Dë bê ti ala so ayeke na vundu

“L’Eternel asa mafuta na li ti Mbi . . . ti lungula vundu ti azo kue so atoto na vundu”.​—ESAÏE 61:1, 2.

JÉHOVAH, Nzapa ti lungula vundu kue, afa na e ti bi bê ti e na azo tongana ala wara akpale. Lo fa na e ti “lungula vundu ti ala so bê ti ala anze” na ti dë bê ti azo kue so ayeke toto na vundu (1 aThessalonicien 5:14). Tongana a hunda mara ti dengo bê tongaso, e yeke mû ni na aita ti e na yâ vorongo. E nga kue e yeke fa ndoye na mbage ti ala so ayeke na gigi ti kongregation, même na ala so giriri afa kete ndoye oko pëpe na mbage ti e.​—Matthieu 5:43-48; aGalate 6:10.

² Jésus Christ adiko lani mbeni tënë ti prophétie, na lo fa so a ga tâ tënë na ndo lo mveni; lo tene: “Yingo ti Seigneur L’Eternel ayeke na ndo Mbi, teti L’Eternel asa mafuta na li ti Mbi ti fa tene-nzoni na awanzinga; Lo to Mbi ti sala si bê ti zo so afâ awe aga nzoni, . . . ti lungula vundu ti azo kue so atoto na vundu”. (Esaïe 61:1, 2; Luc 4:16-19). A-Chrétien so a sa yingo na ndo ti ala ti ngoi ti laso ahinga ngbele ye awe, so tokua so alingbi nga na ala; na “ambeni ngasangbaga” ayeda na ngia ti sala kusala so legeoko na ala.​—Jean 10:16.

³ Tongana ambeni ye ti ngangu asi, na a sala si bê ti azo afâ na vundu na pekoni, fani mingi ala yeke hunda: “Ngbanga ti nyen Nzapa azia si aye ti ngangu asi?” Bible akiri tënë polele na hundango tënë so. Ye oko, a lingbi ti hunda ngoi teti mbeni zo so amanda Bible pëpe ti gbu nda ti kiringo tënë ni mbilimbili. Ambeti ti aTémoin ti Jéhovah alingbi ti mû maboko na zo na lege so.a Ye oko, na tongo nda ni, gi senge dikongo na yâ Bible mbeni versê tongana Esaïe 61:1, 2 adë bê ti ambeni zo, teti a ye ti fa so Nzapa aye si azo awara dengo bê.

⁴ Apendere nga na ambakoro ayeke tâ na kota nzara ti wara dengo bê. Mbeni maseka-wali ti Pologne so ayeke tâ na yâ kota vundu ahunda ti wara wango na mbage ti mbeni molenge-wali so lo hinga lo. Tongana lo yeke hunda ambeni tënë na lo na nzobe, ndeko ti lo ni so ayeke mbeni Témoin ti Jéhovah abâ so ahundango tënë nga na agingo bê ahon ndo ti molenge-wali ni; lo yeke hunda tele ti lo: “Ngbanga ti nyen sioye ahon ndo ni tongaso? Ngbanga ti nyen azo abâ pasi? Ngbanga ti nyen ngambe ti mbi ti wali anze na kobela? Ngbanga ti nyen kobela ti bê asala mbi? Église atene so Nzapa aye si aye ni aduti tongaso. Me tongana a yeke ni la, mbi yeke zia ti mä na bê na lo!” Témoin ni asambela na yâ bê ti lo na Jéhovah na lo tene na pekoni: “A nzere na mbi mingi so mo hunda tënë na mbi na ndo aye so. Fade mbi yeke tara ti mû maboko na mo.” Maseka-wali Témoin so afa na lo so lo nga kue lo wara akite ti lo mveni na ngoi so lo de kete molenge, na aTémoin ti Jéhovah amû maboko na lo. Lo tene: “Mbi manda so a yeke Nzapa pëpe si ayeke sala pasi na azo. Lo ndoye ala, lo ye nzoni ti ala so ahon atanga ni, na fade lo yeke gbian aye ngangu si ye aga nzoni na ndo ti sese. Fade kobela, gango mbakoro, na kui ayeke duti mbeni pëpe, na fade azo so amä yanga ayeke ngbâ ande teti lakue lakue, tâ na ndo sese so.” Lo fa na molenge-wali ni Apocalypse 21:3, 4; Job 33:25; Esaïe 35:5-7 na 65:21-25. Na pekoni so lo mû mbeni yongoro lisoro, so na yâ ni a lingbi ti bâ so lo wara dengo bê, molenge-wali ni atene: “Fadeso, mbi hinga nda ni so mbi yeke na fini. Mbi lingbi ti ga ti peko ti bâ mo?” A to nda ti manda Bible na lo fani use na yâ yenga.

