Mo ye ti ngbâ lakue lakue na fini?

MBENI mbakoro-wali so ayeke na kodoro ti Japon atene: “Mbito ti kui asala mbi pëpe. Me tënë ni asala vundu na mbi ngbanga ti so mbi yeke zia afleur so na peko ti mbi.” Mbeni ita-wali so asala vizite na mbakoro-wali so na yanga-da ti lo ahinga ngbanga ti nyen lo sala atënë tongaso; a yeke ndali ti so lo yeke na mbeni pendere yaka ti afleur. Biani, mingi ti azo so atene ala yeke na mbito ti kui pëpe ayeke bâ na nene ni aye so Nzapa acréé nga peut-être ala yeke tâ na nzara ti ngbâ lakue lakue na fini.

Ti ngbâ lakue lakue na fini? Azo mingi ayeke ndulu ti ke tënë so. Ambeni alingbi même ti tene so a nzere na ala pëpe ti ngbâ lakue lakue na fini. Ngbanga ti nyen ambeni zo ayeke na bi bê tongaso?

Fini ti lakue lakue ayeke fun sen?

Ambeni zo abi bê ti ala so fini ti lakue lakue ayeke ga ande mbeni ye so afun sen. Peut-être ala yeke fa tënë ti azo so amû retraite awe so ayeke na kusala mingi ti sala pëpe gi ti bâ télé. Tongana bango ndo ti mo ayeke tongaso, bâ mbilimbili tënë so wagingo yâ ti atongoro Robert Jastrow atene tongana a hunda lo ti hinga wala fini ti lakue lakue ayeke duti ande mbeni ye ti nzoni wala ti songo bê. Jastrow akiri tënë: “Fini ti lakue lakue ayeke duti ande mbeni ye ti nzoni ndali ti ala so ayeke na nzara ti hinga na ti manda mbeni ye. Teti so ala hinga so ala yeke na ngoi mingi ti manda ye, ye so asala si ala kpengba lakue. Me ti ala so na lê ti ala, ala manda ye kue awe nga ala yeke na bezoin ti manda afini ye pëpe, fini ti lakue lakue ni ayeke duti mbeni sioni ye, ndali ti so ala yeke hinga pëpe kusala so ala lingbi ti sala na gbâ ti angoi so ala yeke na ni.”

A yeke gi na lege ti bango ndo ti mo si fini ti lakue lakue alingbi ti ga mbeni ye so afun sen wala pëpe. Tongana mo yeke mbeni zo so ‘ayeke na nzara ti hinga na ti manda ye’, pensé na gbâ ti aye so mo lingbi ti manda na ndo kode ti ambeni ye tongana pikango mozoko, lekengo ada, ajardin wala ti sala mbeni ye so mo ye tënë ni mingi. Fini ti lakue lakue ni na ndo sese ayeke mû na mo mbeni pendere beku ti maï akode so mo yeke na ni ti sala na aye nde nde.

Teti so e yeke wara lakue lakue lege ti fa na gigi ndoye na so amba ti e ayeke fa ni nga na mbage ti e, ye so ayeke sala si fini ti lakue lakue ni ayeke nzere ande na e mingi. A leke e na ngangu ti fa na gigi ndoye na e yeke maï tongana e bâ so a ndoye e. Ti kangbi tâ ndoye legeoko na ambeni zo ayeke ga na mo biani kota ngia so ayeke hunzi pëpe. Ti ngbâ lakue lakue na fini ayeke zi lege na e ti duti na ndoye gi na mbage ti amba ti e zo pëpe, me mingi ni na mbage ti Nzapa. Bazengele Paul atene: “Me tongana mbeni zo andoye Nzapa, Nzapa ahinga zo so.” (1 aCorinthien 8:3). So tâ pendere beku ti hinga Kota Gbia ti dunia kue na lo nga kue lo hinga e! Na ndo ni, ti manda ye na ndo Wasalango e so ayeke na ndoye, katikati ni ayeke dä pëpe. Tongaso na bango atënë so ayeke na nduzu ge, fini ti lakue lakue alingbi ti fun ande sen pëpe.

A bâ fini na nene ni gi ngbanga ti so a ninga pëpe?

