Mbaï ti fini

Gigi so anzere ndali ti e yeda ti zia ambeni ye

TËNË TI MARIAN NA ROSA SZUMIGA

Psaume 54:8 atene: “Fade mbi mû na Mo sacrifice ti nzobe.” Atënë so la afa lege na Marian Szumiga na wali ti lo Rosa, so ala yeke na France. Ade ti ninga pëpe, ala fa akota ye so asi na gigi ti ala so anzere na so ala sala na kua ti Jéhovah a ninga.

MARIAN: Babâ na mama ti mbi asala nzapa ti Catholique. Ala zia kodoro ti Pologne ti sala kodoro na France. Babâ ti mbi asala ekole lâ oko pëpe. Me na ngoi ti Kozo Bira so Amû Sese Kue, lo manda ti diko na ti sû mbeti na ngoi so lo yeke sala kua ti turugu. Lo bâ vorongo Nzapa na nene ni, me fani mingi église azia vundu na bê ti lo.

Lo girisa lâ oko pëpe mbeni ye so asi. Mbeni lâ, na ngoi ti bira ni, mbeni prêtre, so ayeke hiri nzoni tënë na ndo aturugu, asala vizite na bungbi ti aturugu so lo yeke na yâ ni. Tongana mbeni nene lê ti ngombe asungba ndulu na prêtre ni, kota mbito asala lo, na lo pika mbarata ti lo na croix ti sala si lo kpe loro hio. Bê ti babâ ti mbi aso ti bâ mbeni “kota wakua” ti Nzapa so asala kusala na croix so ayeke “nzoni-kue” ti sala si lo kpe hio. Atâa aye so asi na lo nga na aye ti sioni so lo bâ na ngoi ti bira ni, babâ ti mbi angbâ ti mä na bê na Nzapa. Fani mingi, lo yeda so Nzapa la abata lo si lo sö kuâ na yâ ti bira ni.

“Kete Pologne”

Na 1911, babâ ti mbi asala mariage na mbeni molenge-wali ti mbeni kete kodoro so ayeke ndulu na lo. Iri ti lo ayeke Anna Cisowski. Kete na peko ti bira ni, na 1919, Babâ na Mama azia kodoro ti Pologne ti sala kodoro na France, ndo so Babâ awara kua ti gbotongo charbon na gbe ti sese. A dü mbi na mars 1926 na gbata ti Cagnac-les-Mines, na do ti France. Na pekoni, babâ na mama ti mbi asala kodoro na popo ti azo ti Pologne so ayeke na Loos-en-Gohelle ndulu na Lens na banga ti France. Na ndo ni so, zo ti zongo mapa, zo ti kango nyama nga na prêtre ti paroisse ni ayeke gi aPolonais. A yeke ye ti dongo bê pëpe so a hiri ndo ni Kete Pologne. Babâ na mama ti mbi abi tele ti ala na yâ lekengo aye so azo ti ndo ni aye mingi ti sala. Fani mingi, Babâ ayeke leke aye tongana angia ti théâtre, pikango mozoko nga na hengo bia. Lo yeke sala nga lisoro na prêtre ni lakue, me a nzere na lo pëpe so lakue prêtre ni ayeke tene, “Atënë so zo alingbi ti gbu nda ni pëpe ayeke mingi.”

Mbeni lâ, na 1930, awali use apika yanga-da ti e. A yeke aWamandango Bible, so na pekoni a hiri ala aTémoin ti Jéhovah. Babâ avo Bible na tïtî ala, mbeni buku so teti angu mingi lo ye mingi ti diko ni. Lo na Mama adiko nga na bê kue ambeni mbeti ti Nzapa so awali ni azia na ala. Aye so ala diko agbu bê ti ala mingi. Atâa so ala yeke na kua mingi, Babâ na Mama ato nda ti gue na abungbi so aWamandango Bible aleke. Lisoro ti Babâ na prêtre ni aga même papa, juska mbeni lâ, lo tene na Babâ so tongana lo na Mama angbâ ti gue na bungbi ti aWamandango Bible, a yeke tomba yaya ti mbi Stéphanie na cathéchisme. Babâ akiri tënë: “Gi bê ti mo na ndo ti tënë ni pëpe. A to nda ni laso, Stéphanie na tanga ti amolenge ti mbi ayeke gue legeoko na e na bungbi ti aWamandango Bible.” Babâ asigigi na yâ église ni, nga na tongo nda ti ngu 1932, lo na Mama awara batême. Na ngoi ni kâ, wungo ti awafango tënë ti Royaume na France ayeke gi 800 tongaso.

