BIBLIOTHÈQUE NA NDÖ TI INTERNET Watchtower
Watchtower
BIBLIOTHÈQUE NA NDÖ TI INTERNET
Sango
  • BIBLE
  • AMBETI
  • ABUNGBI
  • w09 1/1 l. 12-15
  • Wara ngia na sarango si azo aga adisciple

Vidéo ayeke na yâ ti mbage ni so ape.

Pardon, mbeni kpale asi na ngoi ti zingo vidéo ni.

  • Wara ngia na sarango si azo aga adisciple
  • Tour ti Ba Ndo Afa Tene ti Royaume ti Jéhovah: 2009
  • Akete li ti tënë ni
  • Ambeni mbeti nde na ndö ti oko tënë ni
  • Akpale so alingbi ti buba ngia ti e
  • Leke bê ti mo
  • Zia na gbele ti mo ti manda Bible na azo
  • Tongana azo asara nzara ti tënë ni pëpe
  • A bâ aita kue ti congrégation
  • Hongo ndo ti mbeto ti e
  • A ga na aye ti nzoni wa?
  • Mo peut ti mû maboko na kua ti sarango adisciple?
    Tour ti Ba Ndo Afa Tene ti Royaume ti Jéhovah (Ti mandango ni): 2021
  • Akode ti fango nzoni tënë
    Bungbi so a leke ni ti sara ye so Jéhovah aye
  • “Ala gue, ala sara si azo . . . aga adisciple”
    Tour ti Ba Ndo Afa Tene ti Royaume ti Jéhovah (Ti mandango ni): 2019
  • Découragé ape
    Tour ti Ba Ndo Afa Tene ti Royaume ti Jéhovah (Ti mandango ni): 2021
Bâ ambeni ye ni
Tour ti Ba Ndo Afa Tene ti Royaume ti Jéhovah: 2009
w09 1/1 l. 12-15

Wara ngia na sarango si azo aga adisciple

“Ala gue, ala sara si azo . . . aga adisciple.”​—MAT. 28:19.

1-3. (a) Azo mingi abâ mandango Bible na azo tongana nyen? (b) Ahundango tënë wa e yeke bâ ande ni?

MBENI ita-wali so asara kua na mbeni groupe so azo ni atene yanga ti Hindi na Amerika atene: “A sara ayenga 11 awe so mbi yeke manda Bible na mbeni sewa so alondo na kodoro ti Pakistan.” Lo kiri lo tene: “Mbi na ala e ga akota kamarade. Tongana mbi yeke gbu li ti mbi so na yâ ti ngoi kete sewa so ayeke kiri na Pakistan, ngu ti lê asi lê ti mbi. Ngu ti lê ti mbi aga gi pëpe ndali ti so mbi na ala e yeke kangbi me nga ndali ti ngia so mbi wara na ngoi so mbi yeke fa ye na ala na ndo ti Jéhovah.”

2 Legeoko tongana ti ita-wali so, a si na mo awe ti wara ngia ndali ti so mo manda Bible na mbeni zo? Jésus na akozo disciple ti lo awara kota ngia na yâ ti kua ti sarango si azo aga adisciple. Na ngoi so adisciple ti Jésus 70 so lo fa ye na ala na lo tokua ala ti fa tënë akiri na anzoni sango, “bê ti Jésus asi na ngia nga na yingo vulu”. (Luc 10:17-21). Legeoko nga, aita mingi ayeke wara kota ngia laso na yâ ti kua ti sarango si azo aga adisciple. Na ngu 2007, na ngia na bê awafango tënë asara kua ngangu, ala manda Bible na azo kutu omene na ndambo tongaso nze oko oko.

3 Ye oko, ambeni wafango tënë ade ti manda Bible na azo pëpe. Ti ambeni, peut-être a ninga ala manda Bible na azo pëpe. Akpale wa e lingbi ti wara na ngoi so e yeke gi ti manda Bible na mbeni zo? E lingbi ti sara tongana nyen ti hon ndo ni? Aye ti nzoni wa e yeke wara na ngoi so e sara ye kue so e lingbi ti sara ti yeda na yanga so Jésus amû lo tene: ‘Ala gue, ala sara si azo aga adisciple’?​—Mat. 28:19.

