“I fa na Nzapa ye so i ye”

“Na yâ ye kue i fa na Nzapa ye so i ye, na lege ti sambela na ti hunda mingi na tënë ti merci.”​—APHILIPPIEN 4:6.

TONGANA mo hunda ti bâ gbia ti kodoro ti mo, a yeke kiri tënë na mo tongana nyen? Peut-être azo ti tere ti lo alingbi ti kiri sioni tënë na mo pëpe, me a yeke ngangu ti tene ala yeda na mo ti bâ gbia ni. Ye oko, ti Jéhovah Nzapa, Kota Gbia na Gbia ti dunia kue, a yeke tongaso pëpe. Na ndo kue so e yeke dä e lingbi ti ga nduru na lo na ngoi kue so e ye. Lakue lo yeke mä asambela so ayeke nzoni (aProverbe 15:29). So ayeke biani tâ nzoni ye! A lingbi bê ti singila so e yeke na ni teti ye so apusu e ti sambela lakue Lo so a iri lo tâ na lege ni “Mo so Mo mä sambela”, ni la pëpe?​—Psaume 65:3.

² Ye oko, mbeni zo alingbi ti hunda tere ti lo: “Asambela wa si Nzapa ayeke mä?” Bible afa na e mbeni kpengba ye so a hunda ti duti na ni ti tene lo mä asambela ti e, a tene: “Tongana mabe ayeke pëpe, zo alingbi ga nzoni na lê ti Nzapa pëpe; teti zo so aga na Nzapa, a yeke ngbanga ti lo ti mä na bê so Nzapa ayeke, na Lo yeke Zo ti futa ye na ala so agi Lo.” (aHébreu 11:6). Biani, tongana ti so kozo article ni afa, ti tene zo aga nduru na Nzapa mabe ayeke mbeni kpengba ye. Nzapa ayeke nduru ti mä asambela ti azo so ayeke ga nduru na lo, me a lingbi ala sambela lo na mabe so ague oko na anzo kusala nga na bê ti ala kue.

³ Bazengele Paul awa aChrétien ti ngoi ti lo, lo tene: “I gi bê ti i na ye oko pëpe; me na yâ ye kue i fa na Nzapa ye so i ye, na lege ti sambela na ti hunda mingi na tënë ti merci.” (aPhilippien 4:6, 7). A yeke wara na yâ ti Bible tapande ti azo mingi so afa na Nzapa atënë so agbu bê ti ala. Na popo ti azo so mo yeke wara Anne, Elie, Ezéchias nga na Daniel (1 Samuel 2:1-10; 1 aGbia 18:36, 37; 2 aGbia 19:15-19; Daniel 9:3-21). A lingbi e mû tapande ti ala. Bâ nga so tënë ti Paul so ayeke na nduzu ge afa na e so yâ ti asambela ayeke mingi. Lo fa tënë ti merci, so ayeke sambela ti fa bê ti kiri singila teti ye so Nzapa asara na e. A lingbi nga ti wara tënë ti sepela Nzapa na yâ ni. Ti hunda mingi aye ti tene ti sambela Nzapa na tâ be-ti-molenge na ti voro tere na lo. Nga e lingbi ti fa na Nzapa ye so e ye, wala ti hunda mbeni mbilimbili ye so e ye ti wara (Luc 11:2, 3). Babâ ti e ti yayu ayeke na ngia ti mä e tongana e ga nduru na lo na lege ti asambela nde nde so a fa ge.

⁴ Ambeni zo alingbi ti hunda: ‘Jéhovah ahinga kozoni awe aye so e yeke na bezoin ni pëpe?’ Biani, lo hinga ni (Matthieu 6:8, 32). Tongaso, ngbanga ti nyen lo ye ti tene e fa na lo tënë ti aye so e ye? Bâ tapande so: mbeni wadengo buze ayeke kangbi cadeau na aclient ti lo. Ye oko, ti wara cadeau ni, a lingbi aclient ni aga ahunda ni si. Ala so aye ti sara ngangu ti gue ti hunda ni pëpe ayeke fa biani so ala ye ti wara cadeau ni pëpe. Legeoko nga, tongana e ye pëpe ti fa na Nzapa na yâ sambela aye so e ye, a fa so e bâ na nene ni pëpe aye so Jéhovah ayeke mû na e. Jésus atene: “I hunda, na fade i wara.” (Jean 16:24). Na sarango tongaso, e yeke fa so e zia bê ti e kue na Nzapa.

