Ngbâ lakue ti kpengba congrégation

“Ala ngbâ ti dë bê ti mba nga ti kpengba mba.”​—1 ATHES. 5:11.

1. Aye ti nzoni wa zo ayeke wara tongana lo ga mbeni membre ti congrégation ti aChrétien? Me akpale wa alingbi ti ngbâ na yâ ti fini ti lo?

TI DUTI mbeni membre ti congrégation ti aChrétien ayeke tâ mbeni ye ti nzoni mingi. Mo yeke na nzoni songo na Jéhovah. So mo zia bê ti mo na Mbeti ti lo ti fa lege na mo, ye so abata mo yongoro na akpale so ayeke si na azo ndali ti asarango ye so ayeke ti aChrétien pëpe. Mo yeke na popo ti akamarade so aye nzoni ti mo. Biani, aye ti nzoni ni ayeke mingi. Ye oko, mingi ti aita ayeke tirika na ambeni kpale. Ambeni na popo ti ala ayeke na bezoin ti tene a mû maboko na ala ti gbu nda ti atënë ti Bible so alï mingi. Ambeni ayeke na kobela wala kota vundu, wala peut-être ala yeke bâ pasi ndali ti ambeni desizion so ala mû na lege ti ndara pëpe. Na ndo ni, e kue e yeke na yâ ti mbeni dunia so azo ni ayeke kpe mbeto ti Nzapa pëpe.

2. Ye wa a lingbi e sara na ngoi so aita ti e ayeke na yâ ti akpale? Ngbanga ti nyen?

² Zo oko na popo ti e aye pëpe ti bâ mbeni mba ti lo Chrétien abâ pasi wala atirika na mbeni kpale. Bazengele Paul ahaka congrégation na tere ti zo na lo tene so “tongana membre oko abâ pasi, atanga ni kue abâ pasi legeoko na lo”. (1 aCor. 12:12, 26). Na yâ ti mara ti aye tongaso, a lingbi e sara kue ti mû maboko na aita ti e. Bible asara tënë ti tapande ti ambeni membre ti congrégation so amû maboko na amba ti ala ti hon ndo ti akpale so ala tingbi na ni. Na ngoi so e yeke bâ atapande so, gbu li ti mo ti bâ tongana nyen mo lingbi ti sara nga tongaso ti mû maboko na ambeni zo. Mo lingbi ti sara nyen ti mû maboko na aita ti mo na lege ti yingo nga ti kpengba congrégation ti Jéhovah?

“Ala mû lo na tere ti ala”

3, 4. Ye wa Aquila na Priscille amû maboko na Apollos dä?

³ Kozoni si Apollos aga asara kodoro na Éphèse, lo yeke lani mbeni zo so ayeke fa tënë na nzara ni. Mbeti ti Kusala atene: “Yingo ayeke tongana wâ na yâ ti tere ti lo, lo yeke sara tënë na lo yeke fa aye na ndo ti Jésus tâ na lege ni, me lo hinga gi batême ti Jean.” So Apollos ahinga pëpe tënë ti batême “na iri ti Babâ, na ti Molenge na ti yingo vulu” afa so a yeke peut-être adisciple ti Jean wabatizengo azo wala adisciple ti Jésus si afa tënë na lo kozoni na Pentecôte ti ngu 33. Me atâa so Apollos ayeke fa lani tënë na nzara ni, ambeni kpengba tënë ayeke dä so lo de lo gbu ndani pëpe. Tongana nyen sarango kamarade na amba ti lo aChrétien amû maboko na lo?​—Kus. 1:4, 5; 18:25; Mat. 28:19.

⁴ Aquila na wali ti lo Priscille so ayeke aChrétien amä Apollos so ayeke fa tënë na mbeto pëpe na yâ ti synagogue, ala mû lo na tere ti ala nga ala fa ye mingi na lo. (Diko Kusala 18:24-26.) Nzoni ye la ala sara lani so. Biani, Aquila na Priscille amû maboko na lo na lege ti ndara nga na kode. Ala sara ni na mbeni lege so azia kamene na lê ti lo pëpe. Ye ni ayeke gi so lo hinga ye lani pëpe na ndo ti tongo nda ti mbaï ti congrégation ti aChrétien. Kite ayeke pëpe so Apollos akiri singila lani na afini kamarade ti lo so ndali ti akpengba ye so ala zi ndani na lo. Na pekoni so Apollos ahinga aye so awe, lo “mû maboko mingi” na aita ti lo so ayeke na Achaïe nga lo fa tënë ngangu.​—Kus. 18:27, 28.

