Bungbingo aye ti yayu na aye ti sese
“Na lege ti ye so Lo leke na bê ti Lo ti sara . . . ti bungbi ye kue na yâ Christ, ye ti ayayu, na ye ti sese.”—AEPHÉSIEN 1:9, 10.
1. ‘Ye so Jéhovah aleke na bê ti Lo’ ndali ti yayu na sese ayeke nyen?
TI ZIA siriri na yayu nga na sese ayeke tâ pendere ye so Jéhovah, “Nzapa ti siriri”, aleke na bê ti lo ti sara (aHébreu 13:20). Lo mû yingo ti lo na bazengele Paul ti sû na mbeti so “ye so Lo leke na bê ti Lo” ayeke “ti bungbi ye kue na yâ Christ, ye ti ayayu [wala “aye ti yayu”, Fini Mbuki 2001], na ye ti sese [“aye ti sese”, FM 01].” (aEphésien 1:9, 10). Na yâ ti aversê so, tënë “ti bungbi ye” aye ti tene nyen mbilimbili? Pakara John Lightfoot, so lo yeke wagingo nda ti Bible, atene: “Tënë ni aye ti fa so na yayu wala na sese aye kue ayeke duti oko, so na yâ ni a yeke wara ande pëpe mbeni ye so aduti ti lo nde na atanga ni. Me aye kue so ayeke na yayu wala na sese ayeke ngoro gi na tere ti Christ nga ayeke bungbi beoko na yâ lo. Siokpari, kui, vundu, bubango ti ye nga na pasi ayeke hunzi ande biaku.”
“Aye ti yayu”
2. “Aye ti yayu” so a lingbi a bungbi ni ayeke azo wa?
2 Bazengele Pierre afa pendere beku so atâ Chrétien ayeke na ni na lege ti nduru tënë so: “Na lege ti zendo ti Lo, e yeke ku ayayu ti fini na sese ti fini so mbilimbili aduti na yâ ni.” (2 Pierre 3:13). Zendo ti “ayayu ti fini” so a sara tënë ni ge andu tënë ti fini ngorogbia so ayeke komande, so ti tene Royaume ti Messie. Na yâ ti mbeti ti lo na aChrétien ti Ephèse, bazengele Paul asara tënë ti “aye ti yayu” so a yeke bungbi ni “na yâ Christ”. Ye ni so ayeke kete wungo ti azo so Nzapa asoro ala ti komande legeoko na Christ na yayu (1 Pierre 1:3, 4). A-Chrétien 144 000 so a sa yingo na ndo ti ala, “A vo ala na popo ti azo ti sese” ti ga afon héritier na Christ na yâ ti Royaume ti lo ti yayu.—Apocalypse 5:9, 10; 14:3, 4; 2 aCorinthien 1:21; aEphésien 1:11; 3:6.
3. Na lege wa a lingbi ti tene so aChrétien so a sa yingo na ndo ti ala ‘aduti na yayu’ na oko ngoi so ala ngbâ sese?
3 A yeke yingo vulu la asara si aChrétien so a sa yingo na ndo ti ala awe aga, wala asara si a kiri a dü ala, amolenge ti Jéhovah na lege ti yingo (Jean 1:12, 13; 3:5-7). Ndali ti so Jéhovah amû na ala “ndo-ti-molenge”, ala ga aita ti Jésus (aRomain 8:15; aEphésien 1:5). Teti so ala yeke amolenge ti Nzapa awe, même na ngoi so ala ngbâ na sese, a yeke sara tënë ti ala tongana azo so a ‘yä ala na nduzu, na a sara si ala duti na yayu na yâ Christ Jésus’. (aEphésien 1:3; 2:6). Ala wara kota ndo so awe na lege ti yingo ndali ti so ‘a kanga ala na sceau ti Yingo Vulu ti zendo, Lo so ayeke mazin ti ye ti héritier ti ala’ so a bata na ala na yayu (aEphésien 1:13, 14; aColossien 1:5). Tongaso, teti so ala ayeke “aye ti yayu” so Jéhovah adiko wungo ti ala kue kozoni awe, a hunda ti bungbi ala si.
