Mbeni zo ayeke bi bê biani na e nga la?

A si na mo awe ti bâ so mo yeke gi mo oko na mo yeke na ngangu pëpe ti sara mbeni ye, mo bâ mo tene mbeni zo ti gbu nda ti akpale so ayeke si na mo ayeke dä pëpe? Atâa tongana azo ahinga ni, mo bâ so ala bi bê biani na mo pëpe.

NA NGOI so e wara akpale, e lingbi ti bâ so gigi ti e ayeke tongana mbeni pupu so aya ngangu na so ayeke kaï ande pëpe. A si na mbeni ngoi, e lingbi même ti tene so aye so ayeke si na e amû vundu mingi na e nga ayeke na lege ni pëpe, tongaso e lingbi pëpe ti ngbâ ti gbu ngangu. Mingi ni, a yeke ye so ayeke si tongana e yeke gi bê ti e mingi, e yeke lakue na kota vundu, e wara mbeni kota kpale na peko ti mbeni ndao, e yeke na mbeni ngangu kobela wala e wara ambeni kpale nde. E lingbi ti bâ so e yeke na ngangu pëpe ti sara mbeni ye, e yeke na beku pëpe na e hunda ti hinga ndo wa la e lingbi ti kpe dä ti wara dengo bê. Mbeni zo ayeke bi bê biani na e nga la?

“Nzapa ti dengo bê kue” ayeke bi bê na e

Bible atene so Nzapa ayeke “Babâ so ayeke sara nzoni bê mingi na zo nga Nzapa ti dengo bê kue”. (2 aCorinthien 1:3). Nzapa so iri ti lo ayeke Jéhovah ahinga so e yeke na bezoin ti dengo bê. Bible asara kusala na tënë “dengo bê” na alege nde nde ahon fani ngbangbo oko, na a dë bê ti e so Nzapa ahinga aye so ayeke si na e nga lo yeke na nzara ti dë bê ti e. Ti hinga ni tongaso asara si na ngoi so e pensé so azo abâ pëpe ye so asi na e, ala gbu nda ni pëpe, wala ala bi bê pëpe na vundu so e wara, Jéhovah Nzapa ayeke bi bê ti lo na e.

Ti tâ tënë ni, Bible amû maboko na e ti hinga polele so Nzapa ayeke bi bê ti lo na azo oko oko kue. Bible atene: “Lê ti L’Éternel ayeke na ndo kue ti bâ azo ti sioni na azo ti nzoni.” (aProverbe 15:3). Legeoko nga, Job 34:21 atene: “Lê ti Lo abâ lege ti zo, Lo bâ tambela ti gere ti lo kue.” Jéhovah abâ aye so e yeke sara, atâa a yeke ye ti nzoni wala ye ti sioni; na so lo hinga dutingo ti e amû lege na lo ti mû maboko na e alingbi na ni. Ye so ague oko na tënë so Hanani zo ti bâ ye, wala prophète atene na Gbia Asa ti Juda, lo tene: “Lê ti L’Éternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.”​—2 Chronique 16:7, 9.

Jéhovah ayeke bâ nga ndo na ndo ti e ndali ti mbeni nda ti tënë nde. Jésus atene: “Zo oko alingbi ti ga na mbi pëpe, gi tongana Babâ so atokua mbi si agboto lo aga na lo na mbage ti mbi.” (Jean 6:44). So Jéhovah ayeke bi bê ti lo mingi na azo asara si lo gi ti hinga ye so ayeke na bê ti zo ti bâ wala zo ni ayeke na nzara ti hinga lo. Na tongana lo bâ ni, lo lingbi ti mû maboko na zo ni na ambeni lege so ahon gbungo li ti zo. Na tapande, na République Dominicaine, a gbanzi mbeni wali na da-nganga ti sara opéré na lo ndali ti cancer. Lo toto na Nzapa ti mû maboko na lo ti wara tâ bungbi ti vorongo nzapa. Tâ gi na ngoi ni so, koli ti lo aga na lo brochure Ye Wa Nzapa Ahunda na E?a so mbeni Témoin ti Jéhovah so aga na yanga-da ti lo na ndapre ni amû na lo. Wali ni adiko brochure ni na lo bâ so Nzapa akiri tënë na sambela ti lo awe. Lo yeda ti tene Témoin ti Jéhovah ni amanda Bible na lo, na gi na yâ ti nze omene tongaso, lo mû tere ti lo na Nzapa na lo wara batême.

