Mo sara siokpari na tere ti yingo vulu?
“Mbeni siokpari ayeke so alingbi na kui.”—1 JEAN 5:16.
1, 2. E hinga tongana nyen so mbeni Chrétien alingbi ti sara siokpari na tere ti yingo vulu ti Nzapa?
MBENI wali ti kodoro ti Zamani so ayeke mbeni wakua ti Jéhovah atene: “Mbi yeke gi bê ti mbi mingi ti bâ wala siokpari so mbi sara, mbi sara ni na tere ti yingo vulu.” Mbeni Chrétien alingbi ti sara siokpari na tere ti yingo vulu ti Nzapa, wala ngangu so Nzapa ayeke sara na kusala?
2 Biani, mbeni Chrétien alingbi ti sara siokpari na tere ti yingo vulu ti Jéhovah. Jésus Christ atene: “Fade A pardone azo teti siokpari kue na zonga kue; me fade A pardone azo pëpe so azonga Yingo.” (Matthieu 12:31). Bible awa e atene: “Tongana e gue na bê ti e mveni ti sara sioni nda ni e hinga tene-biani awe, sacrifice teti siokpari angbâ mbeni pëpe, me e ku ngbanga na mbeto.” (aHébreu 10:26, 27). Nga, bazengele Jean atene: “Mbeni siokpari ayeke so alingbi na kui.” (1 Jean 5:16). Me, a yeke na zo oko oko so asara kota siokpari ti bâ wala lo sara ‘mbeni siokpari so alingbi na kui’?
A yeke pardone zo so achangé bê ti lo
3. Ye wa e lingbi pëpe ti dë kite na ni tongana e sara kota vundu ndali ti siokpari so e sara?
3 Jéhovah ayeke zo so ayeke fâ ngbanga ti nda ni na ndo ti azo so asara siokpari. Biani, fade e oko oko kue e yeke kiri ande tënë na Nzapa ndali ti aye so e sara, na lo yeke sara lakue ye so ayeke na lege ni (Genèse 18:25; aRomain 14:12). Jéhovah la ayeke bâ wala e sara siokpari so alingbi na pardon pëpe nga lo lingbi ti zi yingo ti lo na ndo ti e (Psaume 51:13). Ye oko, tongana e sara kota vundu ndali ti siokpari so e sara, kite ayeke dä pëpe so e changé bê ti e biani awe. Me, ti tene zo achangé biani bê ti lo aye ti tene nyen?
4. (a) Ti changé bê aye ti tene nyen? (b) Ngbanga ti nyen atënë ti Psaume 103:10-14 ayeke dë bê ti e?
4 Ti changé bê aye ti tene so e changé bango ndo ti e na ndo ti siokpari so e sara awe wala so e ye fade ti sara. A ye ti fa so e yeke na kota vundu ndali ti ye so e sara na e zia lege ti sarango siokpari. Tongana e sara kota siokpari me e sara ye kue so a hunda ti sara ti fa so e changé biani bê ti e, e lingbi ti dë bê ti e na lege ti atënë ti zo ti sungo psaume so atene: “Lo [Jéhovah asara] na e alingbi na siokpari ti e pëpe, na Lo futa e alingbi na sioni ti e pëpe. Legeoko tongana ayayu ayeke yongoro na nduzu na ndo sese, tongaso, nzobe ti Lo ayeke kota mingi teti ala so akpe mbeto ti Lo. Legeoko tongana est ayeke yongoro na ouest, tongaso, Lo lungula kengo-ndia ti e, na Lo zia yongoro. Legeoko tongana babâ asara nzobe na amolenge ti lo, L’Eternel asara nzobe tongaso na ala so akpe mbeto ti Lo. Teti Lo hinga tere ti e, Lo dabe Lo na lege so e yeke pupu-sese.”—Psaume 103:10-14.
5, 6. Fa ngbongboro tënë ti yâ ti 1 Jean 3:19-22, nga fa nda ti atënë ti bazengele Jean.
