“Fade lo ga ndulu na i”

‘Nzapa ayeke yongoro pëpe na e oko oko kue’.​—KUSALA 17:27.

MO BI lê ti mo mbeni lâ awe na nduzu na mbeni bï ti bâ atongoro, na bê ti mo adö pëpe? Bango atongoro so ayeke gbâ ni gbâ ni nga na kota ti lê ti nduzu asala si bê ti zo adö na mbito. Na yâ ti kota ndagigi so, sese ayeke ye oko pëpe. Me aye ti tene so Wasalango ye, “Lo Ti Nduzu Ahon Kue na ndo sese kue”, ayo na nduzu kâ mingi si lo lingbi ti bi bê ti lo na azo pëpe? Wala azo alingbi ti si nga ndulu na lo pëpe ti hinga lo?​—Psaume 83:19.

² Bible afa na e so azo ane mingi na lê ti Jéhovah. Ni la, Mbeti ti Nzapa awa e ti gi lo tongaso: “Lo yeke yongoro pëpe na e oko oko kue”. (Kusala 17:27; 1 Chronique 28:9). Biani, tongana e sala ambeni ye ti ga ndulu na Nzapa, lo yeke sala nga ambeni ye. Lo yeke sala nyen? Atënë ti versê teti ngu 2003 amû kiringo tënë so amû wâ na bê, a tene: “Fade Lo ga ndulu na i.” (Jacques 4:8). Zia e bâ ambeni ye ti nzoni so Jéhovah atuku na ndo ala so ayeke ndulu na lo.

Jéhovah mveni ayeke mû matabisi na zo

³ Awakua ti Jéhovah ayeke na mbeni matabisi ti ngele ngangu so lo bata ni gi ndali ti ala. Angangu kue, amosoro, nga na aye so sese so ayeke na ni alingbi ti mû mara ti matabisi so pëpe. A yeke mbeni matabisi so Jéhovah mveni ayeke mû na zo, mbilimbili na ala so ayeke ndulu na lo. A yeke nyen? Mbeti ti Nzapa akiri tënë na ni: “Tongana . . . mo dekongo ti bâ nda ti ye, tongana mo ngbâ ti gi ni tongana argent, nga si mo kiri mo gi ni lakue tongana mosoro so ahonde, tongaso, fade mo hinga nda ti kpengo mbito ti Jéhovah, na fade mo wara tâ hingango ye ti Nzapa. Teti Jéhovah mveni ayeke mû ndara.” (aProverbe 2:3-6, NW). Bâ kete si, azo so ayeke mbilimbili-kue pëpe alingbi ti wara “tâ hingango ye ti Nzapa”! Hingango ye so ayeke na yâ Mbeti ti Nzapa ayeke mbeni matabisi so a haka ni na “mosoro so ahonde”. Ngbanga ti nyen?

⁴ Kozoni kue, a yeke ngbanga ti so hingango ye ti Nzapa ayeke na kota ngele. Mbeni oko ti apendere ye ti nzoni so lo mû ayeke beku ti duti na fini ti lakue lakue (Jean 17:3). Me hingango ye so ayeke sala même si gigi ti e anzere laso. Na tapande, mandango Mbeti ti Nzapa nzoni amû lege na e ti wara akiringo tënë na ahundango tënë tongana: Iri ti Nzapa ayeke nyen? (Genèse 22:14). Tâ dutingo ti akuâ ayeke so wa? (Zo-ti-fa-tene 9:5, 10). Ye nyen Jéhovah aleke ti sala teti sese nga teti azo? (Esaïe 45:18). E manda nga awe so batango awango ti Bible so asi singo na ndara asala si e duti na mbeni fini so ayeke nzoni mingi (Esaïe 30:20, 21; 48:17, 18). Na lege so, e yeke na mbeni nzoni wango so amû maboko na e ti luti na gbele akpale ti dunia nga ti duti na mbeni fini so amaï tâ ngia nga na nzerengo tele. A hon ye kue, teti so e manda Mbeti ti Nzapa, a mû lege na e ti hinga apendere lengo ti Jéhovah na ti ga ndulu na lo. Kota songo so e lë na Jéhovah so aluti na ndo ‘tâ hingango ye ti lo’, mbeni ye ayeke dä so alingbi ti hon ni?

