Nzinga na ndo sese laso

AZO ayeke bâ ka Vicentea tongana lo yeke gboto puse ti lo so asi na kungba na ndo ti alege ti São Paulo, na Brésil. Lo yeke ro acarton, anduru wen na aplastique. Tongana ndo akomanse ti vuko, lo zia mbeni carton na sese na gbe ti puse ti lo na lo lango. Atâa so akutukutu na abus ayeke hon mingi, lo lango ti lo nzoni. Kozoni, lo yeke sara kua, lo yeke na da nga na sewa, me lo girisa aye so kue. Ti fadeso, lo yeke pika li ti lo ti wara kete ye ti tengo ni.

Mawa ni ayeke so, azo kutu mingi na ndo sese kue ayeke na yâ ti kota nzinga tongana Vicente. Ti akodoro so ayeke na pasi ti mosoro, azo mingi ayeke lango na lege wala na yâ ti agbagbara da. A yeke bâ ka amama so angbâ ti mû me na amolenge ti ala, awazin na awaziba na iringo ye. Tongana akutukutu aluti na sangbi-lege, amolenge ayeke gi ti kä abonbon ti wara kete pata.

A yeke ngangu ti fa nda ti mara ti nzinga tongaso. Mbeni mbeti-sango ti Grande-Bretagne (The Economist) atene: “Laso, azo ayeke na mosoro mingi ahon ti kozo, ala wara aye kue so a hunda ti kinda nzinga, aye tongana hingango ye na ndo tënë ti seni, aye ti kode so a leke ni nga na hingango ndo.” Azo mingi awara ye ti nzoni na yâ ti aye so kue. Na ndo alege ti akota gbata ti akodoro so ayeke na pasi ti mosoro, a yeke bâ afini kutukutu mingi. Akota magazin asi singo na afini ye, na azo ti vongo ni amanke pëpe. Akota magazin use ti Brésil asara sabango ti akungba ti ala. Na bï ti lango 23 ti si na 24 ti nze ti décembre 2004, ala kanga pëpe. Mbeni oko ti amagazin so airi azo ti tene ala dodo ndali ti awavongo ye. Azo 500 000 ague dä lani.

Ye oko, mingi ti azo abâ nzoni na lege ti mosoro so ambeni zo ayeke na ni pëpe. Na bango kota kangbi so ayeke na popo ti awamosoro na awanzinga, azo mingi atene so a lingbi a sara ye hio ti lungula nzinga. Mbeni mbeti-sango ti Brésil (Veja) atene: “A yeke nzoni sarango bira na nzinga aduti kota tënë ti amokonzi-poroso na ngu 2005 so.” Mbeti-sango so asara nga tënë ti tene a zia na sese mbeni mara ti pialo so azo ti Amerika azia ândö na sese ti mû maboko na akodoro ti Poto na lege ti konomi na peko ti use bira so amû sese kue. Me fini pialo so ayeke ti tene a mû maboko na akodoro so nzinga ayeke dä mingi, mbilimbili na Afrika. Me, atâa so amara ti ye so a zia na sese tongaso akpa mbeni guengo na li ni, oko mbeti-sango so akiri atene: “Anda ti tënë mingi ayeke dä ti de kite na ndo aye ti pekoni. Tongana mingi ti akodoro ake ti mû nginza, a yeke ngbanga ti so a yeke ngangu ti tene nginza ni asi na azo so a tokua ni ndali ti ala.” Mawa ni ayeke so, ndali ti goro na aye mingi so letäa ahunda ti sara, kota mbage ti nginza so angorogbia, akota ndokua ti sese na azo amû asi lâ oko pëpe na azo so ayeke na bezoin ni.

Jésus ahinga lani so nzinga ayeke ngbâ ti gue. Lo tene: “Awanzinga ayeke na i lakue.” (Matthieu 26:11). So ti tene fade nzinga ayeke hunzi pëpe? Mbeni ye ti sara ti gbian ye ni ayeke dä pëpe? Ye nyen aChrétien alingbi ti sara ti mû maboko na awanzinga?

[Kete tënë na gbe ni]