Mû na azo dengo bê so Nzapa amû

⁵ Tongana e yeke gi ti dë bê ti ambeni zo, a yeke nzoni e sala atënë so afa so e yeke kangbi mawa ti amba ti e. Na lege ti atënë ti e nga na toto ti go ti e, e yeke sala kue ti fa na zo ni so ayeke na yâ vundu, so e yeke bi bê ngangu mingi na ndo ye so asi na lo. A yeke sala ni pëpe na lege ti asenge tënë so a tene ni gi tongaso me so alondo na bê pëpe. Bible atene na e so ‘na lege ti bê so azia pëpe, na ti tënë ti Mbeti ti Nzapa so alungula vundu, e lingbi duti na beku.’ (aRomain 15:4). Ni la, tongana e bâ so ngoi ni alingbi na ni, e lingbi ti fa nda ti Royaume ti Nzapa, nga na lege ti Bible e lingbi ti fa tongana nyen Royaume so ayeke leke ande akpale ti laso. Na pekoni, e lingbi ti fa ngbanga ti nyen beku so ayeke mbeni ye so a lingbi ti zia bê kue dä. Na salango tongaso, fade e yeke mû dengo bê na azo.

⁶ Ti wara ye ti nzoni mingi na lege ti dengo bê so a mû, a lingbi zo ahinga tâ Nzapa, mara ti Zo wa lo yeke, na lo bâ wala a lingbi ti zia bê kue na azendo ti Nzapa ni. Tongana e gi ti mû maboko na mbeni zo so ade ti ga wavorongo Jéhovah pëpe, a yeke nzoni e fa na lo atënë so: (1) Dengo bê so a wara na yâ Bible alondo na Jéhovah, tâ Nzapa. (2) Jéhovah ayeke mbeni Nzapa ti ndoye, Lo ti Ngangu Ahon Kue, Wasalango yayu na sese. Lo yeke Nzapa ti ndoye, so asi singo na nzobe nga na tâ tënë. (3) E lingbi ti wara ngangu ti kanga bê na gbele akpale tongana e ga ndulu na Nzapa na warango tâ hingango ye so alondo na yâ Tënë ti lo. (4) Bible ayeke na aversê so andu ambilimbili tara so asi na mara ti azo nde nde.

⁷ Ambeni adë bê ti azo so ayeke na vundu na so ahinga Bible na dikongo na ala 2 aCorinthien 1:3-7. Tongana ala yeke sala tongaso, ala gboto lê mingi na ndo tënë so atene “tënë so alungula vundu ti e awu mingi na lege ti Christ.” Versê so alingbi ti mû maboko na mbeni zo ti bâ so Bible ayeke mbeni lingu ti dengo bê teti zo, na so a lingbi lo bi bê dä mingi. A lingbi nga ti mû lege na mo ti ga ti peko ti sala lisoro, peut-être na ambeni ngoi nde. Tongana mbeni zo abâ so lo duti nzoni pëpe ngbanga ti ambeni ye ti kirikiri so lo sala, biani na fango ngbanga pëpe na ndo ye so lo sala, e lingbi ti tene na lo so a yeke ye ti dengo bê ti hinga ye so a sû na yâ Mbeti ti Nzapa na 1 Jean 2:1, 2 nga na Psaume 103:11-14. Na salango tongaso, biani e yeke mû na azo dengo bê so alondo na Nzapa.