5 Atënë ti bazengele Jean ayeke dë nga bê ti e. Lo tene: “Na lege so e hinga e yeke ti tene-biani, na e sara si bê ti e aduti nzoni na gbele Lo, teti tongana bê ti e afâ ngbanga na li ti e, Nzapa ayeke kota ahon bê ti e, na Lo hinga ye kue. I so mbi ndoye i mingi, tongana bê ti e afâ ngbanga na li ti e pëpe, e yeke na mbeto na gbele Nzapa pëpe, na ye so e hunda, e wara na tïtî Lo, teti e bata komandema ti Lo, na e sara ye so ayeke nzoni na lê ti Lo.”—1 Jean 3:19-22.
6 E “hinga e yeke ti tene-biani” na lege so e yeke fa so e ndoye aita ti e nga e tï pëpe na yâ ti sarango siokpari (Psaume 119:11). Tongana mbeni raison ayeke dä so apusu e ti fâ ngbanga na ndo ti e, a yeke nzoni e girisa pëpe so “Nzapa ayeke kota ahon bê ti e, na Lo hinga ye kue.” Jéhovah asara nzobe na e ndali ti so lo hinga so e “ndoye aita na tâ ndoye,” e yeke tiri na siokpari nga e yeke sara ngangu ti sara ye so bê ti lo aye (1 Pierre 1:22). Bê ti e ayeke ‘fâ ngbanga na li ti e pëpe’ tongana e zia bê ti e kue na Jéhovah, e fa so e ndoye aita ti e nga e tï pëpe na yâ ti sarango siokpari na mbana. E yeke “na mbeto na gbele Nzapa pëpe” na ngoi so e yeke sambela, nga lo yeke kiri tënë na asambela ti e ndali ti so e yeke sara ye alingbi na akomandema ti lo.
Azo so asara siokpari na tere ti yingo vulu
7. Ye wa amû lege ti hinga wala a lingbi ti pardone mbeni siokpari wala a lingbi pëpe ti pardone ni?
7 Asiokpari wa alingbi na pardon pëpe? Ti kiri tënë na hundango tënë so, zia e bâ ambeni tapande so Bible afa. Atapande so alingbi ti dë bê ti e tongana e changé bê ti e awe me e ngbâ ti sara kota vundu ndali ti kota siokpari so e sara. E yeke bâ ande so mingi ni, a yeke pëpe mara ti siokpari so zo asara si afa wala a lingbi ti pardone lo wala a lingbi ti pardone lo pëpe; nde na so, a yeke ye so apusu lo ti sara ni, ye so ayeke na bê ti lo nga wala lo ye fade mingi ti sara ni.
8. Na lege wa ambeni mokonzi-nzapa ti aJuif ti ngoi ti akozo Chrétien asara siokpari na tere ti yingo vulu?
8 Amokonzi-nzapa ti aJuif ti ngoi ti akozo Chrétien, so na sioni bê agi ti kanga lege na Jésus Christ ayeke sara lani siokpari na tere ti yingo vulu ti Nzapa. Ala bâ so yingo ti Nzapa amû lege na Jésus ti sara amiracle so amû gonda na Jéhovah. Ye oko, awato ti Christ so atene so lo sara aye so na ngangu ti Satan Zabolo. Tongaso, Jésus atene so azo so azonga yingo vulu ti Nzapa ayeke sara siokpari so a lingbi ti pardone ni pëpe “na ngoi so wala na ngoi so ayeke ga.”—Matthieu 12:22-32.
9. Zongango ndo aye ti tene nyen? Jésus atene nyen na ndo ni?
9 Zongango ndo ayeke tenengo asioni tënë na ndo ti mbeni zo ti buba iri ti lo wala ti so bê ti lo. Teti so yingo vulu alondo na Nzapa, ti tene asioni tënë na tere ti yingo vulu ayeke legeoko tongana ti so zo ayeke sara sioni tënë na tere ti Jéhovah. Tongana mbeni zo angbâ ti sara mara ti atënë so na lo changé bê ti lo pëpe, a lingbi ti pardone lo pëpe. Atënë so Jésus atene na ndo ti mara ti siokpari so afa so lo yeke sara tënë ti azo so ake na mbana ti yeda na ye so yingo vulu ti Nzapa ayeke sara. Teti so yingo ti Jéhovah amû ngangu na Jésus ti sara aye nde nde, me azo so agi ti kanga lege na lo atene so lo sara aye so na lege ti ngangu ti Zabolo, ala zonga yingo vulu. Tongaso, Jésus atene: “Zo so azonga Yingo Vulu alingbi wara pardon lâ oko pëpe; me ngbanga ti siokpari ti lakue lakue ayeke na li ti lo.”—Marc 3:20-29.