5. Ndoye apusu awafango tënë ti Royaume saki mingi ti mû maboko na azo na lege wa? Ye ti pekoni ayeke so wa?

⁵ Azo mingi so ayeke na yâ ti congrégation ti aChrétien laso akiri singila mingi na azo so amû maboko na ala ti gbu nda ti Bible. Ambeni mingi alë kpengba songo na azo so amanda Bible na ala. Mingi ni, ti mû maboko na azo ti gbu nda ti atâ tënë so ayeke na yâ ti Bible ahunda ti manda Bible na ala lakue teti anze mingi. Ye oko, awafango tënë ti Royaume ayeda na bê ti ala ti sara sacrifice so ndali ti so ala hinga so ayeke mû lege na azo ni ti wara fini (Jean 17:3). Ala yeke na ngia mingi ti bâ so azo agbu nda ti tâ tënë, ala sara ye alingbi na ni nga ala mû fini ti ala ti sara ye so bê ti Jéhovah aye!

‘A sara nzoni tënë ti lo mingi’

6, 7. (a) Ngbanga ti nyen Paul asoro lani Timothée ti sara kusala na tere ti lo? (b) A mû maboko na Timothée ti gue na li ti sara nyen?

⁶ Tongana Bazengele Paul na Silas ague ti sara vizite na Lystres na ngoi ti use tambela ti ala ti missionnaire, kâ ala wara mbeni maseka-koli so iri ti lo ayeke Timothée. Lo yeke na ngu 20 tongaso. “Aita na Lystres nga na Iconium ayeke sara nzoni tënë ti lo mingi.” Eunice, mama ti Timothée nga na âta ti lo Loïs ayeke aChrétien, me babâ ti lo ayeke Chrétien pëpe (2 Tim. 1:5). Peut-être Paul na sewa ni ahinga tere na ngoi ti kozo vizite ti lo kâ asara ngu use wala ota tongaso awe. Me fadeso bazengele Paul abi bê ti lo mingi na Timothée ndali ti so lo yeke ti lo mbeni maseka so ayeke nde mingi. Tongaso, bungbi ti a-ancien ti congrégation ni ayeda ti tene Timothée amû maboko na Paul na yâ ti kusala ti missionnaire.​—Diko Kusala 16:1-3.

⁷ Timothée ayeke lani na aye mingi ti manda na mbage ti kamarade ti lo so ayeke kota zo na lo. Lo manda ye biani na mbage ti Paul, ni la angu kete na pekoni Paul ayeke na mbeto pëpe ti tokua lo ti gue ti sara vizite na acongrégation na ti sara kua na iri ti Paul. Na yâ ti ngu 15 so Timothée asara kua na tere ti Paul, Timothée so kozoni ahinga ye mingi pëpe na so peut-être ayeke zo ti kamene ague na li ni na lo ga mbeni nzoni surveillant.​—aPhil. 2:19-22; 1 Tim. 1:3.

8, 9. Amembre ti congrégation alingbi ti sara nyen ti wa amaseka? Fa mbeni tapande ni.

⁸ Amaseka-koli nga na amaseka-wali mingi so ayeke laso na yâ ti congrégation ti aChrétien ayeke na apendere kode so ala lingbi ti sara na aye mingi. Tongana aita so ayeke nzoni tapande na yâ ti kusala ti Jéhovah awa amaseka so na afa ye na ala nzoni, ala lingbi ti gi ti sara anzoni kusala na ti duti nduru ti yeda ti sara ambeni kota kusala na yâ ti bungbi ti Jéhovah. Bâ ndo na yâ ti congrégation ti mo! Ambeni maseka ayeke dä so alingbi ti yeda ti sara ambeni kusala tongana ti so Timothée asara ândö? Tongana mo mû maboko na ala nga mo wa ala, ala lingbi ti ga apionnier, aBéthelite, amissionnaire wala asurveillant so ague na ando nde nde. Mo lingbi ti sara nyen ti mû maboko na ala ti gi ti sara amara ti kusala tongaso?