Rosa: Babâ na mama ti mbi alondo na Hongrie, na legeoko tongana sewa ti Marian, ala sala kodoro na banga ti France ti sala kua ti gbotongo charbon na gbe ti sese. A dü mbi na 1925. Na 1937, mbeni Témoin ti Jéhovah, Auguste Beugin, so e hiri lo Papa Auguste, ato nda ti ga na Tour ti Ba Ndo ti yanga ti Hongrois na babâ na mama ti mbi. Ambeti ni anzere na ala mingi, me na popo ti ala, zo oko aga Témoin ti Jéhovah pëpe.

Atâa so mbi de lani maseka, aye so mbi diko na yâ Tour ti Ba Ndo ni agbu bê ti mbi mingi, na tongaso monya ti Papa Auguste, Suzanne Beugin, ato nda ti fa ye na mbi. Babâ na mama ti mbi azia lege na lo ti gue na mbi na bungbi. Na pekoni, tongana mbi to nda ti sala kua, guengo na bungbi ti dimanche ayeke so bê ti Babâ songo. Atâa so lo yeke zo so asala ye nzoni, lo dema tele ti lo: “Na yâ ti yenga ni mo yeke na yanga-da pëpe, nga na dimanche mo yeke gue gi na abungbi ti mo!” Me, mbi ngbâ ti gue na abungbi ni. Mbeni lâ, Babâ atene: “Mû akungba ti mo, na sigigi na da ti mbi!” L’heure ahon mingi, nga mbi yeke gi na ngu 17, na mbi hinga ndo wa si mbi lingbi ti gue dä pëpe. Mbi gue na ndo ti Suzanne si mbi toto mingi. Mbi ngbâ na ndo ti lo ndulu na yenga oko, na pekoni Babâ atokua ita ti mbi ti wali ti kiri na mbi na yanga-da. Mbi yeke zo ti mbito, me atënë ti 1 Jean 4:18 amû maboko na mbi ti luti ngangu. Versê ni atene so “ndoye so alingbi kue atomba mbito.” Mbi wara batême na 1942.

Ye ti héritier ti yingo so ayeke na ngele mingi

Marian: Mbi na ayaya ti mbi Stéphanie, Mélanie na Stéphane e wara batême na 1942. Na yâ sewa ti e, ye kue angoro gi na tele ti Tënë ti Nzapa. Tongana e kue e bungbi oko na tele ti table, Babâ ayeke diko na e Bible na yanga ti Polonais. Mingi ni, na lakui, e yeke mä babâ na mama ti e so ayeke fa peko ti aye so ala wara na fango tënë. Angoi so, so asi singo na aye ti yingo, afa na e ti ndoye Jéhovah na ti zia bê kue na lo mingi ahon ti kozo. Kpale ti seni asala si Babâ azia ti sala kua, me lo ngbâ ti bâ lege ti e na lege ti yingo nga na ti mitele.

Fadeso, so Babâ ayeke na akua mingi pëpe, fani oko na yâ yenga oko oko lo yeke mû li ni na yâ mandango Bible na yanga ti Polonais na amaseka ti kongregation ni. Ge la si mbi manda ti diko yanga ti Polonais. Lo yeke wa nga amaseka ni na mbeni lege nde. Mbeni lâ, tongana Ita Gustave Zopfer, so ayeke bâ ndo na ndo kusala ti aTémoin ti Jéhovah ti France na ngoi ni kâ, asala vizite na kongregation ti e, Babâ aleke mbeni bungbi ti awahengo bia na ti azo so ayü bongo tongana azo ti giriri ti sala drame ti Bible so aluti na ndo matanga ti Gbia Belsatsar nga na maboko ti zo so asû mbeti na tele ti mur (Daniel 5:1-31). Louis Piéchota, so na pekoni lo luti ngangu na gbele aNazi, asala kusala tongana Daniel.a E kono na yâ mara ti dutingo so. E bâ so lakue babâ na mama ti e amû tele ti ala mingi na aye ti yingo. Laso, mbi hinga so a yeke mbeni ye ti héritier so ayeke na ngele mingi si Babâ na Mama azia na e.

