BIBLIOTHÈQUE NA NDÖ TI INTERNET Watchtower
Watchtower
BIBLIOTHÈQUE NA NDÖ TI INTERNET
Sango
  • BIBLE
  • AMBETI
  • ABUNGBI
  • w04 1/10 l. 14-19
  • ‘I ye tele na popo ti i’

Vidéo ayeke na yâ ti mbage ni so ape.

Pardon, mbeni kpale asi na ngoi ti zingo vidéo ni.

  • ‘I ye tele na popo ti i’
  • Tour ti Ba Ndo Afa Tene ti Royaume ti Jéhovah: 2004
  • Akete li ti tënë ni
  • Ambeni mbeti nde na ndö ti oko tënë ni
  • Yengo tele ti aita nga na ndoye
  • ‘Nzapa afa na e ti ndoye tele ti e’ na popo ti e
  • Mo yeke na bezoin ti “kono yâ ni”?
  • Fa atënë ti bê ti mo na ambeni zo
  • “Mo mû ngia na Mbi mingi”
  • “Seigneur asi na be-ti-ndoye”
  • Zia e ngbâ ti duti na tâ yengo terê
    Tour ti Ba Ndo Afa Tene ti Royaume ti Jéhovah (Ti mandango ni): 2021
  • Tongana nyen la mo peut ti fa na koli wala wali ti mo so mo ye lo?
    Ti mû maboko na asewa
  • Fa ndoye na yâ ti sewa
    Tour ti Ba Ndo Afa Tene ti Royaume ti Jéhovah: 2002
  • ‘I duti na kota ndoye na popo ti i’
    Voro oko tâ Nzapa
Bâ ambeni ye ni
Tour ti Ba Ndo Afa Tene ti Royaume ti Jéhovah: 2004
w04 1/10 l. 14-19

‘I ye tele na popo ti i’

‘I ye tele na popo ti i tongana ti so aita ayeke ye tele.’​—AROMAIN 12:10, Fini Mbuki, 2001.

NA YÂ ti ngu 43 so lo sala na kua ti missionnaire na mbage ti Asie ti Tö, a hinga Don ndali ti wâ so lo yeke na ni na mbage ti azo so lo sala na ala. Tongana lo yeke tiri na kobela so ayeke gue na lo ti kui, ambeni zo so lo manda Mbeti ti Nzapa na ala na so alondo na ando so ayo ti ga ti bâ lo atene: “Kamsahamnida, kamsahamnida!” so ti tene “Singila, singila!” na yanga ti Coréen. Yengo tele ti aita so Don ayeke na ni andu bê ti ala mingi.

2 A yeke gi Don si mara ti ye so asi na lo pëpe. Na ngoi ti akozo Chrétien, bazengele Paul afa kota ndoye so lo yeke na ni na mbage ti azo so lo sala na ala. Lo mû tele ti lo kue ti sala na ala. Atâa so lo yeke mbeni zo so ayeke bele pëpe aye so lo mä na bê dä, Paul ayeke nga na nzobe nga lo bi bê ti lo na azo “legeoko tongana mama abata amolenge ti lo mveni na nzobe”. Lo sû mbeti na kongregation ti Thessalonique: “I ga azo so e ndoye i mingi, tongaso nzara ti sala nzoni na i asala e, na e yeke na ngia ti mû na i gi Tene-nzoni ti Nzapa pëpe, me âme ti e mveni nga.” (1 aThessalonicien 2:7, 8). Na pekoni, tongana Paul atene na aita ti Ephèse so ala yeke bâ lo mbeni pëpe, “ala kue atoto na vundu mingi, ala tï na ndogo ti Paul, ala hunu yanga ti lo.” (Kusala 20:25, 37). Biani, kpengba songo so ayeke na popo ti Paul na aita ti lo ayeke gi pëpe ndali ti so ala yeke na yâ ti bungbi oko. Ala yeke na yengo tele ti aita na popo ti ala.