A to nda ti bungbi aye ni
4. Lawa nga tongana nyen si a to nda ti bungbi lani “aye ti yayu”?
4 Ti gue oko na “kusala” ti Jéhovah wala lege so lo yeke leke na aye ni, a hunda ti to nda ti bungbi “aye ti yayu” tâ “na ngoi so alingbi”. (aEphésien 1:10). Ngoi ni so asi lani na lâ ti Pentecôte ti ngu 33. Na lango ni so, yingo vulu ti Nzapa azu lani na ndo ti abazengele nga na mbeni bungbi ti adisciple, akoli na awali (Kusala 1:13-15; 2:1-4). Ye so afa lani polele so fini mbele ni ato nda ti sara kusala lani awe, na afa nga tongo nda ti kongregation ti aChrétien nga na ti fini mara ti Israël na lege ti yingo, “Israël ti Nzapa”.—aGalate 6:16; aHébreu 9:15; 12:23, 24.
5. Ngbanga ti nyen Jéhovah aleke lani mbeni fini “mara” na place ti Israël ti mitele?
5 Mbele ti Ndia so a te ni lani na Israël ti mitele aleke pëpe mbeni “royaume ti asacrificateur”, mbeni “mara ti nzoni-kue” so alingbi fade ti sara kusala teti lakue lakue na yayu (Exode 19:5, 6). Jésus atene lani na amokonzi-nzapa ti aJuif: “Fade A lungula royaume ti Nzapa na tïtî i, na A mû na mbeni mara so alë lê ni.” (Matthieu 21:43). Mara ni so ayeke Israël ti yingo, so na yâ ni a yeke wara aChrétien so a sa yingo na ndo ti ala na so ala lï na yâ ti fini mbele ni. Bazengele Pierre atene tënë so na ala, lo tene: “I yeke mara so Nzapa airi i awe teti Lo mveni, i yeke asacrificateur, agbia, mara ti nzoni-kue, azo ti Lo mveni, si i lingbi fa nzoye ti Lo so airi i ti sigigi na yâ bingo si i ga na yâ lumière ti Lo so ayeke ye ti kpene. Giriri i yeke mara pëpe, me fadeso i yeke azo ti Nzapa.” (1 Pierre 2:9, 10). Israël ti mitele aga lani mbeni mara so Nzapa ayeke na mbele na lo mbeni pëpe (aHébreu 8:7-13). Tongana ti so Jésus afa tënë ni kozo awe, a zi matabisi so Israël ti mitele ayeke fade na ni ti duti na yâ ti Royaume ti Messie na a mû ni na azo 144 000 so ayeke azo ti Israël ti yingo.—Apocalypse 7:4-8.
Ala lï na yâ ti mbele ti Royaume ni
6, 7. Mbeni mbele nde so Jésus ate ni lani na aita ti lo ti yingo ayeke so wa? Ti ala, nda ti mbele so ayeke nyen?
6 Na bï ni so Jésus azia na sese Matanga ti Dango Bê na kuâ ti lo, lo sara tënë so na abazengele be-ta-zo ti lo: “I yeke ala so angbâ na Mbi na yâ ye ti handa so atara Mbi; na Mbi mû royaume na i, legeoko tongana Babâ ti Mbi amû na Mbi, si i lingbi te na nyon na table ti Mbi na royaume ti Mbi; na fade i duti na ndo trône, na i fâ ngbanga ti amara bale-oko na ndo ni use ti Israël.” (Luc 22:28-30). Ge, Jésus ayeke sara tënë ti mbeni mbele nde so lo te ni na azo 144 000 so ayeke aita ti lo ti yingo, so fade ala yeke “duti be-ta-zo juska na kui” ti fa so ala yeke ‘azo so ahon na ngangu’.—Apocalypse 2:10; 3:21.