Azo ti sungo apsaume ti giriri so ayeke aHébreu, so mbeni oko ti ala ayeke Gbia David, asû gbâ ti atënë so ayeke dë bê ti zo, na atënë ni so afa so na ndoye Jéhovah ayeke bâ lege ti awakua ti lo. Na Psaume 56:9, e bâ so Gbia David atoto na Nzapa, lo tene: “Mo zia ngule ti mbi na yâ ngbenda ti Mo; ye so ayeke na mbeti ti Mo pëpe?” Tongana ti so hakango ye so afa, David ahinga so Jéhovah ahinga nzoni mingi apasi so lo yeke bâ nga na vundu so lo wara na pekoni. Jéhovah ahinga songo ti pasi ti David na lo dabe ti lo na ye ti vundu so David ayeke na yâ ni na so asara si lo toto na ngu ti lê. Ti tâ tënë ni, Wasarango e ayeke bâ ndo na ndo ti azo kue so ayeke gi ti sara ye so bê ti lo aye, “ala so bê ti ala ayeke mbilimbili na Lo.”

Mbeni mbage ti Bible so afa nzoni mingi so na ndoye Nzapa ayeke bâ lege ti azo ti lo ayeke Psaume 23, so azo ahinga ni mingi. Kozo versê ni ahaka Nzapa tongana mbeni Berger. Versê ni atene: “L’Éternel ayeke Berger ti mbi; ye alingbi manke mbi pëpe.” Aberger ti mara ti Israël na ti amara so angoro ala ayeke bâ lege ti angasangbaga ti ala oko oko kue, na ala yeke zia même iri na ndo ti ala oko oko kue. Lâ na lâ, berger ni ayeke iri ngasangbaga oko oko kue nga na ndoye lo yeke ndu tere ti ala oko oko kue ti bâ wala ala wara mbeni kä. Tongana lo wara kä na tere ti mbeni, lo yeke zia mafuta na lê ni ti tene a mü hio. Tongana ngasangbaga ni ayeke na kobela, berger ni ayeke tuku yorö na yanga ti ngasangbaga ni nga lo yeke gbu lo na nduzu si lo lango pëpe nga lo kui pëpe. Kite ayeke dä pëpe so pendere tapande so afa tongana nyen Jéhovah ayeke bâ lege ti azo so aga na mbage ti lo.

Sambela nga na zingongo ti akuâ afa so Nzapa ayeke bi bê na azo

Apsaume so nga na ambeni pendere psaume ni nde so a sû na yâ ti Bible, a sû ni pëpe gi ti tene e diko na e wara ngia dä. Apsaume so afa tongana nyen awakua ti Jéhovah ti giriri so ayeke be-ta-zo azi bê ti ala na Jéhovah ti fa na lo so ala yeke na bezoin ti tene lo mû maboko na ala. Na yâ ti apsaume so, ala fa nga so ala kiri singila ndali ti so Nzapa afa lege na ala nga lo iri tënë nzoni na ndo ti ala. Mara ti atënë tongaso afa polele so awakua ti Jéhovah ti giriri so ahinga biani so lo yeke bi bê na ala. Tongana e diko atënë so ala sû, so alondo na bê, nga e gbu li na ndo ni, a lingbi ti mû maboko na e ti hinga so Nzapa ayeke bi bê ti lo nga na e. So Jéhovah amû lege na e ti sambela lo afa polele so lo yeke bi bê na e.

Ye oko, na ambeni ngoi e lingbi ti bâ so mbeni kpale ahon ndo ti e, na e hinga pëpe tongana nyen ti sambela ndali ni. Ye so ayeke kanga lege na Jéhovah ti hinga kpale so e yeke na yâ ni? A-Romain 8:26 akiri tënë: “Yingo nga aga ti mû maboko na ndo so e woko dä. Teti kpale ni ayeke so: ye so a lingbi e sambela ndali ni tongana e yeke na bezoin ni, e hinga ni pëpe. Me yingo wani ayeke hunda teti e na atënë ti dema so asigigi pëpe.” Versê so afa na e so sambela ti awakua ti Jéhovah ti giriri so yingo ti Nzapa apusu ala ti tene ni alingbi ti gue oko na bibe ti e na tongaso Jéhovah so ayeke “mä sambela” alingbi ti bâ asambela so tongana asambela ti e wani.​—Psaume 65:3.

Beku ti zingongo ti akuâ ayeke nga mbeni ye so afa biani so Nzapa ayeke bi bê ti lo na e oko oko kue. Jésus Christ atene: “Ngbonga ni ayeke ga so ala kue so ayeke na yâ ti asende ti kuâ ayeke mä ande go ti lo [Jésus] na ala yeke sigigi.” (Jean 5:28, 29). Tënë ti Grec so a sara kusala na ni ge, a kiri peko ni na lege ni na tënë “asende so ayeke ye ti dabe na azo ni”, tongana ti so kete tënë so a zia na gbe ti versê so afa. A kiri peko ni pëpe gi na tënë “dû ti kuâ.” Tënë so aye ti fa so Nzapa angbâ lakue ti dabe ti lo na aye kue so zo so akui asara na yâ ti gigi ti lo.