10. Ngbanga ti nyen Jésus airi Judas “molenge ti futi”?
10 Zia e bâ nga tënë na ndo Judas Iscariote. Lo gi lani ti sara aye ti likisi na lege so lo yeke nzi anginza so a yeke zia na yâ ti sanduku so lo yeke bata ni (Jean 12:5, 6). Na pekoni, Judas ague lo mä tere na amokonzi ti aJuif ti kä Jésus na ala teti nginza ti argent 30. A yeke tâ tënë so Judas abâ so ye so lo sara ayeke na lege ni pëpe, me lo changé bê ti lo lâ oko pëpe ndali ti siokpari so lo sara na mbana. A yeke ndali ni la si a lingbi pëpe ti zingo Judas na kuâ, na tongaso Jésus airi lo “molenge ti futi”.—Jean 17:12; Matthieu 26:14-16.
Azo so asara siokpari pëpe na tere ti yingo vulu
11-13. Na lege wa Gbia David asara asiokpari so andu Bath-Séba? Tongana nyen lege so Nzapa asara ye na mbage ti ala alingbi ti dë bê ti e?
11 Ngoi na ngoi, aChrétien so afa na gigi kota siokpari so ala sara nga so a-ancien amû maboko na ala ti leke songo ti ala na Jéhovah alingbi peut-être ti ngbâ ti gi bê ti ala mingi na ndo siokpari so ala sara awe (Jacques 5:14). Tongana e yeke gi bê ti e mingi tongaso, kite ayeke dä pëpe so e yeke wara ye ti nzoni tongana e bâ ye so Bible atene na ndo ti azo so a pardone asiokpari ti ala awe.
12 Gbia David asara akota siokpari so andu Bath-Séba, wali ti Urie. Tongana David atambela na ndo ti da ti lo na lo bâ pendere wali ti Urie so ayeke sukula ngu, David ahunda si a ga na wali ni na yâ ti da ti lo na lo bungbi na lo. Na pekoni, tongana David amä so Bath-Séba ayeke na ngo, lo leke na mayele si Urie abungbi na wali ti lo ti kanga ndo ti lango-sioni so. Tongana David abâ so ye so lo leke na mayele atï na ngu, lo leke si a fâ Urie na yâ ti bira. Na pekoni, Bath-Séba aga wali ti David nga lo dü na lo mbeni molenge so na pekoni akui.—2 Samuel 11:1-27.
13 Jéhovah abâ lege ti ye so David na Bath-Séba asara. Nzapa apardone David, âmanke lo bâ lege so David achangé na bê ti lo nga na mbele ti Royaume so lo te na lo (2 Samuel 7:11-16; 12:7-14). Âmanke Bath-Séba achangé lani bê ti lo ndali ti so Nzapa asara si lo dü Gbia Salomon nga lo ga oko ti akotara ti Jésus Christ (Matthieu 1:1, 6, 16). Tongana e sara siokpari, a yeke nzoni ti girisa pëpe so Jéhovah ayeke bâ lege so e changé na bê ti e.
14. Tongana nyen lege so Nzapa asara na ye na mbage ti Gbia Manassé afa so lo yeke nduru ti pardone ye mingi?
14 A yeke bâ nga lege so Jéhovah ayeke nduru ti pardone ye mingi na lege so lo sara ye na mbage ti Gbia Manassé ti Juda. Lo sara ye so ayeke sioni mingi na lê ti Jéhovah. Manassé asara abalaga ti Baal, lo voro “ye kue ti yayu” nga lo sara même abalaga ti anzapa ti wataka na yâ ti asedu use ti temple. Lo sara si amolenge ti lo ti koli ahon na yâ ti wâ, lo pusu azo ti sara aye ti yorö nga lo pusu azo ti Juda na ti Jérusalem ti “sara sioni ahon amara so L’Eternel afuti ala na gbele amolenge ti Israël.” Manassé ake ti mä wango so aprophète ti Nzapa amû na lo. Ye ti pekoni ayeke so gbia ti Assyrie amû lani Manassé na ngbâa. Na ngoi so Manassé ayeke na ngbâa, lo changé bê ti lo nga na tâ be-ti-molenge lo sambela Nzapa. Tongaso, Nzapa apardone asiokpari ti Manassé nga lo kiri lo zia lo gbia na Jérusalem, ndo so lo sara si azo avoro Jéhovah na lege ni.—2 Chronique 33:2-17.