7 Ti ala so ayeke na yâ ti kete bungbi ti azo so a diko li ti ala dikongo so, ala pusu tënë ti beku ti warango fini ti lakue lakue na ndo sese azia ni yamba. Fade ala yeke komande legeoko na Christ na yayu na ala yeke duti na ndo trône ti dë ngbanga na li ti azo (Apocalypse 20:4, 6). Zia e bâ fadeso ambeni versê ti Bible so andu gi aChrétien so a sa yingo na ndo ti ala na so afa ngbanga ti nyen “ambeni ngasangbaga” ayeke te mapa nga ayeke nyon vin ti Mémorial pëpe.—Jean 10:16.
8. So aChrétien so a sa yingo na ndo ti ala ayeke te mapa ni aye ti tene nyen? (Bâ encadré na lembeti 23.)
8 A-Chrétien so a sa yingo na ndo ti ala ayeke bâ pasi legeoko na Christ na ala yeke nduru ti kui mara ti kuâ tongana ti lo. Teti so lo yeke na yâ ti bungbi ti ala so, Paul atene so ni yeke leke tere ti ni ti gbanzi aye kue na tere ti ni tongaso si ni lingbi “wara Christ, si [ni] lingbi hinga Lo, na ngangu ti londongo ti Lo, na beoko ti pono ti Lo”. Biani, Paul ayeke lani nduru ti zia tere ti lo na lê ti kuâ “ti lingbi na [Christ] na kui ti Lo”. (aPhilippien 3:8, 10). Mingi ti aChrétien so a sa yingo na ndo ti ala, na ngoi so ala ngbâ na yâ mitele ala kanga bê na ala “yô kui ti Jésus na yâ tere” ti ala.—2 aCorinthien 4:10.
9. Mapa ti Mémorial aduti fä ti tere wa?
9 Na ngoi so lo zia na sese Kobe ti Seigneur, Jésus atene: “So ayeke tere ti Mbi.” (Marc 14:22). Lo yeke sara lani tënë ti tâ tere ti lo, so na yâ ti kete ngoi azo ayeke pika ni na ayeke sara si mênë ni ayuru. Mapa so mama ni ayeke dä pëpe aduti lani fä ti tere ti Jésus ni so. Ngbanga ti nyen? Ngbanga ti so na yâ ti Bible, mama ti mapa aye ti fa tënë ti siokpari wala ye ti sioni (Matthieu 16:4, 11, 12; 1 aCorinthien 5:6-8). Jésus ayeke lani mbilimbili-kue nga siokpari ayeke na yâ tere ti lo oko pëpe. Lo yeke mû tere ti lo so siokpari ayeke dä oko pëpe so tongana sacrifice-ti-futa teti siokpari (aHébreu 7:26; 1 Jean 2:2). Sarango tongaso ayeke ga ande na ye ti nzoni na aChrétien be-ta-zo kue, atâa ala so ayeke na beku ti wara fini na yayu wala ala so ayeke na beku ti wara fini ti lakue lakue na ndo sese so ayeke ga paradis.—Jean 6:51.
10. Na lege wa ala so ayeke nyon vin ti Mémorial ‘asara beoko na mênë ti Christ’?
10 Na ndo tënë ti vin so aChrétien so a sa yingo na ndo ti ala ayeke nyon ni na ngoi ti Mémorial, Paul atene: “Kopo ti nzoni, so e iri tënë nzoni dä, e kamata ti sara beoko na mênë ti Christ pëpe?” (1 aCorinthien 10:16). Na lege wa si ala so ayeke nyon vin ni ‘asara beoko na mênë ti Christ’? Biani, ala yeke sara beoko na lo na yâ mungo sandaga ti zi azo na gbe ti siokpari pëpe, ndali ti so ala nga ayeke na bezoin ti tene a pardone siokpari ti ala. Me ndali ti mabe so ala yeke na ni na yâ ngangu so mênë ti Jésus ayeke na ni ti zi zo na gbe ti siokpari, a pardone siokpari ti ala awe nga a diko ala azo ti mbilimbili ti tene ala wara fini na yayu (aRomain 5:8, 9; Tite 3:4-7). A yeke gi na lege ti mênë ti Christ so atuku si ‘a bata nde teti Nzapa’ azo 144 000 so aga ahéritier legeoko na Christ nga a sukula siokpari ti ala si ala ga “azo ti be-vulu”. (aHébreu 10:29; Daniel 7:18, 27; aEphésien 2:19). Ti tâ tënë ni, a yeke na lege ti mênë ti lo so ayuru so si Christ ‘avo azo teti Nzapa na popo ti akete mara kue, na ti yanga nde nde kue, na ti azo nde nde kue, na ti amara kue; na lo sara si ala ga royaume, asacrificateur teti Nzapa ti e; na fade ala komande na ndo sese.’—Apocalypse 5:9, 10.