Akpale so alingbi ti buba ngia ti e

4, 5. (a) Na yâ ti akodoro mingi, azo ayeke sara ye tongana nyen na mbage ti tënë ti Nzapa? (b) Na ambeni ndo, awafango tënë ayeke wara akpale wa?

4 Na yâ ti ambeni kodoro, azo ayeke yeda hio ti mû ambeti ti e nga ala yeke na nzara mingi ti manda Bible. Mbeni koli na wali ti lo so alondo na kodoro ti Australie, na ala gue ti sara kua ti Jéhovah teti mbeni ngoi na Zambie atene: “Atënë so e mä lani ayeke tâ tënë. Zambie ayeke tâ nzoni ndo ti fango tënë dä. Fango tënë na tere ti lege ayeke tâ pendere mingi. Azo ayeke ga na tere ti e, ambeni ahunda même ti wara ambeni numéro ti Tour ti Ba Ndo na Réveillez-vous! so agbu bê ti ala.” Na yâ ti angu so ahon, aita ti Zambie amanda Bible na azo ahon 200 000, so ti fa so na bango ni, wafango tënë oko oko amanda Bible na zo oko.

5 Ye oko, na ambeni ndo, awafango tënë abâ so a yeke ngangu ti zia ambeti ti e na azo nga ti manda Bible na azo lakue lakue. Ndali ti nyen? Fani mingi, a yeke ndali ti so azo ayeke na yanga-da pëpe na ngoi so awafango tënë asi na yanga-da ni, wala ala so ayeke na yanga-da asara nzara ti tënë ti Nzapa pëpe. Peut-être azo ni akono na yâ ti asewa so azo ni ayeke voro Nzapa pëpe wala peut-être ala ke tënë ti Nzapa ndali ti so ala bâ so azo ti yâ ti abungbi ti vorongo nzapa ti wataka ayeke sara ye ague nde na ye so ala fa. Aberger ti wataka asara sioni na azo na lege ti yingo na ala sara si azo ni ague kirikiri (Mat. 9:36). Ndani la a lingbi ti duti ngangu na mara ti azo tongaso ti yeda ti sara lisoro na ndo ti Bible.

6. Akpale wa akanga lege na ambeni wafango tënë?

6 Ambeni wafango tënë so ayeke be-ta-zo awara mbeni kpale nde so alingbi ti sara si ala yeke na ngia pëpe. Atâa so ândö ala yeke mû mbage mingi na yâ ti kua ti sarango si azo aga adisciple, kpale ti seni wala akpale ti lâ ti mbakoro asara si ala sara ni mingi tongana ti kozo pëpe. Bâ nga ambeni ye so e wani e lingbi ti sara si akanga lege na e ti mû mbage mingi na kua ti sarango adisciple. Na tapande, mo bâ so mo lingbi pëpe ti manda Bible na azo? Bibe ti mo alingbi ti gue oko na ti Moïse na ngoi so Jéhovah atokua lo ti sara tënë na Pharaon. Moïse atene: “O Seigneur, mbi yeke zo ti sara tënë mingi pëpe, giriri wala fadeso.” (Ex. 4:10). Tongana zo apensé so ye so lo ye ti sara ayeke ga ande nzoni pëpe, a lingbi ti sara si lo bâ so lo lingbi pëpe. E lingbi peut-être ti gi bê ti e so zo ni ayeke ga ande disciple pëpe ndali ti so e yeke tâ nzoni wafango ye pëpe. E lingbi ti tene so ti tene mara ti ye tongaso asi na e pëpe, ahon tënë e manda Bible na zo pëpe. E lingbi ti sara nyen ti hon ndo ti akpale so?

