Ye so e manda na lege ti Jésus

Na ndo ti “nda ni”

Nda ni ti nyen?

Adisciple ti Jésus ahunda lo: “Fade fä ti ngoi so mo yeke si na mo yeke duti dä nga ti ngoi so aye ti ngoi so ayeke gue ti hunzi ayeke nyen?” (Matthieu 24:3). Na ngoi so Jésus ayeke kiri tënë na hundango ndo ti ala, lo tene pëpe so fade a yeke futi ande sese so e yeke na ndo ni so. Kozoni na ngoi ni so, lo sara tënë ti “aye ti ngoi so” nga lo sara kusala na tënë so ti sara tënë ti abungbi kue ti poroso, ti dengo buze nga na ti vorongo nzapa so Satan ayeke komande na ndo ni (Matthieu 13:22, 40, 49). Tongaso, a yeke aye so si Jésus ayeke gbu li lani na ndo ni tongana lo tene: “Nda ni ayeke ga.”​—Matthieu 24:14.

Jésus atene nyen na ndo ti nda ni?

Hunzingo ti aye ti sioni ti ngoi so ayeke mbeni “nzoni tënë”. Jésus atene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” Jésus atene so hunzingo ti aye ti ngoi ti e laso ayeke duti ande tongaso: “Fade mbeni kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso, na mara ni ayeke kiri ti si ande mbeni pëpe. Biani, tongana fade a kiri na alango ni so nduru pëpe, ka mitele oko ayeke sö kuâ pëpe.”​—Matthieu 24:14, 21, 22.

A yeke futi ande azo wa?

A yeke futi ande gi azo so aye pëpe Jéhovah na Jésus nga so asara na ala pëpe. Mara ti azo tongaso ake ti mä yanga ti Nzapa. Jésus atene: “Legeoko tongana ti so a si lani na ngoi ti Noé, ye ni ayeke duti ande tongaso nga na ngoi so Molenge ti zo ayeke si na lo yeke duti dä. Na ngoi ni so, kozo si kota ngu apika, . . . [azo agbu] li lani na ndo ti ye so ayeke si so pëpe juska kota ngu apika na ahon na ala kue.” (Matthieu 24:36-39). Jésus atene so azo mingi ayeke na ndo ti lege so ague na futingo. Ye oko, lo dë bê ti e so mbeni “lege so ague na fini” na so “yanga ti gbagba ni ayeke kete” ayeke dä.​—Matthieu 7:13, 14.

Aye ti ngoi ti laso ayeke hunzi ande lawa?

Na ngoi so a hunda Jésus na ndo ti aye so afa so lo si awe na lo yeke duti dä “nga ti ngoi so aye ti ngoi so ayeke gue ti hunzi”, Jésus akiri tënë, lo tene: “Fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade kota nzara ayeke tï nga sese ayeke yengi, . . . na teti so kpengo ndia pëpe ayeke wu mingi, fade ndoye ti mingi ti azo ni ayeke dë.” (Matthieu 24:3-12). Tongaso, asioni sango kue so e yeke mä laso afa so nzoni ye aga nduru ti si awe: Royaume ti Nzapa so ayeke ngorogbia ti lo aga nduru ti ga na siriri na azo so amä yanga. Jésus atene: “Tongana ala bâ aye so ayeke si, . . . zia ala hinga so royaume ti Nzapa aga nduru awe.”​—Luc 21:31.

A yeke nzoni mo sara nyen?

Jésus atene so Nzapa ‘amû gi oko Molenge ti lo ndali ti azo, si zo kue so amä na bê na lo, a lingbi ti futi lo pëpe, me lo wara fini ti lakue lakue.’ (Jean 3:16). Tongana mo ye ti mä na bê na Nzapa nga na Molenge ti lo, a lingbi mo hinga ala nzoni. Ni la Jésus atene: “Ti wara fini ti lakue lakue, a lingbi ala manda ti hinga mo, mo so gi mo oko ayeke tâ Nzapa, nga ti hinga lo so mo tokua lo, Jésus Christ.”​—Jean 17:3.

Sara hange si agingo bê nga na akpale akanga lege na mo pëpe ti hinga tongana nyen ti fa so mo ye Nzapa. Jésus atene: “Ala sara hange si . . . gingo bê ngbanga ti aye ti gigi ane bê ti ala pëpe, na lango ni so aga hio tongaso na ndo ti ala tongana mbeni kûkû. Teti lango ni so ayeke ga.” Tongana mo yeda na awango so Jésus amû, mo yeke “wara lege ti sigigi na yâ ti aye kue so a fa ni kozo awe ti tene a si”.​—Luc 21:34-36.

Ti hinga ambeni tënë na ndo ni, bâ buku Bible afa nyen biani?,a chapitre 9 so li ti tënë ni ayeke: “E yeke na ‘lâ ti nda ni’?”

[Kete tënë na gbe ni]