11. So aChrétien so a sa yingo na ndo ti ala anyon vin ti Mémorial aye ti fa nyen?
11 Na ngoi so Jésus azi yanga ti Matanga ti Dango bê na kui ti lo, lo mû na abazengele so ayeke be-ta-zo na lo kopo ti vin na lo tene: “I kue [i] nyon; teti so ayeke mênë ti Mbi, mênë ti mbele so a sa na sese teti azo mingi teti pardon ti siokpari.” (Matthieu 26:27, 28). Gi legeoko tongana ti so mênë ti abagara na ti angasa amû lani ngangu na mbele ti Ndia so ayeke na popo ti Nzapa na mara ti Israël, mênë ti Jésus amû nga ngangu na fini mbele so Jéhovah ayeke te na Israël ti yingo na so ato nda ni na Pentecôte ti ngu 33 (Exode 24:5-8; Luc 22:20; aHébreu 9:14, 15). Na lege ti nyongo vin ni so aduti fä ti “mênë ti mbele” ni, aChrétien so a sa yingo na ndo ti ala ayeke fa so ala lï na yâ ti fini mbele ni nga ala yeke wara adeba nzoni ti pekoni.
12. Na lege wa a batize aChrétien so a sa yingo na ndo ti ala na yâ kui ti Christ?
12 A kiri a dabe ti aChrétien so a sa yingo na ndo ti ala na mbeni ye nde. Jésus atene lani tënë so na adisciple be-ta-zo ti lo: “Kopo so Mbi nyon, fade i nyon; na batême so Mbi kamata, fade i kamata.” (Marc 10:38, 39). Na pekoni, bazengele Paul asara tënë ti aChrétien so a yeke ‘batize ala na yâ kui ti Christ.’ (aRomain 6:3). Fini so aChrétien so a sa yingo na ndo ti ala ayeke na ni apusu ala ti gbanzi ye na tere ti ala mveni. Kuâ ti ala ayeke fa so ala gbanzi ye na tere ti ala na lege so ala pusu beku ti warango fini na ndo sese ala zia ni yamba. Batême ti ala na yâ kui ti Christ ayeke hunzi na ngoi so tongana ala kui awe a yeke zingo ala ti ga azo ti yingo na ti “komande legeoko” na Christ na yayu.—2 Timothée 2:10-12; aRomain 6:5; 1 aCorinthien 15:42-44, 50.
Tengo mapa na nyongo vin ni
13. Ndali ti nyen si ala so ayeke na beku ti wara fini na ndo sese ayeke te mapa nga ayeke nyon vin ti Mémorial pëpe? Me ngbanga ti nyen ala yeke gue na Mémorial ni?
