti mû kodoro ni. Élisée ahunda na gbia ni ti kamata gbâ ti kondoro na ti pika ni na sese. Tondo ti Bible ni atene: “Lo pika na sese lege ota, na lo zia. Ngonzo asala zo ti Nzapa na tele ti Joas, lo tene, A lingbi mo pika na sese lege oku wala omene, si mo hon azo ti Syrie na bira juska mo fâ ala kue; me fadeso, fade mo hon azo ti Syrie gi lege ota.” (2 aGbia 13:18, 19). Teti lo sala ye na wâ mingi pëpe, Joas ayeke hon nga na ngangu azo ti Syrie lege mingi pëpe.

Oko kpengba-ndia so abâ e nga laso tongana e ye ti sala ye so Jéhovah ahunda na e ti sala. A hon ti gi bê na ndo akpale so ayeke ku e wala tongana nyen si kusala ni alingbi ti duti ngangu na e, a lingbi e sala ni na wâ nga na bê kue. A hunda na e ti sala si maboko ti e awara ngangu na ti bâ ndo na mbage ti Jéhovah teti mungo maboko.​—Esaïe 35:3, 4.

Fade Jéhovah asala si maboko ti e awara ngangu

Fade Jéhovah ayeke manke pëpe ti sala si maboko ti e awara ngangu ti sala ye so bê ti lo aye. Tâ tënë, Nzapa ayeke sala ande pëpe mbeni miracle, na lo yeke sala kue pëpe teti e. Lo ku ti tene e sala mbage ti e: dikongo Bible lâ na lâ, lekengo tele teti abungbi nga guengo lakue dä, mungo mbage na kusala ti fango tënë fani mingi tongana lege ayeke dä, nga sambelango lo lakue. Tongana e sala mbage ti e na be-biani nga na bê kue tongana lege ti sala ni ayeke dä, fade Jéhovah ayeke mû ngangu na e ti sala ye so lo ku na mbage ti e.​—aPhilippien 4:13.

Bâ tapande ti Chrétien so: gi na yâ ti ngu oko, wali ti lo na mama ti lo akui. Vundu ni ade ti hunzi pëpe na bê ti lo tongana wali ti molenge ti lo ti koli ake molenge ti lo ni, na lo zia tâ vorongo. Ita-koli so atene: “Mbi bâ so e lingbi pëpe ti soro atara so ayeke si na e, e lingbi pëpe ti fa lawa si ayeke ga, wala même fani oke si ayeke si.” Tongana nyen lo wara ngangu ti hon ndo ti aye so? Lo tene: “Sambela na mandango Bible mbi mveni amû maboko na mbi ti yä li ti mbi na nduzu na yâ ti aye ti ngangu so. Nga, mungo maboko so alondo na aita ti mbi ti koli na ti wali na lege ti yingo adë bê ti mbi ngangu. Me a hon tanga ti aye kue, na ndani mbi bâ nene ti lë nzoni songo na Jéhovah kozoni si akpale abâ gigi.”

Atâa ye so asi na mo na yâ fini ayeke so wa, gi lege ti zia bê ti mo kue na Jéhovah, na ti sala kusala nzoni na aye kue so lo mû ti sala si maboko ti mo awara ngangu. Na nda ni, fade mo yeke wara lege ti sala kusala ti nzoni ahon teti Jéhovah, na tongaso ti sepela, na ti mû gonda na iri ti lo so ayeke na ngele ngangu.​—aHébreu 13:15.

[Foto na lembeti 31]

Teti so lo sala ye na wâ mingi pëpe, Joas ahon azo ti Syrie na ngangu lege mingi pëpe