Tongana nyen ti ga nduru na Nzapa?

⁵ Na ndo tënë ti sambela, Jéhovah azia na sese pëpe gbâ ti andia so akpengba mingi. Ye oko, a lingbi e hinga mbilimbili lege so Bible afa ti ga nduru na Nzapa. Na tapande, Jésus afa lani na adisciple ti lo, lo tene: ‘Tongana i hunda mbeni ye na tïtî Babâ, fade Lo mû ye so na i na iri ti Mbi.’ (Jean 16:23). Tongaso, a hunda na e ti sambela Nzapa na iri ti Jésus, na hingango so gi Jésus si ayeke oko zo so na lege ti lo Nzapa airi deba nzoni na ndo azo kue.

⁶ A lingbi e luti tongana nyen na ngoi so e yeke sambela? Bible afa na e pëpe mbeni mbilimbili lege so a lingbi e luti na ni ti tene Nzapa amä sambela ti e (1 aGbia 8:22; Néhémie 8:6; Marc 11:25; Luc 22:41). Kota ye ni ayeke ti sambela Nzapa na bê ti e kue.​—Joël 2:12, 13.

⁷ Ka tongana zo atene “amen” a yeke tongana nyen? Bible afa so a yeke lakue na lege ni ti hunzi sambela so e yeke tene na gbele azo kue na tenengo Amen (Psaume 72:19; 89:53). Tënë na yanga ti Hébreu ʼa·menʹ nda ni aye ti tene “ni la”. Mbeni bakari, (Cyclopedia) ti aPakara McClintock na Strong, afa so tënë “Amen” so a yeke tene ka na hunzingo ti asambela, nda ni aye ti tene “zia a duti gi tongana ti so a tene, zia a si tongaso biani.” Tongaso, tongana mbeni zo asambela na lo hunzi sambela ni na tenengo “Amen” na bê ti lo kue, lo fa na gigi so lo mû na nene ni tënë so lo londo ti tene. Tongana mbeni ita ayeke sambela na iri ti kongregation na lo tene na nda ni “Amen,” ala so amä sambela ni alingbi nga ti tene “Amen” na yâ ti bê ti ala wala na kota go ti fa so ala yeda na tënë so a londo ti tene.​—1 aCorinthien 14:16.

⁸ Na ambeni ngoi Nzapa azia lege na e ti fa na gigi so tënë so e fa na lo na yâ sambela agbu bê ti e biani. Peut-être a hunda na e ti sara ye tongana Jacob giriri, so atiri na mbeni ange alondo na bï juska ndapre, ti tene ange ni airi tënë nzoni na ndo lo (Genèse 32:24-26). Wala ambeni ye so asi alingbi ti hunda na e ti duti tongana Abraham, so asambela Jéhovah fani mingi ndali ti Lot nga ndali ti azo ti mbilimbili so peut-être ayeke lani na Sodome (Genèse 18:22-33). Legeoko nga, ndali ti mbilimbili, nzobe na grâce ti Jéhovah, e lingbi ti toto na lo tënë ti aye so ayeke kota ye na lê ti e.

E lingbi ti hunda ye wa?

⁹ Girisa pëpe so Paul atene lani: ‘Na yâ ye kue i fa na Nzapa ye so i ye.’ (aPhilippien 4:6). Ni la, na yâ asambela ti e mveni, e lingbi même ti sara tënë ti aye kue so andu fini ti e. Ye oko, kozo ye so a lingbi a gbu bê ti e na yâ sambela ti e ayeke aye so bê ti Jéhovah aye. Na ndo tënë so, Daniel azia na e mbeni pendere tapande. Na ngoi so azo ti Israël ayeke hu pono ndali ti siokpari ti ala, Daniel atoto na Jéhovah ti fa be-nzoni na ala, lo tene: “Teti iri ti Mo mveni, Mo ku pëpe, O Nzapa ti mbi, teti a di iri ti Mo.” (Daniel 9:15-19). Asambela ti e ayeke fa nga so e ye kozoni kue ti tene iri ti Jéhovah aga nzoni-kue nga ti tene a sara ye so bê ti lo aye?