Yengo tele ti aita nga na ndoye

3 Na yâ ti Mbeti ti Nzapa, yengo tele ti aita, ziango tele na place ti zo nga na bango mawa ti zo ague tâ oko na ndoye, kota salango ye ti aChrétien so ahon atanga ni kue (1 aThessalonicien 2:8; 2 Pierre 1:7). Na tapande ti apendere ye nde nde so ayeke na tele ti mbeni tênë ti ngele ngangu, asalango ye so ayeke bungbi oko ti ga na aye ti nzoni. Ala yeke gboto gi pëpe aChrétien ndulu na mba, me nga na Babâ ti ala ti yayu. Ni la, Paul awa amba ti lo wamabe: “I zia ndoye ti i aga tâ ndoye. . . . I ndoye ambeni zo [“i duti na yengo tele”, NW ] na popo ti i tongana aita.”​—aRomain 12:9, 10.

4 Tënë ti Grec so Paul asala na kua teti “yengo tele” ayeke na ambage use: Mbeni oko aye ti fa songo ti kamarade, na mbeni aye ti fa songo so ayeke na popo ti azo ti mbeni sewa. Tongana ti so mbeni wagingo nda ti Bible afa, ye so aye ti tene so aChrétien “ayeke duti azo so a hinga ala na lege ti mungo bê ti ala kue na mba, so a yeke fa ni na lege ti ndoye, kpengba songo nga na mara ti mungo maboko na mba so ayeke na yâ ti sewa.” So ayeke bibe so mo yeke na ni na mbage ti aita ti mo wamabe ti koli na ti wali? A lingbi bibe ti dutingo tongana sewa amû yâ ti kongregation kue (aGalate 6:10). Ni la, Mbeti ti Nzapa, Fini Mbuki, 2001 akiri peko ti aRomain 12:10 na lege so: ‘I ye tele na popo ti i tongana ti so aita ayeke ye tele.’ Nga, Bible ti Sango ti Alliance Biblique Universelle 1966 atene: “I ndoye ambeni zo na popo ti i tongana aita.” Tongaso, aChrétien ayeke ndoye amba ti ala gi pëpe ndali ti so a yeke na lege ni ti sala ni wala ngbanga ti so a yeke kungba ti ala ti sala ni. Me, a lingbi e ‘ndoye aita na tâ ndoye, e ndoye ambeni zo na popo ti e na be-biani’ wala ndoye so alondo tâ na bê.​—1 Pierre 1:22.

‘Nzapa afa na e ti ndoye tele ti e’ na popo ti e

5 Atâa so e yeke na yâ ti sese so “ndoye ti azo mingi” ayeke dë dengo, Jéhovah ayeke fa ye na azo ti lo ti “ndoye tele” na popo ti ala (Matthieu 24:12; 1 aThessalonicien 4:9). A-assemblée internationale ti aTémoin ti Jéhovah ayeke akpengba ngoi ti fa na gigi ndoye so ala wara fango ye na ndo ni. Na akota bungbi so, aTémoin ti kodoro ni ayeke tingbi na aita ti ala so alondo na akodoro so ayo, nga mingi ti ala ayeke yamba azo so na da ti ala. Na mbeni kota bungbi so ahon ade ti ninga pëpe, ambeni zo alondo na akodoro so azo ni ayeke ndulu pëpe ti fa atënë ti bê ti ala na gigi. Mbeni Chrétien so abâ lege ti ando ti lango atene: “Na kozo singo ti azo so, ala yeke na mbito nga na kamene. Me gi lango omene na pekoni, tongana aita so aga ti kiri, ala nga na aita ti kodoro ni so ayamba ala agbu tele na ala toto. Ala yeke na ngia mingi ngbanga ti mara ti wâ ti ndoye ti aChrétien so ala yeke girisa ni ande lâ oko pëpe.” Ti yamba aita ti e, atâa ndo so ala londo dä, alingbi ti sala nzoni mingi na agene so aga nga na azo so agene ni alango na ndo ti ala.​—aRomain 12:13.