⁵ Mbeni raison nde ayeke dä so afa ngbanga ti nyen a lingbi ti haka hingango ye ti Nzapa na “mosoro so ahonde”. Tongana mingi ti amosoro, a yeke ngangu ti wara ni na ndo sese so. Tongana a mû wungo ti azo kue na ndo sese, so ayeke ngbundangbu omene na ndo ni, awavorongo Jéhovah so awara “tâ hingango ye ti Nzapa” ayeke gi kutu omene. So ti tene zo oko na popo ti azo 1 000. Ti fa tongana nyen warango tâ tënë ti Mbeti ti Nzapa ayeke mbeni mosoro, zia e bâ gi mbeni hundango tënë oko ti Bible: Tongana zo akui, ye nyen ayeke si na lo? E hinga so Bible afa so âme ayeke kui na so akuâ ahinga ye oko pëpe (Ezéchiel 18:4). Me, na ndo tënë ti wataka so a tene mbeni ye na yâ tele ti zo ayeke ngbâ na fini na peko ti kuâ ti lo, mingi ti alege ti vorongo ti sese so ayeda na ni. A yeke mbeni kota tënë ti mabe ti alege ti vorongo ti Chrétienté. A mû nga yâ ti Bouddhisme, Hindouisme, Islam, Jaïnisme, Judaïsme, Shinto, Sikhisme, nga na Taoïsme. Pensé kete si, tâ gi oko tënë ti mabe ti wataka so, azo ngbundangbu mingi atï na yâ ni!

⁶ Me ngbanga ti nyen azo mingi awara “tâ hingango ye ti Nzapa” pëpe? Ngbanga ti so zo oko alingbi ti gbu nda ti Tënë ti Nzapa pëpe gi tongana Lo mû maboko na lo si. Girisa pëpe so hingango ye so ayeke mbeni matabisi. Jéhovah ayeke mû ni gi na ala so, na nzoni bê nga na tâ be-ti-molenge, aye ti hinga nda ti Tënë ti lo. Peut-être “sese so abâ ala tongana awandara” pëpe (1 aCorinthien 1:26). Peut-être na lê ti azo, mingi ti ala ayeke “azo so amanda mbeti pëpe, na ala yeke azo senge”. (Kusala 4:13). Me a sala ye oko pëpe. Jéhovah amû na e ‘tâ hingango ye ti lo’ ngbanga ti so lo bâ anzoni ye na yâ bê ti e.

⁷ Bâ mbeni tapande. Awandara mingi ti Chrétienté asigigi na ambeti so asala tënë mingi na ndo Bible. Peut-être ambeti ni so afa tënë na ndo aye so asi giriri, nda ti atënë na yanga ti Hébreu nga na Grec, nga na ambeni ye nde. Atâa aye kue so ala manda, awandara so awara biani “tâ hingango ye ti Nzapa”? Kota li ti tënë ti Bible so ayeke fango na gigi mbilimbili ti kota yanga-ti-komande ti Jéhovah na lege ti Royaume ti lo ti yayu, ala hinga nda ni nzoni? Ala hinga so Jéhovah Nzapa ayeke pëpe mbage ti Nzapa ti Li Ota? Ti e, e gbu nda ti atënë so nzoni mingi. Ngbanga ti nyen? Ngbanga ti so Jéhovah amû na e lege ti hinga nda ti atâ tënë ti yingo so mingi ti “azo ti ndara, nga na azo ti hingango ye” awara ni pëpe (Matthieu 11:25, Buku ti Nzapa, Fini Mbuki). So tâ deba nzoni si Jéhovah atuku na ndo ala so ayeke ndulu na lo!

‘Jéhovah abata ala kue so andoye Lo’

⁸ Mbeni ye nde ti nzoni so azo so ayeke ndulu na Jéhovah awara ni ayeke batango ndo ti lo. Wasungo psaume David, so awara lani gbâ ti akpale, atene: “L’Eternel ayeke ndulu na azo kue so adi iri ti Lo, ala so adi iri ti Lo na lege ti tene-biani. Lo mû na ala so akpe mbito ti Lo ye so bê ti ala aye, Lo mä toto ti ala, na Lo sö ala. L’Eternel abata ala kue so andoye Lo”. (Psaume 145:18-20). Tâ tënë, Jéhovah ayeke ndulu na ala so aye lo. Tongaso, lo yeke kiri tënë hio tongana ala toto ti wara mungo maboko.