13 Ndali ti so tengo mapa ni na nyongo vin ni na ngoi ti Mémorial ague oko na atënë kue so e fa na nduzu ge, a yeke polele so a yeke na lege ni pëpe ti tene azo so ayeke na beku ti wara fini na ndo sese ate mapa ni na anyon vin ni. Ala so ayeke na beku ti wara fini na ndo sese abâ tere ti ala so ala yeke pëpe na popo ti aChrétien so a sa yingo na ndo ti ala so ayeke amembre ti tere ti Christ. Ala bâ nga so ala yeke pëpe na yâ ti fini mbele so Jéhovah ate lani na ala so ayeke komande ande legeoko na Jésus Christ. “Kopo” ni aduti fä ti fini mbele, ni la gi ala so ayeke na yâ ti fini mbele ni si ayeke te mapa na ayeke nyon vin ni. Azo so ayeke na beku ti wara fini ti lakue lakue na ndo sese na gbe ti Royaume ni awara batême na yâ kui ti Christ lâ oko pëpe wala a iri ala nga ti gue ti komande na yayu pëpe. Tongana ala te mapa ni na ala nyon vin ni, a yeke duti ande na lege ni oko pëpe. Tongaso, ala yeke te mapa ni pëpe nga ala nyon vin ni pëpe; ye oko, ala yeke ga na Matanga ti Dango ti Bê ni ti fa tongana nyen ala bâ ni na nene ni. Ala kiri singila na Jéhovah ndali ti aye kue so lo sara teti ala na lege ti Molenge ti lo, so andu nga pardon ti siokpari ti ala na lege ti mênë ti Christ so ayuru.
14. Tongana nyen aChrétien so a sa yingo na ndo ti ala ayeke wara ngangu na lege ti yingo na tengo mapa nga na nyongo vin ti Mémorial?
14 A ga nduru ti hunzi awe ziango sceau wala kpongo tanga ti nzoroko na ndo ti lê ti kete groupe ti aChrétien so a iri ala ti gue ti komande legeoko na Christ na yayu. Na yâ ti ngoi kue ti fini ti ala na ndo sese, aChrétien so a sa yingo na ndo ti ala ayeke wara ngangu na lege ti yingo na tengo mapa nga nyongo vin ti Mémorial. Ala bâ so ala duti beoko na amba ti ala aTémoin so ayeke nga na beku ti wara fini na yayu tongana amembre ti tere ti Christ. Tengo mapa ni nga na nyongo vin ni adabe ti ala na kungba so ala yeke na ni ti ngbâ be-ta-zo juska na kuâ.—2 Pierre 1:10, 11.
Bungbingo “aye ti sese”
15. A bungbi azo wa na tere ti aChrétien so a sa yingo na ndo ti ala?
15 Ngbene ye na ngu 1935 ti ga na ni, mbeni wungo so ayeke gue gi na li ni ti “ambeni ngasangbaga”, so ala yeke ti yâ ti “kete kundu” ni pëpe na so ayeke na beku ti wara fini ti lakue lakue na ndo sese, aga ti bungbi na tere ti aChrétien so a sa yingo na ndo ti ala (Jean 10:16; Luc 12:32; Zacharie 8:23). Ala ga atâ kamarade ti aita ti Christ, na ala mû maboko mingi na ala na yâ kusala ti fango “Tene-nzoni so ti royaume” tongana tënë ti témoin na amara kue (Matthieu 24:14; 25:40). Na sarango tongaso, lege azi na ala ti tene Christ abâ ala tongana “angasangbaga” so a zia ala na nzoni ndo “na koti ti lo” na ngoi so lo yeke ga ande ti fâ ngbanga na ndo ti amara (Matthieu 25:33-36, 46). Na lege ti mabe so ala yeke na ni na yâ mênë ti Christ, ala yeke ga ala so a iri ala “azo so asi singo” so ayeke sö ande kuâ na yâ ti “kota ye ti vundu”.—Apocalypse 7:9-14.
16. Azo wa la ayeke duti ande na yâ ti “aye ti sese”? Tongana nyen si ala kue ayeke wara ande lege ti ga “amolenge ti Nzapa”?
