Atënë so azo ahunda

Tongana mbeni Chrétien ayeda ti sala kua so ahunda ti yü ngombe na tele ti lo, lo lingbi ti duti lakue na mbeni nzoni yingo-ti-hinga?

Na ndo lê sese kue, aTémoin ti Jéhovah abâ na nene ni mingi kungba so Nzapa amû na ala ti mû aye ti mitele na asewa ti ala (1 Timothée 5:8). Me ambeni kua ayeke dä so ague tâ nde mingi na akpengba-ndia ti Bible, na a lingbi Chrétien asala ni pëpe. A yeke akua tongana ti ala so andu tënë ti ngia ti nginza, salango kusala na mênë na lege ni pëpe nga aye so andu kua ti manga (Esaïe 65:11; Kusala 15:29; 2 aCorinthien 7:1; aColossien 3:5). Ambeni kua ayeke dä so Bible ake ni pëpe, me a lingbi ti sala sioni na yingo-ti-hinga ti zo ni wala ti ambeni zo nde.

Ti sala mbeni kua so ahunda na zo ti gbu ngombe wala mbeni ye tongana kokora ayeke desizion ti zo oko oko. Me na mara ti kua tongaso, tongana ye asi si zo ni asala kusala na ngombe ni wala na ye so ayeke na maboko ti lo, lo lingbi ti wara ngbanga ti mênë na li ti lo. Ni la a yeke nzoni mbeni Chrétien abâ tënë ni mbilimbili na yâ ti sambela, ngbanga ti so mbeni ye alingbi ti si na a hunda na lo ti sala ye hio. Lo yeke sala ande nyen? Lo yeke mû ngombe ni ti pika na zo so aga ti sala sioni na lo wala lo yeke mû ni pëpe? Dutingo na mara ti aye tongaso na tele ti lo ayeke sala nga si lo wara kä wala kuâ, ndali ti so azo aga na ndo ti lo, wala ala gi ti bata tele ti ala na peko ti so lo pika ala na ngombe wala na kokora.

Desizion ti Chrétien ni alingbi nga ti sala ye na ndo ti ambeni zo nde. Na tapande, kozo kungba ti Chrétien ayeke ti fa nzo tënë ti Royaume ti Nzapa (Matthieu 24:14). Chrétien so ayeke sala kua so ahunda na lo ti yü ngombe na tele ti lo, fade lo lingbi ti fa na azo ti “duti na siriri na azo kue”? (aRomain 12:18). Ka ti amolenge ti lo wala ambeni zo ti sewa ni? Fade dutingo na ngombe na da ayeke zia fini ti ala na lê ti kuâ pëpe? Nga, ambeni zo alingbi ti pika gere ti ala na ndo tënë ni so pëpe?​—aPhilippien 1:10.

Na “lâ ti nda ni” so, azo mingi mingi ‘asala pasi na amba ti ala; ala ye ti sala nzoni ye pëpe.’ (2 Timothée 3:1, 3, Fini Mbuki, 2001). Tongana zo ni ahinga ye so na lo yeda ti sala kua so ahunda na lo ti gbu ngombe, so alingbi ti tingbi lo na mara ti azo tongaso, fade ‘tënë aduti na li ti lo’. (1 Timothée 3:10). Ndali ti tënë so, tongana a mû na lo wango gbä na ndo ni na lege ti Bible, kongregation ayeke bâ lo tongana zo so ‘tënë ayeke na li ti lo’. (1 Timothée 3:2; Tite 1:5, 6). Ni la, zo tongaso alingbi pëpe na ambeni matabisi tongana kua ti pionnier, ti ancien wala ambeni ye tongaso.

Jésus atene na adisciple ti lo so tongana ala zia Royaume ti Nzapa na kozo ndo na yâ fini ti ala, a lingbi ala gi bê ti ala ahon ndo ni pëpe na ndo aye ti lâ oko oko (Matthieu 6:25, 33). Biani, tongana e zia bê ti e kue na Jéhovah, “fade Lo bata [e]. Fade lo zia ye ayengi azo ti mbilimbili lâ oko pëpe.”​—Psaume 55:23.