¹⁰ Ye oko, a yeke nga na lege ni ti hunda aye so abâ e mveni. Na tapande ti wasungo psaume, e lingbi ti sambela ti tene e gbu nda ti tënë ti Nzapa nzoni. Lo sambela lo tene: “Mû na mbi ndara ti hinga nda ti tënë, na fade mbi bata Ndia ti Mo; biani, fade mbi bata Ndia ni na bê ti mbi kue.” (Psaume 119:33, 34; aColossien 1:9, 10). Jésus ‘asambela na Lo hunda mingi na totongo ngangu na ngule, Lo sambela Nzapa so alingbi sö Lo na yâ kui.’ (aHébreu 5:7). Na sarango tongaso, lo fa so a yeke na lege ni ti hunda ngangu ti Nzapa na ngoi so e yeke na gbele akpale wala atara. Tongana lo yeke fa tapande ti sambela na adisciple ti lo, Jésus azia na yâ ni atënë ti ye so ayeke gbu bê ti zo, tongana pardon ti siokpari na kobe ti lâ oko oko.

¹¹ Na yâ ti sambela so lo fa tongana tapande, Jésus azia tënë ti hundango ye so dä: “Mo zia e tï na yâ handa pëpe, me Mo zi e na tïtî wato-sioni.” (Matthieu 6:9-13). Na pekoni lo mû wango so: “I bata, i sambela, si i tï na handa pëpe; teti yingo aye biani, me mitele ayeke na ngangu pëpe.” (Matthieu 26:41). A yeke kota ye ti sambela tongana e yeke na yâ ti atara. Na ekole wala na ndo ti kusala, bê ti e alingbi ti pusu e ti girisa andia ti Bible. Azo so ayeke aTémoin pëpe alingbi ti hunda na e ti bungbi oko na ala na yâ ti ambeni ye so ayeke nzoni pëpe na lê ti Chrétien. Peut-être a lingbi ti hunda na e ti sara mbeni ye so adoro ndia ti Bible. Na angoi tongaso, a yeke nzoni ti tene e mû peko ti wango ti Jésus na ndo sambela na e hunda Nzapa ti mû maboko na e si e tï na yâ tara pëpe. A yeke nzoni e sambela kozoni na tara ni nga na ngoi so e yeke na yâ ti tara ni.

¹² Agingo bê na ambeni ye nde nde ayeke sara ngangu na ndo ti awakua ti Nzapa laso. Kobela na aye so amû vundu ayeke sara si azo agi bê ti ala mingi. Sarango ye ti ngangu so amû ndo kue asara si gigi ni amû mbeto na zo. Kpale ti warango nginza asara si a yeke ngangu mingi ti wara kobe ti yanga. A yeke ye ti dengo bê ti hinga so Jéhovah ayeke dengi mê ti mä awakua ti lo so ayeke fa na lo atënë so! Psaume 102:18 atene na ndo Jéhovah: “Lo mä sambela ti ala so ye amanke ala mingi, na Lo ke sambela ti ala pëpe.”

¹³ Biani, a yeke nzoni ti fa na yâ sambela atënë kue so andu kusala ti e wala songo ti e na Jéhovah (1 Jean 5:14). Tongana a hunda mo ti mû mbeni desizion so andu tënë ti mariage wala kua ti nginza wala ti kono yâ ti kusala ti mo ti fango tënë, duti nduru ti fa ni na Nzapa, na hunda lo ti fa lege na mo. Na tapande, na kodoro ti Philippines, mbeni wali ayeke na nzara ti sara kusala ti fango tënë na ngoi kue. Ye oko, lo yeke sara kua ti nginza pëpe. Lo tene: “Mbeni samedi, mbi sambela Jéhovah gi na ndo tënë ti kusala ti pionnier. Na pekoni, gi na yâ ti oko lango ni, tongana mbi yeke na fango tënë, mbi fa mbeni buku na mbeni maseka-wali. Gi tongaso, maseka ni atene na mbi: ‘A lingbi mo gue hio na ekole ti mbi na lundi na ndapre.’ Mbi hunda lo, mbi tene: ‘Ngbanga ti nyen?’ Lo tene na mbi so mbeni kua ayeke dä so a yeke gi zo gingo ndali ni. Mbi gue, na fade fade a mû mbi na kua ni. Ye ni kue asi gi hio tongaso.” Na ndo sese kue, mara ti aye tongaso asi na aTémoin ti Jéhovah mingi. Tongaso, duti nduru ti fa na yâ sambela ti mo na Nzapa aye so mo ye!

Ka tongana e sara siokpari?

