Zia mbeto Jéhovah ayeke na mo!

AHON angu 50 tongaso awe, kete na peko ti sungbango ti akozo nene ngombe so afuti kota ndo, wasenda-ye Harold C. Urey, so awara mbeni kota palata, atene tënë so na ndo gigi ti kekereke, lo tene: “Atâa e te ye, e lango, wala e duti na fini wala e kui, ye so kue e yeke sara ni ande gi na yâ ti mbeto.” Laso, mbeto ayeke sara azo ahon ndo ni na yâ dunia so, na ye so ayeke ye ti dongo bê pëpe. Lâ oko oko, ambeti-sango ayeke sara tënë ti kusala ti aterroriste, ti asioni ye so asi nga na ti akobela so zo agi li ti lo na ni gbä.

E aChrétien, e hinga nda ti aye so asi. Aye so afa atene e yeke na “lâ ti nda ni” ti sioni sese so, na Bible atene kozoni so fade a yeke hinga ni na lege ti “lâ ti ye ti ngangu”. (2 Timothée 3:1). Ti hinga ye so ayeke sara si e yeke kiri ti zia bê ti e mingi ahon ti kozo na tënë so Jéhovah Nzapa atene, so fade na yâ ngoi kete lo yeke ga na mbeni fini sese so mbilimbili ayeke duti dä (2 Pierre 3:13). Me, ti ku na ngoi ni so, mbeto ayeke sara ti lo e pëpe?

Awakua ti Nzapa ayeke bâ mbeto tongana nyen?

Jacob, David na Elie ayeke lani na popo ti awakua ti Jéhovah so mbeto asara ala tongana ala tingbi na ambeni ye so alingbi ti sara sioni na ala (Genèse 32:6, 7; 1 Samuel 21:11, 12; 1 aGbia 19:2, 3). Mabe atia azo so pëpe. Me ala fa so ala zia bê ti ala kue na Jéhovah. Ye oko, Jacob, David na Elie ayeke azo lani, na ala nga kue mbeto ayeke sara ala. Disciple Jacques atene: “Elie ayeke zo legeoko tongana e.”​—Jacques 5:17.

E nga kue tongana e zia bê ti e gi na ndo akpale so asi na e laso wala ala so alingbi ti si na e ande, mbeto alingbi ti sara e. A yeke na lege ni ti sara mbeto tongaso. Senge pëpe, ngbanga ti so Bible atene so ti Satan, lo ye ti lo gi ti “sara bira” na azo so “abata komandema ti Nzapa, na ala bata tënë ti témoin ti Jésus”. (Apocalypse 12:17). Atâa so atënë so abâ mbilimbili aChrétien so a sa yingo na ndo ti ala, Paul asû na mbeti, lo tene: ‘Azo kue so aye ti tambela na lege ti batango tënë ti Nzapa na yâ Christ Jésus, fade ala hu pono ti ye ti ngangu.’ (2 Timothée 3:12). Me, a yeke nzoni tongana e wara akpale, e zia si mbeto awoko e kue pëpe. Ngbanga ti nyen?

“Nzapa ti sö azo”

Wasungo psaume David atene: “Nzapa ti e ayeke Nzapa ti sö azo.” (Psaume 68:21). Fani mingi, Jéhovah afa so lo yeke na ngangu ti sö azo ti lo. Lo fa ni na lege so lo zi ala na lê ti aye ti ngangu wala lo mû na ala ngangu ti hon ndo ni (Psaume 34:18; Daniel 6:22; 1 aCorinthien 10:13). Na lege ti ye so mo manda na yâ ti Bible, akusala oke ti ‘songo azo’ mo dabe ti mo na ni?

Na sarango kusala na Index des publications de la Société Watch Tower,a mo lingbi ti gi ambeni tënë na ndo atâ ye so asi? Aye tongana Kota Moa na ngoi ti Noé, songo Lot na amolenge ti lo ti wali na gbata ti Sodome na Gomorrhe, sigingo ti amolenge ti Israël na Egypte nga na fango Kota Ngu Bengba, wala bubango yâ ti ye so Haman aleke na bê ti lo na lingo ti futi aJuif kue. Tongana mo diko apendere mbaï so nga mo gbu li ti mo na ndo ni, mabe so mo yeke na ni so Jéhovah ayeke Nzapa ti sö azo ayeke kpengba. Na ye so ayeke mû ande maboko na mo ti luti na mbeto pëpe na lê ti aye so atara mabe ti mo.

