Salango ye ti nzoni na angoi ti ngangu

“A LINGBI e sala ye ti nzoni na azo kue; na a hon kue, a lingbi e sala ye ti nzoni na aita ti e awamabe.” (aGalate 6:10). So ayeke wango ti bazengele Paul. A-Témoin ti Jéhovah na ndo sese kue ayeke sala ngangu ti sala ye alingbi na kpengba-ndia so na yâ fini ti ala, na salango nzoni na azo kue, mbilimbili na amba ti ala wamabe. A yeke bâ ni fani mingi na angoi ti ngangu. Zia e bâ atapande so asi ade ti ninga pëpe so alondo na akodoro ota.

Na décembre 2002, mbeni kota pupu so akpe ahon kilomètre 300 na yâ ti ngbonga oko aya na kodoro ti Guam. Ada mingi asuru, ambeni abuba biani. Akongregation ti ndo ni aleke fade fade mbeni bungbi ti azo ti lekengo ndo ti mû maboko na asewa ti aTémoin so ayeke na ando so ye abuba dä mingi. Filiale ti Guam amû agbakuru nga na azo ti leke ada so abuba. Filiale ti Hawaii nga amû maboko. Ayenga kete na peko ti kpale ni, mbeni bungbi ti azo ti kpakango keke so alondo na Hawaii aga ti mû maboko na yâ ti kua ti lekengo ada so abuba. Ambeni ita ti ndo ni amû angoi so place ti kua ti ala azia na ala ti hu tele ti mû maboko na bungbi ti azo so. Nzoni bibe ti ala ti sala kua maboko na maboko ayeke lani mbeni tënë ti témoin teti azo kue ti ndo ni.

Na ando so angoro gbata ti Mandalay, Myanmar, mbeni wâ so amû ndo hio agbi ye ndulu na mbeni Da ti Royaume. Da ti mbeni ita-wali so azia ti fa tënë aninga nga na sewa ti lo ayeke ndulu na ndo ni so. Pupu ti wâ ni ayeke ya ti gue na mbage ti da ti lo, tongaso lo kpe hio na Da ti Royaume ni ti hunda mungo maboko. Teti so a yeke leke ambeni ye na tele ti Da ti Royaume ni, aita mingi ayeke dä. Bê ti ala adö ti tingbi na ita ni ngbanga ti so ala hinga pëpe so lo yeke lango na ndo so. Hio, aita ni amû maboko ti zi akungba ti sewa ni, na ti zia ni na mbeni ndo so ayeke nzoni. Tongana koli ti lo, so ayeke Témoin pëpe, amä tënë ti wâ ni, lo kpe hio ti gue na yanga-da. Kâ, lo wara aita so ayeke bâ lege ti sewa ti lo. Bê ti lo apika, nga lo mû singila mingi. Bê ti lo adë nga teti so, fani mingi, azo ti nzi ayeke gbu mara ti angoi tongaso ti nzi ye. Nzobe so aita afa na gigi apusu ita-wali ni nga na molenge ti lo ti koli ti kiri ti sala kua maboko na maboko na aita, na fadeso, ala yeke gue na abungbi kue.

Na yâ ti ngu ti kusala so ahon, azo mingi na Mozambique abâ pasi na kota nzara, ngbanga ti so ngu apika pëpe nga kobe alë nzoni pëpe. Biröo ti filiale ti aTémoin ti Jéhovah asala ye hio ti mû kobe na azo so ye atia ala mingi. Ngoi na ngoi, a yeke kangbi kobe ni na Da ti Royaume na peko ti abungbi. Mbeni ita-wali so ayeke bata amolenge gi lo oko atene: “Mbi ga na bungbi na bê so anze, teti mbi hinga pëpe ye wa mbi yeke mû ande na amolenge ti mbi ti te tongana mbi kiri na yanga-da.” Maboko ti ndoye so aita amû hio asala si lo wara ngangu. Lo tene: “A kpa mo bâ mo tene mbi zingo na kuâ.”

A-Témoin ayeke “sala ye ti nzoni” nga na lege ti yingo na kangbingo tokua ti dengo bê na ti beku so ayeke na yâ ti Bible. Mabe ti ala ayeke legeoko tongana ti wandara so ti giriri: “Zo so amä [ndara ti Nzapa], fade lo duti na siriri, na bê ti lo aduti nzoni, na mbito ti sioye asala lo pëpe.”​—aProverbe 1:33.

[Afoto na lembeti 31]

1, 2. Kangbingo kobe na azo so ye atia ala na Mozambique

3, 4. Kota pupu ni abuba ada mingi na Guam

[Lingu ti afoto ni]

Molenge, na gati: Andrea Booher/FEMA News Photo; wali, na nduzu: AP Photo/Pacific Daily News, Masako Watanabe