Dë bê ti ala so salango ngangu na zo wala kpale ti nginza asala sioni na fini ti ala

⁸ Salango ngangu na zo asala sioni na fini ti azo mingi mingi, atâa a yeke salango ngangu ti azo ti kengo ndia na mbeni ndo, wala salango ngangu ti peko ti bira. Tongana nyen e lingbi ti dë bê ti azo so aye so asi na ala?

⁹ Atâ Chrétien abata kue si, atâa na lege ti tënë ti yanga ti ala wala salango ye ti ala, ala mû pëpe mbage ti bungbi ti azo so ge wala so kâ, so ayeke tiri na popo ti ala na yâ abira ti sese so (Jean 17:16). Me ala yeke sala kusala nzoni na Bible ti fa so aye ti ngangu so ayeke si na e fadeso ayeke ngbâ teti lakue lakue pëpe. Ala lingbi peut-être ti diko Psaume 11:5 ti fa tongana nyen Jéhovah ayeke bâ azo so andoye salango ngangu, wala ala lingbi ti diko Psaume 37:1-4 ti gboto lê na ndo wango ti Nzapa ti kiri sioni teti sioni pëpe, me ti zia bê kue na Nzapa. Atënë so a wara ni na Psaume 72:12-14 afa bibe wa Salomon ti Kota, so ayeke Jésus Christ, na so fadeso ayeke komande tongana Gbia na yayu, ayeke na ni na mbage ti asenge zo so ayeke bâ pasi na gbele salango ngangu.

¹⁰ Ambeni zo abâ na yâ fini ti ala abira na peko ti tele na ngoi so abungbi ti aturugu ayeke tiri na popo ti ala ti mû mbeni ndo. Ala bâ so bira na akpale ti pekoni aga tongana mbage ti fini ti ala awe. Oko beku so ala lingbi ti duti na ni ayeke so aye alingbi ti gue nzoni mingi teti ala gi tongana ala wara lege ti kpe na mbeni kodoro nde. Me mingi ti ala awara lege lâ oko pëpe ti sala tongaso, na ambeni so atara ti sala ni agirisa fini ti ala. Ala so akpe kodoro ti ala ti gue na mbeni nde abâ gi so ala zia ambeni kpale na peko ti ala ti wara ambeni fini kpale nde. A lingbi ti sala kusala na Psaume 146:3-6 ti mû maboko na mara ti azo tongaso ti zia beku ti ala na mbeni ye so ayeke kota mingi ahon kpengo na mbeni kodoro nde. Prophétie so a wara na Matthieu 24:3, 7, 14 wala na 2 Timothée 3:1-5 alingbi ti mû maboko na ala ti gbu nda ti aye ni kue nzoni na ti hinga nda ti aye so ayeke si na ala, so ti tene, so ala yeke na ngoi ti hunzingo ti aye ti ngbele sese so. Aversê tongana Psaume 46:1-3, 8, 9 na Esaïe 2:2-4 alingbi ti mû maboko na ala ti bâ so biani beku ayeke dä teti mbeni kekereke ti siriri.

¹¹ Na ngoi ti mbeni bira so atambela lani na Afrika ti Do, mbeni wali akpe yanga-da ti lo na lo hon gi na yâ toto ti angombe na alê ni so ayeke hon kirikiri. Na yâ fini ti lo, lo duti tâ gi na mbito, tele ti lo anzere oko pëpe, na kota vundu asi bê ti lo. Na pekoni, na ngoi so sewa ni ayeke na mbeni kodoro nde, koli ti wali so amû desizion ti zö mbeti ti mariage ti ala, ti tomba wali ti lo so na ngoi ni lani ayeke na ngo nga na kete molenge-koli ti ala ti ngu 10, na ti ga mbeni prêtre. Tongana a fa na wali so mbeti ti aPhilippien 4:6, 7 na Psaume 55:23, nga na ambeni article ti Tour ti Ba Ndo na ti Réveillez-vous!, lo bâ so biani lo wara ye so lo gi ni a ninga, so ti tene, dengo bê na mbeni nzoni ye ti sala na yâ fini.