15. Ye wa so asi na bazengele Pierre afa so Jéhovah ayeke pardone siokpari “kue” ti zo?
15 Ngu mingi na pekoni, bazengele Pierre asara mbeni kota siokpari na lege so lo tene ni hinga Jésus pëpe (Marc 14:30, 66-72). Ye oko, Jéhovah apardone siokpari ti Pierre “kue.” (Esaïe 55:7). Ndali ti nyen? Ndali ti so Pierre achangé biani bê ti lo (Luc 22:62). Lango 50 na peko ti ye so, Nzapa asara kusala na Pierre na lâ ti Pentecôte ti sara tënë na ndo ti Jésus na mbeto pëpe, na ye so afa polele so Nzapa apardone lo awe (Kusala 2:14-36). Kite ayeke dä pëpe so Nzapa ayeke pardone aChrétien so achangé biani bê ti ala laso. Zo ti sungo psaume atene: “O L’Eternel, tongana Mo bata tënë ti sioye, O Seigneur, ka zo [wa] alingbi ti ngbâ? Me pardon ayeke na Mo.”—Psaume 130:3, 4.
Dengo bê na ndo tënë ti sarango siokpari na tere ti yingo vulu
16. Aye wa ayeke pusu Nzapa ti pardone e?
16 A yeke nzoni atapande so e bâ amû maboko na e ti dë bê ti e na ndo tënë ti sarango siokpari na tere ti yingo vulu. Atapande so afa so Jéhovah ayeke pardone biani awasiokpari so achangé bê ti ala. Kota ye ni ayeke ti sambela na bê kue. Tongana e sara siokpari, e lingbi ti toto na Nzapa mingi ti pardone e na lege ti fini ti Jésus so lo mû na sandaga ti zi e. Be-nzoni ti Jéhovah, siokpari so a dü e na ni nga na kusala ti Jéhovah so e yeke sara na be-biani ayeke nga ambeni raison so ayeke pusu lo ti pardone e. Teti so e hinga so nzobe ti Jéhovah ayeke kota, e lingbi ti hunda lo ti pardone e na hingango so lo yeke sara ande ni.—aEphésien 1:7.
17. A yeke nzoni ti sara nyen tongana e sara siokpari na e yeke na bezoin ti tene a mû maboko na e ti leke songo ti e na Nzapa?
17 Ka tongana e sara siokpari na e yeke na ngangu pëpe ti sambela ndali ti so e bâ so siokpari so e sara abuba songo ti e na Nzapa? Na ndo tënë so, disciple Jacques atene: “A lingbi [mara ti zo tongaso airi] a-ancien ti eglize, na a lingbi ala sambela na tere ti lo, ala sa mafuta na ndo lo na iri ti Seigneur, na fade sambela ti mabe asö zo ti kobela so, na fade Seigneur ayä lo; na tongana lo sara siokpari awe, fade a pardone siokpari ti lo.”—Jacques 5:14, 15.
18. Atâa tongana a bi mbeni zo na gigi ti bungbi, ngbanga ti nyen ye so aye pëpe ti tene so a lingbi pëpe ti pardone siokpari ti lo?
18 Même tongana a bi zo so achangé bê ti lo pëpe na gigi ti bungbi, ye so aye pëpe ti fa so a lingbi pëpe ti pardone siokpari ti lo. Paul atene na ndo mbeni Chrétien ti Corinthe so a sa yingo na ndo ti lo, me so a bi lo na gigi ti bungbi ndali ti mbeni kota siokpari, lo tene: “Ngbanga so azo mingi afâ na li ti zo so, a lingbi na lo awe; fadeso a lingbi i pardone lo na i wa lo si bê ti lo aga nzoni, wala peut-être kota vundu ti zo so ahon ndo ti lo.” (2 aCorinthien 2:6-8; 1 aCorinthien 5:1-5). Ye oko, ti tene azo so asara siokpari akiri aleke songo ti ala na Jéhovah, a hunda ti tene ala yeda na awango ti Bible so a-ancien amû nga ala fa so ala changé biani bê ti ala. A lingbi ala “lë le-kobe alingbi na lege ti zo so achangé bê ti lo”.—Luc 3:8.
