Atënë so azo ahunda

Bazengele Paul aye ti tene nyen tongana lo tene so a lingbi awali “asara tënë pëpe na yâ a-eglize”?

Na aChrétien ti kongregation ti Corinthe, Paul asû tënë so: “Azo asara tongaso na popo ti a-église kue ti azo ti be-vulu. A lingbi awali asara tënë pëpe na yâ a-eglize, teti a zia lege na ala pëpe ti sara tënë.” (1 aCorinthien 14:33, 34). Ti tene e gbu nda ti tënë so mbilimbili, a yeke nzoni e bâ aversê so angoro wango ti Paul so.

Na 1 aCorinthien chapitre 14, tënë ti Paul andu atënë so abâ abungbi ti kongregation ti aChrétien. Lo fa aye so a lingbi a sara tënë na ndo ni na ngoi ti abungbi so na lo mû wango na ndo lege so a lingbi aye ni atambela (1 aCorinthien 14:1-6, 26-34). Lo luti mingi na ndo nda ni so a sara abungbi ni: ti tene “eglize akpengba.”​—1 aCorinthien 14:4, 5, 12, 26.

Wango ti Paul ti ‘sara tënë pëpe’ asigigi fani ota na 1 aCorinthien chapitre 14. Lakue, lo mû wango so na bungbi ti azo nde nde ti kongregation ni, me na yâ ti tënë ni kue, nda ti wango ni ayeke gi oko: ti “sara ye kue mbilimbili na lege ni.”​—1 aCorinthien 14:40.

Kozoni, Paul atene: ‘Tongana ambeni zo asara tënë na yanga nde, a lingbi azo use wala ota asara tënë, me a hon so pëpe, a lingbi zo oko asara tënë ti lo si ita ti lo asara tënë ti lo; na a lingbi mbeni zo afa nda ti tënë so. Me tongana zo ti fa nda ti tënë so ayeke pëpe, a lingbi zo asara tënë so pëpe na eglize; zia lo sara tënë na bê ti lo mveni, na lo sara tënë na Nzapa.’ (1 aCorinthien 14:27, 28). So aye ti tene pëpe so mara ti zo tongaso ayeke sara tënë lani oko pëpe na abungbi, me ambeni ngoi ayeke dä so a lingbi lo kaï. Zia e girisa pëpe so nda ti abungbi ayeke ti sara si zo akpengba. Na tongana mbeni zo asara tënë na mbeni yanga so zo oko amä pëpe, fade a kpengba zo pëpe.

Use ni, Paul atene: ‘Zia aprophète use wala ota asara tënë, na zia ambeni zo agi nda ti tënë ni. Me tongana Nzapa afa mbeni tënë na mbeni zo so aduti na popo ti ala, a lingbi zo ti kozoni azia tënë.’ So ti tene, a lingbi kozo prophète ni azia ti sara tënë na ngoi ti abungbi pëpe, me a ye ti tene a lingbi lo kaï na ambeni ngoi. Na lo so Nzapa afa na lo mbeni tënë, lo lingbi ti sara tënë ni na kongregation, tongaso zo kue awara ye so a yeke gi na ngoi ti bungbi ni: so ayeke ti tene zo “kue amä wango.”​—1 aCorinthien 14:26, 29-31.

Ota ni, Paul asara tënë gi na awali, lo tene: ‘A lingbi awali asara tënë pëpe na yâ église, teti a zia lege na ala pëpe ti sara tënë; me a lingbi ala mä tënë.’ (1 aCorinthien 14:34). Ngbanga ti nyen Paul akomande ye so na aita-wali? Ti bata si ye atambela na lege ni na yâ kongregation. Lo tene: “Tongana ala ye ti manda mbeni ye, zia ala hunda akoli ti ala mveni na yâ da ti ala; teti a yeke ye ti kamene tongana wali asara tënë na yâ église.”​—1 aCorinthien14:35.

Peut-être lani ambeni ita-wali alondo ti ke ye so a tene na kongregation. Wango ti Paul amû maboko na aita-wali so ti kpe bibe ti kengo yanga tongaso, na ti yeda na tâ be-ti-molenge na place so a zia ala dä na yâ ti aye so Jéhovah aleke awe, mbilimbili na gbele akoli ti ala (1 aCorinthien 11:3). Na ndo ni, na dutingo kpô, fade aita-wali afa na gigi so ala yeke na nzara ti ga awafango ye na yâ kongregation pëpe. Lâ ni so lo sû mbeti na Timothée, Paul afa so a yeke na lege ni oko pëpe ti tene wali asara kusala ti koli ti wafango ye, lo tene: “Me mbi ye wali afa nda ti tënë wala akomande koli pëpe, me lo duti kpô.”​—1 Timothée 2:12.

So ti tene a lingbi wali so ayeke Chrétien asara tënë lâ oko pëpe na ngoi ti bungbi ti kongregation? Oko pëpe. Lani na ngoi ti Paul, ambeni ngoi ayeke dä so awali Chrétien ayeke sara tënë, peut-être yingo vulu apusu ala ti sambela wala ti tënë prophétie na yâ kongregation. Na angoi tongaso, ala hinga so dutingo ti ala ahunda na ala ti kanga ye na li ti ala.a (1 aCorinthien 11:5). Na ndo ni, na ngoi ti Paul nga laso, a wa aita-wali legeoko na aita-koli ti sara tënë ti beku ti ala na gbele azo (aHébreu 10:23-25). Na tere ti sarango ye so na yâ fango tënë, aita-wali ayeke sara nga tënë ti beku ti ala na ngoi ti abungbi na kiringo na anzoni tënë tongana a tisa ala ti sara ni nga na yengo dä ti sara adémonstration wala adevoir.

Tongaso, awali Chrétien “asara tënë pëpe” na lege so ala gi pëpe ti mû ndo so ayeke ti koli na ti fa ye na kongregation. Ala yeke londo pëpe ti ke ala so a mû na ala ngangu ti fa ye na kongregation, na tapande na hundango atënë so ake tënë so a fa. Na sarango kusala so a mû na ala na yâ kongregation na lege ni, awali Chrétien ayeke sara ye mingi ti tene siriri aduti dä si “ye so kue” atambela na ngoi ti bungbi “asara si eglize akpengba.”​—1 aCorinthien 14:26, 33.

[Kete tënë na gbe ni]