Mo hinga kota ngia so ayeke ga na lege ti mungo ye?

MBENI ita-wali asala kusala ti fango tënë ndulu na ngu 50. Atâa so lo woko mingi ndali ti so ngu ti lo ague na li ni mingi, lo leke na bê ti lo ti gue ti bâ fini Da ti Royaume so a leke ni. Mbeni ita-koli agbu maboko ti lo, na amû lege na lo ti lï na yâ ti Da ti Royaume ni so nga ti tambela yeke yeke ti gue gi na ndo so a zia boîte ti a-offrande dä. Na yâ ti boîte ni kâ, lo zia mbeni kete wungo ti nginza so lo bata ni ti mû gi na contribution ngbanga ti fini Da ti Royaume so. Atâa so lo yeke na ngangu pëpe ti bi tele ti lo na yâ kusala ti lekengo da ni, lo ye ti mû maboko na ni.

Salango ye ti ita-wali so adabe ti mo peut-être na mbeni wali be-ta-zo nde, “womua so ayeke wanzinga”, so Jésus abâ lo na ziango akete lê ti nginza use na yâ ti sanduku ti temple. A fa na e pëpe dutingo ti fini ti lo, me ndali ti so lo yeke na koli pëpe ti mû maboko na lo, lo lingbi lani ti duti na kota kpale ti mosoro. Biani, teti Jésus ahinga nzoni mingi so womua so ayeke tâ na kpale ti mosoro, mawa ti lo agbu lo. Ti fa lo tongana mbeni tapande ngbanga ti adisciple ti lo, Jésus atene so kete nginza so wali so amû ni ayeke “même ye kue so ayeke na lo ti vo kobe ti lo.”​—Marc 12:41-44.

Ngbanga ti nyen mbeni womua so ye amanke lo mingi amû mara ti mbeni matabisi tongaso? Biani, a yeke ngbanga ti so lo mû tele ti lo kue na Jéhovah, so a yeke voro lo na temple ti Jérusalem. Atâa so lo yeke na ngangu ti sala ye mingi pëpe, lo ye ti mû maboko ti tene kusala ti nzoni-kue amaï. Na lo lingbi biani ti wara tâ kota ngia na mungo mbeni matabisi so alingbi na ngangu ti lo.

Mungo ye ti maï na kusala ti Jéhovah

Mungo acontribution ti akungba ti mitele wala ti nginza ayeke lakue mbeni kota mbage ti vorongo so ayeke na sioni oko pëpe na ayeke ga na zo kota ngia (1 Chronique 29:9). Na Israël ti giriri, a yeke sala kusala na acontribution gi ti leke na temple pëpe me nga ti sala si akusala kue ti lâ oko oko so andu vorongo Jéhovah angbâ ti tambela. Ndia ni afa mbilimbili so a lingbi amolenge ti Israël amû dîme ti akobe ti yaka ti ala ti tene a mû maboko na aLévite so ayeke sala kusala na yâ temple. Me, aLévite nga kue ayeke mû na Jéhovah dîme ti ye so ala wara ni.​—Nombre 18:21-29.

Atâa so a zi aChrétien na gbe ti mbele ti Ndia ti Moïse awe, akpengba-ndia ti tene awakua ti Nzapa amû acontribution ti mû maboko na tâ vorongo agbian pëpe (aGalate 5:1). Nga, aChrétien ti ngoi ti abazengele abâ ti ala so ti mû acontribution ti tene a mû maboko na aita ti ala so ye amanke ala aga na ala kota ngia (Kusala 2:45, 46). Bazengele Paul adabe aChrétien so, legeoko tongana ti so Nzapa ayeke mû na ala na bê kue aye ti nzoni, a lingbi ala fa na gigi mara oko bibe so na ambeni zo. Lo sû na Mbeti: “Mo wa ala so ayeke na mosoro na sese so, si bê ti ala aga kota pëpe, na ala zia bê ti ala pëpe na mosoro so fade awe, me na Nzapa, Lo so amû na e ye mingi, ye kue ti mû ngia na e. A lingbi ala sala nzoni, a lingbi nzo kusala ti ala awu; ala mû ye mingi na azo na ala kangbi ye na azo; tongaso na lege ti ye so ala bungbi teti ala mveni, ala leke nzo gere teti lâ ni so ayeke ga, si ala lingbi gbu fini so ayeke tâ fini biani.” (1 Timothée 6:17-19; 2 aCorinthien 9:11). Biani, na lege ti ye so lo mveni lo hinga ni, Paul alingbi ti yeda na atënë ti Jésus so: “Ngia ayeke na zo so amû ye, ahon ngia ti lo so akamata ye.”​—Kusala 20:35.