⁹ Ngbanga ti nyen e yeke na bezoin ti tene Jéhovah abata e? Na ndo ti “lâ ti ye ti ngangu” so ayeke ne na ndo atâ Chrétien, lê ti Satan Zabolo, kota wato ti Jéhovah, ayeke gi na ndo ti ala ti sala sioni na ala (2 Timothée 3:1). Wato so, so ayeke na mayele mingi, aye ti “te” gi e tengo (1 Pierre 5:8). Satan ayeke sala ngangu na e, lo yeke ga na akpale na e, nga lo yeke tara e. Lo yeke gi nga ti bâ dutingo ti bibe nga na ti bê ti azo so lo lingbi ti tï na ndo ni ti sala sioni na ala. Ti lo, lo ye ti woko mabe ti e na ti futi dutingo ti e na lege ti yingo (Apocalypse 12:12, 17). Teti so e yeke na mara ti ngangu wato tongaso ti tiri na lo, ti hinga so ‘Jéhovah abata ala kue so andoye Lo’ adë bê ti e pëpe?

¹⁰ Tongaso, Jéhovah ayeke bata azo ti lo tongana nyen? Teti so lo zê ti bata e, a ye ti tene pëpe so akpale ti laso ayeke tï na ndo ti e pëpe; a ye nga pëpe ti tene so lo yeke duti ande gi forcé ti sala aye ti kpene na e. Atâa so kue, Jéhovah ayeke bata si azo ti lo angbâ lakue. Teti biani, lo yeke yeda lâ oko pëpe ti tene Zabolo ahunzi azo ti lo na ndo sese so! (2 Pierre 2:9). A hon ye kue, Jéhovah ayeke bata e na lege ti yingo. Lo mû na e aye so e yeke na bezoin ni ti gbu ngangu na gbele atara na ti bata nzoni songo na lo. Na nda ni, a yeke batango ndo na lege ti yingo si ayeke kota ye mingi. Ngbanga ti nyen? Ngbanga ti so, tongana e ngbâ lakue ti lë songo na Jéhovah, ye oko pëpe, même kuâ, alingbi ti sala sana na e lakue lakue.​—Matthieu 10:28.

¹¹ Jéhovah aleke aye mingi ti bata na lege ti yingo azo so ayeke ndulu na lo. Na lege ti Tënë ti lo, Bible, lo mû na e ndara ti hon ndo ti atara nde nde (Jacques 1:2-5). Salango ye alingbi na wango so awara na yâ Mbeti ti Nzapa abata zo. Nga, Jéhovah amû “Yingo Vulu na ala so ahunda Lo”. (Luc 11:13). Yingo so ayeke tâ ngangu so ahon atanga ni kue na yâ ndagigi. Ni la, lo lingbi biani ti leke e nzoni ti hon ndo ti atara kue so alingbi ti si na e. Na lege ti Jésus, Jéhovah amû ambeni ‘koli tongana matabisi.’ (aEphésien 4:8). Akoli so, so akpengba na lege ti yingo, ayeke sala kue ti fa na gigi mara ti nzobe ti Jéhovah na mungo maboko na afon ala awamabe.​—Jacques 5:14, 15.

¹² Jéhovah amû nga mbeni ye nde ti bata na e: kobe ti yingo na ngoi so alingbi (Matthieu 24:45). E yeke na ambeti so asigigi, so na popo ni a yeke wara nga Tour ti Ba Ndo na Réveillez-vous! Na mbage, e yeke na abungbi nga na a-assemblée. Na lege ti aye so kue, Jéhovah amû na e ye so e yeke na bezoin ni na ngoi so a lingbi. Mo lingbi ti dabe ti mo na mbeni tënë so mo mä mbeni lâ na abungbi ti aChrétien nga na a-assemblée so andu bê ti mo na akpengba mo, wala so adë bê ti mo? Mo diko mbeni lâ awe mbeni oko ti ambeti so e sala tënë ni ge, na mo tene so a sû ni gi teti mo?