6 Aye so ayeke si na ngoi ti akota bungbi ayeke aye so azia ngia na bê, me mbeni kpengba songo ayeke bâ gigi na ngoi so aChrétien ayeke sala na Jéhovah legeoko teti mbeni ngoi so aninga. Tongana e hinga aita ti e nzoni, e lingbi ti yekia mingi anzoni salango ye ti ala tongana tenengo tâ tënë, dutingo zo so alingbi ti zia bê kue na lo, dutingo be-ta-zo, salango ye na nzobe, dutingo na bê ti mû ye, bango zo na nene ni, dutingo na be-ti-ndoye nga na salango ye na kion pëpe (Psaume 15:3-5; aProverbe 19:22). Mark, so asala kua ti missionnaire na Afrika ti Tö, atene: “Salango kua legeoko na aita ti e ayeke sala si songo ti e aga mbeni ye so yâ ni alingbi ti fâ pëpe.”

7 Ti wara mara ti songo so nga ti bata ni na yâ ti mbeni kongregation, a lingbi azo ti yâ ni aga ndulu mingi na mba. Na guengo na abungbi lakue, e yeke kpengba songo so e yeke na ni na aita ti e ti koli na ti wali. Tongana e gue na abungbi, e ga ndulu na aita ti e kozoni nga na peko ti abungbi ni na e mû mbage ti e dä, na alege so e yeke wa amba ti e ti “ndoye azo, na [ti] sala kusala nzoni”. (aHébreu 10:24, 25). Mbeni ancien na Amerika atene: “Mbi dabe ti mbi so na ngoi so mbi de lani kete, sewa ti e ayeke lakue na popo ti andangba zo so ayeke zia Da ti Royaume. E yeke ngbâ a ninga ti sala anzoni lisoro so ayeke kpengba songo na popo ti e.”

Mo yeke na bezoin ti “kono yâ ni”?

8 Ti fa na gigi mara ti yengo tele so, a hunda na e ti “kono yâ” ti ndoye ti e. Bazengele Paul asû mbeti so na kongregation ti Corinthe: “E kono yâ ti ndoye ti e teti i. Ndoye ti e teti i ayeke mingi.” Paul awa ala ti tene ala nga kue ‘akono yâ ni.’ (2 aCorinthien 6:11-13, NW ). Mo nga mo lingbi ti “kono yâ” ti ndoye ti mo? Mo yeke pëpe na bezoin ti ku ti tene ambeni zo si amû li ni kozo. Na yâ mbeti so lo tokua na azo ti Rome, Paul afa nene ti yengo tele ti aita na lege ti wango so: “I mû li ni ti yekia tele ti i na popo ti i.” (aRomain 12:10, NW ). Ti yekia azo, mo lingbi ti mû li ni ti tingbi na ala na ngoi so mo ga na bungbi. Mo lingbi ti hunda na ala ti sigigi na fango tënë wala ti leke bungbi legeoko na mo. Salango tongaso ayeke sala si yengo tele ti aita amaï.

9 Asewa na azo oko oko kue ti yâ ti kongregation alingbi ti “kono yâ ni” na salango vizite na mba, peut-être na tengo kete kobe nga na salango anzoni kusala legeoko (Luc 10:42; 14:12-14). Ngoi na ngoi, Hakop ayeke leke ti tene mbeni kete wungo ti azo awara tele ti te ye. Lo tene: “Amaseka na ambakoro, nga na akoli wala awali so ayeke bata amolenge gi ala oko ayeke dä. Azo kue ayeke kiri na yanga-da na ngia, nga ala bâ so songo so ayeke na popo ti ala akiri akpengba.” E aChrétien, a lingbi e sala ngangu si songo ti e aduti gi ti awamabe pëpe me nga ti atâa kamarade.​—3 Jean 15.