Ye so aChrétien ayeke mû ni laso

Laso, awakua ti Jéhovah angbâ lakue ti mû aye ti mitele so ala yeke na ni ti mû maboko na amba ti ala na popo ti ala nga na kusala ti Nzapa. Même ala so ayeke na ye mingi pëpe ayeke mû contribution ti ye so alingbi na ngangu ti ala. “Ngbâa be-ta-zo na ti ndara” abâ so lo yeke na kungba na gbele Jéhovah ti sala kusala nzoni mingi na anginza so a mû ni (Matthieu 24:45, NW ). A yeke sala kusala na anginza so ti sala si akua na yâ ti afiliale atambela, ti leke na ti kiri peko ti Bible nga na ambeti ti Nzapa na mbeni yanga nde, ti leke na akota bungbi, ti fa ye na ti futa lege na asurveillant so ayeke gue na ndo nde nde nga na amissionnaire, ti mû maboko na aita na ngoi ti aye ti ngangu nga ti sala na ambeni kpengba kusala. Zia e bi lê ti e na ndo ti mbeni oko ti akpengba kusala ni so: maboko so a mû ti leke ada ti vorongo Nzapa.

Na yâ yenga oko, aTémoin ti Jéhovah ayeke bungbi fani mingi na yâ aDa ti Royaume ti ala ti wara anzoni fango ye na lege ti yingo nga ti duti oko na anzoni kamarade. Ye oko, na yâ ti akodoro mingi a yeke ngangu na aTémoin ti Jéhovah ti ndo ni ti wara nginza ti leke na aDa ti Royaume sân ti hunda mbeni mungo maboko. Tongaso, na 1999, aTémoin ti Jéhovah ato nda ti mbeni kapa ti salango kusala na anginza so alondo na akodoro so ayeke na mosoro mingi ti tene a leke na aDa ti Royaume na yâ akodoro so nzinga ayeke dä mingi. Nga, awakua saki mingi ayeda na bê ti ala kue ti mû angoi nga na akode ti ala ti gue ti sala kusala na yâ ti akete kodoro. Na ngoi ti lekengo ada ni, aTémoin ti Jéhovah ti ndo ni ayeke manda akode ti lekengo na ti batango aDa ti Royaume, nga nginza teti aDa ti Royaume ni amû lege na ala ti vo akungba ti lekengo na ada. A-Témoin so fadeso ayeke sala abungbi na yâ ti afini da akiri singila mingi teti angoi nga na anginza so afon ala wamabe amû ni. A-Témoin ti kodoro ni nga kue na yâ nze oko oko ayeke mû acontribution ti tene a sala na kusala ti bata afini Da ti Royaume so si angbâ nzoni, nga ala yeke mû maboko na futango ambeni ye so andu akungba ti lekengo na ada. Salango tongaso amû lege ti tene a leke ambeni Da ti Royaume ni mingi.

A leke aDa ti Royaume na salango kusala na akungba ti lekengo na ada so a wara ni na ando ni so. Atâa so ada ni so ayeke ti gboto lê ti azo pëpe, ala yeke pendere na alingbi na akongregation ni. Na ngoi so kapa ti lekengo ada ni so ato nda ni na ngu 1999, tënë ni andu lani gi akodoro ndulu na 40 so ayeke na mosoro mingi pëpe. Ngbele ye na ngoi ni so, a kono yâ ti kapa so, na a ndu akodoro 116, ye so ahon ndambo ti wungo ti akongregation ti aTémoin ti Jéhovah na ndo lê sese kue. Na yâ ti angu oku so ahon, na lege ti kapa so a zia na sese, a leke aDa ti Royaume ahon 9 000, so ti tene na yâ ti lango oko oko, a yeke leke aDa ti Royaume 5. Atâa so kue, na yâ ti akodoro 116 so, bezoin ti tene a leke aDa ti Royaume 14 500 angbâ. Ngbanga ti so deba nzoni ti Jéhovah aga na lege ti bibe ti dutingo ndulu ti mû ye na bê kue so aTémoin ti ndo lê sese kue ayeke na ni, e yeke na beku so a yeke wara ande nginza so alingbi ti tene a kaï na abezoin so.​—Psaume 127:1.

A-Da ti Royaume asala si kusala ni amaï

Kota kusala so asala ngangu wa na ndo ti aTémoin ti Jéhovah ti ndo ni nga na ndo kusala ti ala ti fango tënë? Na ando mingi, na peko ti so a leke mbeni fini Da ti Royaume, a yeke bâ mbeni kota guengo na li ni ti wungo ti azo so ayeke ga na abungbi. A yeke wara mbeni nzoni tapande ni na yâ tondo so alondo na Burundi: “Gi na peko ti so a hunzi ti sala Da ti Royaume ni, azo asi yâ ni. Na tapande, a leke lani Da ti Royaume ngbanga ti mbeni kongregation so wungo ti azo so ayeke ga na abungbi na yâ ni ayeke ndulu na 100. Fini Da ti Royaume ni so alingbi ti yamba wungo ti azo 150. Na ngoi so kusala ni ahunzi awe, wungo ti azo so abungbi na yâ ni ayeke 250.”

