Mbeni sese so nzinga ayeke dä pëpe aga ndulu

AFOTO ti Paradis tongana ti so ayeke na kozo lembeti apika bê ti awanzinga mingi. Paradis ayeke ândö tâ ye teti akozo koli na wali, Adam na Eve, so ndo ti duti ti ala ayeke lani yaka ti Eden (Genèse 2:7-23). Atâa so Paradis ayeke laso pëpe, mango na bê na mbeni paradis ti kekereke (na ndo mbeni fini sese so nzinga ayeke dä pëpe) ayeke gi pëpe mbeni tënë ti bango li. Tënë ni aluti ngangu na ndo azendo ti Mbeti ti Nzapa.

Bâ zendo so Jésus amû lani na ndangba lango ti fini ti lo na sese. Mbeni oko ti azo ti sioni so akui na tele ti Jésus afa mabe na yâ ngangu ti Nzapa ti hunzi akpale ti azo. Lo tene: “Jésus, Mo dabe Mo na mbi tongana Mo si na royaume ti Mo.” Atënë ti sioni zo so afa so lo mä na bê so fade Jésus ayeke komande tongana gbia, na so fade a yeke zingo akuâ. Jésus akiri tënë na lo: “Biani, Mbi tene na mo, laso, fade mo yeke na Mbi na Paradis.”​—Luc 23:42, 43.

Na ndo ala so ayeke duti ande na yâ Paradis, Bible atene: “Fade azo asala da, na ala duti na yâ ni; fade ala lu vigne na yaka, na ala te lê ni.” (Esaïe 65:21). Biani, “fade azo oko oko kue aduti na gbe ti vigne ti ala mveni, na gbe ti keke ti figue ti ala mveni; zo oko ti mû mbito na ala ayeke pëpe teti yanga ti L’Eternel Ti Sabaoth asala tënë ni awe.”​—Michée 4:4.

Me, ngbanga ti nyen si a zi lege na nzinga laso? Maboko wa Nzapa ayeke mû ni na ala so nzinga ahon ndo ti ala? Lawa si nzinga ayeke hunzi ande?

Nda ni so a zi lege na nzinga laso

Adam na Eve agirisa Paradis so a zia ala na yâ ni ndali ti kpengbango li ti ala so mbeni sioni ange, Satan Zabolo, apusu ala ti sala. Na lege ti mbeni ngbo, Satan ahanda Eve ti ke ndia ti Nzapa so agbanzi tengo lê ti mbeni keke. Lo handa lo ti yeda so dutingo yamba na Nzapa ayeke sala si fini ti lo aga nzoni. Na ngoi so Eve amû na Adam lê ti keke so, lo nga lo te ni, na tongaso lo turne peko ti lo na Nzapa ti yeda na wali ti lo.​—Genèse 3:1-6; 1 Timothée 2:14.

Na lege ni, a tomba Adam na Eve so ake yanga na yâ ti Paradis ni, na fadeso a lingbi ala tiri ngangu ti ngbâ na fini. Ti londo na ngoi ni kâ juska laso, Jéhovah azi lege na Satan ti komande azo ti siokpari, ye so asala si sioye ti peko ti kengo yanga ti Nzapa aga polele. Mbaï afa so zo alingbi oko pëpe ti leke Paradis na sese (Jérémie 10:23). Nde na so, dutingo yamba na Nzapa ague na zo na yâ ti angangu kpale, so na popo ni nzinga.​—Zo-ti-fa-tene 8:9.

Ye oko, a girisa awanzinga pëpe na yâ sese so asi singo na aye ti wusuwusu. Tënë ti Nzapa so lo sû na gbe ti yingo, Bible, amû nzoni fango lege na ala.