Leke bê ti mo

7. Nyen la apusu Jésus ti sara kua ti lo?

7 Kozo ye ni ayeke ti leke bê ti e wani. Jésus atene: “A yeke tënë so asi yâ ti bê ti [zo] si ayeke sigigi na yanga ti lo.” (Luc 6:45). Jésus ayapu na yâ ti kua ti lo ndali ti so tënë ti nzoni duti ti azo agbu bê ti lo. Na tapande, na ngoi so lo bâ aJuif so aye ti yingo amanke ala, “mawa ti ala asara lo”. Lo tene na adisciple ti lo: “Akobe ti fango ni ayeke mingi, . . . ala hunda mingi na Wa ti kua ni ti tokua azo ti kua ti fâ akobe ti yaka ti lo.”​—Mat. 9:36-38.

8. (a) A yeke nzoni e gbu li ti e na ndo ti nyen? (b) Tënë so mbeni wamandango Bible asû afa nyen na e?

8 Na ngoi so e yeke mû mbage na yâ ti kua ti sarango si azo aga adisciple, a yeke nzoni e gbu li mingi na ndo ti aye ti nzoni so e wara ndali ti so mbeni zo amû ngoi ti manda Bible na e. E gbu li nga na ndo ti azo so e yeke tingbi na ala na fango tënë nga na aye ti nzoni so ala yeke wara na lege ti tënë so e yeke fa. Mbeni wali asû mbeti na Béthel ti kodoro so lo yeke dä, lo tene: “Mbi ye ti fa na ala ngia so mbi yeke na ni ndali ti aTémoin ti Jéhovah so amanda Bible na mbi na yanga-da ti mbi. Mbi hinga so ngoi na ngoi, bê ti ala ason kete na tere ti mbi ndali ti gbâ ti atënë so mbi yeke hunda na ala nga ndali ti so mbi yeke te ngoi ti ala mingi. Atâa so kue, ala sara ngonzo pëpe me ala yeke na ngia ti fa na mbi ye so ala manda. Mbi kiri singila na Jéhovah nga na Jésus ndali ti so mbi wara lege ti hinga azo so.”

9. Jésus azia lê ti lo gi na ndo ti nyen? E lingbi ti sara nyen ti mû tapande ti lo?

9 Ti tâ tënë ni, a yeke azo kue pëpe si ayeda lani na ngangu so Jésus asara ti mû maboko na ala (Mat. 23:37). Ambeni amû peko ti lo teti kete ngoi, me na pekoni, ala ke afango ye ti lo na “ala ye ti tambela na lo mbeni pëpe.” (Jean 6:66). Ye oko, Jésus azia pëpe si sarango ye ti azo so ake tënë ti lo asara si lo bâ so tënë so lo yeke fa ayeke mbumbuse tënë. Atâa so mingi ti alê ti kobe so Jésus alu alë pëpe, lê ti lo angbâ gi na ndo ti nzoni ye so lo yeke sara. Lo bâ so alê ti kobe abe awe na lo wara ngia mingi ti mû maboko na kua ti fango ni. (Diko Jean 4:35, 36.) Ahon ti bâ gi ando so alê ti kobe abe dä pëpe, a lingbi e zia lê ti e gi na ndo ti ando ti yâ ti territoire ti e so alê ti kobe abe dä mingi. Zia e bâ aye so e lingbi ti sara ti duti lakue na mara ti nzoni bango ndo so.

Zia na gbele ti mo ti manda Bible na azo

10, 11. Mo lingbi ti sara nyen ti bata ngia ti mo?

10 Tongana zo ti fango yaka alu lê ti kobe, ndani ayeke ti tene lo ko kobe so mbeni lâ. Legeoko nga, zia si ndani so e yeke fa tënë ayeke ti manda Bible na azo. Ka tongana mo mû ngoi ti fa tënë lakue me mo wara azo mingi pëpe na yanga-da ti ala wala mo bâ so a yeke ngangu na mo ti wara avizite ti mo? Ye so alingbi ti sara si bê ti mo ason kete. A lingbi mo zia ti fa tënë da na da? Oko pëpe! Fango tënë da na da ayeke lakue mbeni lege so azo mingi ayeke mä tënë ti e ti kozoni.

