“Fa na e ambeni ye na ndo ni si!”

NA MBENI kota da-mbeti na gbata ti Nezlobnaya, na Russie, a-élève ti mbeni klase ayeke manda lani abuku ti Pakara Mikhail Bulgakov. Na popo ti abuku ni, mbeni oko atene sioni tënë ti Jésus Christ, me a gonda Satan tongana walombe. Na peko ti mandango ye ni, wafango mbeti ni ahunda na a-élève ni ti mû ambeni tënë ti yâ ti buku so ti sara na devoir. Ye oko, Andrey, mbeni Témoin ti Jéhovah ti ngu 16 ayeke na popo ti a-élève ni. Na nengo tere, lo hunda ti sara devoir ni pëpe ngbanga ti so yingo-ti-hinga ti lo ake na lo ti manda mara ti mbeti ni so. Me lo hunda ti sara devoir na ndo ti mbeni tënë nde so afa tongana nyen lo bâ Jésus Christ. Wafango mbeti ni ayeda.

Na yâ ti devoir ti lo, Andrey atene so lo bâ na nene ni bango ndo ti amba ti lo, me ti lo nzoni lege ahon kue ti manda ye na ndo Jésus ayeke ti diko mbaï so ayeke na yâ mbeni oko ti aÉvangile osio. Na dikongo ni, “fade mo yeke manda ye na ndo gigi ti Jésus na afango ye ti lo so azo so abâ lo na amä afango ye ti lo si afa pekoni.” Andrey akiri atene: “Mbeni kota tënë ni ayeke lege so a sara tënë ti Satan. Ti ambeni zo, a yeke ye ti ngia ti diko mbeni buku so na yâ ni a gonda Satan tongana mbeni walombe, me na mbi a yeke tongaso pëpe.” Lo fa so Satan ayeke biani mbeni ngangu sioni zo ti yingo so aturne peko na Nzapa, lo ga na ye ti sioni, vundu na pasi na ndo ti azo. Andrey ahunzi devoir ti lo tongaso: “Mbi bâ so mbi yeke wara ande ye ti nzoni oko pëpe na dikongo mara ti buku so. Ti tâ tënë ni, mbi yeke nga na tënë na Pakara Bulgakov pëpe. Me ti mbi, mbi ye ti diko Bible ti hinga tâ mbaï ti Jésus Christ.”

Devoir ti Andrey anzere na wafango mbeti ni mingi, na tongaso lo hunda na Andrey ti leke mbeni tënë na ndo Jésus Christ ti diko ni na yâ ti klase. Andrey ayeda. Na ngoi ti mandango ye ti peko, Andrey adiko devoir ti lo na gbele amba ti lo ti klase ni. Lo fa ngbanga ti nyen lo bâ Jésus tongana koli so ahon tanga ti azo kue. Na pekoni, lo diko mbeni chapitre na yâ mbeti ti Matthieu so a sara tënë ti kuâ ti Jésus. Teti so ngoi so a mû na lo ti diko na devoir ni aga nduru ti hunzi, Andrey aye ti ko nda ti tënë ti lo, me amba ti lo ti klase atene: “Fa na e ambeni ye na ndo ni si! Nyen la asi na pekoni?” Tongaso, lo kiri lo diko na ala mbaï ti yâ ti mbeti ti Matthieu so a sara tënë ti zingongo ti Jésus na kuâ.

Tongana lo hunzi tënë ti lo awe, amba ti Andrey ahunda atënë mingi na lo na ndo ti Jésus nga na Jéhovah. Andrey atene: “Mbi sambela lani Jéhovah ti mû na mbi ndara na lo kiri tënë na sambela ti mbi. Mbi wara lege ti kiri tënë na ahundango tënë ti ala kue!” Tongana mandango ye ni ahunzi awe, Andrey amû buku Koli so ahon tanga ti azo kuea na wafango mbeti ti lo; a nzere mingi na wafango mbeti ni ti wara buku so. Andrey atene: “Lo mû na mbi nzoni note na lo gonda mbi teti so mbi yeke na atënë ti mbi so mbi mä na bê na ni nga teti so kamene ti atënë so asara mbi pëpe. Lo tene nga so lo yeda na ambeni ye so mbi mä na bê dä.”

Tere ti Andrey anzere mingi so lo mä yingo-ti-hinga ti lo so Bible afa lege na ni na lege so lo ke ti diko mbeni mbeti so azonga Jéhovah na Molenge ti lo Jésus Christ. Ye so lo sara abata lo nde na ambeni tënë so Bible ake, me na ndo ni a zi nga lege na lo ti fa atâ tënë ti Mbeti ti Nzapa na ambeni zo.

[Kete tënë na gbe ni]