Mo dabe mo na ni?
Dikongo anuméro ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:
• Ngbanga ti nyen a lingbi ti haka kozo siokpari, so ti tene kengo yanga ti Adam, na mbeni kobela so babâ na mama adü na amolenge ti ala?
A haka ni na kobela ndali ti so siokpari ni alondo na Adam si aga na amolenge ti lo. Tongaso, e wara siokpari legeoko tongana ti so mbeni kobela alondo na ababâ na mama ti ga na amolenge ti ala.—15/8, lembeti 5.
• Aye wa mbilimbili asala si ye ti ngangu ahon ndo ni laso?
Satan ayeke gi ti gboto azo yongoro na Jéhovah na lungo na yâ bê ti ala nzara ti angia ti ngangu. Lo yeke sala ni na lege ti aye tongana alimon, mozoko nga na ambeni ngia so ayeke pusu zo so ayeke sala ni ti sala ye ti ngangu wala ti fâ zo. Asioni limon so ndokua ti asango ayeke fa asala nga si aye ti ngangu awu mingi.—1/9, lembeti 29.
• Ponce Pilate ayeke lani zo wa?
Lo yeke lani mbeni zo ti Rome so sewa ti lo ayeke kete na gbe ti sewa ti akota zo ti Rome; peut-être lo sala nga kua ti turugu. Na ngu 26, Tibère, togbia ti Rome, azia Pilate tongana gouverneur ti Judée. Na ngoi ti fango ngbanga ti Jésus, Pilate amä atënë so akota zo ti aJuif abi na li ti lo. Ti nzere na lê ti azo, lo yeda ti tene a fâ Jésus.—15/9, lembeti 10-12.
• “Fä” so a sala tënë ni na Matthieu 24:3 ayeke nyen?
Aye mingi ayeke na yâ ti fä so, so abungbi oko ti ga fä ti singo ti Jésus. Na yâ ni, mo yeke wara tënë ti bira, kota nzara, kobela ti futi kodoro na yengingo ti sese; nga, fä so ayeke mû lege na adisciple ti Jésus ti hinga tënë ti “singo” ti lo na ti “nda ti ngoi so”.—1/10, lembeti 4-5.
• Nde na Palestine, ambeni ndo so aJuif ayeke dä na ngoi ti akozo Chrétien ayeke so wa?
Na ngoi ti akozo Chrétien, ambeni ndo so aJuif ayeke dä mingi ayeke lani Syrie, Asie Mineure, Babylone, na Egypte; ambeni Juif ni ayeke nga na yâ ti akodoro ti Poto so ayeke na gbe ti Kodoro-togbia ti Rome.—15/10, lembeti 12.
• Tongana mbeni Chrétien ayeda ti sala kua so ahunda ti yü ngombe na tele ti lo, lo lingbi ti duti lakue na mbeni nzoni yingo-ti-hinga?
Ti sala mbeni kua so ahunda na zo ti gbu ngombe wala mbeni ye tongana kokora ayeke desizion ti zo oko oko. Me mara ti kua tongaso, tongana ye asi so zo ni asala kusala na ngombe ni wala na ye so ayeke na maboko ti lo, lo lingbi ti wara ngbanga ti mênë na li ti lo. Mbeni Chrétien so ayeke yü aye tongaso na tele ti lo alingbi pëpe na ambeni matabisi ti kusala na yâ ti kongregation (1 Timothée 3:3, 10).—1/11, lembeti 31.
• Teti so tënë ti “Harmaguédon” alondo na tënë “Hoto ti Meguiddo”, a ye ti tene so a yeke tiri ande bira so na mbeni hoto na mbage ti Palestine?
Ên-ën. Hoto ti Meguiddo ayeke ti lo dä pëpe. Me, na ngbele place ti Meguiddo ni na Israël, mo yeke wara gi mbeni kete hoto na tele ti lando so abâ ndo na gbele ni. A lingbi oko pëpe ti bungbi “agbia ti sese, na aturugu ti ala” kue kâ. A yeke tiri ande kota bira ti Nzapa so na ndo sese kue, nga bira so ayeke hunzi tanga ti abira kue (Apocalypse 16:14, 16; 19:19; Psaume 46:9, 10).—1/12, lembeti 4-7.