Tongana Use Bira so Amû Sese Kue alondo na 1939, a kanga lege na kusala ti fango tënë ti aTémoin ti Jéhovah na France. Mbeni lâ, aturugu ti Zamani angoro kete kodoro so e yeke dä ti gi ndo. Mbeni kete ndo ti batango abongo ayeke dä na yâ da ti e. Na dû ayeke na gbe ni. Babâ aleke ye na ndo ni mo bâ mo tene dû ayeke dä pëpe na e honde ambeti ti e kâ. Ye oko, gbâ ti abrochure Facisme ou Liberté ayeke na yâ ti armoire so a yeke bata akungba ti tengo na kobe dä. Babâ amû ni na lo honde ni na yâ ti abozo ti kazaka ti lo so lo zia na yâ ti couloir. Aturugu use nga na mbeni zo ti lapolice ti France ayeke gi yâ ti da ti e. Bê ti e ayeke gi na nduzu. Mbeni turugu ni akomanse ti hasa yâ ti abongo so ayeke na yâ ti couloir ni, kete na pekoni, lo lï na peko ti e na cuisine na gbâ ti abrochure ni na maboko ti lo. Lo bâ lê ti e, lo zia abrochure ni na ndo ti table na lo ngbâ ti gi ndo na mbeni ndo nde. Mbi mû abrochure ni hio na mbi kiri na ni na yâ ti tiroir so aturugu ni agi yâ ni awe. Turugu ni ahunda nga tënë ti abrochure ni pëpe, mo bâ mo tene lo girisa na ndo ni biaku awe!

Lingo na yâ kusala ti ngoi kue

Na 1948, mbi mû desizion ti sala na Jéhovah na ngoi kue tongana pionnier. Kete na pekoni, mbi wara mbeni lettre so alondo na biröo ti aTémoin ti Jéhovah ti France. Na yâ ti lettre ni, a hunda na mbi ti sala kusala tongana pionnier na kongregation ti Sedan, ndulu na Belgique. Babâ na mama ti mbi ayeke na ngia ti bâ so mbi mû tele ti mbi ti sala na Jéhovah tongana pionnier. Me Babâ atene na mbi so kua ti pionnier ayeke kete kua pëpe. Ye oko, lo tene na mbi so lo yeke lakue ndulu ti yamba mbi na yanga-da ni, nga tongana mbi yeke na kpale mbi lingbi ti ga ti bâ lo. Atâa so babâ na mama ti mbi ayeke na nginza mingi pëpe, ala vo na mbi fini vélo. Mbi ngbâ ti bata mbeti ti vongo na vélo ni, na tongana mbi bâ ni, ngu ti lê ti mbi ayeke ga. Babâ na Mama akui na 1961, me mbi ngbâ ti bata awango ti ndara so Babâ amû; atënë so amû ngangu na mbi na adë bê ti mbi na yâ ti angu kue so mbi sala na kusala.

Mbeni zo so akpengba mbi ayeke lani mbeni ita-wali ti ngu 75 ti kongregation ti Sedan, so iri ti lo ayeke Elise Motte. Mingi ni, na nze ti juin ti si na août, mbi yeke mû vélo ti gue ti fa tënë na yâ akete kodoro so ayo, na Elise ayeke mû train ti gue na peko ti mbi. Me, mbeni lâ, azo ti kpengo na train ake ti sala kua, na Elise alingbi pëpe ti kiri na yanga-da. Gi ye so mbi lingbi ti sala ayeke ti yô lo na ngbonda ti vélo ti kiri na lo na yanga-da, me ye ni ayeke ngangu na lo kete. Na ndade ni na ndapelele, mbi zia mbeni coussin na ngbonda ti vélo ni na mbi gue na yanga-da ti lo ti mû lo. Lo zia lege ti mungo train ni. Tongaso, na nginza ti lege so angbâ, lo wara lege ti vo mbeni ye ti nyongo ni ndali ti e na midi. Zo wa si alingbi ti hinga so vélo ti mbi aga tongana ye ti yongo na zo?