10 Ye oko, ngoi na ngoi, awokongo ti e alingbi ti kanga lege na e ti duti na songo ti kamarade nga na yengo tele ti aita. E lingbi ti sala nyen? Kozoni, e lingbi ti sambela ndali ti songo ti e na aita ti e. Ye so bê ti Nzapa aye ayeke ti tene awakua ti lo aduti na mango tele na popo ti ala, nga lo yeke kiri tënë na mara ti asambela tongaso, so a tene ni na bê kue (1 Jean 4:20, 21; 5:14, 15). A yeke nga nzoni ti tene e sala ye alingbi na asambela ti e. Ric, mbeni wakua so ayeke tambela na ndo nde nde na Afrika ti Tö, adabe ti lo na mbeni ita-koli so salango ye ti lo na ngangu asala si a yeke ngangu ti mä tele na lo. Ric atene: “A hon ti tene mbi kpe lo, mbi leke na bê ti mbi ti gi ti hinga lo nzoni. Ye ni ayeke so babâ ti lo ayeke lani mbeni zo so aso mingi. Na pekoni so mbi hinga tongana nyen a yeke lani ngangu na ita ni ti tiri ti hon ndo ti salango ye so lo wara na mbage ti babâ ti lo, nga tongana nyen lo gue na li ni mingi, ye so asala si mbi ye lo mingi na e ga atâ kamarade.”​—1 Pierre 4:8.

Fa atënë ti bê ti mo na ambeni zo

11 Laso, azo mingi aduti na fini sân ti gi ti duti na kpengba songo ti kamarade na mbeni zo. So tâ ye ti mawa! A lingbi mara ti ye so aduti na yâ kongregation ti aChrétien pëpe. Tâ yengo tele ti aita ayeke gi pëpe senge balango azo nga na nzoni salango ye na mbage ti azo; a yeke nga pëpe fango atënë ti bê ti mo na mbeni lege so ahon ndo ni. Nde na so, a lingbi e fa atënë ti bê ti e na ambeni zo, tongana ti so Paul asala na azo ti Corinthe, nga e fa na amba ti e wamabe so e bi bê ti e mingi na ndo nzoni duti ti ala. Atâa so a yeke pëpe na yâ ti salango ye ti azo kue ti duti ndulu na amba ti ala wala ti fa atënë ti bê ti ala na gigi, a yeke nzoni pëpe ti duti gi e oko. Mbeti ti Nzapa amû wango so: “Zo so akangbi tele ti lo na mbeni zo, lo gi ye so bê ti lo aye, na lo yeke na ngonzo na tele ti ye kue so ayeke na lege ti tâ ndara.”​—aProverbe 18:1.

12 Nzoni lisoro ayeke gunda ti tâ songo ti kamarade (Jean 15:15). E kue e yeke na bezoin ti akamarade so e lingbi ti fa na ala aye so ayeke na yâ ti bê ti e nga na atënë ti bê ti e. Na ndo ni, tongana e hinga tele nzoni, a yeke ngangu pëpe ti bâ lege ti aye so atia e na popo ti e. Na lege so, tongana e yeke bi bê ti e na ndo aye ti amba ti e, e yeke maï yengo tele ti aita, nga e yeke bâ ande tongana nyen atënë ti Jésus so ayeke tâ tënë: “Ngia ayeke na zo so amû ye, ahon ngia ti lo so akamata ye.”​—Kusala 20:35; aPhilippien 2:1-4.

13 Ti tene e wara ye ti nzoni mingi na lege ti yengo tele ti e ti aita, e yeke na bezoin ti fa ni na gigi (aProverbe 27:5). Tongana e yeke na tâ yengo tele ti aita, a lingbi ti bâ ni na lê ti e; na ye so alingbi ti pusu azo ti duti na mara ti yengo tele so na mbage ti e. Mbeni mato ti Bible atene: “Bango ndo na nzobe amû ngia na bê ti zo.” (aProverbe 15:30). Akusala so afa na gigi bingo bê na zo ayeke maï nga yengo tele ti aita. Atâa so mbeni zo alingbi pëpe ti vo tâ yengo tele ti aita, mbeni matabisi so e mû ni na bê ti e kue alingbi ti duti mbeni ye so andu bê ti zo. Mbeni lettre wala mbeni “tënë so zo atene” na tâ ngoi ni alingbi ti fa kota yengo tele ti aita (aProverbe 25:11; 27:9). Tongana e leke nzoni songo ti kamarade na azo awe, a lingbi e ngbâ ti bata ni na ngbango lakue ti fa na gigi yengo tele ti aita so kion ayeke dä pëpe. Na angoi so ye atia amba ti e, e yeke duti ande na nzara ti mû maboko na ala. Bible atene: “Tâ ndeko andoye lakue; na lâ ti ye ti vundu, lo yeke tongana tâ ita.”​—aProverbe 17:17.

