Atënë so azo ahunda

Nyen la ayeke sara si ‘aye ti nzoni mingi’ ti amara kue aga na yâ “da” so a yeke voro tâ Nzapa dä?​—Aggée 2:7.

Na lege ti prophète Aggée, Jéhovah afa tënë ti ye so ayeke si ande, lo tene: “Mbi yengi amara kue, na fade ala ga na [aye] ti nzoni mingi ti ala, na fade Mbi sara si da so a si na gloire.” (Aggée 2:7). E hunda tere ti e: A yeke ngbanga ti so a yengi “amara kue” la si ‘aye ti nzoni mingi’ ti ala ni, so ti tene azo kue ti nzoni bê, ayeke ga ti voro tâ Nzapa? Kiringo tënë ni ayeke ên-ën.

Zia e bâ nyen la ayengi amara ni na ye so asi na pekoni. Bible atene so “amara asara wuluwulu” na “azo abi bê ti ala na ye senge senge”. (Psaume 2:1). “Ye senge senge” so azo ni ayeke ‘bi bê ti ala’ dä ayeke ti ngbâ lakue ti bata komandema ti ala mveni na ndo ti azo. Ti mä so a gue ti zi komandema na maboko ti ala ande ayeke mbeni tënë so ayengi ala mingi ahon tanga ti aye kue so agi ti kinda komandema ti ala.

Kusala ti aTémoin ti Jéhovah ti fa na ndo ti sese mobimba tënë na ndo ti Royaume ti Nzapa so a to nda ti kusala ti lo awe ayeke biani kusala so ayengi amara. Teti biani, Royaume so Nzapa azia Jésus Christ mokonzi ni ayeke ga ti ‘fâ aroyaume ti azo so kue nduru nduru, na ti sara si aroyaume nde nde so kue awe’. (Daniel 2:44). Tënë ti ngbanga so e yeke fa na lege ti kusala ti e ti fango tënë ayeke yengi ndo na popo ti amara (Esaïe 61:2). Na ngoi so fango tënë ni angbâ gi ti gue na li ni mingi na ti ga ngangu, yengingo ndo ni na popo ti amara akiri aga ngangu mingi ahon ti kozo. Yengingo amara ni so Aggée 2:7 asara tënë ni aye ti fa nyen?

Na Aggée 2:6, e diko tënë so: “L’Eternel Ti Sabaoth atene tongaso, A ngbâ lâ mingi pëpe, fade Mbi yengi ayayu na sese, kota ngu ti ingo na kuru sese.” Bazengele Paul akiri afa lani peko ti atënë ti versê so, lo tene: “Lo zê ndo awe, Lo tene, Fade Mbi sara mbeni lege oko si gi sese ayengi pëpe, me yayu nga. Na tënë so, Mbeni lege oko, afa na e fade Lo lungula ye so ayengi, so atene, ye so Lo sara awe, si ye so ayengi pëpe [Royaume ti Nzapa] alingbi ngbâ.” (aHébreu 12:26, 27). Biani, a yeke ga ti futi bungbi ti aye ti fadeso kue ti zia na place ni fini sese ti Nzapa.

Biani, azo ti nzoni bê ayeke ga ti voro tâ Nzapa, me a yeke pëpe ngbanga ti so a yengi amara la si azo so ayeke ga. Oko ye so asara si ala yeke ga na mbage ti Jéhovah na bungbi ti lo ayeke gi oko ye so ayeke yengi amara. Ye ni so ayeke fango tënë ti Royaume ti Nzapa so ato nda ti kusala ti lo awe na yayu. “Tene-nzoni ti lakue lakue” so a yeke fa ni ayeke gboto azo so aye tënë ni na bê ti ala si ala ga ti voro tâ Nzapa.​—Apocalypse 14:6, 7.

Tënë ti Royaume so e yeke fa ayeke tënë ti fango ngbanga nga tënë ti salut (Esaïe 61:1, 2). Tongaso, aye so aga na peko ti fango tënë so ayeke use: oko ni, a yeke yengi amara; use ni, a yeke sara si aye ti nzoni mingi ti amara ni aga ndali ti gloire ti Jéhovah.