Mbeni matanga so andu mo

NA NGOI so lo yeke lani na sese, Jésus Christ aleke mbeni matanga so amû gonda na Nzapa. A yeke lani gi oko matanga ti lege ti vorongo so lo hunda polele na adisciple ti lo ti sala ni. A yeke matanga ti Kobe ti Seigneur so a hinga ni nga na matanga ti Dango Bê.

Tara ti bâ na li so mo yeke dä na ngoi ti aye so ague ti si na matanga ni. Jésus na abazengele ti lo abungbi legeoko na yâ mbeni da-nduzu na Jérusalem ti sala matanga ti Pâque ti aJuif. Ala hunzi awe ti te kobe ti Pâque so ala yeke sala ka ni lakue, so ayeke wara na yâ ni zongo taba, sengo kugbe ti kasa, mapa so mama ni ayeke dä pëpe na bengba vin. A hunda na Judas Iscariote, bazengele so ayeke be-biani pëpe, ti sigigi, nga na yâ ngoi kete, lo yeke gue ti kä maître ti lo (Matthieu 26:17-25; Jean 13:21, 26-30). Jésus angbâ gi lo oko na abazengele ti lo be-ta-zo 11. Matthieu ayeke na popo ti ala.

Ti gue oko na tondo ti Matthieu so lo bâ ni kue na lê ti lo mveni, bâ tongana nyen Jésus azia na sese matanga ti Kobe ti Seigneur: ‘Jésus akamata mapa [so mama ni ayeke dä pëpe], Lo hiri tënë nzoni dä, Lo fâ yâ ni; na Lo mû na adisciple, Lo tene, I kamata so, i te; so ayeke [“fä ti”, NW ] tele ti Mbi. Lo kamata kopo, Lo mû merci, Lo mû na ala, na Lo tene, I kue [i] nyon; teti so ayeke [“fä ti”, NW ] mênë ti Mbi, mênë ti mbele so a sa na sese teti azo mingi teti pardon ti siokpari.’​—Matthieu 26:26-28.

Ngbanga ti nyen Jésus azia na sese matanga ti Kobe ti Seigneur? Na ngoi so lo yeke sala ni, ngbanga ti nyen lo sala kusala na mapa so mama ni ayeke dä pëpe nga na bengba vin? A yeke adisciple ti Christ kue si ayeke te mapa na anyon vin ni? A yeke sala matanga ni fani oke? Na a ye ti tene nyen teti mo?