Sewa ti Jésus: A yeke azo wa?

NA YÂ ti ando mingi na ndo ti sese, fani mingi na nze ti décembre, mo yeke bâ afoto na ambeni ye so afa Jésus na mama ti lo Marie, nga na babâ ti batango lo Joseph na yâ mbeni da ti batango anyama; aye tongaso agboto même lê ti ala so atene ala yeke aChrétien pëpe. Teti so foto ni agboto lê mbilimbili na ndo Jésus, ye nyen Bible atene na e na ndo sewa ti Jésus ti mitele?

Jésus ayeke na mbeni kpengba sewa. A dü lo ândö na lege ti mbeni masia so iri ti lo ayeke Marie; na lege so lo ga mbeni mbage ti mbeni sewa ti mitele. Bible atene so na lege ti yingo vulu, a mû lani fini ti lo na nduzu a zia na yâ ti Marie (Luc 1:30-35). Kozoni ti tene a sala tënë ti mengo ngo ti Jésus na lege ti kpene, Marie ayeda ti mû na mariage Joseph, so ayeke ga ande babâ ti batango Jésus.

Na peko ti dungo Jésus, Joseph na Marie adü ambeni molenge, aita ti Jésus ti koli na ti wali na mbage ti mama. Ye so asigigi polele na yâ hundango tënë so azo ti Nazareth ahunda na pekoni na ndo Jésus: “Lo so ayeke Molenge ti charpentier ni pëpe? Iri ti mama ti Lo ayeke Marie pëpe? iri ti aita ti Lo ayeke Jacques, Joseph, Simon, na Jude pëpe? Na aita ti Lo ti wali kue ayeke na popo ti e pëpe?” (Matthieu 1:25; 13:55, 56; Marc 6:3). Tongaso, e lingbi ti tene na lege ti tënë so a yeke wara na yâ sewa ti Jésus so ayeke na yâ da oko na lo, babâ na mama ti lo, aita ti lo ti koli osio, na kamême aita ti wali use wala a hon so.

Ye oko, ambeni zo laso ake ti yeda so aita ti Jésus ti koli na ti wali ayeke lani amolenge ti Joseph na Marie. Ngbanga ti nyen? Mbeni bakari (New Catholic Encyclopedia) atene: “Ngbele ye na ngoi so lo to nda ni, Église afa so Marie angbâ lakue mbeni maseka so ahinga koli lâ oko pëpe. Tongaso, na bango ye so, a lingbi ti tene biani so Marie ayeke lani na ambeni molenge pëpe.” Oko bakari ni atene so atënë “ita ti koli” na “ita ti wali” alingbi ti ndu “ambeni zo so asala beoko na yâ mbeni lege ti vorongo, wala mbeni kamba ti songo” wala afami, peut-être akoya.

A yeke tâ biani tongaso? Même ambeni wandara ti alege ti vorongo ti Catholique, so amä tele pëpe na ndo kota tënë ti mabe so église ayeke fa lakue, ayeda so Jésus ayeke na aita ti koli na ti wali na lege ti mitele. John P. Meier, ngbele mokonzi ti Bungbi ti aCatholique ti Amerika, asû na mbeti: “Na yâ Testament ti Fini, tongana a sala pëpe kusala na tënë ti Grec so akiri pekoni na [ita] na lege ti fä, me ti sala tënë ti mbeni songo so ayeke na yâ ti sewa, a ye gi ti sala tënë ti aita ti babâ oko na mama oko, wala aita na mbage ti babâ wala mama. Mbeni nda ti tënë nde ayeke dä pëpe.”a Biani, Bible afa so Jésus ayeke na aita ti koli na ti wali so Joseph na Marie adü lani ala.

A-Évangile asala tënë ti ambeni fami ti Jésus. Ye oko, zia e bi lê na ndo sewa ti Jésus so ayeke na yâ ti da oko na lo, na zia e bâ ye so e lingbi ti manda na ndo ala.

[Kete tënë na gbe ni]