Jésus Christ: Ngangu so atënë ti lo asara na ndo ti azo
“Biani, ye so ahon atanga ni kue, so ayeda a tene wandara ti Capernaüm aduti lani dä ayeke so lo ngbâ lakue ti sara ngangu na ndo ti bê nga na bibe ti azo.”a—WASUNGO MBETI GREGG EASTERBROOK.
AMBUPA ayeke na ngangu. Atënë ti ndara so a soro ni nzoni alingbi ti ndu bê, ti mû beku na zo nga ti gbian fini ti zo. Mbeni zo so tënë ti yanga ti lo ayeke na ngangu ahon ti Jésus Christ ayeke dä oko pëpe. Mbeni zo so amä lani Jésus na mungo mbeni kpengba diskur atene na pekoni: “Tongana Jésus ahunzi atënë so awe, li ti gbâ ti azo ni so akpe ngbanga ti kode ti fango ye ti lo.”—Matthieu 7:28.
Juska laso, azo mingi na dunia kue ahinga pendere mingi gbâ ti atënë ti Jésus. Bâ gi ambeni tapande ni ge so ndani alï mingi.
“Ala lingbi ti duti ngbâa ti Nzapa nga na ti Mosoro pëpe.”—Matthieu 6:24.
“Ye kue so ala ye azo asara na ala, a lingbi ala sara na azo ni nga.”—Matthieu 7:12.
“Ala kiri na César aye so ayeke ti César, me na Nzapa aye so ayeke ti Nzapa.”—Matthieu 22:21.
“Ngia ayeke mingi tongana zo amû ye na zo ahon ti wara ye na maboko ti zo.”—Kusala 20:35.
Me Jésus asara ye lani mingi ahon gi tenengo akpengba tënë. Tënë so lo fa ayeke lani na ngangu ngbanga ti so a fa tâ tënë na ndo ti Nzapa, a fa na azo tâ nda ti fini ti ala nga a gboto lê polele na ndo ti yorö ti pasi ti azo: Royaume ti Nzapa. Na ngoi so e yeke bâ tënë ti lo na alembeti so ayeke ga, e yeke bâ ande ngbanga ti nyen Jésus angbâ ti sara ngangu na ndo ti “bê nga na bibe ti azo” kutu mingi.
[Kete tënë na gbe ni]