⁹ Martin so ayeke sara kua na Béthel asara ngu 20 tongaso awe, ayeke na ngia ti dabe ti lo na mbeni surveillant ti circonscription so abi bê ti lo lani na lo na ngoi so ala use kue ayeke na fango tënë. Ye so asara angu 30 awe. Na nzerengo tere, surveillant ni asara lani tënë na lo na ndo ti kusala ti lo wani na Béthel na ngoi so lo de maseka. Lo wa Martin ti gbu li ti lo ti duti nduru ti yeda ti tene bungbi ti Jéhovah asara nga kusala na lo tongaso. Martin atene so lisoro so ala sara lani so lo girisa ni pëpe, a sara ye mingi na ndo ti adesizion ti lo angu mingi na pekoni. Mo lingbi ti sara nzoni mingi na akamarade ti mo so ade maseka tongana mo wa ala ti zia aye ti yingo na gbele ala.

“Ala sara tënë so adë bê ti a-âme so vundu asara ala mingi”

10. Nyen la asi na Épaphrodite nyen? Ngbanga ti nyen?

¹⁰ Épaphrodite asara mbeni yongoro voyage so asara si lo nze. Lo londo na kodoro ti Philippe lo gue na Rome ti bâ Paul so a kanga lo ndali ti tënë ti mabe ti lo. Aita ti kodoro ti Philippe la atokua lo. Lo gue gi pëpe na matabisi ti aita ni na Paul, me lo leke lani ti gue ti ngbâ na tere ti lo ti mû maboko na lo ndali ti kpale so lo yeke na yâ ni. Ye oko, na ngoi so Épaphrodite ayeke na Rome, lo tï kobela “nduru na kuâ”. Tongana Épaphrodite abâ so lo lingbi pëpe ti sara ye so lo ga ndali ni, lo tï na yâ ti kota vundu.​—aPhil. 2:25-27.

11. (a) Ngbanga ti nyen a lingbi bê ti e adö pëpe tongana ambeni ita ayeke na yâ ti kota vundu? (b) Paul ahunda ti tene a sara nyen ndali ti Épaphrodite?

¹¹ Laso, aye ti ngangu nde nde asara si azo atï na yâ ti kota vundu. Bungbi ti Bendo ti Gigi so ayeke bâ tënë ti seni atene so azo mingi na yâ ti dunia ayeke na yâ ti kota vundu. Ye so ayeke si nga na awakua ti Jéhovah. Aye tongana kpale ti bango lege ti azo ti sewa, kpale ti seni, bê so anze ndali ti so zo alingbi pëpe ti sara ambeni ye, wala ambeni ye nde tongaso alingbi ti sara si zo atï na yâ ti kota vundu. Aita ti Philippe alingbi ti sara nyen ti mû maboko na Épaphrodite? Paul atene: “Ala yamba tâ lo na ngia tongana ti so lakue ala yeke yamba na azo ti Seigneur, na ala ngbâ ti bâ mara ti azo tongana lo so na nene ni mingi, ndali ti so lo ga lani nduru na kuâ ngbanga ti kusala ti Seigneur nga lo zia âme ti lo na lê ti kuâ, tongaso si lo kanga dû ti peko ti ala so ala yeke na ndo so pëpe ti sara kusala ndali ti nzoni ti mbi.”​—aPhil. 2:29, 30.