19. Aye wa alingbi ti mû maboko na e ti ngbâ ti “kpengba na mabe”?
19 Aye wa alingbi ti sara si e bâ so e sara siokpari na tere ti yingo vulu? Tongana mbeni zo ayeke na bibe ti sarango ye kue tâ gi na lege ni wala seni ti lo ayeke nzoni pëpe, a lingbi ti sara si lo bâ ti lo so lo sara siokpari na tere ti yingo vulu. Na yâ ti mara ti aye tongaso, ti sambela nga ti wu tere nzoni alingbi ti mû maboko na lo. Kota ye ni ayeke ti zia lege pëpe na Satan ti sara si e nze, tongaso si e zia ti voro Nzapa. Teti so Jéhovah awara ngia pëpe tongana zo ti sioni akui, a nzere na lo kete pëpe ti girisa mbeni wakua ti lo. Tongaso, tongana e yeke na mbeto so e sara siokpari na tere ti yingo vulu ti Nzapa, a yeke nzoni e ngbâ lakue ti diko Mbeti ti Nzapa, so na yâ ni mo yeke wara apsaume so adë bê ti zo. A hunda ti tene e ngbâ lakue ti ga na abungbi nga ti fa tënë ti Royaume. Ti sara tongaso ayeke mû maboko na e ti “kpengba na mabe” nga ti gi bê ti e pëpe na tenengo so e sara mbeni siokpari so a lingbi pëpe ti pardone ni.—Tite 2:2.
20. Ahundango tënë wa alingbi ti mû maboko na mbeni zo ti bâ so lo zonga yingo vulu ti Nzapa pëpe?
20 A yeke nzoni azo kue so abâ so ala sara siokpari na tere ti yingo vulu ti Nzapa ahunda tere ti ala na atënë so: ‘Kota siokpari so mbi sara lani, mbi sara ni na tere ti yingo vulu? Mbi changé biani bê ti mbi lani ngbanga ti siokpari so mbi sara? Mbi yeke na mabe so Nzapa apardone siokpari ti mbi? Mbi yeke mbeni apostat so ake atënë so bungbi ti Jéhovah ayeke zi nda ni?’ Kite ayeke dä pëpe so azo so agi bê ti ala tongaso ayeke bâ ande so ala zonga yingo vulu ti Nzapa pëpe nga so ala yeke a-apostat pëpe. Ala changé bê ti ala awe nga ala yeke dë kite ande lâ oko pëpe so Jéhovah ayeke pardone siokpari. Tongana a yeke tongaso, ala sara siokpari na tere ti yingo vulu ti Jéhovah pëpe.
21. Article ti peko ayeke sara ande tënë na ndo ti nyen?
21 So tâ ye ti dengo bê ti hinga biani so e sara siokpari na tere ti yingo vulu ti Nzapa pëpe! Ye oko, na yâ ti article ti peko, e yeke bâ ande ahundango tënë mingi na ndo ti yingo vulu ti Nzapa. Na tapande, e lingbi ti hunda tere ti e: ‘Yingo vulu ti Nzapa ayeke fa lege na mbi biani? A yeke bâ ambage nde nde ti lengo ti yingo na yâ ti fini ti mbi?’
Mo yeke kiri tënë tongana nyen?
• Ngbanga ti nyen e lingbi ti tene so zo alingbi ti sara siokpari na tere ti yingo vulu?
• Ti changé bê aye ti tene nyen?
• Azo wa asara siokpari na tere ti yingo ti Nzapa na ngoi so Jésus ayeke na sese?
• Na lege wa e lingbi ti hon ndo ti gingo bê na ndo sarango siokpari so a lingbi ti pardone ni pëpe?
[Foto na lembeti 8]
Atâa so Pierre atene ni hinga Jésus pëpe, lo sara pëpe siokpari so a lingbi pëpe ti pardone ni