Atapande ti laso

Mo hinga ambeni zo na ndo so mo yeke dä so agbu ngangu na gbe ti ambeni tara? Peut-être a yeke mbeni zo so a kanga lo ndali ti so lo yeke be-ta-zo na Jéhovah. Wala mo hinga mbeni mbakoro Chrétien so ayeke sara na Jéhovah atâa so lo yeke na kpale ti seni. Wala a yeke ambeni maseka so aduti nde na sese so atâa akota ngangu so akamarade ti ala ti ekole asara na ndo ti ala. Mo yeke nga na ababâ wala amama so ayeke bata amolenge ti ala gi ala oko, wala akumbamba so ayeke sara na Jéhovah atâa so ala bâ so ala yeke gi ala oko. Mo manda nyen na lege ti azo so? Na bango tongana nyen ala yeke sara na Jéhovah be-ta-zo, a yeke mû maboko na mo ti gbu ngangu na ti duti na mbeto pëpe na gbele akpale kue so mo lingbi ti tingbi na ni.

Tâ tënë, a hunda na e ti duti na mbeto pëpe tongana a kanga lege na e wala a sara ngangu na e. Me a hunda nga na e ti duti na mbeto pëpe tongana e yeke na kite na ndo ndoye so Jéhovah ayeke na ni na mbage ti e. A lingbi e gi ti hinga na bê ti e wani so biani Christ akui ndali ti e oko oko (aGalate 2:20). Tongaso e yeke zia mbeto so ayeke na lege ni pëpe na e ga nduru na Jéhovah. Tongana e bâ so e lingbi pëpe na ndoye ti Jéhovah, e lingbi ti gbu li ti e na ndo atënë so Jésus atene na adisciple ti lo, lo tene: ‘Ala kä atiri use teti pata oko pëpe? Na fade tiri oko atï na sese pëpe, tongana Babâ ti i ayeda pëpe; na A diko kuali ti i kue awe nga. Tongaso i zia mbeto asara i pëpe; ngere ti i ayeke ngangu ahon ngere ti atiri mingi.’​—Matthieu 10:29-31.

Tour ti Ba Ndo na Réveillez-vous! ayeke sara ka mingi tënë ti aTémoin ti Jéhovah ti ngoi ti e so aluti na mbeto pëpe na gbele akpale so asi na ala. Ye so aye ti tene pëpe so ala yeke gi bê ti ala lâ oko pëpe ndali ti aye so asi na ala. Me ala zia si mara ti aye tongaso akanga lege na ala pëpe ti sara na Jéhovah. Ambaï ti ala so a sû na yâ ti ambeti alingbi ti mû maboko na mo ti gbu nga ngangu na mbeto pëpe. Zia e bâ atapande use.

Mbeni ndao agbian fini ti lo

A yeke wara na yâ ti Réveillez-vous! ti lango 22 ti avril, ngu 2003 article so: “Un accident qui a changé ma vie.” Article so asara tënë ti akpale so Stanley Ombeva, mbeni Témoin ti Jéhovah na Kenya, aluti na gbele ni na peko ti so mbeni kutukutu so akpe na loro mingi akpo lo. Tongana ngangu ti lo ayeke kiri gi na peko kiringo, a zi lo na kua nga lo girisa anginza kue so Letäa ayeke mû na zo. Ita Ombeva atene tënë so: “Tongana yeke yeke mbi ga ti bâ so dutingo ti mbi ni ayeke tâ ngangu mingi, mbi bâ aye kue na nzoni lê mbeni pëpe, ye kue aso gi bê ti mbi songo, nga mbi yeke bi bê ti mbi gi na mbi wani. Na ambeni ngoi, ngonzo ayeke sara mbi na bê ti mbi aso ngangu.” Atâa akpale ti lo ni, Chrétien so ayeke na bê. Lo zia si bê ti lo anze ahon ndo ni pëpe nga si a pusu lo ti woko kue pëpe. Nde na so, lo zia bê ti lo na Jéhovah. Ita Ombeva atene: “Lo mû lakue maboko na mbi na yâ ye kue so asi na mbi. Maboko so lo mû na mbi ayeke tâ mingi na a sara si na ambeni ngoi kamene asara mbi. Mbi leke na bê ti mbi ti diko aversê so mbi hinga mbi tene a yeke dë bê ti mbi na nga ti gbu li ti mbi na ndo ni.”

Atënë so Ita Ombeva afa ni polele amû lege na azo mingi ti luti na mbeto pëpe na gbele akpale. Mbeni ita-wali atene: “Ngu ti lê ti mbi ayuru tongana mbi diko article so. Mbi bâ so na lege ti article so Jéhovah ayeke fa so lo ye mbi, lo bi bê ti lo na ndo ti mbi nga lo dë bê ti mbi.” Mbeni Témoin nde asû na mbeti, lo tene: “A-article tongaso ayeke mbeni tâ dengo bê ndali ti e kue so e yeke na yâ oko dutingo so na so e yeke bâ pasi me e dema tere ti e pëpe.”