E wara akusala mingi ahon ti kozo

Na 1950, a hiri mbi ti sala kusala tongana surveillant ti circonscription na banga kue ti France. Teti so mbi yeke gi na ngu 23, mbito agbu mbi kozoni. Ti mbi, biröo asoro ye ni na lege ni pëpe! Ahundango tënë mingi aga na li ti mbi: ‘Na lege ti yingo nga na ti mitele, mbi lingbi biani na kusala so? Ti changé da yenga oko oko, mbi yeke sala ande tongana nyen?’ Na ndo ni, ngbele ye na ngoi so mbi yeke na ngu omene, mbeni kobela ti lê asala mbi. Ye so asala si mbeni lê ti mbi oko ayeke bâ ndo gi na mbage oko. Kamene asala mbi ndali ti so mbi yeke gi bê ti mbi na ndo salango ye ti azo tongana ala bâ mbi. Me ye ti nzoni ayeke so mbi wara mungo maboko mingi na mbage ti Stefan Behunick, mbeni missionnaire so awara kota mbeti ti Ekole ti Galaad. A tomba Ita Behunick na Pologne ndali ti kusala ti lo ti fango tënë na a tokua lo na France. Salango ye ti lo na mbito pëpe apika bê ti mbi mingi. Lo bâ Jéhovah nga na tâ tënë na nene ni mingi. Ambeni zo abâ ti ala so lo yeke sala ye na mbi na ngangu, me mbi manda aye mingi na mbage ti lo. Kpengba bê so lo yeke na ni amû maboko na mbi ti duti na mbito pëpe.

Kusala ti circonscription amû lege na mbi ti wara ambeni pendere ye na yâ kusala ti fango tënë. Na 1953, a hunda na mbi ti gue ti sala vizite na Pakara Paoli, so alango na mbongo ti Paris na so asala abonema na Tour ti Ba Ndo. Mbi tingbi na lo, na mbi ga ti hinga so lo yeke ngbele turugu, nga so Tour ti Ba Ndo ayeke mbeni mbeti so agbu bê ti lo. Lo tene na mbi so na peko ti so lo diko mbeni article ade ti ninga pëpe na ndo Matanga ti Dango Bê na kuâ ti Christ, lo mveni lo sala Matanga ni nga lo mû tanga ti ngoi ni ti diko aPsaume. Na peko ti midi ni so, mbi na lo e sala lisoro a ninga. Kozoni ti zia lo, e sala nga ndulu lisoro na ndo batême. Mbi tokua na lo mbeni mbeti ti tene lo ga na kota bungbi ti circonscription so a sala ni na tongo nda ti ngu 1954. Lo ga, nga lo yeke lani na popo ti azo 26 so awara batême na kota bungbi ni. Mara ti aye so angbâ lakue mbeni ye so ayeke zia ngia na bê ti mbi.

Rosa: Na octobre 1948, mbi komanse kua ti pionnier. Na pekoni so mbi sala kusala na gbata ti Anor, ndulu na Belgique, a tokua mbi na Paris legeoko na mbeni pionnier so iri ti lo ayeke Irène Kolanski (fadeso Leroy). E lango na yâ ti mbeni kete da na Saint-Germain-des-Près na bê ti gbata ni. Teti so mbi kono na kete kodoro, bê ti mbi adö mingi ti bâ azo ti Paris. Ti mbi, ala yeke azo so ayeke na akode mingi nga ala hinga ndo mingi. Me na lege ti fango tënë na ala, mbi ga ti bâ so ala yeke tongana tanga ti azo kue. Fani mingi asinziri ayeke tomba e, nga a yeke ngangu ti to nda ti amandango Bible. Atâa so kue, ambeni zo ayeda na tënë ti e.

Na mbeni kota bungbi ti circonscription na 1951, a hunda tënë na mbi na Irène na ndo kusala ti e ti pionnier. Ti mo, zo wa la ahunda tënë ni na e? Mbeni maseka surveillant ti circonscription so iri ti lo ayeke Marian Szumiga. E tingbi tele fani oko awe, me na peko ti kota bungbi ni e to nda ti sû mbeti na mba. Mbi na Marian e yeke na aye mingi so ague oko, so na popo ni e wara batême nga e ga pionnier na yâ ti oko ngu. Me kota ye ni ayeke so e use kue e ye ti ngbâ na yâ kusala ti ngoi kue. Ni la, na peko ti so e bâ tënë ni na yâ sambela, e sala mariage na 31 juillet 1956. Na peko ti mariage ni, mbi to nda ti mbeni fini dutingo so ayeke biani nde. Mbi yeke gi pëpe mbeni wali ti da, me mbi mû peko ti Marian na yâ kusala ti circonscription, so ti tene yenga oko oko e yeke na yâ ti da nde nde nde. Na tongo nda ni, ye ni ayeke ngangu, me akota ye ti ngia mingi ayeke ku e.