“I gi bê ti i pëpe”

Na ngoi so lo yeke sala tënë na azo mingi so abungbi, so na popo ni nga gbâ ti awayere, Jésus atene: “Bâ andeke ti nduzu, ala lu le-kobe pëpe, ala fâ le-kobe pëpe, na ala bungbi le-kobe na gogoro pëpe; me Babâ ti i na yayu amû kobe na ala. Ngele ti i ayeke ngangu ahon ngele ti ala pëpe? . . . Tongaso i gi bê ti i pëpe, na i tene pëpe, Fade e te nyen? wala, Fade e nyon nyen? wala, Fade e yü bongo ti nyen? Teti aGentil agi ye so kue; Babâ ti i na yayu ahinga i ye ye so kue. Me i gi royaume ti Nzapa na mbilimbili ti Lo kozoni, na fade A mû ye so kue na i nga.”​—Matthieu 6:26-33.

Zo so ayeke wanzinga ayeke na bezoin ti nzi pëpe (aProverbe 6:30, 31). Lo yeke wara ye kue so lo yeke na bezoin ni tongana lo zia Nzapa na kozo ndo na yâ fini ti lo. Bâ tapande ti Tukiso, mbeni koli ti Lesotho, na mbongo ti Afrika. Na ngu 1998, aturugu ti akodoro wande alï na kodoro ni ti mingo aturugu so alondo na tele ti ngorogbia ni. Ye ti pekoni: a buba amagazin, azo agirisa kua ti ala na warango kobe aga ngangu.

Tukiso ayeke lango lani na mbage ti li-kodoro ni so yere ayeke dä mingi. Avoizin ti lo mingi anzi lani aye na yâ ti amagazin ti bata na fini ti ala. Na ngoi so Tukiso akiri na yanga-da, lo wara Maseiso, wali so lo na lo ayeke duti, na gbâ ti akungba so lo gbu na yâ ti amagazin. Tukiso atene na lo: “Bi aye so na gigi”, na lo fa na lo so ndia ti Nzapa ake ti tene zo anzi. Maseiso amä yanga ti lo. Avoizin ahe ala, na ala ga a ro akungba so kue.

Tukiso amû desizion so ndali ti ye so lo manda na Bible na aTémoin ti Jéhovah. Yengo dä na ndia ti Nzapa asala si lo kui lani nzara? Ên-ën. Ngoi kete na pekoni, a-ancien ti kongregation ti aTémoin ti Jéhovah so lo yeke gue dä atingbi na lo na ala gue na lo ambeni ye ti tengo ni. Ti tâ tënë ni, aTémoin ti Jéhovah ti Afrika ti Mbongo atokua lani tonne use ti kobe na ambeni ye teti aita ti ala ti Lesotho. Mango yanga ti Nzapa so Tukiso afa ni nga maboko ti ndoye so kongregation amû apika lani bê ti Maseiso mingi. Tongaso, lo nga lo to nda ti manda Bible. Na nda ni, ala use kue asala mariage so ndia ahunda, na tongaso ala lingbi lani ti wara batême tongana aTémoin ti Jéhovah. Laso ala ngbâ ti voro Nzapa be-ta-zo.

Jéhovah Nzapa ayeke bi bê na awanzinga. (Bâ tënë “Nzapa abâ awanzinga tongana nyen?”) Na ndoye, lo leke aye ti mû maboko na azo so ayeke tongana Tukiso na Maseiso ti manda ye mingi na ndo ti lo. Nga, na yâ Tënë ti lo, lo mû awango ti ndara ti sala na kua lâ oko oko.

Mbeni pendere ye so a leke

A ninga awe si aTémoin ti Jéhovah ayeke tara ti mû peko ti Nzapa na bingo bê na awanzinga (aGalate 2:10). Fani mingi tongana akpale asi na mbeni kodoro na awara atâ Chrétien, a yeke leke aye kue so alingbi ti gue ti mû maboko na ala. Ye so ayeke kota mingi ayeke so aTémoin ti Jéhovah afa so ala bi bê na ndo abezoin ti azo kue na lege ti yingo, so na popo ni awanzinga (Matthieu 9:36-38). Na yâ angu 60 so ahon awe, awakua saki mingi so a fa ye na ala ayeda na bê ti ala ti gue ti sala tongana amissionnaire na akodoro wande. Na tapande, a yeke lani mbeni koli na wali missionnaire ti kodoro ti Finlande so amanda yanga ti Sesotho si afa ye na Tukiso nga na Maseiso ti ga adisciple ti Jésus (Matthieu 28:19, 20). Mingi ni, mara ti kua tongaso ahunda na zo ti zia pendere duti ti lo na yâ kodoro ti mosoro na ti gue na mbeni kodoro so nzinga ayeke dä.