12. Nyen la alingbi ti dë bê ti azo so ayeke na yâ ti kota vundu?

¹² E nga kue a lingbi e wa aita ti e so bê ti ala anze wala so ayeke na yâ ti kota vundu. Kite ayeke pëpe so ala sara ambeni ye ti nzoni na yâ ti kusala ti Jéhovah na so e lingbi ti sara tënë na ndo ni. Peut-être ala gbian lani aye mingi na yâ ti fini ti ala ti ga aChrétien wala ti sara na Jéhovah na ngoi kue. E bâ na nene ni ngangu kue so ala sara nga e lingbi ti fa na ala so Jéhovah nga kue abâ ni na nene ni.Tongana gango mbakoro wala kpale ti seni akanga lege na ambeni zo so ayeke be-ta-zo ti sara aye so ala yeke sara ândö, a lingbi e ne ala ndali ti akusala so ala sara teti angu mingi. Atâa ye wa la asara si aita ti e ayeke na yâ ti kota vundu, Jéhovah awa awakua ti lo kue so ayeke be-ta-zo lo tene: “Ala sara tënë so adë bê ti a-âme so vundu asara ala mingi, ala mû maboko na azo so awoko nga ala kanga bê ti ala na azo kue.”​—1 aThes. 5:14.

“Ala pardone lo na bê ti ala kue nga ala dë bê ti lo”

13, 14. (a) Kota ye wa a lingbi congrégation ti Corinthe asara lani? Ngbanga ti nyen? (b) Ziango zo ni na gigi ti bungbi aga na ye ti nzoni wa?

¹³ Na ngoi ti akozo Chrétien, mbeni koli ayeke lani na yâ ti congrégation ti Corinthe, lo yeke sara lango-sioni na lo ke ti gbian bê ti lo. Sarango ye ti lo ni asara sioni na congrégation nga ason même bê ti azo so ayeke aChrétien pëpe. Tongaso, Paul ahunda ti tene a zia lo na gigi ti congrégation.​—1 aCor. 5:1, 7, 11-13.

¹⁴ Sengo ndo so aga na ye ti nzoni. A sara si sioni sarango ye alï na yâ ti congrégation ni pëpe, nga li ti zo so asara siokpari ni aga dä na lo changé bê ti lo. Na ngoi so koli so asara aye so afa so lo changé bê ti lo awe, na yâ ti use mbeti so Paul atokua na congrégation ni, lo hunda ti tene a kiri na koli so na bungbi. Me a yeke gi ye so Paul ahunda la pëpe. Paul ahunda nga na aita ti congrégation ni lo tene: “Ala pardone lo na bê ti ala kue nga ala dë bê ti lo si vundu so asara lo mingi awoko lo pëpe.”​—Diko 2 aCorinthien 2:5-8.

15. Tongana mbeni zo so asara siokpari achangé bê ti lo na a kiri na lo na bungbi, a lingbi e bâ lo tongana nyen?

¹⁵ Ye wa e manda na yâ ti mbaï so? E yeke na vundu tongana a zia ambeni zo na gigi ti bungbi. Peut-être ala ga na zonga na ndo ti iri ti Nzapa nga ala buba iri ti congrégation. A lingbi ti si so ala sara siokpari ni na tere ti e. Me, na ngoi so a-ancien so a soro ala ti bâ tënë ni asara ye ague oko na fango lege ti Jéhovah na ala bâ so a lingbi a kiri na zo ni so achangé bê ti lo so na bungbi, ye so afa so Jéhovah apardone zo ni awe (Mat. 18:17-20). A yeke nzoni e sara ye tongana Jéhovah pëpe? Biani, ti bâ mawa ti zo pëpe nga ti ke ti pardone ayeke mo bâ mo tene e ke ye so Jéhovah asara. Ti sara si congrégation aduti na siriri nga na beoko na ti nzere na lê ti Jéhovah, tongana mbeni zo so asara siokpari achangé bê ti lo na a kiri na lo na bungbi, a yeke nzoni e ‘fa na lo so biani e ndoye lo.’​—Mat. 6:14, 15; Luc 15:7.