14 Ti tâ tënë ni, e lingbi pëpe ti duti na oko kpengba songo na azo kue ti kongregation. A yeke tâ na lege ni ti bâ so e yeke ndulu mingi na ambeni zo ahon ambeni nde. Ni la, tongana mo bâ so mbeni zo ayeke na wâ na mbage ti mo pëpe tongana ti so bê ti mo aye, tene hio pëpe so tënë ayeke na popo ti mo na zo ni so. Nga, tara ti gbu zo na ngangu pëpe ti ga tâ kamarade ti mo. Tongana mo yeke sala kue ti fa so mo ye ti sala kamarade na lo, lege ayeke dä ti tene mbeni lâ ala duti na kpengba songo na popo ti ala.

“Mo mû ngia na Mbi mingi”

15 Bê ti Jésus anzere lani mingi ti mä tënë so na ngoi ti batême ti lo: “Mo mû ngia na Mbi mingi.” (Marc 1:11). Tënë ni so asala si Jésus akiri ahinga biani so Babâ ti lo aye lo mingi (Jean 5:20). Mawa ni ayeke so ambeni zo amä mara ti gondango ndo so lâ oko pëpe na yanga ti azo so ala ne ala na so ala ye ala mingi. Ann atene: “Legeoko tongana mbi, mingi ti amaseka ayeke pëpe na asewa so ayeke Chrétien. Na yanga-da, e yeke mä gi kasango ndo. Ye so asala si e yeke tâ na vundu mingi.” Me, tongana ala ga na yâ kongregation, ala yeke bâ tâ mungo maboko, mbeni sewa ti yingo so ayeke bi bê na ala na so ayeke tongana babâ na mama nga na aita ti koli na ti wali na lege ti yingo.​—Marc 10:29, 30; aGalate 6:10.

16 Na ambeni ndo, a yeke ngangu ti tene ababâ na mama, ambakoro nga na awafango mbeti agonda amaseka. Ti ala, gondango amaseka alingbi ti sala si ala ye ti sala ngangu mbeni pëpe wala ala yeke wara bibe ti baba. Mara bibe so alingbi même ti lï na yâ ti asewa ti aChrétien nga na yâ kongregation. Ti sala tënë na ndo ti mbeni diskur wala ngangu so mbeni zo asala, azo so ngu ti ala ague na li ni alingbi ti tene: “So ayeke nzoni, me mo lingbi ti sala ni nzoni ahon so!” Wala na mbage, ala lingbi même ti fa na maseka ni so mbeni salango ye ti lo anzere na ala pëpe. Mingi ti azo abâ ti ala so na salango tongaso, ala yeke pusu amaseka ti sala ye kue so ala lingbi ti sala. Ye oko, fani mingi salango tongaso ayeke sala nzoni na amaseka ni pëpe, ndali ti so ala lingbi ti kiri na peko wala ti bâ so ala lingbi pëpe ti sala ye so a yeke ku na mbage ti ala.

17 Ye oko, a lingbi gondango ndo aduti pëpe mbeni ye so mo tene ni gi ti wara lege ti mû wango na mbeni zo. Tongana tâ gondango ndo asala si yengo tele ti aita amaï na yâ sewa nga na yâ kongregation, a yeke pusu amaseka ti gi peko ti aita-koli na aita-wali so ayeke na ndara ti wara wango na mbage ti ala. Ni la, a hon ti tene e zia si ye so tanga ti azo ayeke sala afa na e ye so e lingbi ti sala na mbage ti azo, zia e “yü zo-ti-fini, lo so A créé lo na lege ti Nzapa na yâ mbilimbili na nzoni-kue ti tene-biani.” E gonda azo tongana ti so Jéhovah asala.​—aEphésien 4:24.