¹³ Bê so anze ayeke mbeni oko ti aye ti bira ti Satan so akinda azo mingi, na a zi e pëpe na gbe ti aye so aga na pekoni. Tongana bê ti e ayeke na vundu a ninga, a lingbi ti woko e nga ti sala si e tï na gbe ti Satan, na lo hinga so nzoni (aProverbe 24:10). Teti so, tongana lege azi na lo, Satan ayeke hulu na ndo ti bê so anze, ndali ni e yeke na bezoin ti wara mungo maboko. Ngoi na ngoi, Tour ti Ba Ndo na Réveillez-vous! ayeke sigigi na ambeni article so amû maboko na e ti hon ndo ti kpale ti bê so anze. Na ndo mbeni article tongaso, mbeni ita-wali asû mbeti, lo tene: “Mbi yeke diko mbeti ni so mingi, na atâa so kue ngu ti lê ti mbi angbâ lakue ti yuru. Mbi zia ni na tele ti gbogbo ti mbi, si tongana bê ti mbi anze, mbi lingbi diko ni. Na lege ti ambeti tongaso, mbi lingbi ti bâ so maboko ti Jéhovah ayeke na ndo ti mbi.” Teti so Jéhovah amû na e kobe ti yingo na ngoi so alingbi, e yeke mû merci na lo pëpe? Girisa pëpe so aye so lo leke teti nzoni ti e na lege ti yingo afa polele so lo yeke ndulu na e na lo yeke bata e.

Lege ti si na ‘Lo so amä sambela’

¹⁴ Tongana azo awara kota ndo, mingi ni a yeke ngangu ti tene zo asi ndulu na ala. A yeke ye so mo bâ pëpe? Ka ti Jéhovah Nzapa, a yeke tongana nyen? Lo yeke yongoro mingi si lo lingbi ti mä pëpe sambela so asenge zo ayeke tene na lo? A yeke tongaso pëpe! Matabisi ti sambela ayeke nga mbeni deba nzoni so Jéhovah amû na ala so ayeke ndulu na lo. Lege so azi senge senge na zo ti si na ‘Lo so amä asambela’ ayeke biani mbeni kota matabisi (Psaume 65:3). Ngbanga ti nyen?

¹⁵ Zia e mû mbeni tapande: Tongana mbeni zo ayeke mokonzi ti mbeni kota ndokua, lo yeke na gbâ ti akungba ti yô. Lo yeke soro akusala wa a lingbi lo sala ni lo mveni, na so wa si lo yeke zia na tïtî ambeni zo. Legeoko nga, Kota Gbia ti ndagigi ayeke bâ nga atënë wa a lingbi lo mveni lo bâ lege ni, nga ala so wa si lo yeke zia na tïtî mbeni zo nde. Bâ ye kue so Jéhovah azia na tïtî Molenge ti lo, Jésus, so Lo ye lo mingi! Lo mû “lege na Molenge ni ti fâ ngbanga”. (Jean 5:27). ‘Lo zia a-ange . . . na gbe ti Molenge ni.’ (1 Pierre 3:22). Jéhovah amû na Jésus yingo vulu ti lo so ayeke ngangu mingi ti mû maboko na lo ti fa lege na adisciple ti lo na ndo ti sese (Jean 15:26; 16:7). Ni la, Jésus alingbi lani ti tene: “A mû na Mbi ngangu kue na yayu na sese.” (Matthieu 28:18). Me, tongana a ndu tënë ti asambela ti e, Jéhovah abâ so a lingbi lo mveni si lo mä ni. A yeke ndali ni si Bible awa e ti sambela gi Jéhovah, na iri ti Jésus.​—Psaume 69:14; Jean 14:6, 13.