“Lo lingbi ti mû na mbi maboko”

16. Ngbanga ti nyen bê ti Paul ason lani na tere ti Marc?

¹⁶ Mbeni tapande na yâ ti Bible afa nga so a yeke nzoni e bata na bê pëpe azo so ason bê ti e. Na tapande, Marc ason bê ti bazengele Paul ngangu. Tongana nyen? Na ngoi so Paul na Barnabas ato nda ti kozo tambela ti ala ti missionnaire, Marc ague na ala ti mû maboko na ala. Me tongana ala si na mbeni ndo, ndali ti mbeni raison so e hinga pëpe, Marc adö ala lo zia na lo kiri na kodoro. Bê ti Paul ason ngangu ndali ti ye so lo sara so. Ye so asara si na ngoi so Paul aleke ti tene ala gue na use tambela ti ala, lo na Barnabas apapa ndali ti so lo ye pëpe ti tene Marc akiri ague na ala. Ndali ti ye so asi na ngoi ti kozo tambela ti ala ni, Paul aye pëpe ti tene Marc akiri ague na ala.​—Diko Kusala 13:1-5, 13; 15:37, 38.

17, 18. E hinga tongana nyen so Paul na Marc aleke lani awe tënë so ayeke na popo ti ala? E lingbi ti manda nyen na yâ ti ye so?

¹⁷ Bê ti Marc anze mingi pëpe tongana Paul ake ti tene lo gue na ala teti so Marc angbâ ti sara kusala ti lo ti missionnaire na mbeni ndo nde, lo na Barnabas (Kus. 15:39). Tënë so Paul atene na ndo ti Marc angu kete na pekoni afa so Marc ayeke be-ta-zo na zo alingbi ti zia bê na ndo ti lo. Paul so fadeso ayeke na kanga na Rome, atokua mbeti na Timothée ti tene lo ga. Na yâ ti oko mbeti ni, Paul atene: “Mo mû Marc na tere ti mo, mo ga na lo, teti lo lingbi ti mû na mbi maboko na yâ ti kusala ni.” (2 Tim. 4:11). Biani, fadeso Paul ahinga so Marc ague na li ni mingi.

¹⁸ E lingbi ti manda mbeni ye na yâ ti mbaï so. Marc amaï na lo ga mbeni nzoni missionnaire. So Paul ake lani ti tene lo na ala ague, ye so asara pëpe si Marc adö kua ni azia. Marc na Paul ayeke azo so akpengba na lege ti yingo nga ala bata ngonzo na tere ti mba ngbii pëpe. Na pekoni Paul ayeda so Marc ayeke mbeni zo ti mungo maboko so alingbi. Tongana aita awara kpale na popo ti ala si ala leke tënë ni awe, ye so ayeke nzoni ti sara a yeke ti girisa tënë ni nga ti ngbâ lakue ti mû maboko na ambeni zo ti gue na li ni na lege ti yingo. Ti bâ gi nzoni ye so aita ayeke sara ayeke sara si congrégation akpengba.

“Mungo maboko ti congrégation nga na ti mo”

19. Mungo maboko wa aita kue ti congrégation alingbi ti mû na mba?

¹⁹ Na “angoi ti akpale so ayeke ngangu na zo ti kanga bê na yâ ni”, mo yeke na bezoin ti tene aita ti congrégation amû maboko na mo na ala nga kue ayeke na bezoin ti tene mo mû maboko na ala (2 Tim. 3:1). A lingbi ti si na e aChrétien oko oko kue ti hinga pëpe ye so a lingbi e sara ti hon ndo ti ambeni kpale so e tingbi na ni, me Jéhovah ahinga ye ti sara. Na ndo ni, Jéhovah alingbi ti sara kusala na azo nde nde ti yâ ti congrégation wala même mo ti mû maboko na ambeni zo ti sara ye na lege ni (És. 30:20, 21; 32:1, 2). Ni la, sara kue ti sara ye alingbi na wango ti bazengele Paul so! Ala ngbâ lakue “ti dë bê ti mba nga ti kpengba mba gi tongana ti so ala yeke sara so.”​—1 aThes. 5:11.

Mo yeke kiri tënë tongana nyen?

• Ngbanga ti nyen e yeke na bezoin ti kpengba mba na yâ ti congrégation?

• Mo lingbi ti mû maboko na ambeni zo ti hon ndo ti mara ti akpale wa?

• Ngbanga ti nyen e yeke na bezoin ti mungo maboko ti amba ti e na yâ ti congrégation?