Atënë so azo ahunda
Na yâ ando mingi ti sese, azo ayeke mû ka lakue amatabisi na ngoi ti mbeni mariage. Akpengba-ndia wa ti Bible a lingbi e bâ ni tongana e yeke mû wala e yeke wara amatabisi tongaso?
Bible ake pëpe tënë ti mungo amatabisi tongana zo ni amû ni na nzoni bê nga na mbeni ngoi so ayeke nzoni. Na ndo tënë ti mungo ye na mba, Bible awa atâ Chrétien ti mû tapande ti Jéhovah so ayeke mû ye na nzobe (Jacques 1:17). Bazengele Paul awa aita ti lo Chrétien tongaso: “I girisa pëpe ti sala nzoni na ti mû ye na azo, teti sacrifice tongaso ayeke nzoni na lê ti Nzapa.” Ni la, a wa aChrétien ti duti ndulu ti mû ye na amba ti ala.—aHébreu 13:16; Luc 6:38.
Na yâ akodoro mingi, mbeni koli na wali so mariage ti ala ayeke pusu ndulu, ayeke gue ka na yâ mbeni magazin ti zia iri ti ala na yâ mbeni buku nga ti sû na yâ ni molongo ti akungba so ala ye ti wara tongana matabisi, so ayeke na yâ ti magazin ni. Ala yeke fa na asongo ti ala nga na akamarade ti ala iri ti magazin ni so ala lingbi ti gue dä ti vo mbeni oko ti akungba so ala zia ni na mbeti. Ti bâ ni nzoni, tongana ala so aye ti sala mariage asû na yâ mbeni buku molongo ti akungba so ala ye ti wara na matabisi, ye so ayeke sala si zo amû ngoi mingi mingi pëpe ti gi kungba wa ti vo ni ti mû na matabisi. Na oko ngoi ni, a sala nga si azo so ayeke wara ande amatabisi ni abâ pëpe so a lingbi ala kiri na ambeni matabisi tongaso na magazin ni teti so ala yeke na nzara ni pëpe.
A yeke na ala so ague ti sala mariage ni ti soro wala ala yeke sû ande na yâ mbeni buku molongo ti akungba so ala ye ti wara na matabisi. Ye oko, a yeke nzoni ti tene mbeni Chrétien asala hange ti kpe aye kue so alingbi ti doro akpengba-ndia ti Bible. Na tapande, tongana ala so aye ti sala mariage ni asû na yâ buku ni gi akungba so ngele ni akono mingi, fade a yeke duti tongana nyen? Na yâ mara ti ye tongaso, ala so ayeke na nginza mingi pëpe alingbi peut-être pëpe ti vo mbeni matabisi, wala ala lingbi ti bâ so a hon tënë ala ga na mariage ni pëpe ti tene kamene agbu ala pëpe, teti so ala ga gi na mbeni matabisi ti kete ngele. Mbeni wali Chrétien asû na mbeti: “Tënë ti mungo amatabisi na ngoi ti amariage ato nda ti ne zo mingi awe. Mbi yeke sala kue ti mû ye, me na pekoni ngia kue so mbi yeke wara ka na peko ti mungo ye agirisa biani.” A yeke tâ ye ti vundu biani tongana mbeni mariage aga mbeni ye so asala si bê ti zo anze!
Biani, a lingbi a gi ti fa pëpe na ala so ayeke mû ye ni, so tongana ala ye ti tene a yeda na matabisi ti ala ni, a lingbi ala vo ni na yâ ti mbeni mbilimbili magazin, wala na ngele tongaso. Teti biani, Jésus Christ afa so ye so ayeke na ngele mingi na lê ti Nzapa ayeke bibe so zo ayeke mû na matabisi, me pëpe ngele ti matabisi so lo mû (Luc 21:1-4). Legeoko nga, na ndo tënë ti matabisi so a yeke mû na ala so ye atia ala, bazengele Paul asû na mbeti: “Zia azo oko oko kue amû ye tongana bê ti ala aye, na vundu pëpe, wala na forcé pëpe; teti Nzapa andoye zo so amû matabisi na ngia.”—2 aCorinthien 9:7.
Na bango ndo ti Mbeti ti Nzapa, a yeke sioni pëpe ti tene mbeni zo afa so ni si ni mû matabisi tongaso, peut-être na ziango mbeni kete mbeti na tele ti kungba ni so lo mû. Ye oko, na ambeni ndo, salango ye ti azo ti kodoro ni aye si a fa na gbele ala so kue aga iri ti zo so amû kungba tongaso na matabisi. Mara ti salango ye tongaso alingbi ti ga na akpale. Ala so ayeke mû mbeni matabisi aye peut-être ti tene a fa iri ti ala pëpe ti kpe ti gboto lê ti azo senge senge na ndo ti ala. Mara ti azo tongaso asala ye alingbi na kpengba-ndia so a wara na Matthieu 6:3, so na yâ ni Jésus atene: “Me tongana mo mû matabisi, zia maboko ti mo ti gati ahinga pëpe ye so maboko ti mo ti koti asala.” Ambeni zo nga alingbi ti tene so tënë ti mungo amatabisi abâ zo oko oko, na a lingbi tënë ni angbâ gi na popo ti lo so lo mû ye ni na lo so awara ni. Na ndo ni, tongana a fa na gigi iri ti azo so amû amatabisi tongaso, a lingbi ti pusu azo ti haka popo ti amatabisi ni, na ye so alingbi ti dü ‘salango bê na popo ti ambeni.’ (aGalate 5:26). Biani, aChrétien aye ande ti kpe ti bi kamene na lê ti ambeni zo na dingo na kota go iri ti ala so aga na amatabisi.—1 Pierre 3:8.
Biani, na salango ye alingbi na akpengba-ndia so a wara na yâ Mbeti ti Nzapa, mungo matabisi ayeke ngbâ ande lakue ye ti mungo ngia na zo.—Kusala 20:35.