Atënë so azo ahunda

Teti so aLévite awara ye ti héritier pëpe na yâ Israël ti giriri, tongana nyen Hanameel zo ti mara ti Lévi alingbi lani ti kä mbeni yaka na fami ti lo Jérémie ti mara ti Lévi, tongana ti so e diko na Jérémie 32:7?

Na ndo azo ti mara ti Lévi, Jéhovah atene na Aaron: “Fade mo wara ye ti héritier na sese ti ala pëpe, na mo wara ye ti mo na popo ti ala [azo ti Israël] pëpe.” (Nombre 18:20). Ye oko, a mû lani na azo ti mara ti Lévi agbata 48 nga na ando ti agbata ni so anyama ayeke te pele dä; a kangbi ni na yâ Sese ti Zendo kue. Gbata ti Anathoth ni mveni ayeke gbata so a dü Jérémie dä, na a yeke oko ti agbata so a mû na “amolenge ti Aaron so ayeke aprêtre.”​—Josué 21:13-19; Nombre 35:1-8; 1 Chronique 6:54, 60.

Na Lévitique 25:32-34, a tene so Jéhovah amû ambilimbili wango na ndo droit ti ‘ton’ wala ti vo ando so ayeke ti aLévite. Biani, asewa oko oko ti aLévite ayeke na adroit so andu aye ti héritier so abâ tënë ti warango sese ti ala, ti salango kusala na ni na ti kango ni. A yeke na lege ni ti tene so adroit so andu nga kango sese nga na vongo ni.a Na yâ alege mingi, aLévite ayeke na sese ti ala na ala yeke sala kusala na ni tongana ti azo ti tanga ti akete mara ti Israël kue.

Peut-être, a yeke asese tongaso si akotara ti ala azia, na aLévite ni awara na peko ti ala tongana ye ti héritier. Ye oko, na ndo tënë ti ‘droit ti vongo ye’, a hunda na aLévite ti kä wala ti vo sese gi na tïtî amba ti ala Lévite. Nga, ye ni ayeke mo bâ mo tene gi asese so ayeke na yâ ti agbata ni si alingbi ti kä ni na ti vo ni, teti a hunda pëpe na aLévite ti kä “sese [so ayeke] na tele ti akodoro ti ala” so ti tene ando so anyama ayeke te pele dä ngbanga ti so a yeke “ye ti ala lakue”.​—Lévitique 25:32, 34.

Tongaso, sese so Jérémie avo na tïtî Hanameel ayeke mbeni mara ti sese so a lingbi lani ti vo ni senge. Peut-être sese ni ayeke lani na yâ akatikati ti gbata ni. Jéhovah mveni atene so “sese” ni ayeke ti Hanameel na Jérémie ayeke na “tënë [wala droit] ti tongo” ni (Jérémie 32:6, 7). Jéhovah asala kusala lani na ye so asi na popo ti Jérémie na Hanameel ti mû ngangu na zendo ti lo so fade azo ti Israël ayeke kiri ti wara sese ti ala ti héritier na pekoni so ala yeke gue na ngbâa na Babylone teti mbeni ngoi.​—Jérémie 32:13-15.

Ye oko afa pëpe so Hanameel awara lani sese so ayeke na Anathoth na mbeni lege so ayeke nzoni pëpe. Ye oko afa nga pëpe so lo doro ndia ti Jéhovah na hundango na Jérémie ti vo sese ni so ayeke na Anathoth, wala so Jérémie asala kusala na lege ni pëpe na droit ti lo ti vongo ye ti vo sese ni.​—Jérémie 32:8-15.

[Kete tënë na gbe ni]