¹² Kota kpale ti nginza asala si fini ti azo kutu mingi abuba. Ngoi na ngoi, ye so nga ayeke si ngbanga ti bira na aye ti pekoni. Na ambeni ngoi nde nga, aye ti poroso so ayanga-ti-komande aleke na lege ti ndara pëpe, nga be-kota na salango ye na lege ni pëpe ti ala so ayeke na ngangu ti komande abuba nginza kue so azo abata, na a sala si azo agirisa aye ti ala tongana da wala ambeni kungba. Ambeni zo ni nde awara lâ oko pëpe mingi ti akungba ti sese so. Azo so kue alingbi ti wara dengo bê tongana ala hinga so Nzapa amû zendo ti lungula vundu ti ala so azia bê ti ala kue na lo, na lo mû yanga so fade ni yeke ga na mbeni sese ti mbilimbili so na yâ ni azo ayeke wara ngia na peko ti kusala ti maboko ti ala (Psaume 146:6, 7; Esaïe 65:17, 21-23; 2 Pierre 3:13). Tongana mbeni Témoin na yâ mbeni sese na Asie amä mbeni wali na fango gingo bê ti lo teti kpale ti nginza na kodoro ni, lo fa na wali ni so ye so ayeke si na kodoro ni ayeke mbeni mbage ti aye mingi so ayeke si na ndo sese kue. Ala sala lisoro na ndo Matthieu 24:3-14 na Psaume 37:9-11, na a to nda ti manda Bible na wali so na pekoni.

¹³ Tongana azo abâ pasi teti angu mingi wala ala wara vundu ngbanga ti azendo ti wataka so a mû na ala, ala lingbi ti duti tongana azo ti Israël so ake ti mä tënë lani teti so ‘yingo ti ala ayeke na vundu’. (Exode 6:9). Na yâ mara ti aye tongaso, a lingbi ti duti ye ti nzoni mingi ti gboto lê na ndo alege so Bible alingbi ti mû maboko na ala ti hon ndo ti akpale ti laso nzoni na ti kpe ason so abuba fini ti azo mingi senge senge (1 Timothée 4:8b). Ambeni zo alingbi ti bâ sioni dutingo so ala yeke na yâ ni tongana mbeni fä so Nzapa ayeke pëpe wala lo yeke dä me lo bi bê ti lo pëpe na ala. Mo lingbi ti soro ambeni versê so alingbi na ni, na ti sala lisoro na ndo ni na ala. Na lege so, mo lingbi ti mû maboko na ala ti bâ so Nzapa aleke aye ti mû maboko na azo me azo mingi ayeda na ni pëpe.​—Esaïe 48:17, 18.

Dengo bê teti ala so awara kpale na peko ti sioni kota pupu na yengingo ti sese

¹⁴ Ye ti ngangu alingbi ti si na zo ndali ti mbeni sioni kota pupu so asi, sese so ayengi wala mbeni ye so asungba. Vundu alingbi ti gbu bê ti azo kue. Ye nyen a lingbi ti sala ti dë bê ti ala so asö fini na yâ aye ti ngangu so?

¹⁵ A lingbi azo ahinga so mbeni zo ayeke bi bê na ndo ala. Na yâ mbeni kodoro, na peko ti mbeni sioni ye so awabingo kpale so a hiri ala a-terroriste aga na ni, azo mingi awara vundu ngangu, na ala hinga ye so ala lingbi ti sala pëpe. Ambeni zo ni mingi na popo ti ala agirisa azo ti sewa ti ala wala azo so ayeke sala kua ti nginza ti bata na sewa ti ala. Ambeni agirisa andeko ti ala, kua ti nginza ti ala wala bibe kue so apusu ala ti bâ tele ti ala so ala yeke na nzoni dutingo. A-Témoin ti Jéhovah ague na mbage ti azo so ayeke na yâ avaka ti ala, na ala fa mawa ti ala teti akota ye so azo so agirisa; ala fa nga atënë ti dengo bê so alondo na Bible. Gbâ ti azo akiri singila mingi teti so e bi bê ti e na ala tongaso.

