Atënë so azo ahunda

Na yâ sambela so Jésus amû tongana tapande, lo ye ti tene so a yeke sala lani ye so bê ti Nzapa aye na yayu atâa so ade ti tomba pëpe asioni ange?

Tongana ti so Matthieu 6:10 afa, Jésus atene: “E ye ala sala na sese ye so bê ti Mo aye legeoko tongana ala sala na yayu.” Yâ ti gbungo nda ti hundango ye so alingbi ti duti use. Kozoni, a yeke mbeni hundango ye ti tene a sala ye so bê ti Nzapa aye na ndo sese tongana ti so a yeke sala lani na yayu. Wala, use ni, a yeke mbeni hundango ye ti tene a sala ni kue na yayu nga na ndo sese.a Nda ti atënë ti Jésus so aga kozo na ni, “E ye royaume ti Mo aga”, afa so use gbungo nda ti tënë ni ague oko mingi na Mbeti ti Nzapa. Nga a fa na gigi dutingo ti aye na ngoi so Jésus ayeke lani na ndo sese nga na yâ yongoro ngoi so aga na pekoni. Tongana nyen?

Buku ti Apocalypse agboto lê na ndo aye use so ayeke nde nde, so aga na peko ti so a leke Royaume ti Nzapa na yayu. Kozo ye ni andu yayu mveni, na use ni andu sese. Apocalypse 12:7-9, 12 atene: “Bira alondo na yayu, Michel na a-ange ti lo atiri bira na kota ngbo so. Na kota ngbo na a-ange ti lo atiri bira, me ala hon na ngangu pëpe, na a wara ndo na yayu teti ala mbeni pëpe. Ala [bi] kota ngbo, ngbo ti giriri so, lo so ala di iri ti lo Zabolo na Satan, wahanda ti azo ti sese so kue; ala bi lo na sese, na ala bi a-ange ti lo na sese legeoko na lo. Tongaso i sala ngia, O ayayu, na i so i duti na yâ ni! Vundu aga na sese na kota ngu ti ingo! Teti zabolo azu na sese na i na ngonzo mingi, teti lo hinga lâ ti lo angbâ mingi pëpe.”

Tombango Satan nga na ayingo sioni na peko ti ngu 1914, a zi na yayu azo ti yingo kue so ake yanga, a ga na ngia lani mingi na amolenge ti Jéhovah, a-ange so angbâ be-ta-zo, so ayeke biani kota mbage ti azo ti yingo so lo leke (Job 1:6-12; 2:1-7; Apocalypse 12:10). Tongaso, ti yayu, ye so Jésus ahunda na yâ sambela ti lo aga lani tâ tënë. Azo kue so angbâ lani na yayu aduti be-ta-zo na Jéhovah nga ayeda ti duti na gbe ti kota yanga-ti-komande ti lo.

A lingbi a luti na ndo tënë so: même kozoni na ye so, tongana asioni ange angbâ lani ti wara lege ti gue na yayu, a zia ala na gigi ti sewa ti Nzapa nga a gbanzi ambeni mbilimbili ye na ala. Na tapande, Jude 6 afa so gi na kozo siècle lani, a “bata ala na yâ zingere ti lakue lakue na yâ bingo ti ku ngbanga ti kota lâ ni.” Legeoko nga, 2 Pierre 2:4 atene: “Nzapa abata a-ange pëpe na lâ ni so ala sala siokpari giriri, me Lo bi ala na Tartare [mbeni dutingo so ayeke na gbe ni mingi], Lo zia ala na dû ti bingo [ti yingo] ti bata ala teti ngbanga.”b

Nde mingi na dutingo ti ala na gigi ti bungbi ti yayu na ngoi so ala ngbâ kâ, asioni ange so asala kota ngangu na ndo sese. Biani, Tënë ti Nzapa ahiri Satan “mokonzi ti sese so”, nga ahiri ayingo sioni “ala so akomande bingo ti sese so”. (Jean 12:31; aEphésien 6:11, 12; 1 Jean 5:19). Ndali ti ngangu ti komande ti lo, Zabolo alingbi lani ti mû na Jésus “aroyaume kue ti sese na gloire ti ala” tongana Jésus avoro lo fade gi fani oko (Matthieu 4:8, 9). A yeke polele, ti sese, gango ti Royaume ti Nzapa ayeke sala si aye agbian ngangu mingi.

Ge na ndo sese, ‘gango’ ti Royaume ti Nzapa ayeke sala ande si mbeni tâ fini bungbi ti aye abâ gigi. Fade Royaume ni ayeke futi akomandema ti azo kue, nga lo yeke ga oko ngorogbia ti sese. Na oko ngoi ni, azo so akpe mbito ti Nzapa, so ayeke na gbe Royaume ni, ayeke duti ande “sese ti fini”. (2 Pierre 3:13; Daniel 2:44). Royaume ni ayeke lungula ande nga siokpari na tele ti azo so amä yanga, nga na nda ni, a yeke sala si sese kue aga paradis. Na lege so, lo yeke lungula aye oko oko kue so angbâ na peko ti komandema ti Satan.​—aRomain 8:20, 21; Apocalypse 19:17-21.

Na hunzingo ti Ngu Saki Oko, tongana Royaume ti Messie asala kue awe ye so bê ti Nzapa aye na mbage ti lo, “fade Molenge mveni nga ayeke na gbe ti Nzapa so azia ye kue na gbe ti Lo, tongaso Nzapa alingbi ga ye kue na yâ ye kue.” (1 aCorinthien 15:28). Na ngoi ni kâ, fade mbeni ndangba tara ayeke duti dä. Na peko ti tara so, fade a yeke futi biaku biaku na yâ “kui use ni” Satan, ayingo sioni, nga na azo ti kpengba-li kue so ala handa ala (Apocalypse 20:7-15). Nga na pekoni, a-ange kue na yayu nga na azo kue na ndo sese ayeke yeda ande na ngia ti duti na gbe ti komandema ti Jéhovah so lo sala na ndoye. Na yâ aye oko oko kue, fade atënë ti Jésus na yâ sambela so lo mû tongana tapande ayeke ga tâ tënë kue.​—1 Jean 4:8.

[Akete tënë na gbe ni]