18 Na mbeni mbage, i amaseka, tongana azo ti yâ ti kongregation so ngu ti ala ahon ti i amû wango wala agboto mê ti i, a lingbi i tene pëpe so ala ke i (Zo-ti-fa-tene 7:9). Nde na so, peut-être ye so apusu ala ti sala ni ayeke kota ndoye nga na bingo bê so ala yeke na ni teti i. Tongaso pëpe, ye nyen alingbi fade ti pusu ala ti sala ni? Teti so ala hinga nzoni mingi ngangu so tënë ti yanga ti zo ayeke na ni, azo so ngu ti ala ague na li ni, me mbilimbili a-ancien, ayeke mû ngoi mingi ti gbu li ti ala nga ti sambela kozoni ti mû wango, ndali ti so ala ye gi ti sala ye ti nzoni.​—1 Pierre 5:5.

“Seigneur asi na be-ti-ndoye”

19 Aye so asi so anzere na bê ti zo pëpe alingbi ti sala si ambeni zo abâ ti ala so ti ngbâ ti fa na gigi yengo tele ti aita ayeke ga gi na ye so azia vundu na bê ti zo. A hunda na ala ti duti na bê so akpengba nga na kpengba mabe ti kiri ti fa atënë ti bê ti ala na azo. Me a lingbi ala girisa lâ oko pëpe so Jéhovah ayeke “yongoro pëpe na e oko oko kue”. Lo tisa e ti ga ndulu na lo (Kusala 17:27; Jacques 4:8). Lo gbu nga nda ti aye so asala si e yeke na mbito ti tene mbeni ye azia kä na bê ti e, nga lo mû zendo ti duti ndulu ti mû maboko na e. Wasungo psaume David adë bê ti e: “L’Eternel ayeke ndulu na azo so bê ti ala afâ awe, na Lo sö ala so yingo ti ala ayeke na vundu.”​—Psaume 34:19.

20 Dutingo na kpengba songo ti kamarade na Jéhovah ayeke kota ye so ahon atanga ni kue so e lingbi ti gi ti duti na ni. Me a lingbi ti wara mara ti songo ni so? Biani, a lingbi ti wara ni. Bible asala tënë ti akoli na awali ti mbilimbili so ala yeke tâ ndulu mingi na Babâ ti e ti yayu. A bata apendere tënë ti bê ti ala na yâ ti Bible ti mû na e beku so e nga kue e lingbi ti ga ndulu na Jéhovah.​—Psaume 23, 34, 139; Jean 16:27; aRomain 15:4.

21 Aye so Jéhovah ahunda ti duti na kpengba songo ti kamarade na lo alingbi na ngangu ti zo oko oko kue. David ahunda: “O L’Eternel, fade zo nyen aduti na Tabernacle ti Mo? . . . Lo so atambela mbilimbili, na lo sala kusala ti mbilimbili, na lo tene tene-biani na bê ti lo.” (Psaume 15:1, 2; 25:14). Tongana e bâ so salango na Nzapa ayeke mû lege na e ti duti na nzoni salango ye na a sala si lo yeke fa lege na e nga lo yeke bata e, e yeke ga ande ti hinga so “Seigneur asi na be-ti-ndoye”.​—Jacques 5:11.

22 A yeke tâ mbeni deba nzoni mingi ngbanga ti e so Jéhovah aye ti duti na mara ti songo so na e so e yeke mbilimbili-kue pëpe. A lingbi e nga e fa na gigi so e ye tele na popo ti e pëpe? Na lege ti mungo maboko ti Jéhovah, zo oko oko na popo ti e alingbi ti fa ndoye nga ti wara yengo tele ti aita so a hinga na sewa ti e ti aChrétien. Na gbe ti Royaume ti Nzapa, azo kue na ndo sese ayeke fa yengo tele ti aita so teti lakue lakue.

Mo lingbi ti fa nda ni?

• Bibe wa a lingbi amû ndo na yâ kongregation?