¹⁶ Na kodoro ti Salvador, na ngu 2001, sese ayengi ngangu na potopoto so ayeke na tele ti mbeni hoto atuku na afâ azo mingi so ayeke na gbe ni. Mbeni ita-wali Témoin agirisa molenge ti lo ti koli so ayeke na ngu 25, na maseka-wali so molenge ti ita ni ayeke ga na peko ti lo agirisa nga aita ti lo ti wali use. Mama ti molenge-koli so na maseka-wali so molenge-koli ni ayeke ga lani na peko ti lo, ala use kue ato nda ni hio ti bi tele ti ala na yâ kusala ti fango tënë. Azo mingi atene na ala so a yeke lani Nzapa la si amû ala so akui, wala a yeke ye so bê ti Nzapa aye. Aita-wali Témoin so afa mbeti ti aProverbe 10:22 ti fa so Nzapa aye pëpe si e bâ pasi. Ala diko aRomain 5:12 ti fa so kui aga na lege ti siokpari ti zo, me pëpe ngbanga ti so a yeke ye so bê ti Nzapa aye. Ala fa nga tënë ti dengo bê so a wara na Psaume 34:19, Psaume 37:29, Esaïe 25:8, na Apocalypse 21:3, 4. Azo aduti lani ndulu ti mä tënë, mbilimbili tongana ala bâ so awali use so agirisa nga ambeni zo ti sewa ti ala na yâ ye ti ngangu so; tongaso, a to nda ti mandango Bible na azo mingi.

¹⁷ Tongana ye ti ngangu asi, mo lingbi ti tingbi na mbeni zo so aye mungo maboko fade fade. Peut-être lo ye si a hiri na lo mbeni docteur, a mû maboko na lo ti gue na mbeni hôpital wala a sala ye kue so a lingbi ti sala ti mû na lo kobe nga na ndo ti lango. Na ngu 1998, na ngoi so mara ti ye ti ngangu tongaso asi na Italie, mbeni wagosinga atene so aTémoin ti Jéhovah “asala ye polele ti mû maboko na azo; ala sala kue ti mû maboko na ala so ye ti ngangu ni asi na ala, na ala gi pëpe ti hinga wala zo ni asala nzapa wa.” Na yâ ti ambeni ndo, aye so aprophétie afa atene a yeke si na lâ ti nda ni aga na pasi mingi na azo. Na yâ ti ando so, aTémoin ti Jéhovah afa peko ti aprophétie ti Bible, na ala dë bê ti azo na tënë ti Bible so atene fade Royaume ti Nzapa ayeke ga na tâ nzoni duti na azo.​—aProverbe 1:33; Michée 4:4.

Dengo bê teti ala so agirisa mbeni zo ti sewa ti ala

¹⁸ Lâ oko oko, azo kutu mingi ayeke toto na vundu ndali ti kuâ ti mbeni zo ti ala so ala ndoye mingi. Mo lingbi peut-être ti tingbi na azo so ayeke na mua tongana mo yeke fa tënë, wala tongana mo yeke sala akua ti mo ti lâ oko oko. Mo lingbi ti tene nyen wala ti sala nyen ti dë bê ti azo so?