¹⁶ Jéhovah ayeke mä biani sambela ti e? Tongana fade lo yeke mä ni pëpe, ka lo yeke wa e lâ oko pëpe ti “zia ti sambela pëpe” wala ti zia akungba nga na agingo bê ti e na ndo ti lo (aRomain 12:12; Psaume 55:23; 1 Pierre 5:7). Na ngoi so a sû na Bible, awakua be-ta-zo ti Jéhovah ahinga biani so Jéhovah ayeke mä sambela (1 Jean 5:14). Ni la, wasungo psaume David atene: ‘Jéhovah amä yanga ti mbi.’ (Psaume 55:18). A yeke senge pëpe si e nga kue e hinga so Jéhovah ayeke ndulu ti mä atënë ti bê nga na agingo bê ti e.

Jéhovah ayeke futa awakua ti lo

¹⁷ Atâa tongana asenge zo asala mbeni ye wala ala ke ti sala ni, a yeke sala ye oko pëpe na ndo dutingo ti Jéhovah tongana Gbia ti ndagigi. Me atâa so kue, Jéhovah ayeke mbeni Nzapa so ayeke ndulu ti fa nzobe. Lo yeke bâ na nene ni na lo yekia kusala so azo na a-ange nga ayeke sala na be-biani (Psaume 147:11). Bâ mbeni ye ti nzoni so ala so ayeke ndulu na Jéhovah ayeke wara nga: Lo yeke futa awakua ti lo.​—aHébreu 11:6.

¹⁸ Bible afa polele so Jéhovah abâ na nene ni aye so awakua ti lo ayeke sala. E diko na tapande: “Zo so asala be-nzoni na awanzinga, lo mû ye na L’Eternel ti perdé, na fade L’Eternel afuta lo teti nzo kusala ti lo.” (aProverbe 19:17). Ndia ti Moïse afa polele be-nzoni so Jéhovah ayeke na ni na mbage ti azo so ayeke na ye mingi pëpe (Lévitique 14:21; 19:15). Tongana e mû peko ti Jéhovah na salango nzobe na azo so ayeke na ye mingi pëpe, lo yeke bâ e tongana nyen? Tongana e mû ye na zo so ayeke na ye mingi pëpe, na e ku ti wara mbeni ye na pekoni pëpe, Jéhovah abâ ni tongana mbeni bon so e sala na Lo. Lo mû zendo ti futa ni na e na lege ti nzobe nga na adeba nzoni ti lo (aProverbe 10:22; Matthieu 6:3, 4; Luc 14:12-14). Tâ tënë, tongana e sala nzobe na mbeni fon e wakua so ye atia lo, a yeke ndu bê ti Jéhovah. Bâ tongana nyen e yeke na bê ti kiri singila ti bâ so nzobe so e sala na azo ahon senge pëpe na lê ti Babâ ti e ti yayu!​—Matthieu 5:7.

¹⁹ Jéhovah abâ mbilimbili na nene ni ye so e sala teti Royaume ti lo. Tongana e ga ndulu na Jéhovah, bê ti e ayeke pusu e biani ti mû ngoi ti e, ngangu ti e, nga na amosoro ti e teti kusala ti fango nzo tënë ti Royaume nga ti salango adisciple (Matthieu 28:19, 20). Na ambeni ngoi, e lingbi ti tënë so ye so e sala ayeke ye oko pëpe. Bê ti e so ayeke mbilimbili-kue pëpe alingbi même ti pusu e ti hunda wala aye so e sala anzere na Jéhovah (1 Jean 3:19, 20). Me Jéhovah ayeke bâ na nene ni mingi amatabisi kue so alondo na bê so asi singo na ndoye, atâa tongana matabisi ni ayeke kete tongana nyen (Marc 12:41-44). Bible adë bê ti e, a tene: “Nzapa ayeke kirikiri pëpe si Lo lingbi girisa kusala ti i, ndoye so i fa giriri teti iri ti Lo”. (aHébreu 6:10). Biani, Jéhovah adabe ti lo na lo futa même kete ye so ahon atanga ti aye kue, so a sala ni ti mû maboko na Royaume ti lo. Nde na akota deba nzoni ti yingo so e wara fadeso, e lingbi ti duti na beku ti duti na ngia na yâ fini sese so ayeke ga, so na yâ ni Jéhovah ayeke zi ande maboko ti lo kota ti kaï anzara ti bê so ayeke mbilimbili ti azo kue so ayeke ndulu na lo!​—Psaume 145:16; 2 Pierre 3:13.

