Ngbanga ti nyen ti hinga zo so ayeke Wato-ti-Christ?
Bazengele Jean asû tënë so na mbeti giriri: “I mä giriri so wato-ti-Christ ayeke ga.” (1 Jean 2:18). Tënë so agbu bê ti azo mingi! Teti angu mingi, azo agbu li ti ala ti hinga nda ti tënë so. Wato-ti-Christ ayeke zo wa? Lawa si lo yeke ga? Lo yeke sara ande nyen tongana lo ga?
AZO so a iri ala wato-ti-Christ ayeke mingi. Giriri a iri aJuif, apape ti aCatholique nga na atogbia ti Rome “wato-ti-Christ”. Na tapande, tongana Togbia Frédéric ti Use ni (1194-1250) asoro pëpe ti mû mbage na yâ bira ti Eglize, Pape Grégoire ti Gumbaya ni azia iri ti wato-ti-Christ na li ti lo na atomba lo na yâ ti Eglize. Innocent ti Osio ni so aga na peko ti Grégoire akiri atomba Frédéric na yâ ti Eglize. Ye so apusu Frédéric ti zia iri ti wato-ti-Christ na li ti Innocent.
Gi bazengele Jean oko si asara tënë ti “wato-ti-Christ” na yâ ti Bible. Na yâ ti ambeti use so iri ti lo ayeke na ndo ni, a wara tënë wato-ti-Christ wala awato-ti-Christ fani oku. Aversê so a wara tënë wato-ti-Christ na yâ ni ayeke na yâ ti encadré so ayeke na lembeti 4. Aversê so afa so wato-ti-Christ ayeke zo ti mvene na zo ti handa, na lo leke na bê ti lo ti buba songo so zo ayeke na ni na Christ nga na Nzapa. Ni la bazengele Jean awa mingi amba ti lo Chrétien lo tene: “I so mbi ndoye i mingi, i zia bê ti i na tënë ti ayingo kue pëpe, me i tara ayingo ni ti bâ tongana ala yeke ti Nzapa; teti aprophète mingi ti wataka atambela na sese so.”—1 Jean 4:1.
Jésus agboto lani nga mê ti adisciple ti lo ndali ti azo ti handa wala aprophète ti wataka, lo tene: ‘Ala si na i na ala yü poro ti ngasangbaga na tere ti ala; me na bê ti ala, ala yeke a-ikaï ti nzara mingi. Fade i hinga ala na lege ti lengo ti ala.’ (Matthieu 7:15, 16). Jésus agboto nga mê ti adisciple ti lo na ndo zo so a haka lo tongana wato-ti-Christ? Zia e bâ tongana nyen e lingbi ti hinga sioni zo ti handa so.