¹⁹ Mo bâ so vundu agbu zo ni tâ ngangu? Mo bâ so da ni asi singo na azo ti sewa ni so ayeke na kota vundu? Peut-être atënë mingi ayeke dä so mo ye ti tene, me a yeke kota ye mingi ti sala ye na lege ti ndara (Zo-ti-fa-tene 3:1, 7). Peut-être a yeke nzoni ti tene na zo ni mbeni tënë ti dengo bê so afa so mo kangbi mawa ti ala; mo lingbi ti zia mbeni mbeti na ndo Bible (so ti tene mbeni brochure, périodique wala tract) so andu tënë ni; na pekoni, mo lingbi ti kiri ti bâ zo ni na peko ti ambeni lango kete ti bâ wala lo yeke na bezoin ti mbeni mungo maboko nde. Na mbeni ngoi so alingbi, tene na zo ni so mo ye ti kangbi na lo ambeni tënë so a wara na yâ Bible. Ye so alingbi ti dë bê ti zo ni na ti sala si lo ga nzoni (aProverbe 16:24; 25:11). Mo lingbi pëpe ti zingo akuâ tongana ti so Jésus asala giriri. Me mo lingbi ti kangbi na zo ye so Bible atene na ndo dutingo ti akuâ, atâa so a lingbi ti duti ngoi ni la pëpe ti tara ti ke abibe ti wataka (Psaume 146:4; Zo-ti-fa-tene 9:5, 10; Ezéchiel 18:4). Mo lingbi ti diko legeoko na lo azendo so Bible amû na ndo zingongo akuâ (Jean 5:28, 29; Kusala 24:15). Mo lingbi ti fa na yâ lisoro ye so atënë so aye ti tene, peut-être na salango kusala na mbeni tondo ti Bible so afa tënë ti londongo ti akuâ (Luc 8:49-56; Jean 11:39-44). Nga, gboto lê na ndo alengo ti Nzapa ti ndoye so amû na e mara ti beku tongaso (Job 14:14, 15; Jean 3:16). Fa tongana nyen afango ye so aga na aye ti nzoni na mo, nga ngbanga ti nyen mo zia bê ti mo kue na ni.

²⁰ Tongana mo tisa zo ni ti ga na Da ti Royaume, a lingbi ti mû maboko na lo so ayeke na vundu mingi ti hinga azo so biani andoye amba ti ala na so ahinga tongana nyen ti kpengba tele na popo ti ala. Mbeni wali ti kodoro ti Suède abâ so a yeke ye so lo yeke gi ni lani a ninga na yâ fini ti lo.​—Jean 13:35; 1 aThessalonicien 5:11.

²¹ Tongana mo hinga so mbeni zo ayeke na yâ kota vundu, atâa na yâ kongregation wala na gigi ni, mo yeke bâ so ngoi na ngoi mo hinga pëpe tënë ti tene wala ye ti sala? Fani mingi, tënë so a sû pekoni na “lungula vundu” wala “dë bê” na yâ Bible aye mbilimbili ti tene “ti tisa zo ti ga na tele ti mo”. Ti ga mbeni tâ zo so adë bê ti mba ti lo aye ti tene so fade mo yeke mû lege na ala so ayeke na vundu ti ga ndulu na mo.​—aProverbe 17:17.

²² Ka tongana zo ni so mo ye ti dë bê ti lo ahinga awe ye so Bible atene na ndo kuâ, sandaga ti kota ngele ti Christ, wala londongo ti akuâ? Tongana lo bâ gi na tele ti lo mbeni ndeko ti lo so ayeke na a-oko tënë ti mabe tongaso a lingbi ti dë bê ti lo. Tongana lo ye ti sala tënë, duti ndulu ti mä lo nzoni. Tene pëpe na bê ti mo so a lingbi mo mû mbeni diskur. Tongana mo yeke diko ambeni versê, fa pekoni tongana atënë ti bê ti Nzapa so ayeke kpengba bê ti ala use kue. Fa tâ na bê ti mo kue ngangu beku so mo na lo kue ayeke na ni na yâ atënë ti zendo ti aversê so. Tongana mo fa na gigi nzobe ti Nzapa nga tongana mo fa atâ tënë so a wara na yâ Mbeti ti Nzapa, mo lingbi ti mû maboko na ala so ayeke na yâ vundu ti wara dengo bê na ngangu so alondo na “Nzapa ti lungula vundu kue”, Jéhovah.​—2 aCorinthien 1:3.

[Kete tënë na gbe ni]

Mo yeke tene nyen?