²⁰ Na yâ ti ngu 2003 so kue, zia e hunda tele ti e wala e ngbâ lakue ti sala ngangu ti ga ndulu na Babâ ti e ti yayu. Tongana e sala tongaso, e lingbi ti duti na beku so lo yeke ga ndulu na e tongana ti so lo tene kozoni awe. Teti biani, “Nzapa . . . alingbi sala mvene pëpe”. (Tite 1:2). Tongana mo ga ndulu na lo, lo yeke ga ande ndulu na mo (Jacques 4:8). Na nzoni ye ti pekoni ayeke so mo yeke wara gbâ ti adeba nzoni fadeso nga na beku ti ga ndulu na Jéhovah ahon ti kozo teti lakue lakue!

Mo dabe mo na ni?

• Matabisi wa Jéhovah amû na ala so aga ndulu na lo?

• Aye wa Jéhovah aleke ti bata na azo ti lo na lege ti yingo?

• Ngbanga ti nyen lege so azi senge senge na zo ti si na Jéhovah ayeke mbeni kota matabisi?

• Tongana nyen Bible afa so Jéhovah abâ na nene ni aye so azo ti lo ayeke sala na be-biani?

[Ahundango Tene ti Manda na Ye]

1, 2. (a) Tongana e bi lê ti e na nduzu ti bâ atongoro, tënë wa e lingbi ti hunda na ndo Wasalango ye? (b) Tongana nyen Bible afa na e so azo ane na lê ti Jéhovah?

3. Matabisi wa Jéhovah amû na ala so aga ndulu na lo?

4, 5. Ngbanga ti nyen a lingbi ti haka “tâ hingango ye ti Nzapa” na “mosoro so ahonde”? Mû mbeni tapande.

6, 7. (a) Gi azo wa si alingbi ti wara “tâ hingango ye ti Nzapa”? (b) Atapande wa afa so Jéhovah amû lege na e ti hinga ye so “azo ti ndara, nga na azo ti hingango ye” awara pëpe?

8, 9. (a) Tongana nyen David afa mbeni ye ti nzoni nde so azo so ayeke ndulu na Jéhovah ayeke wara? (b) Ngbanga ti nyen atâ Chrétien ayeke na bezoin ti tene Nzapa abata ala?

10. (a) Jéhovah ayeke bata azo ti lo tongana nyen? (b) Mara ti batango ndo wa ayeke kota ye mingi, na ngbanga ti nyen?

11. Aye wa Jéhovah aleke ti bata na azo ti lo na lege ti yingo?

12, 13. (a) Na lege ti aye wa Jéhovah ayeke mû na e kobe ti yingo na ngoi so alingbi? (b) Mo bâ ti mo tongana nyen aye so Jéhovah amû teti nzoni ti e?

14, 15. (a) Ye wa Jéhovah amû na ala oko oko so ayeke ndulu na lo? (b) Ngbanga ti nyen lege so azi senge senge ti si na Jéhovah na yâ sambela ayeke mbeni kota matabisi?

16. Ngbanga ti nyen e lingbi ti duti na beku so Jéhovah ayeke mä biani asambela ti e?

17, 18. (a) Tongana nyen Jéhovah ayeke bâ aye so azo ti lo asala na be-biani? (b) Fa tongana nyen aProverbe 19:17 afa so akusala ti e ti nzobe ahon senge pëpe na lê ti Jéhovah.

19. (a) Ngbanga ti nyen e lingbi ti hinga biani so Jéhovah abâ na nene ni ye so e sala na yâ kusala ti fango tënë nga na ti salango adisciple? (b) Tongana nyen Jéhovah afuta akusala so a sala ti mû maboko na Royaume ti lo?

20. Na yâ ti ngu 2003 so kue, tongana nyen e lingbi ti bata na li atënë ti versê ti ngu so? Na ye nyen ayeke ga na pekoni?

[Foto na lembeti 15]

Jéhovah amû na e lege ti hinga atâ tënë ti yingo

[Afoto na lembeti 16, 17]

Jéhovah ayeke bata e na lege ti yingo

[Foto na lembeti 18]

Jéhovah ayeke yongoro pëpe, lo yeke ndulu ti mä sambela ti e kue