Mo dabe mo na ni?

Dikongo anumero ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Tongana ti so a fa ni kozoni na Psaume 72:12, tongana nyen fade Jésus ‘asö zo so ye amanke lo mingi’?

Na ngoi ti lengo gbia ti lo, fade fango ngbanga ti mbilimbili aduti teti azo kue. Fade petengo goro ayeke dä pëpe. Mingi ni, nzinga ayeke ga ndali ti bira, me fade Christ aga na siriri na ndo sese. Lo yeke sara be-nzoni na azo na fade lo bungbi ala ti tene ala kue aduti beoko, na lo yeke bâ si kobe aduti dä alingbi na azo kue (Psaume 72:4-16).​—1/5, lembeti 7.

• Tongana nyen e aChrétien e lingbi ti fa so e yeke sara ka tënë “na mbeto pëpe”? (1 Timothée 3:13; Philémon 8; aHébreu 4:16).

E lingbi ti sara ni na fango tënë na wâ nga na mbeto pëpe. Na lege ti fango ye na azo, dutingo nduru ti mû anzoni wango na ala nga na fango tënë ti bê ti e polele na Nzapa na yâ sambela. E lingbi ti hinga na bê ti e kue so ande lo yeke mä e nga lo yeke kiri tënë na e.​—15/5, lembeti 14-16.

• Na yâ Ndia ti Moïse, ngbanga ti nyen a bâ ambeni ye so ayeke na lege ni so andu tere ti koli wala wali tongana ye so asara si zo ‘aga sioni’?

Andia ni afa aye so asara si zo aga sioni: yurungo ngu ti tere ti koli, bango yâ ti wali na dungo molenge. Andia ni so asara si zo aduti na seni, na nzoni tambela, a bâ mênë tongana ye so ayeke nzoni-kue na a fa nga nene ti lungulango siokpari.​—1/6, lembeti 31.

• Tongana zo aye ti wara tâ ngia, ngbanga ti nyen a yeke nzoni lo diko mbeti ti Psaume?

Awasungo apsaume ni ahinga so tongana zo ayeke na nzoni songo na Nzapa, lo yeke wara tâ ngia biani (Psaume 112:1). Ala tene so ngia so zo ayeke wara ndali ti so lo yeke na popo ti “azo so L’Eternel [“Jéhovah”, NW ] ayeke Nzapa ti ala” ahon ngia so lo lingbi ti wara na lege ti sarango songo na amba ti lo, na lege ti dutingo na mosoro nga na aye so lo mveni lo sara (Psaume 144:15).​—15/6, lembeti 12.

• Songo wa azo ti Israël ti giriri alï na yâ ni na Jéhovah?

Na ngu 1513 kozo na Christ, Jéhovah aga na azo ti Israël na yâ ti mbeni fini songo na lo, lo te mbele na ala (Exode 19:5, 6; 24:7). Na pekoni, a dü amolenge ti azo ti Israël tongana amembre ti mara so Nzapa asoro, mara so amû tere na lo. Ye oko, a yeke ti zo oko oko ti mû desizion ti sara na Nzapa.​—1/7, lembeti 21-22.

• Ngbanga ti nyen a lingbi e sara ye kue na “demango tere” oko pëpe? (aPhilippien 2:14).

Mingi ti atapande na yâ ti Bible afa so demango tere wala kasango ndo asara sioni mingi na awakua ti Nzapa. A yeke nzoni e gbu li ti e na ndo ye ti sioni so kasango ndo ayeke ga na ni yeke yeke laso. E azo, so e yeke mbilimbili-kue pëpe, e yeke nduru ti kasa ndo. Ni la, a lingbi lê ti e akpengba ti bâ wala e yeke nduru ti kasa ndo nga e kpe ni.​—15/7, lembeti 16-17.

• E hinga tongana nyen so ndara so a sara tënë ni na aProverbe 8:22-31 ayeke gi senge ndara pëpe?

Ndara ni so, a tene ‘a yä lo giriri’, wala a créé lo, tongana komansema ti kusala ti Jéhovah. Lakue Nzapa ayeke dä na lakue lo yeke na ndara; a créé ndara ti lo crééngo pëpe. A-Proverbe 8:22-31 atene so ndara ni ayeke giriri na tere ti Nzapa tongana “wakode.” Tënë so abâ biani Jésus so asara kua nduru mingi na Nzapa na yâ lekengo tanga ti aye kue (aColossien 1:17; Apocalypse 3:14).​—1/8, lembeti 31.