Bâ ye so Bible afa

Jésus Christ ayeke zo wa?

Article so ayeke sigigi na ahundango tënë so mo lingbi ti hunda tere ti mo na ni nga ayeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Jésus Christ ayeke zo wa?

Nde na tanga ti azo kue, Jésus ayeke lani na fini na yayu tongana mbeni zo ti yingo kozoni si a dü lo na sese (Jean 8:23). Lo yeke lani kozo ye so Nzapa asara, nga lo mû maboko na lekengo tanga ti aye kue. Lo yeke oko zo so Jéhovah asara lo na maboko ti lo wani, ni la a iri lo “oko” Molenge ti Nzapa. Jésus asara kusala tongana wayanga ti Nzapa, ni la a iri nga lo “Tënë ni”.​—Jean 1:1-3, 14; diko aProverbe 8:22, 23, 30; aColossien 1:15, 16.

2. Ngbanga ti nyen Jésus aga na ndo ti sese?

Nzapa atokua Molenge ti lo na sese na ziango fini ti lo na yâ ti Marie, mbeni wali Juif so ade ti hinga koli pëpe. A yeke ndali ni la Jésus ayeke pëpe na babâ na lege ti mitele (Luc 1:30-35). Jésus aga na ndo ti sese (1) ti fa tâ tënë na ndo ti Nzapa, (2) ti zia mbeni tapande ti zo so asara ye so bê ti Nzapa aye, nga (3) ti mû fini ti lo so alingbi kue tongana “ngere so a futa ti zi na azo”.​—Diko Matthieu 20:28; Jean 18:37.

3. Ngbanga ti nyen a lingbi a futa ngere ti zi na e?

Tongana azo so akpe ndia pëpe amû mbeni zo ahon na lo, ala yeke hunda ti tene a futa mbeni ye si ala zi zo ni. Na tongo nda ni, Nzapa aleke lani pëpe ti tene azo aga mbakoro na ala kui. E hinga ni tongana nyen? Nzapa atene lani na kozo koli, Adam, so tongana lo sara ye so Bible airi ni siokpari, lo yeke kui. Tongana Adam asara fade siokpari pëpe, ka lo yeke kui lâ oko pëpe. Atâa so Adam asara ngu mingi na pekoni si lo kui, lo to nda ti kui na lango so lo ke yanga ti Nzapa (Genèse 2:16, 17; 5:5). A sara si ahale ti lo kue awara siokpari nga kuâ so ayeke ye ti pekoni. Tongaso kuâ “alï” na yâ ti dunia na lege ti Adam. A yeke ndali ni la e yeke na bezoin ti ngere so a futa ti zi na azo.​—Diko aRomain 5:12; 6:23.

4. Jésus akui ngbanga ti nyen?

Zo wa la alingbi ti futa ngere ti zi e na yâ ti kuâ? Tongana e kui, e futa gi asiokpari ti e wani. Mbeni wasiokpari alingbi pëpe ti futa asiokpari ti amba ti lo.​—Diko Psaume 49:8-10.

Teti so Jésus ayeke na siokpari na yâ ti tere ti lo pëpe, ndali ti so lo yeke na babâ na lege ti mitele pëpe, lo kui pëpe ndali ti asiokpari ti lo wani me ndali ti asiokpari ti azo. Nzapa atokua Molenge ti lo ti kui ndali ti e ti fa kota ndoye so lo yeke na ni na mbage ti azo. Jésus afa nga ndoye ti lo na mbage ti e na mango yanga ti Babâ ti lo nga na mungo fini ti lo ndali ti siokpari ti e.​—Diko Jean 3:16; aRomain 5:18, 19.

5. Nyen la Jésus ayeke sara na ndembe so?

So Jésus akaï kobela, lo zingo akuâ nga lo mû fini ti lo ti zi azo na gbe ti siokpari nga na kuâ, lo fa ye so lo yeke sara teti azo kue so amä yanga (Luc 18:35-42; Jean 5:28, 29). Na pekoni so Jésus akui, Nzapa azingo lo na kuâ tongana zo ti yingo (1 Pierre 3:18). Na pekoni, lo duti na tere ti Jéhovah Nzapa na mbage ti maboko ti lo ti koli, lo ku juska Jéhovah amû na lo ngangu ti tene lo komande tongana Gbia na ndo ti sese kue (aHébreu 10:12, 13). Laso Jésus ayeke komande tongana Gbia na yayu, nga adisciple ti lo ayeke fa nzoni tënë na ndo ti sese kue.​—Diko Daniel 7:13, 14; Matthieu 24:14.

Na yâ ti ngoi kete, Jésus ayeke mû ngangu ti lo ti Gbia ti hunzi apasi kue nga na azo so ayeke na gunda ni. Azo kutu na kutu so amä na bê na Jésus na amä yanga ti lo ayeke wara ande fini na yâ ti paradis na sese.​—Diko Psaume 37:9-11.

Ti wara asango mingi na ndo ni, bâ chapitre 4 ti buku Bible afa nyen biani?, so aTémoin ti Jéhovah asigigi na ni.

[Foto na lembeti 11]

Azo kutu na kutu so amä na bê na Jésus na amä yanga ti lo ayeke wara ande fini na yâ ti paradis na sese