Mbeni gigi so anzere

Marian: Tongana ngoi ayeke hon, e wara matabisi ti mû mbage ti e na lekengo akota bungbi mingi. Mbeni kota bungbi so mbi girisa ni pëpe ayeke ti so e sala na 1966 na Bordeaux. Na ngoi ni kâ, a kanga lege na kusala ti aTémoin ti Jéhovah na Portugal. Tongaso, ndali ti nzoni ti aTémoin so alingbi ti ga na France, a sala mbeni mbage ti programme ni na yanga ti Portugais. Aita-koli na aita-wali ngbangbo mingi ti Portugal asi, me kpale ni ayeke tënë ti ndo ti lango. Ndali ti so aTémoin ti Bordeaux ayeke na ada so chambre ni ayeke mingi pëpe, e loué mbeni da ti cinéma so yâ ni ayeke senge ti leke ni si a ga ndo ti lango. E zi aye ti duti kue so ayeke na yâ ni, na e mû mbeni kota lê ti bongo so ayeke na ndo ti estrade ni ti fâ na yâ ti da ni si a ga ando ti lango use; oko teti aita-koli na mbeni teti aita-wali. E leke ando ti sukulango ngu nga na akota bassine ti sukulango na ye; nga, e gbara apele na sese na yâ ti da ni na e bi abâche na ndo ni. Lekengo ye so anzere na azo kue.

Na peko ti akapa ti kota bungbi ni, e gue ti bâ aita so alango na ndo so e leke teti ala. Ala yeke na ngia mingi. A nzere na e mingi ti mä anzoni ye so ala wara atâa so ala gbu ngangu teti angu mingi. Lê ti e kue asi na ngu ti lê tongana ala zia e na hunzingo ti kota bungbi ni.

Mbeni matabisi so e wara asi ngu use kozoni, so ti tene na 1964, tongana a hunda na mbi ti sala kusala tongana surveillant ti district. Ge nga, mbi hunda tele ti mbi wala mbi lingbi biani ti sala kusala ni. Me mbi tene na bê ti mbi so tongana azo so ayeke na kungba ti mû kusala ni na azo ahunda na mbi ti yeda na ni, ala hinga biani so mbi lingbi ti sala ni. A yeke lani nzoni ye mingi ti sala kusala na tele ti ambeni surveillant so ague na ndo nde nde. Mbi manda ye mingi na mbage ti ala. Mingi ti ala ayeke biani anzoni tapande ti dutingo na be-nze-pepe nga na ti gbungo ngangu, alengo so ayeke kota ye mingi na lê ti Jéhovah. Mbi ga ti hinga so tongana e manda ti duti na be-nze-pepe, Jéhovah ahinga tongana nyen ti sala kusala na e.

Na 1982, biröo ahunda na e nga ti bâ lege ti mbeni kete bungbi ti aPolonais 12 so ayeke awafango tënë na Boulogne-Billancourt, ndulu na Paris. So ayeke lani mbeni ye ti dongo bê. Mbi hinga atënë so andu aye ti bungbi na yanga ti Polonais, me mbi yeke na kpale ti tene yanga ti Polonais ni. Ye oko, nzobe nga na dutingo ndulu ti sala kua legeoko na aita ni amû maboko na mbi mingi. Laso, awafango tënë ti kongregation ni ayeke 170 so na popo ni apionnier 60. Na pekoni, mbi na Rosa e sala nga vizite na agroupe nga na akongregation ti yanga ti Polonais na Autriche, Danemark nga na Zamani.

Dutingo ti e agbian

Salango vizite na akongregation nde nde ayeke lani kota mbage ti fini ti e, ye oko kpale ti seni ti mbi asala si e zia kusala ni na 2001. E wara mbeni ndo ti lango na gbata ti Pithiviers, ndo so ngambe ti mbi Ruth ayeke dä. Na nzobe, biröo ahiri e tongana apionnier spécial na hundango na e mbeni ngbonga so alingbi na dutingo ti e.