Ambeni zo abi bê ti ala so a yeke ngbanga ti so fini ti zo ayeke ninga ka pëpe, ni la si azo abâ fini na nene ni. Ala tara ti haka fini ti zo na lor so a yeke wara ni na ndo kue pëpe. Ala tene so tongana zo alingbi ti wara lor na ando kirikiri, ka ngele ni ayeke duti ngangu pëpe. Ye oko, atâa tongana a yeke wara ni na ndo kue, lor ayeke girisa pendere ti lo lâ oko pëpe. Biani, fini ti zo ayeke nga tongaso.

E lingbi ti haka dutingo na fini ti lakue lakue na gbâ ti pupu so mbeni zo ayeke hu ni. Na tapande, mbeni zo so sese akungbi na li ti lo na ngoi ti zingo diamant alingbi ti hu gbä na tongaso, lo yeke bâ pupu tongana mbeni ye ti ngele ngangu. Me na pekoni tongana ambeni zo ague na azi lo na yâ ti dû ni fade lo yeke dema tele ti lo ngbanga ti so lo yeke na gigi na so lo yeke hu gbâ ti pupu? Oko pëpe.

Legeoko na tapande ti zo ti zingo diamant so, mbeni zo nde alingbi ti sö e na yâ kpale so ti tene e ngbâ na fini gi teti kete ngoi pëpe, me teti lakue lakue. Bazengele Paul asû na mbeti: “Futa ti siokpari ayeke kui; me matabisi ti Nzapa ayeke fini ti lakue lakue na yâ Christ Jésus Seigneur ti e.” (aRomain 6:23). Na lege ti sandaga ti kota ngele ti Jésus, Nzapa ayeke zi ande siokpari nga na kui, na lo yeke mû ande na azo ti mango yanga matabisi ti fini ti lakue lakue. A lingbi biani e kiri tâ kota singila ndali ti mara ti ndoye so!

Ti azo so mo ndoye ala, ye ni ayeke duti tongana nyen?

Ambeni zo alingbi ti tene: ‘Ka ti azo so mbi ndoye ala mingi, ye ni ayeke duti tongana nyen? Fini ti lakue lakue na ndo sese ayeke nzere ande na mbi pëpe tongana azo so mbi ndoye ala ayeke duti dä pëpe legeoko na mbi.’ Peut-être mo wara hingango ye ti Bible awe na mo manda so mo lingbi ti duti na fini ti lakue lakue na yâ paradis na ndo sese (Luc 23:43; Jean 3:16; 17:3). A yeke tâ na lege ni so mo ye si azo ti sewa ti mo, ambeni zo so mo ndoye ala mingi nga akota kamarade ti mo aduti na yâ paradis ni, tongaso si ala nga kue akangbi oko ngia so mo yeke na beku ti wara ni na yâ fini sese ti mbilimbili so Nzapa amû zendo ni.​—2 Pierre 3:13.

Me, ye nyen ayeke si tongana akamarade ti mo nga na azo so mo ndoye ala mingi afa na gigi pëpe nzara ti bê ti ala ti duti na yâ paradis na ndo sese? Zia ye so asala si mo nze pëpe. Ngbâ lakue ti wara tâ hingango ye ti Mbeti ti Nzapa na mo sala ye alingbi na ni. Bazengele Paul asû na mbeti: “O wali, na lege nyen mo hinga fade mo sö koli ti mo? wala mo sö lo pëpe. Wala mo koli, na lege nyen mo hinga fade mo sö wali ti mo? wala mo sö lo pëpe.” (1 aCorinthien 7:16). Azo alingbi ti gbian salango ye ti ala. Na tapande, mbeni koli so aye lani pëpe lege ti vorongo ti aChrétien agbian salango ye ti lo nga na pekoni lo ga mbeni ancien na yâ kongregation. Lo tene: “Mbi kiri singila mingi na sewa ti mbi so aluti ngangu na ndo akpengba-ndia ti Bible na yâ ti akangango lege kue so mbi ga na ni.”