• Tongana nyen zo oko oko na popo ti e alingbi ti sala si yengo tele ti aita amaï na yâ kongregation?

• Tongana nyen tâ gondango ndo ayeke maï yengo tele ti aita na popo ti aChrétien?

• Tongana nyen be-ti-ndoye so Jéhovah ayeke na ni ayeke mû maboko na e?

[Ahundango tënë ti manda na ye]

1, 2. Mara ti songo wa mbeni missionnaire ti ngoi ti e nga na bazengele Paul ayeke lani na ni na aita ti ala?

3. Tongana nyen atënë ti Bible so andu yengo tele ti aita ague tâ oko na ndoye?

4. Tënë “yengo tele” aye ti tene nyen?

5, 6. (a) Tongana nyen Jéhovah ayeke sala kua na a-assemblée internationale ti fa na azo ti lo yengo tele ti aChrétien? (b) Tongana nyen songo so ayeke na popo ti aita ayeke kpengba tongana ngoi ayeke hon?

7. Ti wara yengo tele ti aChrétien na yâ kongregation, ye wa a hunda na e?

8. (a) Paul aye ti tene nyen tongana lo wa azo ti Corinthe ti “kono yâ ni”? (b) Ye nyen e lingbi ti sala ti maï yengo tele ti aita na yâ kongregation?

9. Aye wa ambeni zo asala ti kpengba songo ti ala na amba ti ala Chrétien? (Yôro na yâ ni atapande ti ndo so mo yeke dä.)

10. Ye nyen e lingbi ti sala tongana songo so ayeke na popo ti e atambela nzoni pëpe?

11. (a) Ye nyen ayeke kota ye ti tene yengo tele ti aita amaï na yâ kongregation? (b) Ngbanga ti nyen ti ke ti fa atënë ti bê ti e na gigi alingbi ti duti sioni na lege ti yingo?

12. Ngbanga ti nyen nzoni lisoro ayeke kota ye ndali ti songo ti kamarade na yâ kongregation?

13. Ye nyen e lingbi ti sala ti fa so e yeke na tâ yengo tele ti aita?

14. Ye nyen e lingbi ti sala tongana mbeni zo ayeke ndulu pëpe ti yeda na ndoye so e yeke fa?

15. Tongana a gonda zo wala a gonda lo pëpe, a yeke sala nyen na ndo ti lo?

16. Ngbanga ti nyen a yeke nzoni pëpe ti duti lakue na bibe ti kasango ndo na ndo mbeni ye so zo asala?

17. Ngbanga ti nyen a lingbi e gi alege ti gonda azo?

18. (a) Amaseka, tongana azo so ngu ti ala ahon ti i amû wango na i, a lingbi i bâ ni tongana nyen? (b) Ngbanga ti nyen azo so ngu ti ala ague na li ni ayeke sala hange na ndo lege so ala yeke mû wango?

19. Ngbanga ti nyen a lingbi ala so bê ti ala awoko ndali ti aye so ayeke zia vundu na bê agi mungo maboko na mbage ti Jéhovah?

20, 21. (a) Tongana nyen e hinga so e lingbi ti duti na mbeni kpengba songo na Jéhovah? (b) Aye wa a hunda na e ti duti na mbeni kpengba songo na Jéhovah?

22. Mara ti songo wa Jéhovah aye si azo ti lo aduti na ni?

[Foto na lembeti 15]

Ndoye so aChrétien ayeke fa alondo tâ na bê

[Afoto na lembeti 16, 17]

Mo lingbi ti “kono yâ” ti ndoye ti mo?

[Foto na lembeti 18]

Mo yeke kasa gi azo wala mo yeke kpengba ala?

    Ambeti na Sango (1997-2025)
    Sigi
    Linda
    • Sango
    • Kangbi ni na mbeni zo
    • Aye so mo ye
    • Copyright © 2025 Watch Tower Bible and Tract Society of Pennsylvania
    • Lege ti sara kua na ni
    • Ye so a yeke sara na asango so mo mû
    • Paramètres de confidentialité
    • JW.ORG
    • Linda
    Kangbi ni na mbeni zo