Bâ so ti kiri na mbeni zo na fini, a lingbi Nzapa ahinga aye kue na ndo ti zo ni, na popo ti aye so a yeke wara aye tongana konongo ti zo ni wala yongo ti lo, asarango ye ti lo so a dü lo dungo na ni nga na ati so a hinga lo na ni nga na aye kue so ayeke na yâ ti mongoli ti zo ni (Marc 10:27). Anzene nzene ye kue so Nzapa ahinga na ndo ti zo ni, lo yeke girisa ni pëpe atâa a sara angu mingi mingi (Job 14:13-15; Luc 20:38). Ni la, Jéhovah Nzapa adabe ti lo na anzene nzene ye kue na ndo ti azo ngbundangbu mingi mingi so akui awe, na ye so afa biani so lo yeke bi bê na azo oko oko kue!

Jéhovah ayeke zo ti futango azo

E lingbi ti sara nyen ti tene na ndoye Nzapa abi bê ti lo na e nga lo bâ lege ti e? Kozoni kue, a lingbi e fa so e zia bê ti e kue na lo nga e mä yanga ti lo, ye so afa so e mä na bê na lo. Bazengele Paul afa ye so ague oko na popo ti dutingo na mabe nga na hingango so Nzapa ayeke bi bê na e. Lo tene: “Tongana mabe ayeke dä pëpe zo alingbi ti nzere na lê ti Nzapa pëpe, teti zo so aga nduru na Nzapa a lingbi lo mä na bê so Nzapa ayeke dä na lo ga zo ti futango azo so ayeke gi lo ngangu.”​—aHébreu 11:6.

Bâ so mara ti mabe so anzere na Nzapa andu aye use. Kozo ni, a lingbi e “mä na bê so Nzapa ayeke dä” nga so lo yeke Mokonzi ti dunia kue, na lo lingbi ti tene e mä yanga ti lo na e voro lo. Use ni, a lingbi e mä na bê so lo yeke “zo ti futango azo so ayeke gi lo ngangu.” Tâ mabe andu hingango biani so Nzapa ayeke bi bê ti lo na nzoni duti ti azo kue so ayeke gi ti sara ye so bê ti lo aye nga so lo yeke futa ala. Tongana mo manda Mbeti ti Nzapa nga mo bungbi oko na azo so ayeke mä yanga ti lo, mo nga kue mo lingbi ti duti na mara ti mabe so ayeke sara si Nzapa afuta mo nga na ndoye lo bâ lege ti mo.

Azo mingi laso apensé so Nzapa ayeke bi bê ti lo kete pëpe na aye so azo ayeke sara. Me tongana ti so e bâ awe, Bible afa polele so Nzapa ayeke bi bê ti lo mingi na azo so afa biani so ala mä na bê na lo. Atâa so laso gigi ti azo asi singo na ye ti vundu, agingo bê nga na aye so ason bê ti azo, a lingbi bê ti e anze pëpe. Jéhovah ayeke bi bê biani na azo. Ti tâ tënë ni, na ndoye lo tisa azo ti kpe na mbage ti lo ti tene lo mû maboko na ala. Zo ti sungo psaume atene: “Mo zia kungba ti mo na ndo L’Éternel, na fade Lo bata mo. Fade Lo zia ye ayengi azo ti mbilimbili lâ oko pëpe.”​—Psaume 55:23.

[Kete tënë na gbe ni]

[Encadré/Foto na lembeti 27]

Aversê so alingbi ti sara si mo kiri mo hinga biani so na ndoye Nzapa ayeke bi bê na mo

“Teti lê ti L’Éternel akpe na ndo nde nde na lê ti sese kue ti fa ngangu ti Lo teti ala so bê ti ala ayeke mbilimbili na Lo.”​—2 CHRONIQUE 16:9

“Mo zia ngule ti mbi na yâ ngbenda ti Mo; ye so ayeke na mbeti ti Mo pëpe?”​—PSAUME 56:9

“L’Éternel ayeke Berger ti mbi; ye alingbi manke mbi pëpe.”​—PSAUME 23:1

“O Mo so Mo mä sambela, fade mi kue aga na Mo.”​—PSAUME 65:3

“Fade Mo iri ndo, na mbi kiri tënë na Mo; bê ti Mo aye kusala ti tïtî Mo.”​—JOB 14:15

“Zo so aga nduru na Nzapa a lingbi lo mä na bê so Nzapa ayeke dä na lo ga zo ti futango azo so ayeke gi lo ngangu.”​—A-HÉBREU 11:6

“Mo zia kungba ti mo na ndo L’Éternel, na fade Lo bata mo. Fade Lo zia ye ayengi azo ti mbilimbili lâ oko pëpe.”​—PSAUME 55:23