Ti nzi ye si mo bata na tele ti mo ayeke mbeni ye ti tene atâ Chrétien asoro ti sala pëpe. Nde na so, ala yeke na mabe na yâ ngangu ti Jéhovah Nzapa ti mû ye na ala (aHébreu 13:5, 6). Mbeni lege so Jéhovah ayeke mû ye na azo ti lo ayeke na lege ti bungbi ti awavorongo lo ti sese mobimba, so azo ni ayeke bâ ndo na ndo ti mba.

Jéhovah ayeke mû nga maboko na awanzinga na lege ti awango ti ndara ti sala na kua lâ oko oko. Na tapande, Bible akomande ye so: “A lingbi wanzi asala nzi mbeni pëpe; me a lingbi lo sala kusala nzoni na maboko ti lo si lo wara ye ti mû na zo so ye amanke lo.” (aEphésien 4:28). Azo mingi so ayeke na kua pëpe awara lege ti sigigi na akete kua ti ala mveni, na salango kua ngangu ti sala mbeni ye tongana jardin. Bible amû nga maboko na awanzinga ti bata nginza ti ala, na fango na ala ti kpe asioni salango ye tongana nyongo sämba ahon ndo ni.​—aEphésien 5:18.

Lawa si nzinga ayeke hunzi biaku na sese?

Mbeti ti Nzapa afa so e yeke na “lâ ti nda ni” ti komandema ti Satan (2 Timothée 3:1). Na yâ ngoi kete, fade Jéhovah Nzapa ayeke tokua Jésus Christ ti fâ ngbanga ti azo ti sese. Fade ye nyen ayeke si na ngoi ni so? Jésus akiri lani tënë na ndo ni na yâ mbeni parabole ti lo. Lo tene: “Tongana Molenge Ti Zo akiri na gloire ti Lo, na a-ange kue na tele ti Lo, na lâ ni so fade Lo duti na trône ti gloire ti Lo. Fade amara kue abungbi na gbele Lo, na Lo kangbi yâ ti ala, legeoko tongana berger akangbi popo ti angasangbaga na angasa.”​—Matthieu 25:31-33.

Angasangbaga ti yâ ti tapande so ayeke azo so ayeda na lengo gbia ti Jésus. Jésus ahaka ala na angasangbaga ngbanga ti so ala mû peko ti lo tongana Berger ti ala (Jean 10:16). Ala yeke wara ande fini na gbe ti komandema ti mbilimbili-kue ti Jésus. A yeke duti ande mbeni fini ti tâ ngia teti ala na ndo mbeni fini sese so nzinga ayeke dä pëpe. Me azo so ayeke tongana angasa, ala so ake komandema ti Jésus, fade a yeke futi ala biaku biaku.​—Matthieu 25:46.

Fade Royaume ti Nzapa ayeke hunzi ande sioni kue. Nzinga ayeke ga ande mbeni ye so ahon awe. Me fade azo so aye tele na popo ti ala na so ayeke bi bê na amba ti ala si ayeke duti ande na ndo sese ni. Mara fini sese tongaso alingbi ti duti ande dä biani, teti zo alingbi ti bâ ni na yâ kota songo ti aita so aTémoin ti Jéhovah ti sese kue ayeke na ni, ngbanga ti so Jésus atene: “Na lege so, fade azo kue ahinga i yeke adisciple ti Mbi, tongana i ndoye tele ti i na popo ti i.”​—Jean 13:35.

