Ngbanga ti nyen yâ ti amariage mingi ayeke buba?

“A-Farizien aga na tere ti [Jésus], ala ye ti tara lo. Tongaso, ala tene: ‘Ndia amû lege na koli ti sara divorce na wali ti lo ndali ti mara ti atënë nde nde kue?’”​—Matthieu 19:3.

AMBENI zo na ngoi ti Jésus ayeke hunda wala mariage alingbi ti ngbâ aninga. Jésus atene na ala lo tene: “Ala diko na yâ ti Mbeti ti Nzapa pëpe? Na tongo nda ni, lo so asara ala, lo sara ala koli na wali, na lo tene: ‘Ndani la, koli ayeke zia ande babâ na mama ti lo, na lo gue ande ti duti na wali ti lo na ala use ayeke ga mitele oko.’ Tongaso ala yeke use mbeni pëpe, me mitele oko. Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe.”a (Matthieu 19:4-6). Biani, Nzapa aleke lani ti tene amariage angbâ aninga.

Na ando mingi, tongana a mû amariage 100, yâ ti amariage 40 wala ahon so “akangbi” so ti tene ahunzi na divorce. Wango so Bible amû na ndo ti mariage aga biani ngbene ye awe? So yâ ti amariage mingi abuba aye ti tene so lo mariage ni wani la ayeke nzoni pëpe ngbene ye so a zia gere ni na sese?

Bâ tapande so: Ambeni koli na wali koli na wali use avo gi même mara ti oto. Oko ti koli na wali ni abata oto ti ala ni nzoni nga ala kpe na ni na lege ni. Oto ti ala ni abuba pëpe. Me mbeni koli na wali ni so asara ngangu ti bata oto ti ala ni pëpe, ala kpe na ni gi kirikiri. Oto ni abuba na ala dö ni azia. So oto ni abuba so, a yeke faute ti zo wa? ti oto ni wala ti awa ti oto ni? Biani, faute ni ayeke ti awa ti oto ni.

Legeoko nga, so yâ ti amariage mingi abuba aye pëpe ti tene so mariage ayeke nzoni pëpe. Mariage ti azo kutu mingi so atambela nzoni afa so mariage ayeke ti lo nzoni. Mariage ayeke ga na ngia nga na siriri na azo, na asewa nga na azo ti yâ ti kodoro. Me mariage, legeoko tongana mbeni oto, ayeke na bezoin ti tene a bâ lege ni lakue nzoni si aninga.

Atâa mo sara mariage fade fadeso wala a sara ngu mingi awe, awango ti Bible so afa tongana nyen ti sara si mariage akpengba nga aninga ayeke mû maboko na mo. Bâ ambeni tapande ni na yâ ti alembeti so ayeke ga na peko.

[Kete tënë na gbe ni]