• Zo wa si azo mingi ayeke bi tënë na li ti lo tongana kpale asi? Tongana nyen e lingbi ti mû maboko na ala?

• Ye nyen e lingbi ti sala ti mû maboko na ambeni zo ti wara ye ti nzoni mingi na lege ti dengo bê so Bible amû?

• Aye wa ayeke mû vundu na azo mingi na ndo so mo lango dä? Mo lingbi ti dë bê ti ala tongana nyen?

[Ahundango tënë ti manda na ye]

1, 2. A lingbi e dë bê ti azo wa? Na ngbanga ti nyen?

3. Tongana azo ahunda: “Ngbanga ti nyen Nzapa azia si aye ti ngangu asi?”, mo lingbi ti kiri tënë tongana nyen ti mû maboko na ala?

4. Tongana nyen mbeni Témoin na Pologne awara lege ti mû maboko na mbeni molenge-wali ti ekole ti lo so ayeke na yâ kota vundu? Na tongana nyen tapande so alingbi ti mû lege na mo ti mû maboko na ambeni zo?

5. Tongana e yeke gi ti fa na amba ti e so e kangbi mawa ti ala, ye nyen a yeke mû ande tâ dengo bê?

6. A lingbi e mû maboko na azo ti gbu nda ti ye wa, si ala lingbi ti wara ye ti nzoni mingi na lege ti dengo bê so Mbeti ti Nzapa amû?

7. (a) Tongana e gboto lê mingi na ndo tënë so atene dengo bê so Nzapa amû “awu mingi na lege ti Christ”, ye wa a lingbi ti sala? (b) Tongana nyen mo lingbi ti dë bê ti mbeni zo so abâ so tambela ti lo ayeke sioni?

8, 9. Tongana nyen a lingbi ti sala ye na lege ni ti dë bê ti azo so a sala ngangu na ala?

10. Tongana mo bâ na yâ fini ti mo angu mingi ti bira, tongana nyen aversê so a mû ni ge alingbi ti dë bê ti mo?

11. Aversê wa adë bê ti mbeni wali ti Afrika ti Do? Na ngbanga ti nyen?

12. (a) Tënë wa so adë bê ti zo Mbeti ti Nzapa amû teti ala so ayeke tâ na yâ kota kpale ti nginza? (b) Tongana nyen mbeni Témoin na Asie awara lege ti mû maboko na mbeni wali?

13. (a) Tongana azo awara vundu teti azendo ti wataka so a sala na ala, tongana nyen e lingbi ti sala kusala na Bible ti mû maboko na ala? (b) Tongana azo atene so aye ti sioni so asi afa so Nzapa ayeke pëpe, tongana nyen mo lingbi ti gi ti sala lisoro na ala?

14, 15. Na ngoi ti mbeni ye ti ngangu so abi kota vundu na bê ti azo mingi, tongana nyen aTémoin ti Jéhovah afa lani so ala yeke bi bê ti ala na ndo azo ni?

16. Tongana ye ti ngangu asi na kodoro ti Salvador, ngbanga ti nyen fango tënë ti aTémoin ti kodoro ni andu bê ti azo ni biani?

17. Na ngoi ti ye ti ngangu, amara ti mungo maboko wa e lingbi ti mû?

18-20. Tongana zo akui na yâ mbeni sewa, mo lingbi ti tene nyen wala ti dë bê ti azo ni tongana nyen?

21, 22. (a) Ye nyen a ku na mbage ti e tongana e ye ti dë bê ti azo? (b) Tongana nyen e lingbi ti dë bê ti mbeni zo so ahinga awe Mbeti ti Nzapa nzoni?

[Afoto na lembeti 23]

Fango tënë ti tâ dengo bê na ngoi ti vundu

[Lingu ti afoto]

Camp ti aréfugié: UN PHOTO 186811/J. Isaac

[Foto na lembeti 24]

Gi senge dutingo ti mbeni ndeko na tele ti zo so ayeke na vundu alingbi ti dë bê ti lo