Atënë so azo ahunda

Na yâ Ndia ti Moïse, ngbanga ti nyen a bâ ambeni ye so ayeke na lege ni so andu tere ti koli wala wali tongana ye so asara si zo “aga sioni”?

Nzapa asara tere ti koli na ti wali ti tene ala dü amolenge nga ti tene ala so asara mariage awe awara ngia na popo ti ala (Genèse 1:28; aProverbe 5:15-18). Ye oko, na chapitre 12 na 15 ti Lévitique, e wara andia so afa polele aye so asara si zo aga sioni: yurungo ngu ti tere ti koli, bango yâ ti wali nga na dungo molenge (Lévitique 12:1-6; 15:16-24). Andia so a mû na Israël ti giriri asara si ala duti na nzoni seni, nzoni tambela, ala bâ mênë tongana ye so ayeke nzoni-kue nga ala bâ nene ti lungula siokpari.

Aye so Ndia ti Moïse ahunda na ndo ti akusala ti tere ti koli na wali asara nga si azo ti Israël aduti na nzoni seni. Mbeni buku (The Bible and Modern Medicine) atene: “Kpengo ndia so ake na koli ti bungbi na wali ti lo na ngoi so lo yeke bâ yâ ti lo akanga lege na ambeni kobela ti koli na wali . . . nga a kanga lege ngangu na kobela ti cancer ti sara da ti molenge ti wali ni.” Andia tongaso abata azo ti Nzapa na akobela so azo ahinga ni na lâ ni kâ pëpe wala so ala wara lege ti gi nda ni pëpe. Batango tere ti koli na ti wali nzoni asara si mara ni adü amolenge mingi, ye so ague oko na zendo so Nzapa amû na ala ti tene ala wu mingi na aye ti ala amaï (Genèse 15:5; 22:17). Andia tongaso asara nga si bê ti azo ti Nzapa aduti nzoni. Na batango andia so, akoli na awali amanda ti kanga nzara ti tere ti ala.

Aye nde nde so andu tere ti koli wala wali alingbi ti sara si zo aga sioni. Me kota tënë ti yâ ni kue ayeke so zo aga sioni na lege ti bango yâ ti lo wala na lege ti mênë so ayuru na tere ti lo. Andia ti Jéhovah na ndo mênë ayeke ti fa na azo ti Israël so mênë ayeke gi nzoni-kue pëpe, me nga a yeke na kota ndo mingi na yâ vorongo ti Jéhovah, mbilimbili na ndo tënë ti asandaga nga na lungulango siokpari.​—Lévitique 17:11; Deutéronome 12:23, 24, 27.

Tongaso, aye nde nde so Ndia ahunda na ndo tënë so andu mingi dutingo mbilimbili-kue pëpe ti zo. Azo ti Israël ahinga so na peko ti siokpari ti Adam na Eve, ala lingbi pëpe ti dü amolenge so ayeke mbilimbili-kue. Amolenge ti ala kue ayeke wara ye ti peko ti siokpari so a dü ala na ni: dutingo mbilimbili-kue pëpe na kui (aRomain 5:12). A yeke ndali ni si zo alingbi ti dü gi amolenge so ayeke mbilimbili-kue pëpe nga na siokpari, atâa so na tongo nda ni a sara tere ti koli na wali ti tene, na yâ ti mariage, ala dü amolenge so ayeke mbilimbili-kue.

Tongaso aye so Ndia ahunda na azo ti Israël ti sara si ala ga nzoni ayeke dabe ti ala so adü ala gi pëpe na yâ siokpari, me nga so ala yeke na bezoin ti wara mbeni sandaga so ayeke na ngangu ti lungula siokpari na ti sara si azo akiri aduti mbilimbili-kue. Biani, anyama so ala mû na sandaga asara ye so pëpe (aHébreu 10:3, 4). Nda ti Ndia ti Moïse ayeke ti fa lege na ala ti si na Christ na ti mû maboko na ala ti hinga so a yeke gi na lege ti sandaga ti fini ti Jésus so ayeke mbilimbili-kue si zo alingbi ti wara pardon biani, ye so azi lege na abe-ta-zo ti wara fini ti lakue lakue.​—aGalate 3:24; aHébreu 9:13, 14.