16 Na ngoi so a yeke hunzi ande kpongo tanga ti nzoroko na ndo lê ti azo 144 000 kue awe, a yeke zi lege na “pupu” ti futingo ye ti ya na ndo aye ti sioni sese ti Satan (Apocalypse 7:1-4). Na ngoi ti Komandema ti Ngu Saki Oko ti Christ nga na amba ti lo so ayeke agbia na aprêtre, fade gbâ ti azo so ayeke londo na popo ti akuâ ayeke bungbi na azo so asi singo na ti ga oko (Apocalypse 20:12, 13). Ala yeke wara ande lege ti ga azo so ayeke duti na gbe ti komandema ti Gbia Messie ni (Christ Jésus) na ndo sese teti lakue lakue. Na hunzingo ti Komandema ti Ngu Saki Oko ni, “aye ti sese” kue ayeke gue ande na gbele mbeni tara ti nda ni. Ala so ayeke duti ande be-ta-zo ayeke ga “amolenge ti Nzapa” na ndo sese.—aEphésien 1:10; aRomain 8:21; Apocalypse 20:7, 8.
17. Ye so Jéhovah aleke na bê ti lo ti sara ayeke ga ande tâ tënë tongana nyen?
17 Tongaso, na lege ti “kusala” ti lo ti ndara so ayeke kota mingi, wala na lege ti ye so lo leke, Jéhovah ayeke sara ande si ye so lo leke na bê ti lo ti sara aga tâ tënë, so ti tene “ti bungbi ye kue na yâ Christ, ye ti ayayu, na ye ti sese.” A-Chrétien so a sa yingo na ndo ti ala na so ague na yayu awe, a-ange nga azo kue so ayeke na ndo sese, a yeke bungbi ala legeoko na yâ ti siriri. Na ngia, ala yeke duti na gbe ti yanga-ti-komande ti mbilimbili ti Jéhovah, Nzapa so ayeke sara si ye so lo leke na bê ti lo ti sara aga tâ tënë.
18. Tongana nyen si aChrétien so a sa yingo na ndo ti ala nga na ambeni ngasangbaga ayeke wara ande ye ti nzoni na guengo na Mémorial?
18 Biani, lango 12 ti avril ngu 2006 ayeke duti ande mbeni ngoi so ayeke kpengba mabe ti kete wungo ti aChrétien so a sa yingo na ndo ti ala na amba ti ala kutu mingi so ayeke ti ambeni ngasangbaga. Ala yeke sara ande Mémorial ni gi tongana ti so Jésus ahunda ni lani: “I sara so ti dabe i na Mbi.” (Luc 22:19). A lingbi azo kue so ayeke gue na matanga ni adabe ti ala na ye so Jéhovah asara ndali ti ala na lege ti Molenge ti lo so lo ndoye mingi, Christ Jésus.
Dango bê
• Nyen la Jéhovah aleke ti sara teti aye ti yayu nga na aye ti sese?
• Azo wa la ayeke “aye ti yayu”? A yeke bungbi ala tongana nyen?
• Azo wa la ayeke “aye ti sese”? Beku wa ala yeke na ni?
[Encadré na lembeti 23]
“Tere ti Christ”
Na kozo mbeti ti aCorinthien 10:16, 17, Paul asara tënë ti mapa ni so ayeke kota mingi teti aita ti Christ so a sa yingo na ndo ti ala, tongana lo sara tënë ti “tere” na mbeni lege so ayeke nde. Lo tene: “Mapa so e fâ, e kamata ti sara beoko na tere ti Christ pëpe? Teti mapa ayeke oko, e so e yeke mingi, e yeke tere oko, teti e kue e te mapa oko so.” Na ngoi so aChrétien so a sa yingo na ndo ti ala ayeke te mapa ti Mémorial, ala fa na gigi so ala duti beoko na yâ ti kongregation ti aChrétien so a sa yingo na ndo ti ala so ayeke tongana tere ni na Christ ayeke ti lo Li ni.—Matthieu 23:10; 1 aCorinthien 12:12, 13, 18.
[Afoto na lembeti 23]
Ngbanga ti nyen gi ala so a sa yingo na ndo ti ala si ate mapa na anyon vin ni?
[Foto na lembeti 25]
Na lege ti ye so Jéhovah aleke, a yeke bungbi ande oko aye ti yayu na aye ti sese kue