“I ga ndulu na Nzapa, na fade lo ga ndulu na i”
Ândo nga laso: Ngangu ti Tënë ti Nzapa
TONGANA mo tingbi lani na Tony na ngoi so lo yeke na ngu 14 tongaso, ka mo yeke bâ na lê ti mo mbeni molenge ti koli so salango ye ti tele ti lo ayeke sioni mingi nga mbeni zo ti salango ngangu na azo. Mo yeke wara lo gi na asioni ndo ti gbata ti Sydney, na Australie. Lo yeke fono lani gi na azo so ayeke na yâ ti bungbi ti azo so asala ngangu na amba ti ala. Mingi ni, ala yeke nzi aye, ala yeke tiri na ambeni bungbi nde ti azo ti salango ngangu, nga ala yeke pika ngombe na popo ti ala na lege.
Tony ato nda ti nyon manga tongana lo yeke lani na ngu gumbaya. Na ngu 14, lo yeke nyon mbangi mingi nga tambela ti lo ayeke kirikiri. Na ngoi so lo wara ngu 16, lo ga ngbâa ti mara ti angangu mbangi nde nde. Lo mveni lo tene: “Mbi ye lani ti nyon ye kue so alingbi ti sala si tele ti mbi anzere ahon ndo ni.” Na pekoni, lo vo ambangi na tïtî ambeni zo so ayeke na yâ ti akota bungbi use so asala aye ti sioni, nga lo yeke kä ni. A ninga pëpe, na mbage ti tö ti Australie, a hinga Tony tongana mbeni oko ti azo so zo alingbi ti wara lakue mbangi na tïtî lo.
Lâ oko oko, nginza so Tony ayeke futa lani ti vo na mara ti ambangi use so lo yeke nyon ka ni ayeke na popo ti pata 105 000 nga na pata 216 000. Me sewa ti lo abâ nga pasi na yâ alege mingi. Lo tene: “Azo so ayeke gi ti wara ambangi nga na nginza so ayeke na yâ da ti e ayôro fani mingi ngombe nga na azembe na lê ti mbi nga na lê ti wali ti mbi.” Me, kanga so lo sala ni fani ota apusu Tony ti bâ ndo so gigi ti lo ayeke gue na lo dä.
Atâa so lo yeke gue ka lani na église, ti Tony, lo yeke yongoro mingi na Nzapa, Nzapa so azo atene lo yeke gbi azo ti siokpari na lê ti wâ. Me tongana aTémoin ti Jéhovah use aga ti bâ lo, bê ti Tony adö ti mä so Nzapa ayeke tongaso pëpe. Tele ti lo anzere mingi ti bâ so lo lingbi ti leke gigi ti lo nzoni na ti wara adeba nzoni ti Nzapa. Mbeni tënë so Jésus Christ atene asala ye na ndo Tony. A tene: “Nzapa alingbi sala ye kue.” (Marc 10:27). Me mbilimbili pendere tënë so atene, “I ga ndulu na Nzapa, na fade Lo ga ndulu na i”, a yeke ni si agbu bê ti lo mingi.—Jacques 4:8.
Kpale ti Tony ni fadeso ayeke ti sala ye alingbi na aye so Bible ahunda. Lo tene: “Kozo ye so mbi zia lege ni ayeke nyongo manga. Mbi tara lani fani mingi ti zia lege ni, me a kara mbi. Teti angu 15, mbi yeke nyon lani ambangi nde nde, me na pekoni, na ngangu ti Jéhovah, mbi zia lege ti nyongo ni. Mbi pensé lâ oko pëpe so mbeni lâ mbi yeke sigigi dä.”
Ahon ti sala mbito ti mbeni Nzapa so asala pasi na azo kpu na kpu na lê ti wâ (tënë so alondo na Bible pëpe), Tony na wali ti lo ayeke fadeso na beku ti duti na fini teti lakue lakue na ndo sese so ayeke ga ande paradis (Psaume 37:10, 11; aProverbe 2:21). Tony atene: “Ti tene mbi sala ye alingbi na aye so Nzapa ahunda, a mû ngoi mingi nga a hunda na mbi ti sala ngangu mingi. Me na lege ti ngangu ti Jéhovah, mbi wara lege ti sala ni.”
Biani, ngbele ngbâa ti mbangi so aga mbeni Chrétien. Lo na wali ti lo, ala yeda ti mû ngoi ti ala nga na amosoro ti ala ti sala na kusala ti fango Mbeti ti Nzapa na azo teti l’heure saki mingi. Ala yeke bata nga amolenge ti ala use so ayeke sala na Nzapa. Kota gbiango ye so, a yeke gi ngangu ti Tënë ti Nzapa, Bible, si ayeke na gunda ni. Biani, tongana ti so bazengele Paul atene, “Tënë ti Nzapa ayeke na fini, na a yeke na ngangu ti sala ye”.—aHébreu 4:12.
Atâa apendere tapande so, ambeni zo atene na lege ni pëpe so fango ye ti aTémoin ti Jéhovah, so aluti na ndo Bible, ayeke kangbi yâ ti asewa nga ayeke buba yeke yeke anzoni salango ye ti amaseka. Me tapande ti Tony afa biani so tënë ni so ayeke mvene.
Legeoko tongana Tony, azo mingi amanda so zo alingbi ti hon ndo ti dutingo ngbâa ti ambeni ye so alingbi ti sala sioni na tele ti lo. Tongana nyen? Na mango na bê na Nzapa nga na ziango bê kue na lo nga na Tënë ti lo. A-Chrétien so ayeke na ndoye nga so ayeke bi bê na amba ti ala ayeke mû nga maboko ti hon ndo ni. Na ngia na bê, Tony atene: “Mbi bâ tongana nyen akpengba-ndia ti Bible abata amolenge ti mbi. Aye so Bible afa abata mariage ti mbi. Nga avoizin ti mbi ayeke duti nzoni fadeso ngbanga ti so mbi yeke zia mbito na bê ti ala mbeni pëpe.”
[Kete tënë na lembeti 9]
‘Teti angu 15, mbi yeke nyon lani ambangi, me na pekoni, na ngangu ti Jéhovah, mbi zia lege ti nyongo ni’
[Atënë na lembeti 9]
Ngangu ti akpengba-ndia ti Bible
Akpengba-ndia ti Bible nde nde amû maboko awe na angbâa ti mbangi mingi ti zia lege ti asalango ye so ayeke buba zo yeke yeke. Na popo ti akpengba-ndia so, a wara ala so ge:
“Zia e sukula e mveni ti lungula sioni kue ti mitele na ti yingo; na lege ti mbito ti Nzapa, zia e ga azo ti be-vulu biani.” (2 aCorinthien 7:1). Nyongo mbangi ague nde na ndia ti Nzapa.
“Kpengo mbito ti L’Eternel ayeke komansema ti ndara; na ti hinga Lo Ti Nzoni-kue ayeke ti hinga nda ti ye.” (aProverbe 9:10). Kpengo mbito ti Jéhovah, tongana a luti na ndo tâ hingango ye ti lo nga na alege ti lo, amû maboko na azo mingi ti zia lege ti nyongo ambangi.
“Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sala si lege ti mo aga mbilimbili.” (aProverbe 3:5, 6). Tongana zo azia bê ti lo kue na Nzapa, lo lingbi ti zia lege ti asalango ye so alingbi ti ga na ye ti sioni na lo.