11 Ye oko, mo lingbi ti sara kua na akode nde nde ti fango tënë si mo bata ngia ti mo? Na tapande, mo tara awe ti fa tënë na azo na tere ti lege wala na aplace ti kua ti ala? Mo lingbi ti fa tënë na azo na téléphone wala ti wara anuméro ti téléphone ti azo so mo fa tënë ti Royaume lani na ala si mo ngbâ lakue ti sara lisoro na ala? Tongana mo ngbâ lakue ti fa tënë nga mo gi ti fa tënë na alege nde nde, mo yeke wara ande azo so ayeda na tënë ti Royaume, na ye so ayeke mû na mo ande ngia.

Tongana azo asara nzara ti tënë ni pëpe

12. E lingbi ti sara nyen tongana azo mingi ti territoire ti e asara nzara ti vorongo Nzapa pëpe?

12 Ka tongana azo mingi na yâ ti territoire ti e asara nzara ti bungbi ti vorongo nzapa pëpe? Mo lingbi ti leke si ali ti tënë ti mo ague oko na ye so agbu bê ti ala? Bazengele Paul asû mbeti na amba ti lo aChrétien ti kodoro ti Corinthe, lo tene: “Na popo ti aJuif, mbi ga tongana mbeni Juif . . . Na popo ti ala so ayeke na ndia pëpe, mbi ga tongana zo so ayeke na ndia pëpe, atâa so na gbele Nzapa mbi yeke zo so ayeke na ndia.” Nyen la apusu Paul ti sara tongaso? Lo tene: “Mbi ga ye kue ndali ti mara ti azo nde nde kue, si na yâ ti ye kue mbi sö fini ti ambeni.” (1 aCor. 9:20-22). Legeoko tongana ti Paul, e lingbi ti wara ambeni li ti tënë so e na azo ti territoire ti e amä tere dä? Gbâ ti azo so ayeke na yâ ti abungbi ti vorongo nzapa pëpe aye ti tene songo ti ala na yâ ti sewa ti ala aga nzoni ahon ti kozo. Peut-être ala yeke gi ti sara mbeni ye so ayeke sara si gigi ti ala aga nzoni. E lingbi ti fa tënë ti Royaume na azo so na mbeni lege so ayeke ndu bê ti ala?

13, 14. E lingbi ti sara nyen ti maï ngia so e yeke wara na sarango si azo aga adisciple?

13 Awafango tënë mingi amaï ngia ti ala na yâ ti kua ti sarango si azo aga adisciple, même na ando so ala bâ so mingi ti azo ni asara nzara ti tënë ni pëpe. Na lege wa? Na lege so ala manda mbeni yanga ti kodoro. Mbeni koli na wali ti lo so ngu ti ala ahon 60 abâ so aChinois saki mingi mingi so ayeke a-élève nga na asewa ti ala alango na yâ ti territoire ti congrégation ti ala. Koli ni atene: “Ye so apusu e ti manda Chinois.” Lo kiri lo tene: “Atâa so ye so ahunda ti tene e mû ngoi mingi lâ oko oko ti manda yanga so, e yeke na ngia ti manda Bible na gbâ ti aChinois so alango na ndo so e yeke dä.”

14 Atâa tongana mo lingbi pëpe ti manda mbeni yanga ti kodoro, mo lingbi ti sara kua nzoni na brochure Une bonne nouvelle pour des gens de toutes nations na ngoi so mo tingbi na azo so atene mbeni yanga ti kodoro nde. Fani mingi, mo lingbi nga ti wara ambeti na ayanga ti kodoro ti azo so mo tingbi na ala. Ti tâ tënë ni, a hunda ti tene zo amû ambeni ngoi nga lo sara ngangu si lo sara lisoro na azo so yanga ti kodoro ti ala nga na sarango ye ti ala ayeke nde na ti lo. Me girisa pëpe kpengba-ndia so ayeke na yâ ti Mbeti ti Nzapa, so atene: “Zo so alu ye mingi mingi, fade lo ko ni mingi mingi nga.”​—2 aCor. 9:6.