Rosa: Kozo ngu so aga na peko ti so e zia kua ti circonscription ayeke lani ngangu mingi na mbi. Gbiango ye ni, so ayeke tâ ngangu mingi, asala si mbi bâ tele ti mbi so mbi yeke ye oko pëpe. Na pekoni mbi tene, ‘Mo lingbi ti ngbâ lakue ti sala kusala na angoi so mo yeke na ni, nga mo yeke sala ye ti nzoni mingi na dutingo pionnier.’ Laso, mbi yeke na ngia mingi ti sala kusala legeoko na ambeni pionnier ti kongregation ti e.

Jéhovah ayeke bâ lege ti e lakue

Marian: Mbi kiri singila mingi na Jéhovah so Rosa ayeke na tele ti mbi na yâ ti ngu 48 so ahon. Na yâ ti angu kue so e tambela na nduzu, lo mû maboko na mbi mingi. Mbi mä lo lâ oko pëpe ti tene, ‘Mbi ye ti tene e duti na ndo oko na e leke sewa ti e.’

Rosa: Na ambeni ngoi, mbeni zo ayeke tene na mbi, “Mara ti gigi ni so mo yeke na ni so ayeke nzoni pëpe. Mo yeke lango gi lakue na ndo ti azo.” Me tâ “nzoni gigi” ni ayeke so wa? Fani mingi, e tingbi na aye so alingbi fade ti kanga lege na e ti ngbâ ti sala akusala ti e ti yingo. Me tâ ye so e yeke na bezoin ni ayeke mbeni nzoni gbogbo, nzoni table na akete kete ye so a hunda ti duti na ni. E yeke apionnier na e yeke tâ gi na akete kete ye na lege ti mitele; ye oko, e wara ye kue so e yeke na bezoin ni ti sala na ye so bê ti Jéhovah aye. Na ambeni ngoi, azo ayeke hunda mbi: “Mo yeke sala nyen ande tongana mo ga mbakoro, sân da ti li ti mo nga sân nginza ti retraite?” Na pekoni mbi yeke diko peko ti atënë ti Psaume 34:11 so atene ‘azo so agi Jéhovah fade nzoye oko amanke ala pëpe.’ Jéhovah ayeke bâ lege ti e lakue.

Marian: A yeke tâ tënë! Jéhovah amû na e ye mingi ahon ti so e yeke tâ na bezoin ni. Na tapande, na 1958, a soro mbi ti gue na iri ti circonscription ti e na assemblée internationale na New York. Me e yeke na nginza ti futa mbeti ti lapara na li ti Rosa pëpe. Na mbeni lakui, mbeni ita-koli amû na e mbeni enveloppe so a sû mbeti so na ndo ni: “New York”. Nginza so ayeke na yâ ni amû lege na Rosa ti gue legeoko na mbi!

Mbi na Rosa e yeke na vundu oko pëpe teti angu mingi so e sala na kusala ti Jéhovah. E girisa ye oko pëpe, me e wara mbeni kota ye mingi: Mbeni gigi so anzere mingi na yâ kusala ti ngoi kue. Jéhovah ayeke tâ nzoni Nzapa. E manda ti zia bê ti e kue na lo, nga ndoye ti e teti lo akiri akono. Ambeni mba ti e Chrétien akui ndali ti dutingo be-ta-zo ti ala. Ye oko, mbi hinga so tongana angu ayeke hon, mbeni zo alingbi nga ti mû fini ti lo ti sala na Jéhovah lâ oko oko. So ayeke ye so mbi na Rosa e sala ngangu ti sala ni juska laso, nga a yeke ye so e leke na bê ti e ti sala na ngoi so ayeke ga.

[Kete tënë na gbe ni]

[Foto na lembeti 20]

François na Anna Szumiga na amolenge ti ala, Stéphanie, Stéphane, Mélanie na Marian ndulu na 1930. Marian si aluti na ndo tabouret

[Foto na lembeti 22]

Na nduzu: Fango ambeti na yâ mbeni gara ti Armentières, na banga ti France, na 1950

[Foto na lembeti 22]

Na gati: Stefan Behunick na Marian na 1950

[Foto na lembeti 23]

Marian na Rosa lango oko kozoni na mariage ti ala

[Foto na lembeti 23]

Rosa (kâ na gati) na mba ti lo pionnier Irène (osio zo ti londo na gati), na salango sabango ti mbeni assemblée na 1951

[Foto na lembeti 23]

Mingi ti atambela na ngoi ti avizite ti circonscription ayeke gi na vélo