¹⁴ Tongana nyen sambela alingbi ti mû maboko na mbeni zo tongana lo sara siokpari? Teti so kamene asara ala, ambeni zo so asara siokpari aye ti sambela pëpe. Ye oko, sarango tongaso ayeke lege ti ndara pëpe. Zia e mû mbeni tapande: Tongana mo girisa lege na yâ ti mbeni vaka, a yeke nzoni mo hunda azo so ahinga ndo ni nzoni ti fa lege na mo. Ye oko, nyen ayeke si tongana mo sara kamene ti hunda azo ni? Biani mo yeke si na ndo so mo ye ti gue dä pëpe! Legeoko nga, zo so asara siokpari na so kamene asara lo ti sambela Nzapa, kpale ti lo ni ayeke gue gi na li ni. Zia kamene ti siokpari so e sara akanga lege na e pëpe ti sambela Jéhovah. Biani, Nzapa atisa ala so asara kota siokpari ti sambela lo. Prophète Esaïe awa lani awasiokpari ti ngoi ti lo ti sambela Jéhovah, teti fade ‘lo pardone na ala kue.’ (Esaïe 55:6, 7). Ti tâ tënë ni, mbeni zo so asara siokpari a lingbi lo gi ‘ti ga nzoni na lê ti Jéhovah’ na lege so lo leke bê ti lo kozoni, lo ke sioni lege ti lo ni, na lo gbian bê ti lo biani.​—Psaume 119:58; Daniel 9:13.

¹⁵ Mbeni raison ayeke dä so a lingbi zo so asara siokpari angbâ ti sambela. Disciple Jacques asara tënë so na ndo mbeni zo so ayeke na bezoin ti wara mungo maboko na lege ti yingo: “A lingbi lo iri a-ancien ti [kongregation], na a lingbi ala sambela na tere ti lo, . . . na fade Seigneur ayä lo.” (Jacques 5:14, 15). Biani, a lingbi mbeni zo so asara siokpari afa tënë ti siokpari ni lo mveni na Jéhovah na yâ sambela, me lo lingbi nga ti hunda a-ancien ti sambela ngbanga ti lo. Ye so ayeke mû ande maboko na lo ti ga nzoni na lege ti yingo.

Kiringo tënë na asambela

¹⁶ Tongana nyen a yeke kiri tënë na asambela? Ti ambeni sambela ni, a lingbi ti kiri tënë dä hio na a lingbi ti bâ ye ti pekoni polele (2 aGbia 20:1-6). Ti ambeni a lingbi ti ninga, na a yeke ngangu kete ti bâ ye ti pekoni. Tongana ti so asigigi na yâ parabole ti Jésus na ndo wali womua so ague fani mingi ti bâ mbeni juge, ngoi na ngoi e lingbi ti sambela Nzapa fani mingi ngbanga ti mbeni ye (Luc 18:1-8). Ye oko, e lingbi ti hinga biani so tongana sambela ti e ague legeoko na ye so bê ti Jéhovah aye, lo lingbi lâ oko pëpe ti tene na e: “Zia mbi kpô.”​—Luc 11:5-9, Fini Mbuki, 2001.

¹⁷ Fani mingi azo ti Jéhovah abâ so a kiri tënë na sambela ti ala. A yeke bâ ni mingi na yâ ti kusala ti e ti fango tënë. Na tapande, lani na kodoro ti Philippines, aita-wali use ayeke kangbi ambeti ti nzapa na mbeni kete kodoro. Tongana ala mû tract na mbeni wali, lê ti wali ni asi na ngule. Lo tene: “Biri na bï mbi sambela Nzapa ti tene lo tokua na mbi mbeni zo ti manda Bible na mbi, na mbi hinga so a yeke kiringo tënë na sambela ti mbi ni la.” Kete na pekoni, wali ni ato nda ti gue na abungbi na Da ti Royaume. Na mbeni kodoro ti Asie ti Mbongo-to, mbeni ita-koli ayeke gi bê ti lo ndali ti fango tënë na yâ ti akota ndo ti lango so zo ayeke lï dä kirikiri pëpe. Me, lo sambela Jéhovah, lo zi mbeto na bê ti lo, na lo lï na yâ ti ando ni so. Lo pika mbeni yanga-da, na mbeni wali asigigi. Tongana ita ni afa na lo nda ni so lo ga na yanga-da ti lo, wali ni ato nda ti toto. Lo tene so ni yeke gi aTémoin ti Jéhovah na ni sambela Nzapa ti tene ni wara ala. Na ngia ita-koli ni amû maboko na lo ti tingbi na aTémoin ti Jéhovah ti kongregation ti ndo so lo yeke dä.

