E lingbi ti hon ndo ti atara kue!

MO YEKE tiri na ndembe so na mbeni tara na yâ fini ti mo? Mo pensé so mbeni ye oko ti sala ayeke dä pëpe? A si na mo awe so ndali ti mbito mo tene so gi mo oko si ayeke na yâ ti kpale ni na lege ti leke ni ayeke pëpe? Tongana a yeke tongaso, zia mo gbu ngangu! Atâa atara so e lingbi ti tingbi na ni, Bible azê na e so Nzapa alingbi ti mû maboko na e ti tiri na ala.

Bible atene so fade “ye nde nde atara” awakua ti Nzapa (Jacques 1:2). Bâ tënë “nde nde” (na Grec poi·kiʹlos). Giriri, tënë ni na yanga ti Grec aye ti tene “gbâ ni gbâ ni” wala “amara ni nde nde”, na tënë ni agboto lê na ndo “gbâ ti atara nde nde.” Tongaso, na lege ti fä, ‘atara nde nde’ ayeke atara so yâ ni ayeke mingi mingi. Ye oko, Jéhovah amû maboko na e ti hon ndo ti ala oko oko kue. Ngbanga ti nyen e lingbi ti zia bê ti e na ndo ye so?

‘Nzapa asala nzoni bê na lege nde nde’

Bazengele Pierre atene so aChrétien ‘awara vundu na yâ ye nde nde so atara ala’. (1 Pierre 1:6). Na pekoni, na yâ mbeti ti lo so lo sû na gbe ti yingo vulu, lo tene so Nzapa ‘asala nzoni bê na lege nde nde.’ (1 Pierre 4:10, Fini Mbuki, 2001). Tënë “na lege nde nde”, a wara na yâ ni mbeni mara ti oko tënë ni na yanga ti Grec. Na salango tënë na ndo ni, mbeni wandara ti Bible atene: “So ayeke mbeni tënë so nda ni alï mingi. . . . Ti sala tënë ti grâce [wala nzobe] ti Nzapa tongana poikilos aye ti tene so atâa aye wa asi na zo, grâce ti Nzapa alingbi ti hon ndo ni.” Lo kiri lo tene: “Mbeni ye ayeke pëpe, tongana aye so asi na zo, kpale wala kota bezoin so grâce ti Nzapa alingbi pëpe ti kinda ni. Mbeni ye ti gigi ti kara grâce ti Nzapa ayeke dä pëpe. Ngangu tënë so ayeke poikilos adabe ti e so grâce ti Nzapa so yâ ni ayeke nde nde alingbi biani ti tiri na aye kue.”

Nzobe ti Nzapa amû maboko na e ti hon ndo ti atara

Pierre atene so mbeni lege so nzobe ti Nzapa ayeke sala kua ayeke na lege ti azo nde nde so ayeke na yâ ti kongregation ti aChrétien (1 Pierre 4:11). Wakua oko oko kue ti Nzapa ayeke na amatabisi ti yingo, wala akode so alingbi ti sala kua tongana ye ti mungo ngangu na ala so ayeke tiri na atara (aRomain 12:6-8). Na tapande, ambeni zo na yâ ti kongregation ayeke angangu wafango ye. Atënë ti ala so yâ ni alï mingi amû lege na ambeni zo nga apusu ala ti gbu ngangu (Néhémie 8:1-4, 8, 12). Ambeni so ayeke a-ancien ayeke sala avizite na da ti ala so ayeke na bezoin ti wara mungo maboko. Mara ti avizite tongaso ayeke angoi ti kpengbango zo, ti sala ‘si bê aga nzoni’. (aColossien 2:2). Tongana a-ancien asala mara ti avizite ti kpengbango mabe tongaso, ala yeke kangbi mbeni matabisi ti yingo (Jean 21:16). A hinga même ambeni zo na yâ ti kongregation ndali ti wâ ti ala, be-nzoni nga na nzobe ti ala na yâ salango ye ti ala na mbage ti afon ala awamabe so ayeke na vundu na lege ti atara (Kusala 4:36; aRomain 12:10; aColossien 3:10). Ziango tele na place ti zo nga na ngangu mungo maboko so mara ti aita-koli na aita-wali ti ndoye so afa ayeke mbeni kota fä, wala mbeni mbage ti yâ ti nzobe ti Nzapa.​—aProverbe 12:25; 17:17.

“Nzapa ti lungula vundu kue”

Ahon kue, Jéhovah amû dengo bê. Lo yeke “Nzapa ti lungula vundu kue, Lo so alungula vundu ti e na yâ pono ti e kue”. (2 aCorinthien 1:3, 4). Ndara so ayeke na yâ ti Tënë ti Nzapa so a sû na gbe ti yingo nga na ngangu so yingo vulu ti lo amû ayeke akota ye so Jéhovah asala kusala na ni ti kiri tënë na asambela ti e ti wara maboko (Esaïe 30:18, 21; Luc 11:13; Jean 14:16). E lingbi ti kpengba bê ti e na lege ti zendo so bazengele Paul amû na gbe ti yingo vulu. Lo tene: “Nzapa ayeke Be-Ta-Zo, fade Lo zia handa ahon ngangu ti i pëpe; me legeoko na handa so, fade Lo leke lege ti sigigi nga, si i lingbi gbu ngangu.”​—1 aCorinthien 10:13.

Biani, atâa mara ti tara wa asi na e, lakue nzobe ti Nzapa ayeke mû ande maboko na e ti hon ndo ni (Jacques 1:17). Maboko so Jéhovah ayeke mû na ngoi ni ndali ti awakua ti lo (atâa amara ti atara nde nde wala akpale so alingbi ti si na ala) ayeke gi mbeni fä ti “ndara nde nde ti Nzapa.” (aEphésien 3:10). Mo bâ ni tongana nyen?

[Afoto na lembeti 31]

Jéhovah amû maboko na e ti hon ndo ti atara ti e