Ngbanga ti nyen wungo ti azo ague na li ni tongaso? Mbeni nda ti tënë ni ayeke ndali ti so ala yeke sala lani abungbi gi na gbe ti akeke wala na yâ ti ayaka. Ngoi na ngoi azo ayeke na kite na bê ti ala ti bâ mbeni kete wungo ti awafango tënë so ayeke tâ na mbeni nzoni ndo pëpe ti sala bungbi dä. Na mbeni kodoro, a yeke bâ kete bungbi ti azo tongaso tongana mbeni kete bungbi ti vorongo Nzapa so aye mingi ti sala ngangu na ambeni mara. Nga ndia ti kodoro ni ahunda ti tene a-église kue asala abungbi ti ala gi na yâ ti mbeni da ti vorongo Nzapa.

Ti wara aDa ti Royaume ti ala mveni ayeke mû nga lege na aTémoin ti Jéhovah ti ndo ni ti fa na azo ti kodoro ni so ala yeke pëpe adisciple ti mbeni pasteur. Filiale ti aTémoin ti Jéhovah na Zimbabwe asû mbeti so: “Giriri na yâ kodoro so, aita ayeke sala ka abungbi na yâ ti ada ti lango ti ambeni ita; na azo ti ndo ni ayeke hinga kongregation ni na iri ti mveni ti da ni. Na salango tënë na ndo ti aita ni, ala yeke tene so ala yeke azo ti église ti Pakara tongaso. Ye so kue ato nda ti gbian fadeso awe ngbanga ti so ala bâ apancarte so a sala ambeti na ndo ni na fango polele ada ni so tongana ‘Da ti Royaume ti aTémoin ti Jéhovah.’ ”

Azo so amû ye na ngia

Bazengele Paul asû na mbeti: “Nzapa andoye zo so amû matabisi na ngia.” (2 aCorinthien 9:7). Biani, ti mû gbâ ti nginza, a lingbi ti sala na kusala mingi. Me, kota mbage ti nginza so a mû tongana acontribution teti kusala ti aTémoin ti Jéhovah alondo na yâ ti aboîte ti nginza so ayeke na yâ ti aDa ti Royaume. A yeke bâ pëpe akota wala akete matabisi so tongana mbeni senge ye. Dabe ti mo so Jésus abâ lani mbeni womua so azia akete nginza use na yâ ti sanduku ti temple. Jéhovah na a-ange abâ lani wali so nga. E hinga même iri ti womua so pëpe; ye oko, Jéhovah abâ mbilimbili si a sû teti lakue lakue na yâ Bible tondo na ndo salango ye ti wali so na kion pëpe.

Na ndo ti lekengo aDa ti Royaume so, amatabisi so e yeke mû ni ayeke mû maboko na ambeni kota mbage ti kusala ti Royaume. Ti sala kusala maboko na maboko na ye so ayeke pusu e ti duti na ngia, nga ‘a sala si e mû merci mingi na Nzapa.’ (2 aCorinthien 9:12). A-ita ti e na Bénin atene: “Lango oko oko, gbâ ti asambela ti kiringo singila ayeke gue na Jéhovah teti matabisi ti anginza so e yeke wara ni na mbage ti kota sewa ti aita ti ndo lê sese kue.” Na oko ngoi ni, e oko oko kue so e mû matabisi ti nginza ti tene a pusu na kusala ti Royaume, e hinga ngia so Chrétien ayeke wara ni na lege ti mungo ye.

[Kete tënë/Foto na lembeti 22, 23]]

Alege nde nde so a soro ti mû na

A-OFFRANDE TETI KUSALA SO A SALA NA NDO SESE KUE

Azo mingi azia nde wala aleke na yâ mama-nginza ti ala mbeni wungo ti nginza so ala zia na yâ asanduku teti a-offrande so kete mbeti “A-offrande teti kusala na ndo sese kue​—Matthieu 24:14” ayeke na ndo ni.

Nze oko oko, akongregation ayeke tokua anginza ni na biröo ti aTémoin ti Jéhovah so ayeke na kodoro ti ala. Mo lingbi nga ti tokua a-offrande so mo mû na bê kue gi na filiale so abâ lege ti kusala ni na kodoro ti mo wala na Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483. A yeke nzoni a sala achèque na iri ti “Watch Tower”. Mo lingbi nga ti mû tongana matabisi aye ti go, ti mê, ti maboko na ambeni ye nde ti ngele ngangu. A yeke nzoni mo sû na tele ni mbeni mbeti ti fa so amatabisi so ayeke a-offrande so mo mû biaku.