Ala hon ndo ti vundu ti bê ti ala

Mbeni ye nde so andu bê ti zo ayeke ye so asi na Herbert Jennings, na so a fa ni na yâ ti article “Vous ne savez pas ce que votre vie sera demain.”b Ita Jennings atiri na mbeni kobela so asara si ngoi na ngoi zo so aduti nzoni achangé hio tongaso ti wara kota vundu. Tongana lo gbu li na ndo ngoi so kobela ti lo ato nda ni, lo tene: “A yeke tâ lani ngangu ti gue na abungbi. Ye oko, mbi hinga biani so a yeke kota ye ti bungbi na aita. Ti hon ndo ni, mbi yeke lï ka na yâ Da ti Royaume gi tongana azo kue aduti awe nga mbi yeke hon kete kozoni si tanga ti azo kue alondo ti sigigi.”

A yeke nga lani ngangu na lo ti fa tënë. Ita Jennings atene: “Na ambeni ngoi, même tongana mbi si na yanga ti mbeni da, mbi yeke nga na ngangu pëpe ti pika ni. Me mbi ke ti zia lege ti fa tënë, ngbanga ti so mbi hinga so fango tënë ti e ayeke sö ande e nga na ala kue so amä ni (1 Timothée 4:16). Kete na pekoni, mbi kanga bê ti mbi, mbi gue na mbeni yanga-da ni na mbi pika ni. So mbi ngbâ lakue ti fa tënë, mbi sara si mbi kpengba kamême na lege ti yingo, na ye so asara si mbi hinga nzoni mingi tongana nyen ti hon ndo ti kobela ti mbi ni.”

Ye so Ita Jennings afa ni polele amû maboko na azo mingi so adiko ni ti luti na gbele angangu kpale na mara ti kpengba bê tongaso. Na tapande, mbeni ita-wali atene: “A sara angu 28 awe so mbi yeke diko Tour ti Ba Ndo na Réveillez-vous! Me tâ gi article so la si andu bê ti mbi mingi. A lingbi mbi zia lani kusala ti mbi ti ngoi kue, me a sara mbi nzoni pëpe. Mbi tene na bê ti mbi so tongana fade mabe ti mbi ayeke kota, ka mbi yeke ngbâ na yâ kusala so. Me na ngoi so mbi diko tongana nyen Ita Jennings azia mbeni kusala ti bâ lege ti kobela ti lo, a mû maboko na mbi ti bâ dutingo ti mbi ni na nzoni lê. A yeke tâ kiringo tënë na sambela ti mbi!”

Legeoko nga, mbeni ita-koli asû na mbeti, lo tene: “Mbi sara kua ti ancien teti ngu bale-oko. Me na pekoni mbi zia ni ngbanga ti so mbeni kobela ti li asara mbi. Na ye so asara si mbi bâ so mbi sara ye oko ti nzoni pëpe. Na tongana mbi diko mbaï ti aita so asara aye ti nzoni mingi na yâ kusala ti Jéhovah, vundu ayeke sara mbi mingi. Me gbungo ngangu ti Ita Jennings akpengba mbi. Mbi diko article so fani mingi.”

Gue na li ni na mbeto pëpe

Legeoko tongana Ita Ombeva na Ita Jennings, aTémoin ti Jéhovah mingi angbâ lakue ti sara na Jéhovah Nzapa na mbeto pëpe atâa aye ti ngangu so asi na ala. Tongana mo yeke na yâ ti mara dutingo tongaso, e gonda mo. Hinga so ‘Nzapa ayeke kirikiri pëpe si Lo lingbi girisa kusala ti mo, ndoye so mo fa giriri teti iri ti Lo, teti mo sara kusala teti azo ti be-vulu, na mo de ti sara tongaso’.​—aHébreu 6:10.

Jéhovah amû lani maboko na awakua be-ta-zo ti lo ti giriri ti hon ndo ti awato ti ala. Legeoko nga, lo lingbi ti mû maboko na mo ti hon ndo ti akpale kue so mo lingbi ti wara. Tongaso, mû na bê kue atënë so Jéhovah atene na lege ti prophète Esaïe, so Lo tene: “Zia mbeto asara mo pëpe teti Mbi yeke na mo; na zia ye ayengi mo pëpe, teti Mbi yeke Nzapa ti mo; fade Mbi sara si mo kpengba; biani, fade Mbi sara na mo; biani, fade Mbi bata mo na tïtî Mbi ti koti ti mbilimbili.”​—Esaïe 41:10.

[Akete tënë na gbe ni]

[Afoto na lembeti 16]

Tongana Stanley Ombeva (na nduzu) na Herbert Jennings (na gbe ni), aita mingi ayeke sara na Jéhovah na mbeto pëpe

[Lingu ti foto na lembeti 14]

USAF photo