Nzoni tënë na ayanga ti kodoro 500

NA NGOI so lani azo ti Rwanda ayeke tiri bira na popo ti ala, mbeni kete groupe ti azo ti kiringo na peko ti ambeti akpe ndo ti ala, ala dö akungba ti ala, ala zia. Ye oko, ala sara kue ti mû akete ordinateur ti ala, na ala gue na ni na yâ ti akando ti aréfugié. Ndali ti nyen? Ti mû lege na ala ti ngbâ ti kiri na peko ti ambeti ti Nzapa na yanga ti Kinyarwanda.

Mbeni wali na mbage ti Asie ayeke pika ordinateur ti lo, atâa so l’heure ahon mingi, lo nze, ndowa na mbage nga ngoi na ngoi wâ ti dada ayeke fâ. Ye so kue ngbanga ti nyen? Ngbanga ti so lo ye ti hunzi kua ti lo ti kiringo na peko ti ambeti kozo si ngoi ti petengo ni alingbi.

Azo ti kiringo na peko ti ambeti so ayeke gi mbeni kete mbage ti gbâ ti azo 2 300 so amû tere ti ala wani ti sara kua so na ando 190 tongaso na ndo ti sese kue. Ngu ti ala alondo na ngu 20 ti si nduru na ngu 90, nga ala yeke sara kua ngangu ti tene azo awara tënë ti dengo bê so ayeke na yâ ti Bible na ayanga ti kodoro 500.​—Apocalypse 7:9.

A sigigi na ambeti na ayanga ti kodoro mingi

Na yâ ti angu so ahon, kua ti kiringo na peko ti ambeti so aTémoin ti Jéhovah ayeke sara ague na li ni ngangu mingi. Na tapande, na ngu 1985, oko Tour ti Ba Ndo ayeke sigigi na ayanga ti kodoro 23, mbeni ye so na ngoi ni so ayeke kota ye mingi. Laso, a yeke wara Tour ti Ba Ndo na ayanga ti kodoro 176; oko tënë la ayeke sigigi na ayanga ti kodoro so kue nga na oko ngoi ti mû lege na azo ti ndo ti sese kue ti manda ni legeoko.

Na ayanga ti kodoro 50 tongaso, oko mbeti so ayeke sigigi lakue lakue na ayanga ti kodoro so ayeke gi Tour ti Ba Ndo. Ndali ti nyen? Andokua ti dengo buze ti petengo ambeti abâ so ala yeke wara ye mingi pëpe na petengo ambeti na ayanga ti kodoro ti ndo ni. Me na bê kue, aTémoin ti Jéhovah na ndo ti sese kue ayeke mû nginza nga na aye ti ala ti sara si a sigigi na Bible nga na ambeti ti Nzapa na ndo kue so bezoin ni ayeke dä.​—2 aCorinthien 8:14.

Tongana zo adiko tënë ti Nzapa na yanga ti kodoro ti lo wani, a yeke ndu bê ti lo mingi. Na tapande, ade ti ninga pëpe, a sigigi na ambeti ti Nzapa na yanga ti Miskito, mbeni yanga ti kodoro so azo 200 000 tongaso ayeke tene ni na kodoro ti Nicaragua. Mbeni wali ahunda ti wara buku Mbeti ti ambaï ti yâ ti Biblea na yanga ti Miskito, na pasteur ti ndo ni ayeke dä na ngoi so a ga na buku so na wali ni. Na ngoi so pasteur ni abâ pendere buku so, lo ye ti mû ni. Wali ni ake ti mû ni na lo, atâa so pasteur ni aye ti mû na lo kilo 20 ti lê ti café ndali ni.

Na yâ ti ngu bale-oko so ahon, a sigigi na ambeti ti Nzapa na ayanga ti kodoro ahon bale-oko tongaso, so azo ayeke tene na kodoro ti Mexique. Na popo ti ayanga ti kodoro so, a yeke wara Maya, Nahuatl, na Tzotzil. A sara nduru na ngu bale-oko awe so wungo ti acongrégation ti aTémoin ti Jéhovah so ayeke tene ayanga ti kodoro nde nde na Mexique nga na yanga ti azo so mê ti ala akanga ague na li ni na yâ ti kodoro so; wungo ti acongrégation so ayeke lani 72, me fadeso wungo ni ahon 1 200. A-Témoin ti Jéhovah ayeke fa tënë ti Nzapa na azo, me ala yeke zia tanga ni na maboko ti Nzapa ti sara si tënë ni amaï na yâ ti bê ti azo ni.​—1 aCorinthien 3:5-7.

Mbeni bible na ayanga ti kodoro 80

Na yâ ti angu so ahon, aTémoin ti Jéhovah asara kua ngangu ti sigigi na bible Mbeti ti Nzapa ti fini dunia, ni kue wala gi mbage ni, na ayanga ti kodoro 80. Azo atene nyen na ndo ni? Mbeni ita-wali na Afrika ti Mbongo asara tënë so na ndo ti bible so a kiri peko ni na yanga ti Tswana, lo tene: “So pendere bible ape! A yeke mû ande maboko mingi na mbi ti gbu nda ti Mbeti ti Nzapa nga ti bâ ni na nene ni mingi ahon ti kozo. Atënë ni akpengba pëpe nga anzere mingi.” Mbeni zo so ayeke diko mbeti na yanga ti Tsonga, so ayeke mbeni yanga ti kodoro na Mozambique, atene: “So e yeke lani na ambeni mbeti ti Nzapa me e yeke na Bible pëpe, a yeke tongana ti so ngu-nzapa alondo ngangu me a pika pëpe. Ye oko, ngu ni apika na ngoi so a sigigi na Mbeti ti Nzapa ti fini dunia na yanga ti Tsonga.”

Na mbeni lege so apika bê mingi, azo so ayeke kiri na peko ti ambeti nga ayeke fa nzoni tënë so ayeke na yâ ti Bible ayeke sara si mbeni prophétie so a fa ni ândö awe aga tâ tënë. A yeke Jésus Christ lo wani la atene: “A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.”​—Matthieu 24:14.

[Kete tënë na gbe ni]

[Molongo ti aye na lembeti 30]

(Ti bâ ni mbilimbili, bâ buku ni.)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

AMBENI YANGA NDE

[Foto na lembeti 29, 30]

Azo 2 300 tongaso amû tere ti ala wani ti kiri na peko ti ambeti ti Nzapa na ayanga ti kodoro 500

BÉNIN

SLOVÉNIE

ÉTHIOPIE

GRANDE-BRETAGNE