AMATABISI SO A HUNDA MBENI YE KOZONI

Mbeni zo alingbi ti mû nginza tongana mbeni matabisi na hundango mbeni ye kozoni. Tongana mbeni lâ zo ti mungo nginza ni ahunda ni, a lingbi ti kiri na lo nginza so lo mû tongana offrande. Ti wara sango mingi na ndo tënë so, sû mbeti na Biröo so abâ lege ti nginza na adresse so a fa na use paragraphe ni.

AMATABISI

Nde na amatabisi ti nginza so a mû biaku na ti so a hunda mbeni ye kozoni, ambeni lege nde nde ayeke dä ti mû nginza ndali ti kusala ti fango tënë ti Royaume na ndo kue. Aye so andu:

Assurance: A lingbi ti zia ni na iri ti Société Watch Tower ti tene lo wara ande nginza so mbeni zo amû assurance ndali ni, wala nginza so mbeni zo abata ngbanga ti retraite ti lo.

Nginza na banque: Na yâ ambeni kodoro, a lingbi ti bata teti Société Watch Tower nginza so a zia na banque, mbeni mbeti so afa atene a zia nginza kâ, wala mbeti ti nginza so a bata teti lâ ti retraite, wala so a zia na iri ti Société ti tene lo wara ni tongana zo ni akui.

Ambeti ti mosoro na ti mbele: A lingbi ti mû ambeti ti mosoro na ti mbele na Société Watch Tower tongana mbeni matabisi so a hunda mbeni ye na pekoni pëpe.

Ada: A lingbi ti mû ada so a lingbi ti kä ni; zo ni alingbi ti mû ni biaku, wala tongana a ndu tënë ti da ti lango, lo lingbi ti fa so Société ayeke mû ni ande na peko ti kuâ ti lo na lo yeke ngbâ ti lango na yâ ni na ngoi kue so lo de na fini. Kozoni ti mû na filiale mbeni matabisi ti da tongaso, a yeke nzoni a bâ lo si.

Testament na amatabisi so a bata ti mû na mbeni ngoi: A lingbi ti zia na Société Watch Tower ada na nginza na lege ti mbeni testament so ndia ayeda na ni, wala a lingbi ti sû mbeni mbeti ti fa so fade Société Watch Tower ayeke ga mveni ti mbage ti mosoro ni na mbeni ngoi. Lekengo ye ti tene mbeni lege ti vorongo aga ande mveni ti mbeni mosoro alingbi peut-être ti zi lege ti kiri na peko alampo so a lingbi a futa ni.

Amara ti mungo amatabisi tongaso ahunda ti tene zo so aye ti mû ye agbu li ti lo nzoni kozoni. Ti mû maboko na ala so aye ti mû matabisi teti kusala ti aTémoin ti Jéhovah na ndo sese kue na alege nde nde, a leke mbeni brochure na yanga ti Anglais nga na Espagnole, Charitable Planning to Benefit Kingdom Service Worldwide. A sala brochure so ti kiri tënë na gbâ ti atënë so a yeke hunda na ndo mungo amatabisi, atestament nga na amatabisi so a bata ti mû na mbeni ngoi. A wara nga na yâ ni ambeni nzoni tënë na ndo warango akungba na peko ti kuâ ti mbeni zo, tënë ti lampo, na bango lege ti akungba ti zo mveni. A fa na azo alege nde nde ti mû mbeni matabisi fadeso wala na peko ti kuâ ti ala. Na peko ti dikongo brochure so, na salango lisoro na awamungo wango ti ala na ndo tënë ti lampo nga na aita ti filiale ti kodoro ti ala, azo mingi awara lege ti mû maboko na aTémoin ti Jéhovah ti ndo ti sese kue nga ti wara ye ti nzoni na lege ti wungo ti lampo so ala futa ni. A lingbi ti hunda brochure ni senge na Filiale so ayeke bâ lege ti kusala ni na kodoro ti mo.

Ti wara ambeni sango na ndo ni, mo lingbi ti sala tënë ni na Filiale na tokuango mbeti wala na pikango singa, na lege ti adresse so a mû na gbe ni ge.

Filiale ti aTémoin ti Jéhovah

Association “Les Témoins de Jéhovah” 

B.P. 662, Bangui, R.C.A.

Singa: 61-20-70

[Afoto na lembeti 20, 21]

Ngbele nga na fini ndo ti bungbi ti aTémoin ti Jéhovah

Zambie

République Centrafricaine