A bâ aita kue ti congrégation

15, 16. (a) Ngbanga ti nyen a hunda ti tene aita kue ti congrégation asara ngangu si azo aga adisciple? (b) Aita so aga mbakoro awe ayeke sara kua wa?

15 Ye oko, sarango si azo aga adisciple aluti pëpe na ndo ti ngangu so gi zo oko ayeke sara. Me a hunda ti tene aita kue ti congrégation asara ngangu. Ndali ti nyen? Jésus atene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). Ni la, na ngoi so awamandango Bible aga na abungbi, fani mingi, bê ti ala apika ti bâ ndoye so ayeke na popo ti aita. Mbeni wamandango Bible atene: “Mbi ye gango na abungbi mingi. Azo ni ayeke yamba zo mingi!” Jésus atene so fade afami ti azo so amû peko ti lo alingbi ti gi ti kanga lege na ala. (Diko Matthieu 10:35-37.) Ye oko, lo mû zendo so na yâ ti congrégation, fade ala yeke wara na lege ti yingo gbâ ti “aita ti koli, aita ti wali, amama [na] amolenge”.​—Marc 10:30.

16 Aita ti e so aga mbakoro awe ayeke sara akpengba ye mingi ti mû maboko na awamandango Bible ti gue na li ni. Na lege wa? Atâa so ambeni ita so aga mbakoro alingbi ala wani pëpe ti manda Bible na azo, anzoni kiringo tënë ti ala na ngoi ti abungbi ayeke kpengba mabe ti azo kue so ayeke mä ala. Teti so a hinga aita so tongana azo so ayeke tambela “na lege ti mbilimbili”, a sara si aita kue ti congrégation aduti nzoni ahon ti kozo. A yeke sara nga si azo so ayeke na nzara ti voro Jéhovah aga na yâ ti bungbi ti lo.​—aProv. 16:31.

Hongo ndo ti mbeto ti e

17. Ye wa e lingbi ti sara ti hon ndo ti bibe so asara si e bâ so e lingbi pëpe?

17 Ka tongana mo bâ so mo lingbi pëpe, na mo yeke sara ngangu ti hon ndo ni? Girisa pëpe so Jéhovah amû maboko lani na Moïse na lege so lo mû na lo yingo vulu nga na mbeni zo so lo na lo ayeke sara kua maboko na maboko; zo ni so ayeke ita ti lo Aaron (Ex. 4:10-17). Jésus amû zendo so yingo ti Nzapa ayeke mû ande maboko na e na yâ ti kusala ti e ti fango tënë (Kus. 1:8). Na ndo ni, Jésus atokua awakua use use ti fa tënë (Luc 10:1). Ni la, tongana mo bâ so a yeke ngangu na mo ti manda Bible na mbeni zo, sambela Nzapa ti tene yingo ti lo amû na mo ndara. Na pekoni, sigigi legeoko na mbeni ita so alingbi ti sara si mo bâ so mo lingbi ti sara kua ni nzoni nga so aye so lo hinga alingbi ti mû maboko na mo. Ti dabe ti e so Jéhovah asoro ti sara kusala na asenge zo, “aye ti dunia so ayeke awokongo ye”, ti sara kota kusala ti fango tënë ayeke kpengba mabe ti e.​—1 aCor. 1:26-29.