Nzapa ayeke bi bê ti lo biani na ndo fini ti mo nga na ti azo so mo ndoye ala mingi. Biani, “Seigneur . . . [a]ye mbeni zo oko akui pëpe, me Lo ye azo kue achangé bê ti ala.” (2 Pierre 3:9). Jéhovah Nzapa aye si mo na azo so mo ndoye ala awara fini ti lakue lakue. Ndoye ti lo ayeke kota mingi ahon ti azo ti mitele (Esaïe 49:15). Tongaso, ngbanga ti nyen mo lë mbeni nzoni songo na Nzapa pëpe? Na pekoni mo lingbi ti mû maboko na azo so mo ndoye ala mingi ti sala legeoko tongaso. Atâa so laso ade ala kangbi pëpe legeoko na mo beku ti dutingo na fini ti lakue lakue, salango ye ti ala alingbi ti gbian tongana ala yeke bâ so mo yeke sala ye alingbi na hingango ye ti Bible.

Me ti azo so mo ndoye ala mingi na so peut-être ala kui awe, a yeke tongana nyen? Ndali ti azo kutu mingi so akui awe, Bible amû pendere beku ti londongo na popo ti akuâ; a yeke zingo ala na kuâ ti tene ala wara fini na yâ paradis na ndo sese. Jésus Christ amû zendo so: “L’heure ayeke ga so azo kue so ayeke na dukua, . . . ala [yeke] sigigi.” (Jean 5:28). Même ala so akui awe sân ti hinga ye so bê ti Nzapa aye, a yeke kiri ala ande na fini ndali ti so Bible asala tënë ti “londongo ti awakinda kue, azo ti mbilimbili, na azo ti kirikiri.” (Kusala 24:15). A yeke duti ande ye ti kota ngia ti yamba ala so akiri na fini.

Fini ti lakue lakue: Mbeni beku so amû ngia na zo

Tongana mo lingbi ti duti na ngia na yâ sese ti laso atâa aye ti wusuwusu so ayeke dä, fade mo yeke duti biani na ngia ti wara fini ti lakue lakue na yâ paradis na ndo sese. Ye oko, na ngoi so mbeni Témoin ti Jéhovah ayeke fa na lo aye ti nzoni so fini ti lakue lakue ayeke ga na ni, mbeni wali atene: “Mbi ye pëpe ti duti na fini lakue lakue. Ngu 70 wala 80 alingbi na mbi awe.” Mbeni ancien so ayeke dä na ngoi ti lisoro ni ahunda wali ni: “Mo bi bê ti mo lâ oko pëpe na ndo dutingo ti amolenge ti mo na peko ti kuâ ti mo?” Ngu ti lê ti lo ayuru na ngoi so lo yeke bi bê ti lo na kota vundu so amolenge ti lo alingbi ti tï na yâ ni na peko ti kuâ ti lo. Lo tene: “Kozo ti tene mbi bâ na lege wa mbi yeke zo ti kion la; mbi bâ so fini ti lakue lakue ayeke mbeni beku so kion ayeke na yâ ni pëpe, me mbeni ye so amû lege na zo ti bi bê na songo ti lo na amba ti lo.”

Ambeni atene so atâa ala ngbâ na fini wala ala kui, a sala ye na zo oko pëpe. Ye oko, a sala ye na Jéhovah, Zo so amû fini na e, teti lo tene: “Fini ti Mbi! Mbi wara ngia pëpe na lege ti kui ti zo ti sioni; me Mbi ye zo ti sioni ti zia lege ti lo si lo wara fini.” (Ezéchiel 33:11). Ndali ti so Nzapa ayeke gi bê ti lo même na ndo ti fini ti azo ti sioni, ye so afa polele so lo yeke bi bê ti lo mingi na ndo ala so andoye lo.

Gbia David ti Israël ti giriri ayeke na beku so Jéhovah ayeke bi bê na lo. Lo tene mbeni lâ: “Tongana babâ na mama ti mbi azia mbi, fade L’Eternel akamata mbi.” (Psaume 27:10). David ahinga biani ndoye so babâ na mama ti lo ayeke na ni na mbage ti lo. Me, même tongana babâ na mama ti lo so ayeke atâ kota kamarade ti lo ake lo, lo hinga so Nzapa ayeke ke lo pëpe. Ngbanga ti ndoye nga na bingo bê so lo yeke na ni, Jéhovah ayeke mû na e fini ti lakue lakue nga e yeke duti na songo ti kamarade na lo, mbeni songo so ayeke hunzi pëpe (Jacques 2:23). A lingbi e yeda na bê ti e kue ti wara pendere ye so lo mû na e.

[Foto na lembeti 7]

Ndoye teti Nzapa nga na ti amba ti e asala si fini ti lakue lakue anzere mingi