¹⁸ Sambela ayeke biani mbeni pendere ye so Nzapa amû na e. Jéhovah ayeke nduru ti dengi mê na ti kiri tënë na asambela ti e (Esaïe 30:18, 19). Me, a lingbi e zi lê ti e ti hinga lege so lo yeke kiri tënë na asambela ti e. Lo lingbi ti kiri tënë lakue pëpe na asambela ti e tongana ti so e ku ni. Ye oko, tongana e bâ so lo yeke fa lege na e, a yeke nzoni e girisa lâ oko pëpe ti kiri singila nga ti sepela lo (1 aThessalonicien 5:18). Na ndo ni, zia e dabe ti e lakue na wango ti bazengele Paul so: “Na yâ ye kue i fa na Nzapa ye so i ye, na lege ti sambela na ti hunda mingi na tënë ti merci.” Biani, zia e gbu alege kue so ayeke zi na e ti sara tënë na Nzapa. Tongaso, fade e ngbâ lakue ti bâ gango tâ tënë ti tënë so Paul afa lani na ndo ala so Nzapa akiri tënë na asambela ti ala: “Fade siriri ti Nzapa so ahon bibe kue abata bê ti i na abata bibe ti i.”​—aPhilippien 4:6, 7.

Fade mo kiri tënë tongana nyen?

• Asambela nde nde wa e lingbi ti tene?

• A yeke nzoni e sambela Nzapa tongana nyen?

• Aye wa e lingbi ti sara tënë ni na yâ ti asambela ti e?

• Sambela alingbi ti sara nyen tongana zo asara siokpari?

[Ahundango tënë ti manda na ye]

1. E yeke na matabisi ti sara tënë na zo wa? Ngbanga ti nyen ye so ayeke ye ti dongo bê?

2. A hunda nyen ti tene Nzapa amä asambela ti e?

3. (a) Na tapande ti abe-ta-zo ti giriri, mara ti atënë wa e lingbi ti zia na yâ ti asambela ti e? (b) Asambela nde nde wa e lingbi ti tene?

4. Atâa so Jéhovah ahinga awe aye so e yeke na bezoin ni, ngbanga ti nyen ti fa ni na lo?

5. Ngbanga ti nyen a lingbi e sambela na iri ti Jésus?

6. Na ngoi so e yeke sambela, a lingbi e luti tongana nyen?

7. (a) Nda ti tënë “amen” ayeke nyen? (b) Nzoni lege ti tene ni ayeke so wa?

8. Na lege wa ambeni sambela ti e ayeke kpa ti Jacob wala Abraham? Na asambela ni ayeke fa nyen na ndo ti e?

9. Tongana e yeke sambela, a lingbi tënë wa agbu bê ti e mingi?

10. E hinga tongana nyen so a yeke na lege ni ti sambela ndali ti aye so agbu bê ti e?

11. Na lege wa sambela alingbi ti mû maboko na e ti tï na yâ ti tara pëpe?

12. Aye ti gingo bê wa alingbi ti pusu e ti sambela? E yeke ku Jéhovah ti sara nyen?

13. (a) Atënë wa a yeke nzoni zo afa na yâ sambela ti lo na Nzapa? (b) Fa mbeni tapande ti mara ti sambela tongaso.

14, 15. (a) Ngbanga ti nyen même mbeni zo so asara siokpari a lingbi lo gbanzi tere ti lo pëpe ti sambela? (b) Na ndo ti asambela ti e mveni, ye wa alingbi ti mû maboko na mbeni zo so asara siokpari ti ga nzoni na lege ti yingo?

16, 17. (a) Tongana nyen Jéhovah akiri tënë na asambela? (b) Atapande wa afa so sambela ague oko na kusala ti fango tënë?

18. (a) Tongana Nzapa akiri tënë na asambela ti e, a lingbi e sara ye tongana nyen? (b) Tongana e gbu alege kue ti sambela, fade tënë wa alingbi ti dë bê ti e?

[Afoto na lembeti 29]

Asambela so alondo na bê ti e ayeke bata e si e tï na yâ tara pëpe

[Afoto na lembeti 31]

Na yâ sambela, e yeke fa na Nzapa singila ti bê ti e, atënë so agbu bê ti e nga ye so e ye