18. Tongana e yeke na mbeto so ye so e ye ti sara ayeke ga nzoni pëpe, e lingbi ti hon ndo ni tongana nyen?

18 Tongana e sara mbeto so ye so e ye ti sara ayeke ga ande nzoni pëpe, e lingbi ti hon ndo ni tongana nyen? A yeke nzoni e girisa pëpe so kua ti sarango si mbeni zo aga adisciple ayeke pëpe tongana tongo kobe, so atâa a nzere na azo wala a nzere na ala pëpe, a bâ gi zo so atö ni. Me, a hunda ti tene azo mingi amû amaboko na zo ni. Jéhovah ayeke sara kota mbage ti kua ni na lege so lo yeke sara si zo aga na mbage ti lo (Jean 6:44). E na amba ti e ti congrégation e yeke sara kue ti fa ye nzoni ti mû maboko na mbeni wamandango Bible ti gue na li ni. (Diko 2 Timothée 2:15.) Nga, a lingbi wamandango Bible ni asara ye alingbi na ye so lo yeke manda (Mat. 7:24-27). Tongana mbeni zo azia lege ti mandango Bible, ye so alingbi ti mû na e vundu. E ye si awamandango Bible amû nzoni desizion, me a lingbi zo oko oko ‘akiri tënë na Nzapa ndali ti lo wani.’​—aRom. 14:12.

A ga na aye ti nzoni wa?

19-21. (a) Aye ti nzoni wa e wara na peko ti mandango Bible na azo? (b) Jéhovah abâ azo kue so ayeke fa tënë tongana nyen?

19 Mandango Bible na azo asara si e ngbâ ti gi Royaume kozoni. A sara nga si e gbu nda ti atâ tënë ti Mbeti ti Nzapa nzoni ahon ti kozo, na a ndu bê ti e mingi. Ndali ti nyen tongaso? Mbeni pionnier so iri ti lo ayeke Barak atene: “Mandango Bible na azo asara si mo ga mbeni nzoni wamandango Bible ahon ti kozo. Kozoni si mbi lingbi ti fa ye na mbeni zo, mbi bâ so a lingbi mbi hinga mbi wani so ye so Bible afa ayeke tâ tënë.”

20 Tongana mo yeke manda Bible na mbeni zo pëpe, so aye ti tene so kusala so mo yeke sara na Nzapa ayeke ye oko pëpe? A yeke tongaso pëpe. Jéhovah abâ na nene ni mingi ngangu so e yeke sara ti gonda lo. Azo kue so ayeke fa tënë ayeke “sara kusala maboko na maboko na Nzapa.” Ye oko, mandango Bible na mbeni zo asara si e duti na ngia ahon ti kozo na ngoi so e bâ lege so Nzapa ayeke sara si ye so e lu amaï (1 aCor. 3:6, 9). Mbeni pionnier so iri ti lo ayeke Aimée atene: “Na ngoi so mo bâ mbeni wamandango Bible ayeke gue na li ni, a pusu mo ti kiri singila mingi na Jéhovah ndali ti so lo sara kusala na mo ti mû na mbeni zo mbeni pendere matabisi: lege ti hinga Jéhovah na ti wara fini ti lakue lakue.”

21 Tongana e sara kue ti to nda ti manda Bible na azo na ti sara ni lakue, a yeke sara si lê ti e angbâ na ndo ti sarango na Nzapa laso nga a yeke kpengba beku ti e ti sö ande kuâ ti lï na yâ ti fini dunia. Na mungo maboko ti Jéhovah, e lingbi nga ti mû maboko na azo so ayeke mä e ti sö fini ti ala. (Diko 1 Timothée 4:16.) So kota ye ti mungo ngia na zo!

Mo dabe ti mo na ni?

• Akpale wa alingbi ti kanga lege na ambeni wafango tënë ti manda Bible na azo?

• E lingbi ti sara nyen tongana azo mingi na yâ ti territoire ti e asara nzara ti tënë ni pëpe?

• Aye ti nzoni wa e yeke wara tongana e manda Bible na zo?

    Ambeti na Sango (1997-2025)
    Sigi
    Linda
    • Sango
    • Kangbi ni na mbeni zo
    • Aye so mo ye
    • Copyright © 2025 Watch Tower Bible and Tract Society of Pennsylvania
    • Lege ti sara kua na ni
    • Ye so a yeke sara na asango so mo mû
    • Paramètres de confidentialité
    • JW.ORG
    • Linda
    Kangbi ni na mbeni zo