“I ga ndulu na Nzapa, na fade lo ga ndulu na i”

Ândö nga laso: Gigi ti lo achangé kue

BÂ TONGANA nyen gigi ti Matsepang aduti lani gi tongaso, na a nzere oko pëpe! Lo yeke lani mbeni maseka-wali na Lesotho, mbeni kodoro na bê ti Afrika ti Mbongo. Matsepang akono na yâ ti sewa so ayeke Catholique. Ahon ti tene a mû maboko na lo ti ga ndulu na Nzapa, teti angu mingi, amamère amû nginza na lo ti bungbi na lo.

Ye so asala si bê ti Matsepang aso na tele ti alege ti vorongo, na a yeke lani ngangu na lo ti mä na bê na mbeni Wasalango ye so ayeke na ndoye, so ayeke bi bê mingi na azo so lo leke. Teti so a bâ ndo oko pëpe na ndo ti lo, nga ndali ti ye ti sioni so asi na lo, bê ti Matsepang ayeke na kota vundu, nga lo bâ tele ti lo so lo yeke ye oko pëpe. Tongana lo kono, lo ga zo ti salango sioni na azo nga na ti tiri. Ye so ague na lo ti sala aye so ake ndia.

Na nda ni, Matsepang alï na yâ mbeni bungbi ti azo so ayeke nzi ye ti azo na yâ ti atrain. A gbu lo, na a bï lo na da ti kanga na Afrika ti Mbongo. Na pekoni, a kiri na lo na Lesotho, kodoro ti lo. Kâ, lo ngbâ ti sala gi aye so ake ndia, ti nyon samba ahon ndo ni, ti sala sioni na azo, na ti sala ndumba.

Tâ na ngoi so vundu ahon ndo ti lo kue, Matsepang asambela Nzapa ngangu ti mû maboko na lo. Lo mû yanga lo tene, “Nzapa, tongana mbi ngbâ na fini, mbi yeke sala ye kue so ayeke na ngangu ti mbi, ti sala na mo.”

A ninga pëpe, amissionnaire Témoin ti Jéhovah asi na Matsepang. Ala hunda na lo wala lo ye si ala manda Bible na lo. Na lege ti ye so lo manda, lo ga ti bâ so Nzapa ayeke bi bê biani na azo. Lo bâ nga so Satan, “babâ ti mvene”, ayeke sala kusala na amayele ti pusu azo ti bâ so ala lingbi pëpe, nga ti tene so ala lingbi ti nzere lâ oko pëpe na lê ti Jéhovah.​—Jean 8:44; aEphésien 6:11.

Me nde na so, so dengo bê si Matsepang awara ti manda so tongana e gbian bê ti e ndali ti asioni ye ti e ti giriri, e gi pardon ti Nzapa, na e sala kue ti nzere na lê ti lo, e yeke bâ tele ti e tongana zo. A mû maboko na lo ti hinga nzoni so “Nzapa ayeke kota ahon bê ti e”, na so lo yeke bâ e na mbeni lege so alingbi ti duti tâ nde mingi na ti so e yeke bâ na tele ti e mveni.​—1 Jean 3:19, 20.

Bê ti Matsepang anzere lani mingi ti diko atënë so ti wasungo psaume David: “L’Eternel ayeke ndulu na azo so bê ti ala afâ awe, na lo sö ala so yingo ti ala ayeke na vundu.” (Psaume 34:19). Teti so lo yeke mbeni oko ti azo so “yingo ti ala ayeke na vundu”, lo ga ti bâ so Jéhovah ayeke zia azo ti lo pëpe, même tongana vundu asala ambeni wala ala bâ so ala yeke ye oko pëpe. Bê ti lo aduti na ngia ti hinga so Nzapa ayeke bi bê na angasangbaga ti lo kue, na lo yeke mû maboko na ala na angoi ti ngangu (Psaume 55:23; 1 Pierre 5:6, 7). Me atënë so andu mbilimbili bê ti lo: “I ga ndulu na Nzapa, na fade Lo ga ndulu na i.”​—Jacques 4:8.

Ngoi kete na pekoni, a bâ ngangu ti Tënë ti Nzapa, Bible, na yâ fini ti Matsepang. Lo to nda ti gue na abungbi ti aChrétien lakue, nga lo zia ti sala aye so ague nde na Bible. Ye ti pekoni ayeke nyen? Nde na ti ândö, lo bâ so Nzapa ayeda na lo nga andoye lo. Ngbele ye na ngoi so lo wara batême tongana Témoin ti Jéhovah, lo sala angbonga saki mingi na yâ kusala ti fango nzo tënë ti Royaume na azo. Atâa akä ti bê so lo wara ngbanga ti aye ti giriri so asi na lo, Matsepang ayeke fadeso na ngia, nga lo hinga ye so lo gi na yâ fini ti lo. Biani, ye so ayeke fä ti ngangu so Bible ayeke sala na ndo fini ti azo!​—aHébreu 4:12.

[Kete tënë na lembeti 9]

“Nzapa, tongana mbi ngbâ na fini, mbi yeke sala ye kue so ayeke na ngangu ti mbi, ti sala na mo”

[Tënë na lembeti 9]

Ngangu ti akpengba-ndia ti Bible

Bâ ambeni ti akpengba-ndia ti Bible so adë bê ti azo so a sala sioni na ala:

“Tongana bibe [“agingo bê”, NW] ayeke mingi na bê ti mbi, tënë ti [Nzapa] so alungula vundu amû ngia na âme ti mbi.” (Psaume 94:19). Tënë ti Jéhovah so “alungula vundu”, so ayeke na yâ Mbeti ti lo, ayeke lingu ti kota dengo bê. Bingo bê na ndo ni na ngoi so e yeke gbu li ti e nga na yâ sambela ayeke kaï agingo bê ti e, nga ayeke sala si e zia bê ti e kue na Nzapa tongana mbeni Ndeko so ahinga nzoni mingi ye so asi na e.

“Azo so bê ti ala afâ awe, Lo [Jéhovah] sala si ala ga nzoni, na Lo kanga kä ti ala.” (Psaume 147:3). Tongana e mû merci ndali ti be-nzoni ti Jéhovah, nga ndali ti aye so lo leke ti pardone na asiokpari ti e na lege ti sandaga ti kota ngele ti Jésus, e lingbi ti ga ndulu na Nzapa na mbito pëpe, nga sân ti tene bê ti e afâ ngbanga na li ti e. E yeke wara dengo bê na siriri ti bibe so mara ni ayeke dä pëpe.

“Zo oko alingbi ga na mbi [Jésus Christ] pëpe, gi tongana Babâ so ato Mbi ahiri lo; na fade Mbi yä lo na lâ ti nda ni.” (Jean 6:44). Na lege ti yingo vulu ti lo nga na lege ti kusala ti fango tënë ti Royaume, Jéhovah lo mveni ayeke gboto e ndulu na Molenge ti lo, na lo mû na e beku ti wara fini ti lakue lakue.