[Encadré/Afoto na lembeti 6, 7]

NZAPA ABÂ AWANZINGA TONGANA NYEN?

Mbeti ti Nzapa afa Wasalango azo tongana ‘Lo so amû kobe na azo so ayeke na nzara ti kobe.’ (Psaume 146:7). Aversê ngbango oko na ndo ni agboto nga lê na ndo bingo bê so Nzapa ayeke na ni teti awayere.

Na tapande, na ngoi so Jéhovah amû lani Ndia ti lo na Israël ti giriri, lo komande na ala so ayeke na yaka ti ko pëpe ale-kobe kue so ayeke na yanga ti yaka ti ala. A ke na ala ti kiri fani use ti ko tanga ti alê ti olive wala ti vigne so angbâ na li ti keke. Andia so ayeke lani mbeni ye ti ndoye so a leke teti awande ti kodoro ni, anyindu, awali-mua na azo ti mawa.​—Lévitique 19:9, 10; Deutéronome 24:19-21.

Na ndo ni, Nzapa amû lani yanga na Israël: “A lingbi i sala ye ti vundu na awomua pëpe wala na amolenge so babâ ti ala ayeke pëpe. Tongana mo sala ye ti vundu na ala, na ala toto na Mbi, fade Mbi mä toto ti ala biani, na ngonzo ti Mbi alondo tongana wâ, na Mbi fâ i na épée; na fade awali ti i aga awomua, na amolenge ti i aga amolenge so babâ ti ala ayeke pëpe.” (Exode 22:22-24). Mawa ni ayeke so awamosoro mingi ti Israël asala ye alingbi na tënë so pëpe. Ndali ni nga ndali ti ambeni sioni salango ye, Jéhovah Nzapa, na lege ti aprophète ti lo, agboto lani mê ti azo ti Israël mingi (Esaïe 10:1, 2; Jérémie 5:28; Amos 4:1-3). Na nda ni, Nzapa asala si azo ti Assyrie na ti Babylone aga amû kodoro ti Israël. Azo ti Israël mingi awara kuâ, na ala so asö kuâ a gue na ala na ngbâ na ambeni kodoro nde.

Jésus Christ, Molenge so Nzapa andoye lo mingi, ayeke na mara bibe ti ndoye so Babâ ti lo ayeke na ni teti awanzinga. Na fango nda ti kusala ti lo, Jésus atene: “Yingo ti Seigneur ayeke na ndo Mbi, teti Lo sa mafuta na li ti Mbi ti fa Tene-nzoni na awanzinga.” (Luc 4:18). So aye ti tene pëpe so kusala ti Jésus angbâ lani gi na ndo awanzinga. Na ndoye, lo mû lani maboko nga na awamosoro. Ye oko, na ngoi so lo yeke mû lani maboko na awamosoro, mingi ni lo yeke bi bê ti lo na ndo awanzinga. Na tapande, lo mû wango so na mbeni mokonzi so ayeke na mosoro mingi: “Mo kä ye ti mo kue, na mo kangbi nginza ni na awanzinga, na fade mo yeke na mosoro na yayu. Na mo ga mo tambela na peko ti Mbi.”​—Luc 14:1, 12-14; 18:18, 22; 19:1-10.

Jéhovah Nzapa na Molenge ti lo abi bê ti ala mingi na awanzinga (Marc 12:41-44; Jacques 2:1-6). Na bingo bê na awanzinga, Jéhovah ayeke girisa pëpe awanzinga kutu mingi so akui. Azo tongaso, fade a yeke zingo ala kue na yâ mbeni fini sese so nzinga ayeke dä pëpe.​—Kusala 24:15.

[Afoto]

Songo ti aita ti aTémoin ti Jéhovah ti sese kue afa so fini sese alingbi ti duti dä ande

[Foto na lembeti 5]

Tukiso na Maseiso nga na missionnaire so amanda lani Bible na Tukiso

[Foto na lembeti 5]

Maseiso na devant ti yanga-da ti lo na missionnaire so amanda lani Bible na lo